ប្រធានគណបក្សកាន់អំណាចនៅកម្ពុជានិងប្រធានគណបក្សកាន់អំណាច រុស្ស៊ី សហការគ្នា ប្រយុទ្ធប្រឆាំងនឹងបដិវត្តន៍ពណ៌។ ប៉ុន្តែសង្គមស៊ីវិល និងមន្ត្រីបក្សប្រឆាំងលើកឡើងថា នៅកម្ពុជាគ្មានបដិវត្តន៍ពណ៌នោះទេ។
ប្រមុខគណបក្សពីរ ដែលមានកំណើតជាកុម្មុយនិស្ត គឺប្រធានគណបក្សប្រជាជនកម្ពុជា លោក ហ៊ុន សែន និងប្រធានគណបក្សរុស្ស៊ីរួបរួម និងជាអនុប្រធានក្រុមប្រឹក្សាសន្តិសុខរុស្ស៊ី លោក ឌីមីទ្រី ម៉េដវេដេវ (Dimitri Medvedev) និយាយគ្នាអំពីកិច្ចសហការគ្នា ក្នុងការប្រយុទ្ធប្រឆាំងនឹងបដិវត្តន៍ពណ៌។
ការលើកឡើង អំពីកិច្ចសហការក្នុងការប្រយុទ្ធប្រឆាំងនឹងបដិវត្តន៍ពណ៌នេះ ក្នុងពេលលោក ហ៊ុន សែន ជួបសន្ទនាប្រមាណ ២០នាទីជាមួយលោក ឌីមីទ្រី ម៉េដវេដេវ (Dimitri Medvedev) តាមប្រព័ន្ធវីដេអូ (Online Video) កាលពីថ្ងៃទី២២ មករា។
លោក ហ៊ុន សែន បានសរសេរនៅលើហ្វេសប៊ុករបស់លោក នៅថ្ងៃទី២២ មករា ថា មេដឹកនាំនៃគណបក្សទាំងពីរ បានមើលឃើញអំពីភាពចាំបាច់ នៃកិច្ចសហប្រតិបត្តិការគ្នាទៅវិញទៅមក ដើម្បីប្រយុទ្ធប្រឆាំងនឹងបដិវត្តន៍ពណ៌។
ប្រធានគណបក្សប្រជាជនកម្ពុជា លោក ហ៊ុន សែន លើកឡើងថា គណបក្សទាំងពីរនឹងពិចារណាបង្កើតព្រឹត្តិការណ៍ចាំបាច់នានា ដើម្បីផ្លាស់ប្ដូរកិច្ចសហប្រតិបត្តិការ ដែលធ្លាប់មាន អស់រយៈពេល ២៥ឆ្នាំកន្លងមក ដោយការជឿជាក់ ការគោរពគ្នា ការយោគយល់គ្នា និងគាំទ្រគ្នាទៅវិញទៅមក ព្រមទាំងព្រមព្រៀងគ្នា បង្កើនការផ្លាស់ប្ដូរទស្សនកិច្ច នៃមន្ត្រីគណបក្សទាំងពីរ។
លោក ហ៊ុន សែន បញ្ជាក់ថា រុស្ស៊ីគាំទ្រការដឹកនាំរបស់លោក ហ៊ុន ម៉ាណែត ដែលជាអនុប្រធានគណបក្សប្រជាជនកម្ពុជា។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក លោក នី សុខា ប្រាប់វិទ្យុអាស៊ីសេរី នៅថ្ងៃទី២៣ មករា ថា ការសហការគ្នា ដើម្បីប្រយុទ្ធប្រឆាំង បដិវត្តន៍ពណ៌មិនមែន ជារឿងខុសទេ ពីព្រោះប្រទេសនីមួយៗ មានកិច្ចសហប្រតិបត្តិការគ្នា។
ប៉ុន្តែ លោកចង់ឱ្យងាកមកមើលទិដ្ឋភាពបច្ចុប្បន្នកម្ពុជា ក្នុងដំណាក់កាលនេះវិញ គឺមិនគួរខិតខំទៅធ្វើពង្រឹងកិច្ចសហការ ដើម្បីកម្ចាត់បដិវត្តន៍ពណ៌ឡើយ ពីព្រោះ កម្ពុជាសព្វថ្ងៃ មិនមានក្រុមណាមួយធ្វើបដិវត្តន៍ពណ៌ទេ ហើយបើបៀបធៀបរវាងប្រទេសទាំងពីរ កម្ពុជា និងរុស្ស៊ី ឃើញថា កម្ពុជាជាប្រទេសប្រកាន់ប្រជាធិបតេយ្យ រីឯរុស្ស៊ី ជាប្រទេសដែលមិនមែនប្រជាធិបតេយ្យសេរី។
លោក នី សុខា ថា កិច្ចសហប្រតិបត្តិការកម្ចាត់បដិវត្តន៍ពណ៌នេះ ធ្វើឱ្យក្រុមអ្នកប្រជាធិបតេយ្យជាពិសេសគណបក្សប្រឆាំងនិងអ្នកដែលមានទស្សនៈផ្ទុយពីគណបក្សកាន់អំណាចកាន់តែមានការបារម្ភនិងភ័យខ្លាចទៅវិញ។
លោក នី សុខា៖ «កន្លងមក យើងមិនដែល សង្កេតឃើញ ឬ ចាប់អារម្មណ៍មានក្រុមណាមួយប៉ុនប៉ងទៅធ្វើបដិវត្តន៍ពណ៌ ក្នុងការផ្ដួលរំលំអីទាំងអស់ហ្នឹង គឺយើងអត់មាន ហើយយើងមិនយល់អត្ថន័យបដិវត្តន៍ពណ៌ថែមទៀតផង។ ផ្ទុយទៅវិញ ដោយសារប្រទេសកម្ពុជា យើងប្រកាន់ប្រជាធិបតេយ្យសេរី។ អ៊ីចឹង វាអត់មានមតិណាត្រូវស្របទាំងអស់ទេ វាតែងមានក្រុមមតិផ្ទុយមតិជំទាស់ ឬក្រុមប្រឆាំងក្រុមអីហ្នឹងហើយ ប៉ុន្តែ អ្វីក៏ដោយខ្ញុំឃើញថា កន្លងមកទាំងក្រុមជំទាស់ទាំងក្រុមអីផ្សេងៗ ហ្នឹង ខ្ញុំគិតថាមិនដែលដើរខុសអំពីគន្លងគោលការណ៍ប្រជាធិបតេយ្យទេ»។
កាលពីខែកុម្ភៈឆ្នាំ២០១៧ រដ្ឋាភិបាលកម្ពុជាបានចេញផ្សាយសៀវភៅ «ស» រៀបរាប់ថា កម្ពុជាកំពុងកើតមាននូវបដិវត្តន៍ពណ៌រៀបចំឡើងដោយគណបក្សសង្គ្រោះជាតិ និងថាមានការចូលរួមពីអង្គការសង្គមស៊ីវិលជាតិនិងអន្តរជាតិប្រមាណ ៣០០ ដើម្បីផ្ដួលរំលំរដ្ឋាភិបាលរបស់លោកហ៊ុន សែន នាពេលនោះ។
ប្រធានគណបក្សកម្លាំងជាតិ លោក ស៊ុន ចន្ធី ប្រាប់វិទ្យុអាស៊ីសេរី នៅថ្ងៃទី២៣ មករា ថា លោក ហ៊ុន សែន ព្រមព្រៀងជាមួយប្រធានគណបក្សកាន់អំណាចរុស្ស៊ីនេះ ដើម្បីពង្រឹងអំណាចផ្ទៃក្នុងរបស់លោក ជាជាងការកម្ចាត់បដិវត្តន៍ពណ៌ ពីព្រោះគ្មានអ្នកប្រជាធិបតេយ្យណានៅកម្ពុជាធ្វើបដិវត្តន៍ពណ៌ទេ។ ផ្ទុយទៅវិញ លោក ហ៊ុន សែន បារម្ភខ្លាចមានការងើបឡើង ពីផ្ទៃក្នុងគណបក្សប្រជាជនកម្ពុជាប្រឆាំងនឹងលោក ហ៊ុន ម៉ាណែត។
លោកបន្ថែមថា លោក ហ៊ុន សែន ប្រើនយោបាយប្រឆាំងបដិវត្តន៍ពណ៌ ជាឧបករណ៍បិទបាំងកម្សោយនៃការដឹកនាំរបស់លោក ហ៊ុន ម៉ាណែត ផង និងក៏ជារូបភាព គំរាមកំហែងដោយប្រយោលដល់អ្នកប្រជាធិបតេយ្យនិងប្រជាពលរដ្ឋផង។
លោក ស៊ុន ចន្ធី៖«អ្នកបន្តវេនរបស់គណបក្សកាន់អំណាចសព្វថ្ងៃ មិនមានសមត្ថភាពគ្រប់គ្រាន់ មិនទាន់ ទទួលបានការគាំទ្រឱ្យបានច្រើនលើសលប់ពីប្រជាពលរដ្ឋ ដូច្នេះហើយ បានជាគណបក្សកាន់អំណាច មានការព្រួយបារម្ភ ហើយលើកយកនូវបញ្ហាបដិវត្តន៍ពណ៌យកមកធ្វើជាការបិទបាំងនូវភាពកម្សោយនៃការដឹកនាំរបស់ខ្លួន»។
ពាក្យបដិវត្តន៍ពណ៌នេះ ត្រូវបានលោក ហ៊ុន សែន និងក្រុមមន្ត្រីរដ្ឋាភិបាលលើកឡើងជាញឹកញាប់ បន្ទាប់ពីគណបក្សសង្គ្រោះជាតិ ដែលជាគណបក្សប្រឆាំងដ៏ធំនៅកម្ពុជា ត្រូវតុលាការកំពូលរំលាយចោលកាលពីខែវិច្ឆិកាឆ្នាំ២០១៧ តាមបណ្ដឹងរបស់ក្រសួងមហាផ្ទៃ ដែលចោទគណបក្សនេះ និងលោក កឹម សុខា ថា បានរៀបគម្រោងផ្ដួលរំលំរដ្ឋាភិបាលដោយមានការគាំទ្រពីសហរដ្ឋអាមេរិក។
ប៉ុន្តែ ខ្លឹមសារចោទប្រកាន់នេះ ត្រូវបានអតីតមេដឹកនាំគណបក្សសង្គ្រោះជាតិ សង្គមស៊ីវិលជាតិសហរដ្ឋអាមេរិក និងសហគមន៍អន្តរជាតិច្រានចោលហើយថា រដ្ឋាភិបាលកម្ពុជា មិនមានភស្តុតាងណាមួយ ដើម្បីគាំទ្រការចោទ ប្រកាន់របស់ខ្លួនអំពីបដិវត្តន៍ពណ៌នោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។