មន្ត្រីគណបក្សសង្គ្រោះជាតិនៅប្រទេសអូស្ត្រាលីទីក្រុងស៊ីដនី Sydney ថា សមាជិករដ្ឋសភាអូស្ត្រាលីគាំទ្រការវិលចូលស្រុកវិញរបស់លោក សម រង្ស៊ី នៅថ្ងៃទី៩ ខែវិច្ឆិកាខាងមុខ។ អ្នកឃ្លាំមើលសង្គមយល់ថា ការធ្វើការនយោបាយការទូតនៅក្រៅប្រទេសរបស់លោក សម រង្ស៊ី កំពុងទទួលបានផលជាបណ្តើរៗ ហើយ។
លេខាធិការរងគណបក្សសង្គ្រោះជាតិ ប្រចាំទីក្រុងស៊ីដនី (Sydney) ប្រទេសអូស្ត្រាលី (Australia) អ្នកស្រី ជី គឹមអាន បញ្ជាក់ប្រាប់អាស៊ីសេរី នៅថ្ងៃទី ២០ ខែ សីហាថា តំណាងរាស្រ្តអូស្រ្តាលីបន្ថែមទៀត ដែលប្រធានស្តីទីគណបក្សសង្គ្រោះជាតិលោក សម រង្ស៊ី បានជួប សុទ្ធតែបង្ហាញជំហរគាំទ្រ ឲ្យមានដំណោះស្រាយនយោបាយនៅកម្ពុជាឆាប់ៗ។ អ្នកស្រីបន្ថែមថា សមាជិកសភាអូស្រ្តាទាំងនោះ គាំទ្រការសម្រេចចិត្តរបស់លោក សម រង្ស៊ី ដែលត្រូវវិលទៅស្រុកខ្មែរវិញនេះ <<គេចាប់អារម្មណ៍គេសរសេរថាគាត់(លោក សម រង្ស៊ី) ក្លាហានដឹកនាំខ្មែរយើងចូលស្រុកវិញដើម្បីទាមទារលទ្ធិប្រជាធិបតេយ្យនៅស្រុកខ្មែរណា >>។
ជំហរគាំទ្របន្ថែមពីសមាជិកសភាអូស្រ្តាលីនេះ ត្រូវបានអ្នកស្រី ជី គឹមអាន បញ្ជាក់ថា ធ្វើឡើងក្រោយលោក សម រង្ស៊ី បានជួបតំណាងរាស្រ្តអូស្រ្តាលីនៅទីក្រុង ស៊ីដនី នៅថ្ងៃទី ២០ ខែ សីហា ដែលក្នុងនោះលោក សម រង្ស៊ី បានបញ្ជាក់ជំហរនយោបាយរបស់ខ្លួន និងស្នើទៅសមាជិកសភាអូស្ត្រាលី ឲ្យជួយធ្វើជាសាក្សី ក្នុងការវិលចូលប្រទេសកម្ពុជាវិញនេះ។
ក្នុងជំនួបនោះដែរ អ្នកស្រី ជី គឹមអាន ថាសមាជិកសភាអូស្ត្រាលី បានបង្ហាញការព្រួយបារម្ភ ពីឥទ្ធិពលចិននៅប្រទេសកម្ពុជា ដោយឃើញមានសារព័ត៌មានចុះផ្សាយថា ចិនបានចុះកិច្ចព្រមព្រៀងសម្ងាត់ជាមួយភាគីកម្ពុជា ដើម្បីដាក់មូលដ្ឋានកងព័ទនៅក្នុងតំបន់សមុទ្ររាម ខេត្តព្រះសីហនុ និង នៅខេត្តកោះកុង។ អ្នកស្រីបន្តថា អ្នកនយោបាយអូស្ត្រាលី កំពុងតាមដានពីបញ្ហានេះយ៉ាងចិត្តទុកដាក់ <<រឿងវត្តមានចិនដែលថាយកមូលដ្ឋានយោធានៅខ្មែរយើងគេមានការបារម្ភដែរព្រោះរឿងនេះទាក់ទងសន្តិសុខមិនត្រឹមតែអូស្ត្រាលី មិនត្រឹមតែខ្មែរយើងទេ តំបន់នៅជុំវិញហ្នឹងក៏ប៉ះពាល់ដែរ >>។
លោក សម រង្ស៊ី បានធ្វើដំណើរទៅដល់ប្រទេសអូស្ត្រាលី កាលពីថ្ងៃទី ១៧ ខែ សីហា។ លោកនឹងបន្តជួបមន្រ្តីអូស្រ្តាលី និង អ្នកគាំទ្រគណបក្សសង្គ្រោះជាតិនៅទីនោះ រហូតដល់ថ្ងៃទី ២៦ ខែសីហា នៅទីក្រុងសំខាន់ៗមួយចំនួនដែលពលរដ្ឋរស់នៅច្រើនដូចជា៖ ទីក្រុងស៊ីដនី (Sydney) ទីក្រុងអាដឌឺឡែត (Adelaide) និងទីក្រុងម៉ែលប៊ន (Melbourne) ជាដើម។ ក្រៅពីនេះលោកនឹងទៅប្រទេស ណូវ៉ែលហ្ស៊េឡង់ (New Zealand) ដែរ។ មេដឹកនាំគណបក្សសង្រ្គោះជាតិរូបនេះ តែងជួបអ្នកគាំទ្ររបស់ខ្លួន និងសមជិករដ្ឋសភា និងព្រឹទ្ធសភា នៅតំបន់ដែលលោកចុះទៅ។
អ្នកស្រី ជី គឹមអាន ថា អ្នកគាំទ្រគណបក្សសង្គ្រោះជាតិជាច្រើន នៅប្រទេសអូស្ត្រាលីក៏អះអាងដែរថា ពួកគេនឹងអមដំណើរលោក សម រង្ស៊ី ក្នុងការវិលត្រឡប់ចូលប្រទេសកម្ពុជានេះ។
សាស្ត្រាចារ្យខាងវិទ្យាសាស្ត្រនយោបាយ លោក ឯម សុវណ្ណារ៉ា សង្កេតឃើញថា ពេលនេះលោក សម រង្ស៊ី កំពុងស្វែងការគាំទ្រពីពលរដ្ឋខ្មែរនៅក្រៅស្រុក និងសហគមន៍អន្តរជាតិ។ លោកយល់ថា ការធ្វើដំណើររបស់លោក សម រង្ស៊ី នៅអូស្ត្រាលី កំពុងទទួលបានគាំទ្រពីពលរដ្ឋ និងសមាជិករដ្ឋសភា និងព្រឹទ្ធសភា នៅប្រទេសនេះដែលការគាំទ្រនេះផ្តល់ប្រយោជន៍នយោបាយដល់គណបក្សសង្គ្រោះជាតិ <<គាត់មានសំឡេងគាំទ្រកាន់តែច្រើនគាត់អាចយកតម្លៃណឹងមកដាក់ជាការចរចាឬធ្វើឲ្យអ្នកនយោបាយនៅក្នុងប្រទេសមើលអំពីស្ថានភាពណឹងអាចងាកមកការចរចាគ្នាបាន >>។
ចំណែកឯ លេខាគណបក្សសង្រ្គោះជាតិប្រចាំទីក្រុងអាឌឺឡែត (Adelaide) រដ្ឋអូស្ត្រាលីខាងត្បូងលោក ខៀវ តារា ឲ្យអាស៊ីសេរីដឹងកាលពីថ្ងៃទី ១៧ ខែសីហា កន្លងទៅថា ក្នុងជំនួបរវាងលោក សម រង្ស៊ី ជាមួយសមាជិករដ្ឋសភា និងព្រឹទ្ធសភា នៅទីក្រុងនេះ ពួកគេអះអាងប្រាប់លោក សម រង្ស៊ី ថា សមាជិករដ្ឋសភា និងព្រឹទ្ធសភាអូស្ត្រាលី នឹងជំរុញទៅរដ្ឋាភិបាលរបស់ខ្លួនឲ្យដាក់ទណ្ឌកម្មលើក្រុមលោក ហ៊ុន សែន ដូចដែលអាមេរិកបានធ្វើច្បាប់ H.R 526 ដាក់ទណ្ឌកម្មលើរបបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។