អ្នកជំនាញផ្នែកច្បាប់ និងនយោបាយអន្តរជាតិកញ្ញា សេង ធារី អំពាវនាវឲ្យគ្រប់គណបក្សប្រឆាំងធ្វើពហិការការបោះឆ្នោតនៅពេលខាងមុខ ដើម្បីកុំឲ្យផ្ដល់ភាពស្របច្បាប់ដល់រដ្ឋាភិបាលលោកនាយករដ្ឋមន្ត្រី ដែលកញ្ញាថា កំពុងដឹកនាំប្រទេសបែបផ្ដាច់ការ។ កញ្ញាសង្កេតឃើញថា បរិយាកាសនយោបាយពេលនេះ មិនអាចឲ្យគណបក្សប្រឆាំងឈ្នះឆ្នោតបានទេ។
អ្នកគាំទ្រគោលការណ៍ប្រជាធិបតេយ្យជាង២០ឆ្នាំ កញ្ញា សេង ធារី ថា បរិយាកាសនយោបាយដែលមិនអំណោយផលដល់ការបោះឆ្នោត មានកត្តាជាច្រើនដូចជា គណបក្សសង្គ្រោះជាតិនៅតែមិនអាចបើកដំណើរការឡើងវិញ ស្ថានភាពរំលោភសិទ្ធិមនុស្សនិងបំផ្លាញប្រជាធិបតេយ្យនៅតែធ្ងន់ធ្ងរ ស្ថាប័នអាជ្ញាកណ្ដាល គ.ជ.ប ក៏នៅតែមិនទាន់ឯករាជ្យនៅឡើយ។
កញ្ញា សេង ធារី បន្តថា ការចូលរួមបោះឆ្នោតក្នុងស្ថានភាពអាក្រក់បែបនេះ គឺជាការចូលរួមលម្អសួនប្រជាធិបតេយ្យ ផ្ដល់ភាពស្របច្បាប់ដល់គណបក្សកាន់អំណាចរបស់លោក ហ៊ុន សែន ឱ្យបន្តក្រាញ់អំណាចតវង្សត្រកូលគ្មានទីបញ្ចប់៖ « ពេលយើងថា ចូលរួមយើងត្រូវចូលរួមឲ្យមានក្ដីសង្ឃឹមថា នឹងឈ្នះ បើសិនជាអត់ឈ្នះទេ មិនមែនជាយុទ្ធសាស្ត្រដែលយើងថា ប្រសើរទេ។ ខ្ញុំបាននិយាយនៅឆ្នាំ២០១៨ ខ្ញុំថា ធ្វើពហិការ ពីព្រោះពេលវេលាហ្នឹង បើសិនមានការបោះឆ្នោតត្រឹមត្រូវឆ្កែខ្ញុំអាឌឺឡៃឡា ក៏អាចឈ្នះលោក ហ៊ុន សែន ដែរ ពីព្រោះទាំងអស់គ្នាស្អប់ខ្ពើមរបបផ្ដាច់ការហ្នឹងដល់កម្រិត។ ប៉ុន្តែគេអត់ឲ្យយើងឈ្នះ បើអ៊ីចឹងយើងរៀបចំពេលវេលាហ្នឹងរៀបចំធ្វើម៉េចឲ្យយើងម៉ាំ ដែលយើងអាចមានសេចក្ដីសង្ឃឹមថា អាចឈ្នះ។ ក្នុងឆ្នាំហ្នឹងកុំគិតថា អាចឈ្នះ យើងអត់អាចទេ។ បើយើងចេះតែតៗ យើងខ្ជះខ្ជាយឱកាសដែលយើងអត់មាន ពីព្រោះវាតូចមែនទែន យើងត្រូវការរង់ចាំ ១០ឆ្នាំទៀត ដែលធ្វើឲ្យខ្ញុំព្រួយបារម្ភ ដែលខ្ញុំត្រូវការនិយាយជាសាធារណៈ » ។
ការលើកឡើងបែបនេះ របស់កញ្ញា សេង ធារី ធ្វើឡើងក្រោយពេលកញ្ញាប្រកាសមិនគាំទ្រ ការបើកដំណើរការរបស់គណបក្សភ្លើងទៀនឡើងវិញ ស្របពេលដែលការទាមទារគណបក្សសង្គ្រោះជាតិមកវិញមិនទាន់ជោគជ័យ។ មិនត្រឹមតែប៉ុណ្ណោះ កញ្ញាថា ទោះបីជាគណបក្សសង្គ្រោះជាតិបានវិលមកវិញក្ដី ក៏មិនអាចប្រកួតជាមួយគណបក្សប្រជាជនបានផង ព្រោះគណបក្សនេះកំពុងហែកហួរគ្នាផ្ទៃក្នុង។ កញ្ញាបន្ថែមថា សូម្បីតែគណបក្សសង្គ្រោះជាតិ ដែលមានប្រជាប្រិយខ្លាំងនៅពេលនេះ កំពុងស្ថិតនៅក្នុងស្ថានភាពលំបាកផ្សះផ្សាគ្នាទៅហើយ ចុះទម្រាំគណបក្សតូចៗ ដ៏ទៃទៀត តើមានសង្ឃឹមអ្វី ថានឹងឈ្នះ?
កញ្ញា សេង ធារី ស្នើជាយោបល់ថា ពេលនេះ គឺជាឱកាសមាសសម្រាប់អ្នកប្រជាធិបតេយ្យ ដូច្នេះអ្នកស្រលាញ់ប្រជាធិបតេយ្យគួរតែរួមគ្នាឲ្យបានខ្លាំងក្លាជាងមុន ទាមទារសិទ្ធិមនុស្ស និងប្រជាធិបតេយ្យក្នុងស្ថានភាពដែលមានសម្ពាធពីសហគមន៍អន្តរជាតិផង ក្នុងពេលកម្ពុជាជាប្រធានប្ដូរវេនអាស៊ានផង៖ « ខ្ញុំចង់ឲ្យទាំងអស់គ្នាឃើញ ឆ្នាំ២០២២ ជាឱកាសមាស ជាឱកាសក្រក្នុងការបង្កើតស្ពានអាសន្ន ក្នុងការរំខាន កុំចូលរួមអ្វីដែលយើងគិតថា ជានយោបាយ កុំចូលបោះឆ្នោត មិនត្រឹមតែធ្វើពហិការថ្ងៃបោះឆ្នោតទេ ប៉ុន្តែមុនហ្នឹងទៀត កុំធ្វើសកម្មភាពដែលយើងគិតធម្មតាថា សកម្មភាពនយោបាយក្នុងការទាញអារម្មណ៍ពិភពលោកថា នេះជារបបផ្ដាច់ការ យើងអត់ចូលដៃបានទេ នៅក្នុងការប្រកួតប្រជែងយើងអត់ទទួលស្គាល់គាត់ទេ» ។
កញ្ញា សេង ធារី ផ្ដល់ជាយោបល់ដល់អ្នកស្រលាញ់ប្រជាធិបតេយ្យឲ្យបន្តការតស៊ូមតិដោយអហិង្សា ប្រកាន់គោលដៅច្បាស់លាស់ ដើម្បីយកឈ្នះគណបក្សកាន់អំណាចដោយមិនត្រូវងាករេបែកបាក់សាមគ្គីផ្ទៃក្នុងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។