មន្ត្រីជាន់ខ្ពស់គណបក្សប្រឆាំងបានស្នើរដ្ឋាភិបាលឱ្យស្នើទៅព្រះមហាក្សត្រ ដើម្បីផ្តល់ការលើកលែងទោស និងលើកលែង ដល់មន្ត្រីបក្សប្រឆាំងដែលគ្មានកំហុស និងជាប់បម្រាមនយោបាយទាំងអស់ ដើម្បីផ្សះផ្សាជាតិ និងបើកផ្លូវឱ្យគណបក្សសង្គ្រោះជាតិបានចូលរួមបោះឆ្នោតនៅពេលខាងមុខ។
ភ្លាមៗ ក្រោយពីទទួលបានការលើកលែងទោសពីប្រមុខរដ្ឋស្ដីទី លោក សាយ ឈុំ អតីតសមាជិកព្រឹទ្ធសភាមកពីគណបក្ស សម រង្ស៊ី គឺអ្នកស្រី ថាក់ ឡានី បានអំពាវនាវដល់រដ្ឋាភិបាលលោក ហ៊ុន សែន ឱ្យមានការបន្ធូរបន្ថយភាពតានតឹងនយោបាយបែបនេះទៅមន្ត្រីបក្សប្រឆាំងដទៃទៀត។
អនុប្រធានគណបក្សសង្គ្រោះជាតិ អ្នកស្រី មូរ សុខហួរ មានប្រសាសន៍ថា មន្ត្រីជាន់ខ្ពស់គណបក្សសង្គ្រោះជាតិទាំងអស់គ្មានទោសពៃរ៍អ្វីទេ។ អ្នកស្រីថា របបក្រុងភ្នំពេញត្រូវតែបញ្ចប់ការយកសមាជិកគណបក្សសង្គ្រោះជាតិជាសត្រូវ ហើយងាកមករកការផ្សះផ្សាជាតិឡើងវិញ៖ «ការអនុគ្រោះ ដើម្បីឱ្យមានការផ្សះផ្សាជាតិ ត្រូវមើលឱ្យឆ្ងាយ មិនមែនសម្រាប់មួយករណីម្តងៗ ទេ គឺដើម្បីការផ្សះផ្សាជាតិនេះជាព្រះរាជសិទ្ធិ និងជាព្រះរាជតួនាទីរបស់ព្រះករុណា នៅក្នុងការធានា ឱ្យមានការឯកភាព និងការផ្សះផ្សាជាតិ»។
លោក សាយ ឈុំ ប្រមុខរដ្ឋស្ដីទីបានចុះហត្ថលេខាលើព្រះរាជក្រឹត្យលើកលែងទោសដល់អ្នកស្រី ថាក់ ឡានី កាលពីថ្ងៃទី៣ មីនា ប៉ុន្តែព្រះរាជក្រឹត្យនេះ ទើបបានចេញផ្សាយនៅថ្ងៃទី១៦ មីនា ដោយមិនបានបញ្ជាក់ពីមូលហេតុនៃការលើកលែងទោសនោះទេ។ ប៉ុន្តែព្រះរាជក្រឹត្យបញ្ជាក់ថា គិតដល់ខែមីនា ឆ្នាំ២០២១ នេះ អ្នកស្រី ថាក់ ឡានី បានផុតកំណត់នៃការជាប់ឃុំនៅក្នុងពន្ធនាគារហើយ។
អនុប្រធានអង្គការលីកាដូទទួលបន្ទុកសិទ្ធិមនុស្ស លោក អំ សំអាត ថា ព្រះរាជក្រឹត្យលើកលែងទោសនេះគ្មានអ្វីប្លែកទេ ដោយសាររបត់នយោបាយ ហើយធ្លាប់បានធ្វើរួចមកហើយទៅលើគណបក្សប្រឆាំង៖ « ទាក់ទងនឹងព្រះរាជក្រឹត្យលើកលែងទោសនេះ វាទាក់ទងសាមីខ្លួនផ្ទាល់ ទាក់ទិននឹងការស្នើសុំហ្នឹង ហើយនឹងការពិនិត្យមើលរបស់រដ្ឋាភិបាលទៅលើសកម្មភាពរបស់លោកស្រី ថាក់ ឡានី ហ្នឹង។ អ៊ីចឹងខ្ញុំគិតថា ដូចជាអត់មានអ្វីប្លែកដូចលើកមុនៗ ទេ ទាក់ទងនឹងការលើកលែងទោស ពីព្រោះយើងឃើញមានអ្នកនយោបាយច្រើនដែរដែលត្រូវបានលើកលែងទោសពីមុនៗ មកនោះ » ។
តុលាការក្រុងភ្នំពេញ កាលពីខែវិច្ឆិកា ឆ្នាំ២០១៦ បានសម្រេចផ្ដន្ទាទោសអតីតសមាជិកព្រឹទ្ធសភាគណបក្ស សម រង្ស៊ី អ្នកស្រី ថាក់ ឡានី ដាក់ពន្ធនាគារ ១ឆ្នាំ ៦ខែ និងពិន័យជាប្រាក់ចូលថវិកាជាតិ ចំនួន ៨លានរៀល គឺប្រមាណ ២ពាន់ដុល្លារអាមេរិក ក្រោមបទចោទថា ញុះញង់បង្កឲ្យមានភាពវឹកវរធ្ងន់ដល់សន្តិសុខសង្គម តាមបណ្ដឹងលោក ហ៊ុន សែន។
លោកនាយករដ្ឋមន្ត្រី ហ៊ុន សែន បានប្ដឹងអ្នកស្រី ថាក់ ឡានី ជុំវិញការអត្ថាធិប្បាយរបស់លោកស្រី ថា លោក ហ៊ុន សែន ជាអ្នកនៅពីក្រោយនៃឃាតកម្មលើលោកបណ្ឌិត កែម ឡី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។