តុលាការ​ខេត្ត​សៀមរាប​បញ្ជា​ឱ្យ​សកម្មជន​បក្ស​ប្រឆាំង​ម្នាក់ទៀត​ចូល​បំភ្លឺ​រឿង​រិះគន់​ការ​ចាក់​វ៉ាក់សាំង​ជំងឺ​កូវីដ១៩

តុលាការ​ខេត្ត​សៀមរាប​ចេញ​ដីកា​បញ្ជា​ឱ្យ​សកម្មជន​បក្ស​សង្គ្រោះ​ជាតិ​ម្នាក់​ចូល​ខ្លួន​បំភ្លឺ​នៅ​ស្នងការ​នគរបាល​ខេត្ត​នេះ ពាក់ព័ន្ធ​នឹង​​ការ​បង្ហោះ​សារ​លើ​ហ្វេសប៊ុក​រិះគន់​រដ្ឋាភិបាល​រឿង​ជំងឺ​កូវីដ១៩ និង​ការ​ចាក់​វ៉ាក់សាំង​របស់​ចិន។ សកម្មជន​បក្ស​ប្រឆាំង​រូប​នេះ ចាត់​​ទុក​រឿង​នេះ​ថា ជា​ការ​​គំរាមកំហែង​ដល់​ក្រុម​អ្នក​ដែល​ហ៊ាន​រិះគន់​រដ្ឋាភិបាល​ឱ្យ​ភ័យ​ខ្លាច។

មន្ត្រី​គណបក្ស​ប្រឆាំង​ លោក ឈុន វាន សម្រេច​មិន​បាន​ចូល​បំភ្លឺ​តាម​ដីកា​របស់​ព្រះរាជអាជ្ញា​អម​សាលាដំបូង​ខេត្ត​សៀមរាប​ឡើយ។

ជំទប់​ទី២ ឃុំ​ក្តី​រុន​ជាប់​ឆ្នោត​របស់​គណបក្ស​សង្គ្រោះ​ជាតិ​ ស្រុក​ពួក ខេត្ត​សៀមរាប ដែល​កំពុង​ភៀស​ខ្លួន​នៅ​ប្រទេស​ថៃ លោក ឈុន វាន ប្រាប់​អាស៊ី​សេរី​នៅ​ថ្ងៃ​ទី២ មីនា​ថា លោក​មិន​បាន​ធ្វើ​អ្វី​ខុស​ច្បាប់​អ្វី​ឡើយ ពី​ព្រោះ​ការ​បង្ហោះ​សារ​នោះ​ ជា​ការ​រិះគន់ ដើម្បី​ស្ថាបនា បន្ទាប់​ពី​លោក​បាន​ទទួល​ដំណឹង​ពី​ប្រជាពលរដ្ឋ។ លោក ឈុន វាន បាន​បង្ហោះ​សារ​លើ​បណ្ដាញ​សង្គម​ហ្វេសប៊ុក (Facebook) របស់​លោក​ដោយ​មាន​ភ្ជាប់​រូប​ថត​ថា មន្ត្រី​ប៉ូលិស​នៃ​ក្រសួង​មហាផ្ទៃ​ម្នាក់​ បាន​ធ្លាក់​ខ្លួន​ពិការ​ ក្រោយ​ពី​គាត់​ចាក់​វ៉ាក់សាំង​របស់​ចិន​ស៊ីណូ​ហ្វាម (Sinopharm) ហើយ​ប្រសិន​បើ​ជា​រឿង​ពិត សុំ​ឱ្យ​លោក​នាយករដ្ឋមន្ត្រី​ហ៊ុន សែន គួរតែ​ពិចារណា​រឿង​ចាក់​វ៉ាក់សាំង​ស៊ីណូ​ហ្វាម (Sinopharm) ឡើង​វិញ។ លោក​ចាត់​ទុក​​​វិធាន​ការ​របស់​តុលាការ​នេះ​ថា ជា​ការ​បំភិតបំភ័យ​លោក​ដើម្បី​គំរាមកំហែង​ដល់​ប្រជាពលរដ្ឋ​ដទៃ​ទៀត​ កុំ​ឱ្យ​ហ៊ាន​រិះ​គន់​របប​ក្រុង​ភ្នំពេញ៖ «វា​ជា​ការ​អស់​សំណើច​មែនទែន​ បើ​គិត​ថា តុលាការ​ឯករាជ្យ​គេ​មិន​យក​ចិត្ត​ទុក​ដាក់​រឿង​ការ​បញ្ចេញ​មតិ​របស់​ប្រជាពលរដ្ឋ​ទេ គឺ​គេ​បើក​សិទ្ធិ​សេរីភាព​ឱ្យ​ប្រជាពលរដ្ឋ​និយាយ​ដើម្បី​ប្រយោជន៍​របស់​ជាតិ។ ប៉ុន្តែ​បើ​សិន​ជា​តុលាការ​មិន​ឯករាជ្យ​វិញ​ ដែល​តុលាការ​ស្ថិត​ក្រោម​ការ​គ្រប់គ្រង​របស់​អ្នក​មាន​អំណាច​ឬ​ក៏​បាន​បញ្ជាក់​របស់​អ្នក​មាន​អំណាច​គឺ​ច្បាប់​ណាស់​ មិន​ថា​តែ​រឿង​តូច​តាច​ប៉ុណ្ណឹង​ទេ សូម្បី​តែ​រឿង​ធម្មតា​ក៏​តុលាការ​អាច​ចោទ​ប្រកាន់​បាន​ដែរ »

ប្រតិកម្ម​របស់​មន្ត្រី​គណបក្ស​ប្រឆាំង​នេះ ធ្វើ​ឡើង​បន្ទាប់​ពី​​​​​​​​ព្រះរាជអាជ្ញា​អម​សាលាដំបូង​ខេត្ត​សៀមរាប លោក កើត វណ្ណារ៉េត បាន​បញ្ជា​ឱ្យ​លោក ឈុន វាន ​អាយុ ៣២ឆ្នាំ ចូល​បំភ្លឺ​នៅ​ស្នងការដ្ឋាន​នគរបាល​ខេត្ត​សៀមរាប ដើម្បី​សាកសួរ​ពាក់ព័ន្ធ​នឹង​រឿង​បង្ហោះ​សារ​នៅ​លើ​ហ្វេសប៊ុក។មន្ត្រី​តុលាការ​លើក​ឡើង​ថា សារ​ដែល​សកម្មជន​បក្ស​ប្រឆាំង​រូប​នេះ​បង្ហោះ ធ្វើ​ឱ្យ​សាធារណៈ​យល់​ច្រឡំ​ពី​ការ​ចាក់​វ៉ាក់សាំង​ការពារ​ជំងឺ​កូវីដ១៩ នៅ​កម្ពុជា និង​ធ្វើ​ឱ្យ​ប៉ះពាល់​ដល់​រដ្ឋាភិបាល។ លោក​ កើត វណ្ណារ៉េត បាន​បញ្ជាក់​នៅ​ក្នុង​ដីកា​ចុះ​ថ្ងៃ​ទី១ មីនា ដោយ​បង្គាប់​ឱ្យ​នគរបាល​យុត្តិធម៌​ខេត្ត​សៀមរាប​អនុវត្ត​ដីកា​នេះ​ឱ្យ​បាន​សម្រេច​ក្នុង​រយៈ​ពេល​មួយ​ខែ គិត​ចាប់​ពី​ថ្ងៃ​ទី១ មីនា​តទៅ។

ទោះ​ជា​យ៉ាង​ណា​ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា យល់​ថា តុលាការ​គួរ​តែ​ស៊ើបអង្កេត​រឿង​នេះ​ឱ្យ​បាន​ដឹង​ការ​ពិត​ជា​មុន។ លោក​បន្ថែម​ថា ប្រសិន​បើ​ការ​បង្ហោះ​សារ​នោះ​ខុស​ពី​ការ​ពិត អាជ្ញាធរ​គួរតែ​អប់រំ​ដល់​លោក ឈុន វាន កុំ​ឱ្យ​បង្ហោះ​សារ​បែប​នេះ​ទៀត ហើយ​ឱ្យ​គាត់​ត្រឡប់​ទៅ​ផ្ទះ​វិញ​ ពី​ព្រោះ​​ការ​​​រិះគន់​នោះ​មិន​បាន​ធ្វើ​ឱ្យ​អន្តរាយ​ដល់​សង្គម​ជាតិ​នៅ​ឡើយ​ទេ៖ «ពីព្រោះ​យើង​ដឹង​ហើយ​ថា ប្រជាជន​យើង​ការ​យល់​ដឹង​របស់​គាត់​ក៏​វា​មិន​ទាន់​មាន​កម្រិត​អី​ច្បាប់​ដែរ។ ដូច​ខ្ញុំ​បាន​ជម្រាប​ពី​ខាង​ដើម​ក្នុង​រយៈ​ពេល​ថ្មីៗ នេះ​ វា​មាន​មតិ​សង្ស័យ​ច្រើន​ ដែល​ធ្វើ​ឱ្យ​មាន​បញ្ហា​ការ​លើក​ឡើង​ខុសៗ គ្នា អំពី​បញ្ហា​ជំងឺ​កូវីដ១៩ និង​បញ្ហា​វ៉ាក់សាំង​ហ្នឹង​ដែល​ធ្វើ​ឱ្យ​មហា​ជន​ហ្នឹង​មាន​ការ​សង្ស័យ​ ហើយ​មហា​ជន​មួយ​ចំនួន​គាត់ ក៏​បាន​បញ្ចេញ​មតិ​តាម​បណ្ដាញ​សង្គម »

នេះ​ជា​ករណី​ទី៣ ហើយ​ ដែល​អាជ្ញាធរ​ចាត់​វិធាន​ការ​តាម​ច្បាប់​លើ​ក្រុម​អ្នក​រិះគន់​របប​ក្រុង​ភ្នំពេញ​ រឿង​ចាក់​វ៉ាក់សាំង​ការពារ​ជំងឺ​កូវីដ១៩។

កាល​ពី​ថ្ងៃ​ទី២៨ កុម្ភៈ​តុលាការ​រាជធានី​ភ្នំពេញ ឃុំខ្លួន​សកម្មជន​គណ​បក្ស​សង្គ្រោះ​ជាតិ​ទាំង ២រូប គឺ លោក ធន ចន្ទ័ថា និង លោកស្រី ម៉ី សុផន នៅ​ក្នុង​ពន្ធនាគារ​ព្រៃស ដោយ​ចោទ​ប្រកាន់​ពី​បទ «ញុះញង់​បង្ក​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ពាក់ព័ន្ធ​នឹង​រឿង​បង្ហោះ​សារ​​លើ​ហ្វេសប៊ុក ​រិះគន់​រដ្ឋាភិបាល​អំពី​យុទ្ធនាការ​ចាក់​វ៉ាក់សាំង​របស់​ចិន​ស៊ីណូ​ហ្វាម (Sinopharm) ដែល​ពុំ​មាន​ការ​ទទួល​ស្គាល់​ត្រឹមត្រូវ​ពី​អង្គការ​សុខភាព​ពិភពលោក។

មន្ត្រី​សិទ្ធិមនុស្ស លោក នី សុខា និយាយ​ថា វិធានការ​របស់​អាជ្ញាធរ​នេះ ជា​ការ​ធ្វើ​ឱ្យ​ប្រជា​ពលរដ្ឋ​ភ័យ​ខ្លាច ហើយ​ប្រសិន​បើ​មាន​រឿង​អយុត្តិធម៌​កើត​ឡើង​នៅ​ក្នុង​សង្គម ដែល​ពួក​គាត់​មិន​ហ៊ាន​បញ្ចេញ​មតិ​រិះគន់​រដ្ឋាភិបាល​តាម​ហ្វេសប៊ុក​​ឡើយ។ ក្រៅ​ពី​ករណី​នេះ លោក ឈុន វាន ក៏​កំពុង​ជាប់ចោទ​ក្នុង​សំណុំ​រឿង​រួមគំនិត​ក្បត់​មួយ​ទៀត​ដែរ។

សង្គម​ស៊ីវិល​ជាតិ និង​អន្តរជាតិ រួម​ទាំង​ក្រុម​អ្នក​ជំនាញ​សិទ្ធិមនុស្ស​អង្គការ​សហប្រជាជាតិ បាន​ថ្កោល​ទោស​ចំពោះ​ការ​ចាប់​ខ្លួន និង​របប​លោក ហ៊ុន សែន ទម្លាក់​ចោល​ការ​ចោទ​ប្រកាន់ និង​ដោះ​លែង​សកម្មជន​ទាំង​នេះ ហើយ​ងាក​មក​គោរព​សិទ្ធិ​ពលរដ្ឋ​ឡើង​វិញ ដើម្បី​អាច​ចៀស​ផុត​ពី​ការ​ដាក់​ទណ្ឌកម្ម​របស់​សហគមន៍​អន្តរជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។