ក្រុមយុវជនខ្មែរថាវរៈ ៦នាក់ ចាប់ផ្តើមធ្វើយុទ្ធនាការអត់អាហារ និងសមាធិនៅខេត្តព្រះវិហារ ដើម្បីតាំងចិត្តបួងសួងឲ្យរដ្ឋាភិបាល និងតុលាការដោះលែងកញ្ញា សេង ធារី រួមទាំងអ្នកទោសនយោបាយ និងសកម្មជនសង្គមឱ្យមានសេរីភាពឡើងវិញ។ មន្ត្រីសិទ្ធិមនុស្សថា សកម្មភាពរបស់កញ្ញា សេង ធាវី និងយុវជន គឺជាសិទ្ធិសេរីភាព ហើយអំពាវនាវដល់រដ្ឋាភិបាលដោះស្រាយវិបត្តិនយោបាយ ដើម្បីស្ដារប្រជាធិបតេយ្យ និងការគោរពសិទ្ធិមនុស្សឡើងវិញ។
ក្រុមយុវជនខ្មែរថាវរៈ រួមមាន លោក ហ៊ុន វណ្ណៈ កញ្ញា ឆែម ស្រីគា និងលោក ស្វាយ សំណាង និងយុវជនបីនាក់ទៀត បានធ្វើយុទ្ធនាការអត់អាហាររយៈពេលមួយសប្ដាហ៍ដោយចាប់ពីព្រឹកថ្ងៃទី៧ ខែវិច្ឆិកាតទៅ។ ពួកគេរំពឹងថា យុទ្ធការនេះនឹងអាចបន្ទន់ចិត្តដល់រដ្ឋាភិបាល ដែលធ្វើជាប្រធានប្តូរវេនអាស៊ានងាកមកគិតគូរពីមុខមាត់ប្រទេស លើឆាកអន្តរជាតិ ដោយដោះលែងអ្នកការពារសិទ្ធិមនុស្ស និងជាមេធាវីអន្តរជាតិ កញ្ញា សេង ធារី ព្រមទាំងសកម្មជនផ្សេងទៀត ដែលកំពុងជាប់ពន្ធនាគារដោយអយុត្តិធម៌កន្លងមក។
តំណាងយុវជនខ្មែរថាវរៈ លោក ហ៊ុន វណ្ណៈ ប្រាប់វិទ្យុអាស៊ីសេរី នៅថ្ងៃទី៧ ខែវិច្ឆិកាថា ក្រុមយុវជនបានស្ម័គ្រចិត្តធ្វើកូដកម្មអត់ហូបអាហារ និងក្បាលចងកន្សែងពណ៌ខ្មៅ អុជធូបភាវនាធម៌រយៈពេល ៧ថ្ងៃ នៅតំបន់ព្រៃដាច់ស្រយាលមួយកន្លែងនៅខេត្តព្រះវិហារ។ លោកបួងសួងសូមឱ្យកញ្ញា សេង ធារី ទទួលបានសេចក្ដីសុខ និងជៀសផុតពីការបៀតបៀនផ្សេងៗ នៅក្នុងពន្ធនាគារ៖
«អ្វីដែលសំខាន់នោះ គឺអ្វីដែលយើងធ្លាប់ហូបរាល់ថ្ងៃ យើងនឹងឃ្លាន ប៉ុន្តែយើងព្យាយាមអត់ហូប និងបរិភោគ ដោយសមាធិ ដើម្បីឱ្យសុខភាពយើងអាចទៅមុខរួច ហើយយើងសង្ឃឹមថា តស៊ូបានដល់ថ្ងៃទី៧។ ភាពអយុត្តិធម៌ ហើយការឃុំខ្លួនអ្នកទោស ដែលមិនមានទោស ជាពិសេស កញ្ញា សេង ធារី នេះ បើមិនផ្តល់សិទ្ធិសេរីភាពឱ្យគាត់ទេ ពួកយើងនឹងមានសកម្មភាពបន្តបន្ទាប់ទៀត ខ្ញុំសង្ឃឹមថា រដ្ឋាភិបាលនឹងយល់ពីអ្វី ដែលយើងកំពុងធ្វើនេះ»។
លោក ហ៊ុន វណ្ណៈ ឱ្យដឹងថា យុវជនគ្រោងធ្វើយុទ្ធការបង្អត់អាហារនៅភ្នំពេញបន្តទៀត អំឡុងពេលកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាននៅក្នុងសប្ដាហ៍នេះ ដើម្បីទាមទារឱ្យរដ្ឋាភិបាល និងតុលាការដោះលែងកញ្ញា សេង ធារី ឱ្យមានសេរីភាពវិញ។
កូដកម្មបង្អត់អាហារនេះ ធ្វើឡើងបន្ទាប់ពីអ្នកជំនាញច្បាប់ និងកិច្ចការអន្តរជាតិ ព្រមទាំងជាសកម្មជនសិទ្ធិមនុស្ស កញ្ញា សេង ធារី បានសរសេរលិខិតផ្ទាល់ដៃមួយចេញពីពន្ធនាគារព្រះវិហារ ដែលវិទ្យុអាស៊ីសេរី ទទួលបាននៅថ្ងៃទី១៤ តុលា បង្ហាញថា កញ្ញា គ្រោងធ្វើកូដកម្មអត់អាហារនៅក្នុងពន្ធនាគារ ចាប់ពីថ្ងៃទី៧ ដល់ថ្ងៃទី១៤ ខែវិច្ឆិកា ប្រសិនបើតុលាការមិនដោះលែងកញ្ញាឱ្យមានសេរីភាព ដោយគ្មានលក្ខខ័ណ្ឌ។ កញ្ញាបន្តថា បើទោះជារូបកញ្ញាត្រូវតុលាការដោះលែងឱ្យមានសេរីភាពវិញក្ដី ក៏កញ្ញានៅតែមិនចាកចេញពីប្រទេសកម្ពុជាដែរ លុះត្រាណាតែប្រទេសកម្ពុជាផ្លាស់ប្ដូរមេដឹកនាំដោយសន្តិវិធី ដែលមានអ្នកដឹកនាំជាអ្នកប្រជាធិបតេយ្យ ទើបកញ្ញាចាកចេញពីកម្ពុជា។
វិទ្យុអាស៊ីសេរីមិនអាចទាក់ទងអ្នកនាំពាក្យអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា ដើម្បីបញ្ជាក់ជុំវិញរឿងនេះបានទេ នៅថ្ងៃទី៧ ខែវិច្ឆិកា។ ប៉ុន្តែលោក នុត សវនា ធ្លាប់លើកឡើងថា ការធ្វើយុទ្ធនាការរបស់កញ្ញា សេង ធារី និងក្រុមយុវជនមិនអាចជំរុញឲ្យតុលាការដោះលែងកញ្ញាពីពន្ធនាគារបានឡើយ។
ទោះយ៉ាងណា យុវជនខ្មែរថាវរៈម្នាក់ទៀត កញ្ញា ឆែម ស្រីគា លើកឡើងថា ការដែលកញ្ញានាំគ្នាពហិការអត់អាហារជាមួយកញ្ញា សេង ធារី នេះ ពីព្រោះយុវជនចង់ប្រាប់ទៅរដ្ឋាភិបាលថា ការចាប់ខ្លួនសកម្មជនសិទ្ធិមនុស្ស និងនយោបាយដាក់គុកដោយគ្មានកំហុស គឺជារឿងមិនត្រឹមត្រូវ និងជាការឈឺចាប់សម្រាប់យុវជន ដែលពួកគាត់មិនអាចឈរឱបដៃមើល ចំពោះអំពើអយុត្តិធម៌ក្នុងសង្គមបានទេ។ យុវជនសង្គមរូបនេះយល់ថា អាជ្ញាធររដ្ឋាភិបាល ត្រូវតែយកចិត្តទុកដាក់លើទុក្ខកង្វល់ និងសំណើរបស់កញ្ញា សេង ធារី និងយុវជនទៅដោះស្រាយឲ្យបានត្រឹមត្រូវ។
«ការឃុំខ្លួនបងស្រី សេង ធារី កន្លងមកនេះ សម្រាប់ខ្ញុំផ្ទាល់ គឺជារឿងអយុត្តិធម៌ ដោយសារគាត់បានលះបង់ច្រើនមែនទែនសម្រាប់កម្ពុជា ការលះបង់របស់គាត់យើងមិនឈរឱបដៃមើលទេ គឺពួកយើងចូលរួមជាមួយគាត់ទោះបីបានបន្តិចបន្តួចក៏ដោយ។ ខ្ញុំសង្ឃឹមថា នឹងមានដំណោះស្រាយនៅក្នុងរឿងនេះ ហើយដោះលែងលែងកញ្ញា សេង ធារី ក្រោយកិច្ចប្រជុំអាស៊ានរួច»។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (Licado) លោក អំ សំអាត មានប្រសាសន៍ថា សកម្មភាពធ្វើកូដកម្មរបស់ក្រុមយុវជនខ្មែរថាវរៈ និងកញ្ញា សេង ធារី គឺជាការតស៊ូមតិស្វែងរកយុត្តិធម៌ ពីព្រោះពួកគេយល់ថា ការឃុំខ្លួន និងការចោទប្រកាន់កញ្ញាមិនត្រឹមត្រូវ និងរំលោភបំពានសិទ្ធិសេរីភាព។ លោក អំ សំអាត បារម្ភពីសុខភាពរបស់យុវជន និងកញ្ញា សេង ធារី បើសិនជាកូដកម្មរយៈពេលយូរថ្ងៃនោះ។ លោកអំពាវនាវដល់រដ្ឋាភិបាលងាកមកស្ដារបញ្ហាសិទ្ធិមនុស្ស និងការលទ្ធិប្រជាធិបតេយ្យឡើងវិញ ដោយអ្នកនយោបាយគ្រប់ភាគីចូលតុចរចាដោះស្រាយវិបត្តិនយោបាយ ហើយដោះលែងកញ្ញា សេង ធារី និងអ្នកជាប់ឃុំដោយសាររឿងនយោបាយដទៃទៀត ដើម្បីបញ្ចៀសការរិះគន់ និងទណ្ឌកម្មនានា ពីសហគមន៍អន្តរជាតិ។
«ការបង្អត់អាហារ គឺជាការតស៊ូមតិមួយ ដែលយុវជនខ្មែរថាវរៈគិតថា ដើម្បីភាពយុត្តិធម៌ និងការតស៊ូមតិក្នុងសង្គម ដើម្បីឱ្យមានការដោះលែងសកម្មជនការពារសិទ្ធិមនុស្ស បរិស្ថាន និងនយោបាយ ដែលការឃុំខ្លួន និងចោទប្រកាន់ពុំមានហេតុផលត្រឹមត្រូវ ហើយចាត់ទុកថា ជាការំលោភបំពានលើសេរីភាពជាមូលដ្ឋានរបស់ពួកគាត់»។
សមត្ថកិច្ចក្រុងភ្នំពេញ បានចាប់ខ្លួនកញ្ញា សេង ធារី កាលពីថ្ងៃទី១៤ ខែមិថុនា នៅខាងមុខតុលាការក្រុងភ្នំពេញ ក្រោយតុលាការប្រកាសសាលក្រមកាត់ទោសឲ្យកញ្ញាជាប់ពន្ធនាគារ ៦ឆ្នាំ ពីបទចោទរួមគំនិតក្បត់ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩។ មួយថ្ងៃបន្ទាប់មកតុលាការ បានបញ្ជូនកញ្ញាទៅឃុំខ្លួននៅពន្ធនាគារខេត្តព្រះវិហារ ដែលជាតំបន់ដាច់ស្រយាល ឆ្ងាយពីរាជធានីភ្នំពេញ រហូតមកទល់នឹងបច្ចុប្បន្ននេះ។
សំណុំរឿងកញ្ញា សេង ធារី កំពុងទាក់ទាញចំណាប់អារម្មណ៍ពីសហគមន៍ជាតិ និងអន្តរជាតិ ពិសេស ពីរដ្ឋាភិបាលអាមេរិកតែម្ដង។ ពួកគេ តែងតែទាមទារឲ្យរដ្ឋាភិបាល លោក ហ៊ុន សែន ប្រគល់សេរីភាពជូនកញ្ញាវិញ ព្រោះគ្មានផលប្រយោជន៍ពីការឃុំខ្លួននេះ ក្រៅតែពីទទួលរងនូវការរិះគន់ធ្ងន់ៗ លើរដ្ឋាភិបាល រឿងរំលោភសិទ្ធិមនុស្ស និងប្រជាធិបតេយ្យ ដែលអាចផ្តល់នូវផលវិបាក និងសម្ពាធផ្សេងៗ ត្រឡប់មកវិញថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។