ពលរដ្ឋមួយចំនួននៅខេត្តភាគឦសាន បង្ហាញអារម្មណ៍មិនជ្រះស្រឡះ ក្នុងការធ្វើបុណ្យភ្ជុំបិណ្ឌឆ្នាំនេះ ដោយសារសមត្ថកិច្ចចម្រុះ របស់របបលោក ហ៊ុន សែន ត្រូវបានដាក់ពង្រាយកម្លាំងស្ទើរគ្រប់វត្តអារាម។ ពួកគេចាត់ទុកទង្វើនេះ មិនផ្តល់ផលចម្រើនដល់សង្គមជាតិនោះទេ និងអំពាវនាវឱ្យរបបក្រុងភ្នំពេញពិចារណាបញ្ឈប់សកម្មភាពណា ប៉ះពាល់ការប្រតិបត្តិប្រពៃណីពលរដ្ឋ ដែលការពារដោយរដ្ឋធម្មនុញ្ញ។
ក្រុមពលរដ្ឋមួយចំនួនរស់នៅខេត្តស្ទឹងត្រែង និងខេត្តក្រចេះចាត់ទុក ការដាក់កម្លាំងសមត្ថកិច្ចចម្រុះស្លៀកឯកសណ្ឋានជាច្រើននាក់ ពង្រាយតាមវត្តអារាម ដែលមិនបានបង្កបរិយាកាសល្អ ដើម្បីឱ្យពលរដ្ឋធ្វើបុណ្យទានស្ងប់អារម្មណ៍នោះទេ។ ផ្ទុយទៅវិញ ធ្វើឱ្យពួកគេភ័យខ្លាចក្នុងការប្រតិបត្តិប្រពៃណី។
ពលរដ្ឋរស់នៅឃុំស្រះឫស្សី ស្រុកថាឡាបរិវ៉ាត់ ខេត្តស្ទឹងត្រែង លោក ថាន់ វ៉ន ឱ្យដឹងនៅថ្ងៃទី២៧ កញ្ញាថា ស្ទើរតែគ្រប់វត្តអារាមមាននគរបាល មន្ត្រីអាវុធហត្ថ និងប្រជាការពារភូមិ ចាប់ពី ៦នាក់ ទៅ ១០នាក់ បានពង្រាយគ្នាឃ្លាំមើល សកម្មភាពប្រជាជន ខុសប្លែកពីឆ្នាំមុនៗ។ លោកចាត់ទុកទង្វើនេះ ជាសញ្ញាគំរាមកំហែង ដល់សេរីភាពធ្វើបុណ្យទានរបស់ពលរដ្ឋ ជាពិសេសកម្មជនបក្សសង្គ្រោះជាតិ៖ «យើងធ្វើអ៊ីចឹងវាហួសហេតុពេក យកប្រពៃណីធ្វើនយោបាយ វាអត់សមទេ។ ធ្វើនេះឲ្យពលរដ្ឋភ័យខ្លាច ដោយឡែកពលរដ្ឋតាមជនបទ គ្នាមិនទាន់ដឹងច្បាប់ដឹងទម្លាប់គ្នាភ័យ។ ខ្លះចូលវត្ត ខ្លះក៏មិនចូលទៅ។ វាមិនចំណេញទេធ្វើអ៊ីចឹង។ បើនិយាយពីមន្ត្រីរាជការ ដូចទីងមោង ចង់ធ្វើអ្វីបានតាមចិត្ត។ នេះទីមួយប៉ះពាល់សតិអារម្មណ៍ពលរដ្ឋ ទី២ វាថោកខ្លួនឯង។ យើងជាថ្នាក់ដឹកនាំចុងក្រោយខ្លាចរាស្ត្រតូចតាចវិញ។ អាហ្នឹងគេហៅថា ថោកខ្លួនឯង » ។
ពលរដ្ឋម្នាក់ទៀតរស់នៅក្រុងក្រចេះ លោក ម៉េង ណុប ប្រាប់អាស៊ីសេរីថា គ្រប់វត្តអារាមនៅក្រុងក្រចេះ ក៏មានសមត្ថកិច្ចចម្រុះយ៉ាងហោចណាស់ជិត ១០នាក់ ឃ្លាំមើលសកម្មភាពប្រជាជនដែរ ក្រោមហេតុផលការពារសន្តិសុខ និងសុវត្ថិភាព។ លោកថា វត្តជ្រោយថ្មី វត្តអូរឫស្សី វត្តប៉ាឆា វត្តក្រគរ និងវត្តរកាកណ្ដាលជាដើម មានសមត្ថកិច្ចឃ្លាំមើល សកម្មភាពប្រតិបត្តិប្រពៃណីរបស់ពុទ្ធបរិស័ទ នាំឱ្យពលរដ្ឋខ្លះមិនសប្បាយចិត្ត និងភ័យខ្លាច។ លោកបន្ថែមថា សមត្ថកិច្ចខ្លះបានថតរូប សកម្មភាពធ្វើបុណ្យទាន របស់សកម្មជនគណបក្សសង្គ្រោះជាតិ នៅពេលដែលពួកគេកំពុងធ្វើបុណ្យក្នុងវត្ត៖ « ឃើញពួកទាហាន និងប៉ូលិសច្រើនមែន។ ផ្អើលៗ ខ្លាចដែរ ពួកខ្ញុំអី។ ប្លែកជាងរាល់ឆ្នាំ រាល់ឆ្នាំអត់សូវមានដល់ថ្នាក់ហ្នឹងទេ។ ប៉ុន្មានថ្ងៃនេះ គឺខ្ញុំឃើញទាហាន និងប៉ូលិសគ្រប់វត្ត។ ចង់ឲ្យគាត់កាត់បន្ថយ ប៉ូលិសអីមិនបាច់ទៅទេ មានតែប្រជាការពារបានហើយ។ អាហ្នឹងវាប៉ះពាល់ដែរ ព្រោះមានប៉ូលិសទាហាន អ្នកខ្លះគាត់ខ្លាច » ។
អាស៊ីសេរីបានព្យាយាមទាក់ទង ស្នងការខេត្តស្ទឹងត្រែង លោក ម៉ៅ តារា ដើម្បីសុំការបំភ្លឺជុំវិញបញ្ហានេះ តែលោកថា ទូរស័ព្ទស្ដាប់មិនឮ និងឈប់ទទួលទូរស័ព្ទនៅថ្ងៃទី២៧ កញ្ញា។ រីឯស្នងការខេត្តក្រចេះ ក៏អាស៊ីសេរីមិនទាន់អាចទាក់ទងបានដែរនៅថ្ងៃដដែលនេះ។
កាលពីពាក់កណ្ដាលខែកញ្ញាកន្លងទៅ មានសារបែកធ្លាយមួយជាសំឡេងរបស់លោក ស ខេង រដ្ឋមន្ត្រីក្រសួងមហាផ្ទៃបានបញ្ជាឱ្យអាជ្ញាធរគ្រប់ខេត្តក្រុង ត្រូវចុះតាមឃ្លាំមើលសកម្មជនគណបក្សសង្គ្រោះជាតិតាមវត្ត ដើម្បីគ្រប់គ្រងសភាពការណ៍ក្នុងពិធីបុណ្យភ្ជុំបិណ្ឌ៖ «ពួកប្រឆាំងក្រៅច្បាប់ ក្នុងឱកាសបុណ្យភ្ជុំបិណ្ឌហ្នឹង គេបានណែនាំឱ្យគ្នាគេ ចុះទៅតាមវត្ត ពេលភ្ជុំបិណ្ឌឱ្យបានច្រើន ដើម្បីជាឱកាសជួបជុំគ្នា ហើយនិងគេពិភាក្សារៀបចំផែនការខ្មៅរបស់គេនោះ។ ឥឡូវនេះ យើងនាំគ្នារៀបចំ មន្ត្រី ដើម្បីចុះតាមវត្ត ម្យ៉ាងបុណ្យភ្ជុំបិណ្ឌផង ម្យ៉ាងទៀតគ្រប់គ្រងសភាពការណ៍ហ្នឹង » ។
មន្ត្រីនាំពាក្យសមាគម អាដហុក លោក ស៊ឹង សែនករុណា ថ្លែងថា ការដាក់ពង្រាយកម្លាំងអាជ្ញាធរបែបនេះ គឺឆ្លុះបញ្ចាំង ការបែងចែងវណ្ណៈ រវៀងក្រុមអ្នកគាំទ្របក្សកាន់អំណាច និងក្រុមអ្នកគាំទ្របក្សជំទាស់ ដែលលោកចាត់ទុកថា ជាមូលហេតុធ្វើឱ្យសង្គមជាតិបែបបាក់សាមគ្គីភាព៖ « ករណីនេះយើងមានការព្រួយបារម្ភកាន់តែខ្លាំងថែមទៀត ដោយឃើញថា ហាក់ដូចជា ខ្មែរយើងកំពុងបែងចែកគ្នា មានការបែងចែកលាបពណ៌និន្នាការអ៊ីចឹងទៅ ហើយរស់នៅទាំងភ័យខ្លាច។ ខ្ញុំថា វិធានការទាំងអស់នេះវាមិនបានជួយឲ្យភាពចំរុងចម្រើនដល់ប្រជាពលរដ្ឋខ្មែរយើងទេ » ។
ទាំងពលរដ្ឋ និងអង្គការសង្គមស៊ីវិលចាត់ទុកទង្វើរបស់អាជ្ញាធរនេះថា ជារូបភាពប៉ះពាល់អារម្មណ៍ពលរដ្ឋស្លូតត្រង់ ធ្វើបុណ្យទានបែបប្រពៃណី ជាពិសេសសកម្មជនបក្សជំទាស់។ ពួកគាត់អំពាវនាវដល់អាជ្ញាធរឱ្យឈប់ដាក់ពង្រាយកម្លាំងច្រើនបែបនេះតទៅទៀត ដើម្បីបង្កឱ្យបរិយាកាសធ្វើបុណ្យទានក្នុងថ្ងៃភ្ជុំបិណ្ឌប្រព្រឹត្តទៅដោយមិនមានការភ័យខ្លាចសម្រាប់ពលរដ្ឋគ្រប់រូប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។