គណបក្សភ្លើងទៀននៅខេត្តកំពង់ធំ ចាប់ផ្ដើមប្រមូលសមាជិកមូលដ្ឋានរបស់ខ្លួនឡើងវិញហើយ ក្រោយការផ្អាកសកម្មភាព៤ឆ្នាំចុងក្រោយនេះ។ ជាមួយគ្នានេះ គណបក្សនយោបាយផ្សេងទៀតក៏កំពុងបង្កើនការចុះពង្រឹងតាមមូលដ្ឋានដែរ ក្រោយពេលលោកនាយករដ្ឋមន្ត្រី ហ៊ុន សែន ប្រកាសឲ្យមានការជួបជុំគ្នាឡើងវិញ។
ការប្រមូលសមាជិកអ្នកនយោបាយមូលដ្ឋាននៃអតីតគណបក្ស សម រង្ស៊ី និងគណបក្សសង្គ្រោះជាតិ ឲ្យមកចូលរួមក្នុងគណបក្សភ្លើងទៀនវិញ គឺដើម្បីចូលរួមប្រកួតប្រជែងការបោះឆ្នោតក្រុមប្រឹក្សាឃុំសង្កាត់ឆ្នាំ២០២២ និងការបោះឆ្នោតជាតិឆ្នាំ២០២៣។
តំណាងគណបក្សភ្លើងទៀនប្រចាំខេត្តកំពង់ធំ លោក ថោង វិបុលសុខុម ឲ្យដឹងថា គណបក្សនេះ បានជួបជុំគ្នាជាងមួយរយ(១០០)នាក់ជាលើកដំបូងឡើងវិញនៅថ្ងៃទី១៤ វិច្ឆិកា ក្នុងទិសដៅប្រមូលអ្នកគាំទ្រនៅខេត្តកំពង់ធំ ដែលបែកខ្ញែកគ្នាទាំងអស់ ឬទៅជ្រកក្នុងគណបក្សផ្សេងឲ្យមករួបរួមគ្នាក្នុងបក្សភ្លើងទៀនវិញ។
លោកជឿជាក់ថា ក្រោយពេលរៀបចំរចនាសម្ព័ន្ធរួច គណបក្សភ្លើងទៀននៅខេត្តកំពង់ធំនឹងរឹងមាំ ហើយទទួលបានការគាំទ្រច្រើន ព្រោះគណបក្សនេះមានសមាជិកក្នុងមូលដ្ឋានស្រាប់។ លោក ថោង វិបុលសុខុម ក៏ស្វាគមន៍ចំពោះអ្នកនយោបាយនៃគណបក្សផ្សេងមកចូលរួមដែរ ហើយលោកនៅតែអំពាវនាវឲ្យតុលាការដោះលែងអ្នកនយោបាយទាំងអស់ដើម្បីឲ្យពួកគាត់មកចូលរួមធ្វើនយោបាយឡើងវិញ៖ «ពេលឥឡូវនេះ ខ្ញុំចាប់ផ្ដើមពីសូន្យទៅ។ យើងអត់ទាន់សន្និដ្ឋានបានទេ ប៉ុន្តែកម្លាំងខ្ញុំរឹងមាំនៅមូលដ្ឋាន។ អ៊ីចឹងប្រជាពលរដ្ឋរង់ចាំតែពួកខ្ញុំទៅឈរឈ្មោះដើម្បីគាត់ផ្ដល់សេចក្ដីទុកចិត្ត និងផ្ញើវាសនាទៅលើគណបក្សភ្លើងទៀន»។
គណបក្សភ្លើងទៀន មានឈ្មោះដើមថាគណបក្ស សម រង្ស៊ី។ គណបក្សនេះបានប្ដូរឈ្មោះតាមរូបសញ្ញាភ្លើងទៀនវិញ កាលពីពាក់កណ្ដាលឆ្នាំ២០១៧ ឲ្យស្របតាមវិសោធនកម្មច្បាប់នយោបាយពេលនោះ ហើយ៤ឆ្នាំមកនេះគណបក្សភ្លើងទៀនបានផ្អាកសកម្មភាពទាំងស្រុង និងពហិការរាល់ការបោះឆ្នោត ព្រោះមិនពេញចិត្តនឹងការរំលាយគណបក្សសង្គ្រោះជាតិកាលពីចុងឆ្នាំ២០១៧។
ទីស្នាក់ការគណបក្សភ្លើងទៀននេះ ក៏រងការបិទខ្ទប់មិនឲ្យចូលច្រើនឆ្នាំមកហើយដែរ ដោយសារវាស្ថិតនៅជាន់ផ្ទាល់ដីនៃអគារគណបក្សសង្គ្រោះជាតិក្នុងសង្កាត់ចាក់អង្រែលើ ខណ្ឌមានជ័យ។
អ្នកនាំពាក្យគណបក្សភ្លើងទៀន លោក ថាច់ សេដ្ឋា បានស្នើសុំតុលាការដកបម្រាមហាមឃាត់ការចូលក្នុងទីស្នាក់ការគណបក្សភ្លើងទៀន ដើម្បីពួកគាត់អាចចូលធ្វើការវិញ។ ទោះជាយ៉ាងណា លោកបញ្ជាក់ប្រាប់វិទ្យុអាស៊ីសេរីនៅថ្ងៃទី១៤ វិច្ឆិកា ថា គណបក្សភ្លើងទៀននឹងនៅតែបន្តធ្វើនយោបាយក្នុងនាមគណបក្សប្រឆាំង ហើយសកម្មភាពនេះនឹងមិនប៉ះពាល់ដល់គណបក្សណាឡើយ។ គណបក្សនេះ ក៏នឹងបន្តការជួបជុំប្រមូលសមាជិកបក្សបន្តទៀត ក្នុងខេត្តសៀមរាប នៅថ្ងៃទី១៥ វិច្ឆិកា។
ក្រៅពីនេះគណបក្សមួយចំនួនទៀត ក៏ចាប់ផ្ដើមសកម្មភាពចុះជួបសមាជិកខ្លួនវិញដែរ ក្រោយពេលលោកនាយករដ្ឋមន្ត្រី ហ៊ុន សែន ប្រកាសឲ្យជួបជុំសកម្មភាពនយោបាយឡើងវិញ។ គណបក្សប្រជាធិបតេយ្យមូលដ្ឋានវិញ បានចុះជួបសមាជិក និងអ្នកគាំទ្រនៅខេត្តកំពង់ធំដែរ នៅថ្ងៃទី១៤ វិច្ឆិកា។
អ្នកនាំពាក្យគណបក្សនេះ គឺលោក ឡឹក សុធារ សង្កេតឃើញថា ទោះជារដ្ឋាភិបាលប្រកាសបើកឲ្យជួបជុំគ្នាវិញមែន តែអាជ្ញាធរនៅតែបន្តការតាមដាន និងឃ្លាំមើល សកម្មភាពជួបជុំគ្នារបស់គណបក្សតាមមូលដ្ឋាន។
ចំណែកគណបក្សខ្មែរឈ្នះវិញ មិនទាន់គិតគូរដល់ការចុះមូលដ្ឋានទេ ព្រោះគណបក្សនេះត្រូវរៀបចំសមាជបក្សនៅសប្ដាហ៍ក្រោយដើម្បីតែងតាំងលោក សួង សុភ័ណ្ឌ ដែលទើបត្រូវបានដោះលែងពីពន្ធនាគារឲ្យដឹកនាំគណបក្សនេះបន្ត។ លោក សួង សុភ័ណ្ឌ អះអាងគណបក្សខ្មែរឈ្នះនឹងចូលរួមទាំងសកម្មភាពនយោបាយ និងសង្គម ដើម្បីទាមទារផលប្រយោជន៍ជូនពលរដ្ឋ។
រីឯគណបក្សកាន់អំណាចវិញ ក៏តែងតែចុះជួបសមាជិក និងអ្នកគាំទ្រដែរ។ អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ការធ្វើសកម្មភាពទាំងឡាយជាសិទ្ធិស្របច្បាប់របស់គណបក្សនយោបាយដែលមានឈ្មោះក្នុងបញ្ជីក្រសួងមហាផ្ទៃ ហើយសកម្មភាពទាំងអស់នោះនឹងមិនប៉ះពាល់ដល់ប្រជាប្រិយគណបក្សកាន់អំណាចឡើយ៖ «ជាសិទ្ធិរបស់គណបក្សផ្សេងដែលគាត់មានច្បាប់អនុញ្ញាតហើយ គឺគាត់អាចធ្វើសកម្មភាពបានដោយសេរីហើយ ឲ្យតែស្ថិតនៅក្នុងក្របខណ្ឌការណែនាំរបស់រាជរដ្ឋាភិបាលក្នុងវិធានការសុខាភិបាលដើម្បីការពារកុំឲ្យថ្លោះធ្លោយមានការឆ្លងរាតត្បាតនៃជំងឺកូវីដ១៩ហ្នឹងហើយ»។
អ្នកឃ្លាំមើលយល់ស្របនឹងការលើកឡើងរបស់បក្សកាន់អំណាច។ អ្នកសិក្សាច្បាប់ លោក វ៉ន ចាន់ឡូត យល់ថា ទោះជារដ្ឋាភិបាលបើកឲ្យមានការជួបជុំ និងមានវត្តមានគណបក្សភ្លើងទៀនចូលរួមឆាកនយោបាយវិញ ក៏នៅតែមិនអាចប្រកួតជាមួយបក្សកាន់អំណាចបានដែរ។ លោកជឿថា គណបក្សភ្លើងទៀនអាចប្រមូលសមាជិកខ្លួនមកពង្រឹងមូលដ្ឋានបានរឹងមាំ តែពលរដ្ឋនៅតែឲ្យតម្លៃលើសម្ព័ន្ធភាពលោក សម រង្ស៊ី និងលោក កឹម សុខា ដូច្នេះទាល់តែអ្នកនយោបាយ២នាក់នេះ ធ្វើការជាមួយគ្នាទើបគណបក្សសង្គ្រោះជាតិមានលទ្ធភាពប្រកួតជាមួយគណបក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។