បន្ទាប់ពីការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ បានប្រព្រឹត្តទៅរួចរាល់ គេបានពិនិត្យឃើញថានៅតាមបណ្ដាខេត្តមួយចំនួនដែលមានព្រំដែនជាប់នឹងប្រទេសថៃ គឺប្រជាពលរដ្ឋជាច្រើនម៉ឺននាក់ដែលបានចុះឈ្មោះនៅក្នុងបញ្ជីបោះឆ្នោតថ្មីរបស់ គ.ជ.ប រួចហើយ មិនបានទៅបោះឆ្នោតទេ។
តើបណ្ដាលមកពីមូលហេតុអ្វី បានជាពលរដ្ឋមិនបានទៅបោះឆ្នោតគ្រប់គ្នា?
មន្ត្រីគណៈកម្មការរៀបចំការបោះឆ្នោតនៅខេត្តចំនួនបីនៃភាគឧត្តររបស់ប្រទេសកម្ពុជា បានឲ្យដឹងថា នៅក្នុងខេត្តទាំងនេះមានពលរដ្ឋជាច្រើនម៉ឺននាក់មិនបានចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នេះទេ។
ការខកខានមិនបានទៅបោះឆ្នោតរបស់ពលរដ្ឋមួយចំនួនដែលបានចុះឈ្មោះទៅក្នុងបញ្ជីបោះឆ្នោតរួចហើយនោះ ត្រូវបានមន្ត្រីគណៈកម្មការរៀបចំការបោះឆ្នោត សន្និដ្ឋានទៅលើមូលហេតុផ្សេងៗពីគ្នា។
ប្រធានគណៈកម្មការរៀបចំការបោះឆ្នោតខេត្តព្រះវិហារ គឺលោក ចូ ម៉ាប់។ លោកមានប្រសាសន៍នៅព្រឹកថ្ងៃច័ន្ទ ទី៥ ខែមិថុនា ថា នៅក្នុងខេត្តរបស់លោក គឺប្រជាពលរដ្ឋដែលបានទៅចុះឈ្មោះក្នុងបញ្ជីបោះឆ្នោតថ្មីចំនួនជាង ១សែន ១ម៉ឺន ៥ពាន់នាក់ (១១៥.០០០នាក់) ប៉ុន្តែបានទៅបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ កាលពីថ្ងៃទី៤ ខែមិថុនា គឺមានប្រជាពលរដ្ឋ ៩២,១១% ប៉ុណ្ណោះដែលបានទៅបោះឆ្នោត។
ប្រធានគណៈកម្មការរៀបចំការបោះឆ្នោតដដែលសន្និដ្ឋានថា បញ្ហាដែលពលរដ្ឋទៅបោះឆ្នោតមិនគ្រប់ចំនួននោះ អាចបណ្ដាលមកពីអ្នកបោះឆ្នោតខ្លះជានិស្សិតដែលត្រូវទៅសិក្សានៅភ្នំពេញ និងពលរដ្ឋខ្លះទៀតជាពលករចំណាកស្រុកទៅធ្វើការនៅប្រទេសថៃ និងប្រទេសឡាវ ហើយមិនបានវិលត្រឡប់មកបោះឆ្នោត៖ « ដូចជានៅ ឃុំកំពង់ ស្រឡៅ១ និងកំពង់ស្រឡៅ២ មានពលរដ្ឋ មួយចំនួនចំណាកស្រុក ទៅធ្វើ ការនៅប្រទេសថៃ និងឡាវ។ នៅព្រះវិហារ មិនសូវមានកម្មកររោងចក្រកាត់ដេរទេ គឺ សម្បូរ តែនិស្សិតទៅរៀន »។
ប្រធានគណៈកម្មការរៀបចំការបោះឆ្នោតខេត្តឧត្តរមានជ័យ លោក ជីង សំភួ មានប្រសាសន៍ថា នៅខេត្តរបស់លោក គឺមានប្រជាពលរដ្ឋចុះឈ្មោះបោះឆ្នោតចំនួនជាង ១សែន ១ម៉ឺន ៦ពាន់នាក់ (១១៦.០០០នាក់)ប៉ុន្តែពេលបោះឆ្នោត គឺមានប្រជាពលរដ្ឋចំនួន ៨៦,៣៦% ប៉ុណ្ណោះដែលបានទៅបោះឆ្នោត។
លោក ជីង សំភួ សន្និដ្ឋានថា ដោយសារតែខេត្តរបស់លោកនៅជាប់ព្រំដែនគ្នាជាមួយនឹងខេត្តសុរិន្ទ ខេត្តបូរីរ៉ាំ និងខេត្តស៊ីសាកេត របស់ថៃ នោះ គឺពលរដ្ឋដែលមកបោះឆ្នោតមិនគ្រប់ចំនួន ដោយសារបញ្ហាច្រើនយ៉ាង៖ « បើសន្និដ្ឋាន ពលរដ្ឋដែលមិន បានមក បោះឆ្នោត ប្រហែលជា គាត់ ទៅប្រកបការងារ នៅ ប្រទេសជិតខាង ។ មានពលរដ្ឋតិចតួចអាចស្លាប់ និងអ្នក ខ្លះទៀត អាចផ្លាស់ប្ដូរទីលំនៅ បន្ទាប់ពី រៀបការហើយជាដើម »។
ចំណែកប្រធានគណៈកម្មការរៀបចំការបោះឆ្នោតខេត្តសៀមរាប លោក នឹម វ៉ាន់សំ ឲ្យដឹងថា ខេត្តសៀមរាប មានប្រជាពលរដ្ឋចុះឈ្មោះបោះឆ្នោតចំនួនជាង ៤៩៣.០០០នាក់ ប៉ុន្តែពលរដ្ឋដែលបានទៅបោះឆ្នោតចំនួន ៨៩,៥៩% ប៉ុណ្ណោះ។
លោក នឹម វ៉ាន់សំ សន្និដ្ឋានថា បញ្ហាដែលប្រជាពលរដ្ឋចំនួន ៥ម៉ឺននាក់ទៀតមិនបានទៅបោះឆ្នោតកាលពីថ្ងៃទី៤ ខែមិថុនា ភាគច្រើនគឺជាអ្នករស់នៅទីជនបទដាច់ស្រយាល ប្រហែលជាពួកគេចំណាកស្រុកទៅធ្វើការឆ្ងាយ ចំណែកឯអ្នកទីក្រុងមិនសូវខកខានក្នុងការទៅបោះឆ្នោតនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។