តុលាការកំពូលនៅថ្ងៃទី៣១ ខែឧសភា សម្រេចតម្កល់សាលក្រមរបស់តុលាការថ្នាក់ក្រោម ដែលផ្ដន្ទាទោសអនុប្រធានគណបក្សភ្លើងទៀនលោក ថាច់ សេដ្ឋា ឱ្យជាប់ពន្ធនាគារជាង ១ឆ្នាំកន្លះដដែល ខណៈសំណុំរឿងមន្ត្រីគណបក្សកម្លាំងជាតិ ដែលតុលាការបើកសវនាការនៅថ្ងៃទី៣១ ខែឧសភា នឹងប្រកាសសាលដីកានៅថ្ងៃទី១០ ខែមិថុនាខាងមុខ។
គ្រួសារ និងមន្ត្រីបក្សប្រឆាំងស្នើទៅតុលាការឱ្យដោះលែង លោក ថាច់ សេដ្ឋា និងលោក គា វិសាល ឱ្យមានសេរីភាពវិញ ដើម្បីពួកគេមានសិទ្ធិចូលរួមធ្វើនយោបាយ និងជួបជុំគ្រួសារ។
ប្រធានក្រុមប្រឹក្សាជំនុំជម្រះតុលាការកំពូល លោក និល ណុន នៅថ្ងៃទី៣១ ខែឧសភា បានប្រកាសសាលដីកាផ្ដន្ទាទោសលោក ថាច់ សេដ្ឋា ឱ្យជាប់ពន្ធនាគារចំនួន ១៨ខែ ពីបទ «មិនបំពេញកាតព្វកិច្ច ចំពោះឧបករណ៍ ដែលអាចជួញដូរបាន ឬចេញឆែកអត់ប្រាក់» ដូចសេចក្ដីសម្រេចរបស់សាលាដំបូងរាជធានីភ្នំពេញដែរ។
ចៅក្រមរូបនេះ ចាត់ទុកការសម្រេចរបស់តុលាការថ្នាក់ក្រោមថា ជារឿងត្រឹមត្រូវ។
ទោះជាយ៉ាងណាក្ដី ក្រុមគ្រួសាររបស់អនុប្រធានគណបក្សភ្លើងទៀន លោក ថាច់ សេដ្ឋា ខកចិត្ត ហើយចាត់ទុកការសម្រេចនេះថា ជារឿងអយុត្តិធម៌។
ប្រពន្ធលោក ថាច់ សេដ្ឋា គឺលោកស្រី ថាច់ សុខបូរ៉ានី ប្រាប់អ្នកសារព័ត៌មាននៅថ្ងៃទី៣១ ខែឧសភា ថា ប្ដីរបស់គាត់នៅតែមានជំហររឹងមាំ ប៉ុន្តែលោកស្រីនៅតែសោកស្ដាយ ដែលតុលាការជាន់ខ្ពស់មិនផ្ដល់យុត្តិធម៌ឱ្យប្ដីរបស់គាត់។
លោកស្រីស្នើទៅតុលាការឱ្យទម្លាក់បទចោទប្រកាន់ និងដោះលែងប្ដីរបស់លោកស្រី និងអ្នកទោសមនសិការផ្សេងទៀតឱ្យមានសេរីភាពវិញ។
លោកស្រី ថាច់ សុខបូរ៉ានី៖ «សូមដោះលែងអ្នកស្នេហាជាតិ ធ្វើដើម្បីជាតិដោះលែងពួកគាត់ទៅ ឱ្យបានមកធ្វើការរួបរួមជាតិទាំងអស់គ្នាទៅមុខទៀត។ ឈប់ទៅ ឈប់ធ្វើបាបខ្មែរទៅ ឈប់ទៅ សុំតែប៉ុណ្ណឹងទេ ឱ្យពួកខ្ញុំបានជួបកូនជួបប្ដីផង ហើយមិនថា តុលាការមិនថា អ្នកដឹកនាំ នៅផ្ទះជួបជុំគ្រួសារតែពួកខ្ញុំបែកបាក់គ្រួសារ អាណិតពួកខ្ញុំផង។ ចាស!សំណូមពរតែប៉ុណ្ណឹងទេ»។
កាលពីខែកញ្ញា ឆ្នាំ២០២៣ សាលាដំបូងរាជធានីភ្នំពេញ បានផ្ដន្ទាទោសលោក ថាច់ សេដ្ឋា ឱ្យជាប់ពន្ធនាគាររយៈពេល ១៨ខែ និងពិន័យជាប្រាក់ ៣លានរៀល ពាក់ព័ន្ធនឹងបទចោទចេញសែកគ្មានសាច់ប្រាក់ចំនួន ៥សន្លឹក។ លើសពីនេះទៀត លោកត្រូវបានតុលាការបង្គាប់ឱ្យសងបំណុលមិនទាន់សងចំនួន ៣៣.៤០០ដុល្លារ ទៅឱ្យដើមបណ្ដឹង និងសំណងជំងឺចិត្តចំនួន ៥លានរៀលបន្ថែមទៀត។
ទោះជាយ៉ាងនេះ លោក ថាច់ សេដ្ឋា បានបដិសេធការចោទប្រកាន់នេះ ហើយថា សែកគ្មានសាច់ប្រាក់ចំនួន ៥សន្លឹក ដែលដើមបណ្ដឹង និងតុលាការថ្នាក់ក្រោមចោទប្រកាន់នោះ មិនមែនជារបស់លោកឡើយ។
ជាងនេះទៅទៀត មេធាវីការពារក្ដីឱ្យលោក ថាច់ សេដ្ឋា ធ្លាប់អះអាងថា បំណុលប្រាក់ចំនួន ២ម៉ឺនដុល្លារ ដែលលោក ថាច់ សេដ្ឋា ខ្ចីពីក្រុម រិន ឆាយ ផន ហ្សប់ (Rin Chhay Pawn Shop)អំឡុងឆ្នាំ២០១១ និងឆ្នាំ២០១២ គឺបានដោះស្រាយជិតចប់ទៅហើយ ពោលនៅសល់ក្នុងកម្រិតតិចតួច គឺមិនដូចពាក្យបណ្ដឹង ដែលក្រុមហ៊ុនប្ដឹងចោទប្រកាន់ឡើយ។
ក្រុមហ៊ុន រិនឆាយ ផនសប គឺជារបស់លោក ហៃ វ៉ាន់រិន ដែលត្រូវបានគេដឹងថា ជាមនុស្សស្និទ្ធនឹងគណបក្សប្រជាជនកម្ពុជា និងគ្រួសារលោក ហ៊ុន សែន។
មេធាវីការពារក្ដីលោក ថាច់ សេដ្ឋា គឺលោក ជូង ជូងី សោកស្ដាយ ដែលតុលាការកំពូលរក្សាការផ្ដន្ទាទោសកូនក្ដីរបស់លោកដូចតុលាការថ្នាក់ក្រោម។
លោក ជូង ជូងី៖ «ខ្ញុំជាមេធាវីនៅតែមិនអស់ចិត្ត ពីព្រោះថា ឆិក(Check)ដែលដើមបណ្ដឹងយកមកអះអាងហ្នឹង គឺអត់មានឆែកច្បាប់ដើមទេ មានតែឆែកថតចម្លង»។
ការប្រកាសសាលដីកាសំណុំរឿងលោក ថាច់ សេដ្ឋា នេះ ក៏មានមន្ត្រីគណបក្សភ្លើងទៀន និងទីប្រឹក្សាគណបក្សកម្លាំងជាតិ រួមទាំងអង្គការសង្គមស៊ីវិល បានចូលរួមស្ដាប់ និងតាមដានដែរ។
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ លើកឡើងថា លោក ថាច់ សេដ្ឋា មិនបានបង្កព្យសនកម្មដល់អ្នកណាឡើយ ប៉ុន្តែលោកសោកស្ដាយ ដែលតុលាការកំពូលតម្កល់សាលក្រមរបស់សាលាដំបូងរាជធានីភ្នំពេញទុកជាបានការដដែល។
លោក លី សុធារ៉ាយុត្តិ៖ «តុលាការគួរពិចារណាឡើងវិញ ព្រោះគាត់ជាប់ពន្ធនាគារជាង ១ឆ្នាំហើយ។ អ៊ីចឹងគួរតែពិចារណា និងពិនិត្យលើករណីគាត់ឡើងវិញ ហើយឱ្យគាត់រួចខ្លួនទៅ ទម្លាក់បទចោទទាំងអស់ទៅ ហើយប្រគល់សិទ្ធិសេរីភាពឱ្យគាត់វិញ។ យើងឃើញដែលលោក ថាច់ សេដ្ឋា ជាអ្នកនយោបាយមួយ ប៉ុន្តែមិនដែលបង្កព្យសនកម្មផ្ដល់ទុក្ខទោសឱ្យអ្នកណាគេទេ ឬក៏មិនបង្កឱ្យសង្គមមានភាពវឹកវរអីទេ ឬសង្គមវឹកវរអសន្តិសុខសង្គមដោយសារតែគាត់ទេ។ មានន័យថា យើងជាអ្នកនយោបាយទាំងអស់គ្នាជាអ្នកនយោបាយបែបប្រជាធិបតេយ្យ»។
រីឯទីប្រឹក្សាគណបក្សកម្លាំងជាតិ លោក រ៉ុង ឈុន ចាត់ទុកការសម្រេចរបស់តុលាការជាន់ខ្ពស់នេះថា ជារឿងអយុត្តិធម៌សម្រាប់លោក ថាច់ សេដ្ឋា ដែលមិនបានប្រព្រឹត្តកំហុស។ លោកបន្តថា កន្លងមក សហគមន៍ជាតិ និងអន្តរជាតិចាត់ទុកចំណាត់ការលើលោក ថាច់ សេដ្ឋា និងមេដឹកនាំ ហើយសកម្មជនបក្សប្រឆាំង សកម្មជនសង្គម រួមទាំងសហជីពផងថា ជារឿងនយោបាយច្រើនជាងការអនុវត្តច្បាប់។
លោក រ៉ុង ឈុន៖ «យើងចង់ឱ្យបញ្ចប់ហើយត្រូវដោះលែងអ្នកនយោបាយដូចជា លោក ស៊ុន ចន្ទី លោក ថាច់ សេដ្ឋា លោក កាក់ កុម្ភារ កញ្ញា សេង ធារី កញ្ញា ឈឹម ស៊ីថរ លោកប្អូន កើត សារ៉ាត ដូចជាលោក ម៉ម រិទ្ធី ដែលជាមេសហជីព ត្រូវផ្ដល់សេរីភាពឡើងវិញ ដើម្បីយើងស្ដារកេរ្តិ៍ឈ្មោះ កិត្តិយសកម្ពុជាឡើងវិញ»។
ក្រៅពីសំណុំរឿងអនុប្រធានគណបក្សភ្លើងទៀនលោក ថាច់ សេដ្ឋា នៅថ្ងៃទី៣១ ខែឧសភា តុលាការកំពូល ក៏បានបើកសវនាការលើបណ្ដឹងសុំនៅក្រៅឃុំ របស់មន្ត្រីគណបក្សកម្លាំងជាតិ លោក គា វិសាល ដែលប្ដឹងមិនសុខចិត្ត ចំពោះការសម្រេចរបស់សាលាឧទ្ធរណ៍កាលពីថ្ងៃទី៨ ខែឧសភា។
សំណុំរឿងលោក គា វិសាលនេះ ប្រធានក្រុមប្រឹក្សាជំនុំជម្រះតុលាការកំពូល លោក គង់ ស្រ៊ីម សម្រេចប្រកាសសាលដីកានៅថ្ងៃទី១០ ខែមិថុនាខាងមុខ។
ប្រពន្ធរបស់លោក គា វិសាល គឺលោកស្រី ញ៉ែ សុខឿន ស្នើទៅតុលាការកំពូលរកយុត្តិធម៌ និងដោះលែងប្ដីឱ្យបាននៅក្រៅឃុំ ដោយថា ប្ដីរបស់លោកស្រីមិនបានប្រព្រឹត្តខុសដូចការចោទប្រកាន់ឡើយ។
លោកស្រី ញ៉ែ សុខឿន៖ «សូមលោកដោះលែងគាត់ទៅ ដើម្បីឱ្យខ្ញុំជាគ្រួសារទទួលបានភាពយុត្តិធម៌នៅក្នុងសង្គមដែលថា ប្រជាធិបតេយ្យ ដែលលោកតែងនិយាយថា សន្តិភាពសម្រាប់ពលរដ្ឋឱ្យពេញលេញ។ អ៊ីចឹងសូមឱ្យតុលាការដោះលែងគាត់ ពីព្រោះអីគាត់មិនមានកំហុសដូចដែលថា តុលាការ សាលាដំបូង ឬដាក់បន្ទុកបន្ថែម ឥឡូវគ្រាន់តែបន្តការឃុំខ្លួន ដោយមិនមានអីជាភស្ដុតាងជាក់ស្ដែងវាមិនមាន»។
ចំណែកទីប្រឹក្សាគណបក្សកម្លាំងជាតិលោក រ៉ុង ឈុន ដែលចូលរួមតាមដានសវនាការនេះ សង្ឃឹមថា តុលាការកំពូលនឹងដោះលែងលោក គា វិសាល ឱ្យមានសេរីភាពវិញ ពីព្រោះលោកបានបញ្ជាក់ជំហរ នៅចំពោះមុខប្រធានប្រឹក្សាថា នឹងសហការជាមួយតុលាការគ្រប់នីតិវិធី។
វិទ្យុអាស៊ីសេរី បានទាក់ទងទៅអ្នកនាំពាក្យតុលាការកំពូល លោកស្រី ម៉ៅ ធីតា នៅថ្ងៃទី៣១ ខែឧសភា តែអ្នកស្រីប្រាប់ថា ជាប់ប្រជុំ។
បច្ចុប្បន្នមានអ្នកនយោបាយ អ្នកការពារសិទ្ធិមនុស្ស មេសហជីព និងអ្នកបញ្ចេញមតិរិះគន់ជាង ៦០ នាក់ ហើយត្រូវបានចាប់ខ្លួន និងចោទប្រកាន់ពីសំណាក់តុលាការក្រុងភ្នំពេញ។ ក្នុងនោះ ចំនួន ៣០នាក់ ត្រូវបានចោទប្រកាន់ និងចាប់ដាក់គុក ក្រោមអំណាចដឹកនាំដោយលោក ហ៊ុន ម៉ាណែត រយៈពេលជិត ១០ខែមកនេះ ខណៈសកម្មជនជាច្រើននាក់ទៀត បានរត់ភៀសខ្លួន បន្ទាប់ពីពួកគេ ទទួលនូវការគំរាមកំហែង និងការធ្វើទុក្ខបុកម្នេញផ្សេងៗ។
ការចាប់ខ្លួនឃុំ និងចោទប្រកាន់នេះ ត្រូវបានក្រុមអង្គការជាតិ និងអន្តរជាតិចាត់ទុកថា ធ្វើឡើងដើម្បីបង្ក្រាបសំឡេងប្រជាពលរដ្ឋ និងសំឡេងគណបក្សប្រឆាំង។ ពួកគេទាមទារឱ្យរដ្ឋាភិបាលលោក ហ៊ុន ម៉ាណែត ងាកមកគិតគូរអំពីផលប្រយោជន៍ជាតិ ដោយបញ្ឈប់ការយកប្រព័ន្ធតុលាការមកគាបសង្កត់លើអ្នក ដែលមានមតិផ្ទុយ ហើយដោះលែងសកម្មជន និងអ្នកនយោបាយប្រឆាំងជាបន្ទាន់ និងឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។