ប្រមុខការពារជាតិរបបក្រុងភ្នំពេញ ចេញបញ្ជាឲ្យកងទ័ពសហការគ្នា ដើម្បីចាត់វិធានការបង្ក្រាបលោក សម រង្ស៊ី និងអ្នកគាំទ្រ ដែលលោកចោទថា ប៉ុនប៉ងធ្វើរដ្ឋប្រហារផ្ដួលរំលំរដ្ឋាភិបាលដឹកនាំ ដោយ លោក ហ៊ុន សែន។ សង្គមស៊ីវិល និងតំណាងរាស្ត្រគណបក្សសង្គ្រោះជាតិ ចាត់ទុកថា បទបញ្ជា របស់លោក ទៀ បាញ់ ជារឿងខុសច្បាប់ ព្រោះកងទ័ពសម្រាប់ការពារជាតិ មិនមែនសម្រាប់បង្ក្រាប ពលរដ្ឋខ្មែរនោះទេ។
រដ្ឋមន្ត្រីក្រសួងការពារជាតិ លោក ទៀ បាញ់ ចេញបញ្ជាឲ្យមេបញ្ជាការ មេបញ្ជាការរង និងពលទាហាននៃកងពលតូចលេខ៧០ ព្រមទាំងកងទ័ពទាំងអស់ ត្រូវសហការជាមួយក្រសួង ស្ថាប័ន មានសមត្ថកិច្ច និងអាជ្ញាធរដែនដីគ្រប់លំដាប់ថ្នាក់ ដើម្បីចាត់វិធានការបង្ក្រាបប្រធានស្ដីទីគណបក្សសង្គ្រោះជាតិលោក សម រង្ស៉ី និងអ្នកគាំទ្រនៅគ្រប់ទីកន្លែងទាំងអស់។ លោក ទៀ បាញ់ ចោទលោក សម រង្ស៊ី ថា បានឆ្លងផុតបន្ទាត់ក្រហម តាមរយៈការអំពាវនាវអូសទាញពលរដ្ឋ និងកងកម្លាំងប្រដាប់អាវុធ ឲ្យចូលរួមក្រោកឈរតវ៉ាក្នុងចេតនាប៉ុនប៉ងធ្វើរដ្ឋប្រហារទម្លាក់លោក ហ៊ុន សែន។ បទបញ្ជាផ្ទាល់មាត់នេះ ធ្វើឡើងក្នុងពិធីប្រារព្ធខួប ២៥ឆ្នាំនៃថ្ងៃបង្កើតកងពលតូចលេខ៧០ នៅព្រឹកថ្ងៃទី១៤ ខែតុលា នៅឯបញ្ជាការដ្ឋាន កងពលតូចលេខ៧០ ដោយមានការបង្ហាញក្បួនយោធា រថក្រោះ និងអាវុធធុនធ្ងន់ដទៃទៀត៖ «»
រីឯមេបញ្ជាការរងកងទ័ពជើងគោក និងជាមេបញ្ជាការកងពលតូចលេខ៧០ លោក ម៉ៅ សុផាន់ បាន ប្រកាសប្ដេជ្ញាចំពោះមុខលោក ទៀ បាញ់ ថា កងពលរបស់លោកត្រៀមខ្លួនជានិច្ច ដើម្បីវាយកម្ទេចរាល់ការឃុបឃិត ប៉ុនប៉ងបំផ្លាញសន្តិភាព និងឧបាយកលបង្កើតឲ្យមានបដិវត្តន៍ពណ៌លើទឹកដីកម្ពុជា ព្រមទាំងប្រឆាំងដាច់ខាត ចំពោះការជ្រៀតជ្រែកកិច្ចការផ្ទៃក្នុងកម្ពុជាពីមជ្ឈដ្ឋានខាងក្រៅ៖ «»
ការចេញបទបញ្ជាជាបន្តបន្ទាប់របស់ក្រុមមេទ័ពរបបក្រុងភ្នំពេញនេះ គឺបន្ទាប់ពីប្រធានស្ដីទីគណបក្សសង្គ្រោះជាតិ លោក សម រង្ស៊ី ប្រកាសវិលចូលកម្ពុជាវិញនៅថ្ងៃទី៩ ខែវិច្ឆិកា ដើម្បីស្ដារលទ្ធិប្រជាធិបតេយ្យ និងការគោរពសិទ្ធិមនុស្ស។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន មានប្រសាសន៍ថា តាមច្បាប់ គឺកងទ័ពត្រូវ រក្សាអព្យាក្រឹតភាព មិនកាន់ជើងគណបក្សណាមួយទេ ប៉ុន្តែលោក ទៀ បាញ់ កំពុងប្រើប្រាស់កង ទ័ពជាឧបករណ៍ការពារអំណាចលោក ហ៊ុន សែន និងក្រុមគ្រួសារលោក ហ៊ុន សែន។ លោកយល់ថា លោក ទៀ បាញ់ គួរតែយកកងទ័ពទៅការពារព្រំដែនជាមួយប្រទេសជិតខាង កុំឲ្យបរទេសឈ្លានទឹកដីកម្ពុជា មិនមែនប្រើកងទ័ព សម្រាប់បាញ់បង្ក្រាបពលរដ្ឋខ្មែរស្លូតត្រង់ ដែលគ្រាន់តែអនុវត្តសិទ្ធិស្របច្បាប់របស់ខ្លួននោះទេ។ មន្ត្រីជាន់ខ្ពស់បក្សប្រឆាំងរូបនេះ បញ្ជាក់ថា ការប្រើប្រាស់កងកម្លាំងប្រដាប់អាវុធទៅបាញ់បង្ក្រាបពលរដ្ឋ ដែលអត់មានអាវុធក្នុងដៃនោះ គឺជាអំពើខុសច្បាប់ធ្ងន់ធ្ងរ ហើយក្រុមមេដឹកនាំរបបលោក ហ៊ុន សែន នឹងមិនអាចគេចផុតពីសំណាញ់ច្បាប់អន្តរជាតិឡើយ។
ដោយឡែកពលរដ្ឋ និងក្រុមអង្គការសង្គមស៊ីវិល ក៏បានបញ្ចេញប្រតិកម្មថា របបក្រុងភ្នំពេញ គួរតែបញ្ឈប់ការប្រើពាក្យវាយកម្ទេចតទៅទៀត ព្រោះពាក្យនេះពួកខ្មែរក្រហមធ្លាប់ប្រើ និងអនុវត្តលើប្រជាពលរដ្ឋខ្មែរស្លូតត្រង់ស្ទើរតែផុតពូជខ្មែរម្ដងរួចមកហើយ។
មន្ត្រីគម្រោងនៃមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព លោក ហេង គឹមហុង ថ្លែងថា ស្ថានភាពកម្ពុជាបច្ចុប្បន្ន មិនគួររដ្ឋាភិបាលចេញបញ្ជាឲ្យប្រើប្រាស់កម្លាំងយោធានោះទេ ព្រោះកម្លាំងយោធាប្រើសម្រាប់តែក្នុងពេលមានទំនាស់តាមព្រំដែន និងកន្លែងណា ដែលច្បាប់អនុញ្ញាត ប៉ុណ្ណោះ។ លោកយល់ថា ឲ្យអ្នកនយោបាយខ្មែរល្មមដល់ពេលជែកផ្សះផ្សាគ្នា ដើម្បីកុំឲ្យបែកបាក់ជាតិ និងកុំឲ្យពលរដ្ឋរងគ្រោះដូចសម័យខ្មែរក្រហមម្ដងទៀត៖ «»
ទាក់ទងនឹងករណីនេះ ប្រធានវេទិកាអនាគត លោក អ៊ូ វីរៈ ក៏បង្ហោះសារនៅលើហ្វេសប៊ុក ស្នើសុំឲ្យរដ្ឋាភិបាលចៀសវាងប្រើពាក្យពេចន៍ ដែលរំលឹកដល់អតីតកាលខ្មៅងងឹត។
បើទោះមានការគំរាមកំហែង និងចាប់ខ្លួនសកម្មជនបក្សប្រឆាំងរាល់ថ្ងៃក៏ដោយ មេបក្សប្រឆាំងលោក សម រង្ស៊ី នៅតែរក្សាជំហរថា លោក និងថ្នាក់ដឹកនាំគណបក្សប្រឆាំង គ្មានការរួញរា ចំពោះការវិលចូលស្រុកវិញនោះទេ នៅថ្ងៃទី៩ ខែវិច្ឆិកា។ លោក សម រង្ស៊ី អះអាងថា វត្តមានរបស់លោក នឹងធ្វើឱ្យកម្ពុជាមានការផ្លាស់ប្ដូរ មានប្រជាធិបតេយ្យ និងការគោរពសិទ្ធិមនុស្សឡើងវិញ ព្រមទាំងដោះស្រាយបញ្ហាប្រឈមទាំងឡាយរបស់ជាតិ ដែលរបបលោក ហ៊ុន សែនមិនអាចដោះស្រាយបាន ជាពិសេស គឺជួយកុំឱ្យមានការដកប្រព័ន្ធអនុគ្រោះពន្ធ EBA៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។