មន្ត្រីជាន់ខ្ពស់ក្រសួងការពារជាតិគាំទ្រ ចំពោះគំនិតរបស់មន្រ្តីយោធាម្នាក់ ដែលប្រៀបធៀបលោក សម រង្ស៊ី ទៅនឹងដំប៉ៅមហារីកដែលត្រូវកាត់យកចេញនៅដើមខែវិច្ឆិកាខាងមុខ។ មន្ត្រីគណបក្សប្រឆាំងធ្លាប់បានអះអាងថា ពួកគេមិនខ្លាចនឹងការគំរាមពីរបបលោក ហ៊ុន សែន ទេ ហើយបានសន្យាថា ដឹកនាំកម្លាំងមហាជនអមដំណើរលោក សម រង្ស៊ី វិល ចូលកម្ពុជាឲ្យខាងតែបាននៅថ្ងៃទី៩ វិច្ឆិកា។
លោក ទៀ បាញ់ រដ្ឋមន្រ្តីក្រសួងការពារជាតិ ប្រាប់អាស៊ីសេរីកាលពីថ្ងៃទី២៩ តុលាថា ដំបៅមហារីកចាំបាច់ត្រូវតែកាត់ចេញ បើមិនដូច្នេះទេ និងមានគ្រោះថ្នាក់ទៅពេលខាងមុខនេះ៖ «ខ្ញុំគ្មានទៅយល់អ្វីបើធម្មតានិយាយពីរឿងមហារីកបើវាកើតនៅកន្លែងណាក៏វាពិបាករស់ដែរតាមខ្ញុំយលទេ។មហារីកបើវាកើតចំកន្លែងសំខាន់វិញអាហ្នឹងវាកាន់តែទៅហើយគ្រាន់តែយូរនឹងឆាប់ហ្នឹងឯង » ។
ការលើកឡើងរបស់លោក ទៀ បាញ់ នេះបានកើតមានឡើងក្រោយពីរដ្ឋលេខាធិការក្រសួងការពារជាតិលោក នាយឧត្ដមសេនីយ៍ ម៉ឹង សំផន ប្រាប់សារព័ត៌មានក្នុងស្រុកដែលស្និទ្ធិនឹងរបបលោកហ៊ុន សែនថា លោកគាំទ្រអត្ថបទមិត្តអ្នកអានមួយ ដែលបានចុះផ្សាយថា រដ្ឋាភិបាលគណបក្សប្រជាជនគួរកាត់ «សាច់ដំបៅមហារីក សម រង្ស៊ី» គ្រវាត់ចោលនៅថ្ងៃទី៩ ខែវិច្ឆិកា។
អាស៊ីសេរីមិនអាចស្នើសុំការអត្ថាធិប្បាយពីរដ្ឋលេខាធិការក្រសួងការពារជាតិលោក នាយឧត្ដមសេនីយ៍ ម៉ឹង សំផនបានទេដោយទូរស័ព្ទរបស់លោកគ្មានអ្នកទទួល។តែទោះជាយ៉ាងណាលោក ទៀ បាញ់ បញ្ជាក់ថា ដំបៅមហារីកត្រូវតែយកចេញ។
អាស៊ីសេរីមិនទាន់អាចសុំសេចក្តីបំភ្លឺពី អនុប្រធានគណបក្សសង្គ្រោះជាតិលោក ស្រី មូរ សុខហួរ បានទេកាលពីថ្ងៃទី២៩ តុលា។ ប៉ុន្តែ លោក សម រង្ស៊ី ប្រធានស្តីទីគណបក្សសង្គ្រោះជាតិ ធ្លាប់បានប្រកាសថា គម្រោងវិលត្រឡប់ទៅមាតុប្រទេសវិញនៅថ្ងៃទី៩ ខាងមុខនេះ គ្មានអ្វីផ្លាស់ប្តូរទេ។
គិតត្រឹមថ្ងៃទី៣០ តុលានេះនៅសល់តែ ១១ថ្ងៃទៀតតែប៉ុណ្ណោះដល់ថ្ងៃលោក សម រង្ស៊ី វិលត្រឡប់ទៅស្រុកខ្មែរវិញហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។