ប្រពន្ធសកម្មជនគណបក្សប្រឆាំងលោក តូច ថឹង នៅតែបារម្ភពីស្ថានភាពភ្នែករបស់ប្ដីលោកស្រី និង ស្នើឱ្យពន្ធនាគារបញ្ជូនប្ដីរបស់លោកស្រី ឱ្យទៅសម្រាកព្យាបាលនៅមន្ទីរពេទ្យវិញ។ មេធាវីការពារក្ដីឱ្យប្រធានគណៈកម្មាធិការប្រតិបត្តិគណបក្សភ្លើងទៀនប្រចាំខេត្តកំពង់ចាម លោក តូច ថឹង យល់ឃើញថា មន្ត្រីពន្ធនាគារគួរតែបញ្ជូនលោក តូច ថឹង សម្រាកព្យាបាលនៅមន្ទីរពេទ្យខាងក្រៅតាមការណែនាំរបស់គ្រូពេទ្យ ជាជាងបន្តឃុំខ្លួនក្នុងពន្ធនាគារដែលមិនមានអនាម័យល្អ។
បើទោះបីជាគ្រូពេទ្យណែនាំឱ្យលោក តូច ថឹង ត្រូវសម្រាកព្យាបាលនៅមន្ទីរពេទ្យពី៣ ទៅ៤សប្ដាហ៍ក្ដី ក៏មន្ត្រីពន្ធនាគារបានបញ្ជូនលោក តូច ថឹង យកទៅឃុំខ្លួននៅពន្ធនាគារព្រៃសវិញកាលពីថ្ងៃទី៣០ ខែសីហា បន្ទាប់ពីលោកបានវះកាត់ភ្នែករួច។
ប្រពន្ធរបស់លោក តូច ថឹង គឺលោកស្រី សុ វណ្ណា ប្រាប់វិទ្យុអាស៊ីសេរីថា បើទោះបីជាគ្រូពេទ្យបានវះកាត់ជំងឺធ្លុះបាតភ្នែករបស់ប្ដីលោកស្រីដោយជោគជ័យក្ដី ប៉ុន្តែលោកស្រីនៅតែបារម្ភពីសុខភាពភ្នែករបស់ប្ដី។ លោកស្រីបន្ថែមថា ប្ដីរបស់លោកស្រីមិនមានតែជំងឺភ្នែកមួយប៉ុណ្ណោះទេ ប៉ុន្តែក៏មានជំងឺប្រចាំកាយផ្សេងទៀត ដូចជាជំងឺទឹកនោមផ្អែម និងលើសជាតិអាស៊ីដផងដែរ ដូច្នេះលោកស្រី នៅតែទទូចស្នើឱ្យតុលាការដោះលែងប្ដីរបស់លោកស្រីឱ្យមានសេរីភាពមកវិញ។
លោកស្រី សុ វណ្ណា៖ «សុខភាពប្ដីខ្ញុំមិនដឹងម៉េចទេ ខ្ញុំចង់ឱ្យពន្ធនាគារហ្នឹងសុំឱ្យប្ដីខ្ញុំមកនៅក្រៅឃុំតែម្ដងទៅ ព្រោះខ្ញុំមើលថែគាត់២ថ្ងៃហ្នឹង គាត់ពិបាកណាស់ ព្រោះគាត់ដេកផ្កាប់មុខរហូតអ៊ីចឹង»។
លោក តូច ថឹង គឺជាប្រធានគណៈកម្មាធិការប្រតិបត្តិគណបក្សភ្លើងទៀនប្រចាំខេត្តកំពង់ចាម។ អាជ្ញាធរក្រុងភ្នំពេញបានឃាត់ខ្លួនលោក កាលខែមីនា ពាក់ព័ន្ធនឹងសំណុំរឿងជាមួយលោក សៀម ភ្លុក និងលោក ឃឿន វីរ៉ាត់ ដែលតុលាការ កាត់ទោសឲ្យជាប់ពន្ធនាគារ ២ឆ្នាំ ៦ខែ ពីបទក្លែងបន្លំឯកសារក្នុងការបង្កើតគណបក្សបេះដូងជាតិ កាលពីឆ្នាំ២០២១។
ជុំវិញរឿងនេះ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ប្រាប់វិទ្យុអាស៊ីសេរីថា មន្ត្រីពន្ធនាគារមិនបានទទួលវេជ្ជបញ្ជាពីគ្រូពេទ្យដែលតម្រូវឱ្យលោក តូច ថឹង សម្រាកព្យាបាលនៅមន្ទីរពេទ្យនោះឡើយ។ ទោះជាយ៉ាងណា លោកបញ្ជាក់ថា មន្ត្រីពន្ធនាគារបានឃុំខ្លួនលោក តូច ថឹង នៅអគារមន្ទីរពេទ្យដាច់ដោយឡែកពីអ្នកជាប់ពន្ធនាគារទូទៅ។
លោក នុត សវនា៖ «យើងមានគ្រែសម្រាប់ឱ្យពួកគាត់សម្រាកយ៉ាងសមរម្យដូចក្នុងមន្ទីរពេទ្យអ៊ីចឹង មានឧបករណ៍សម្ភារៈសុខាភិបាលប្រចាំការនៅហ្នឹងទេ អ៊ីចឹងការសម្រាកវាធានាសន្តិសុខសណ្ដាប់ធ្នាប់ ហើយកម្លាំងរបស់យើងមិនបាច់ចំណាយពេលនៅក្រៅ ចាំយាមជាប្រចាំនាំខាតកម្លាំង ព្រោះកម្លាំងយើងក៏ខ្វះដែរ»។
ផ្ទុយពីការលើកឡើងនេះ សកម្មជនដែលធ្លាប់ជាប់ពន្ធនាគារលើកឡើងថា អគារមន្ទីរពេទ្យនៅក្នុងពន្ធនាគារមិនមានអនាម័យល្អនោះឡើយ ព្រោះអ្នកទោសមួយចំនួននៅតែជក់បារីនៅក្នុងបន្ទប់ ខណៈអ្នកទោសក្រីក្រដែលមានជំងឺធ្ងន់ធ្ងរជាច្រើន មិនបានទទួលការព្យាបាលដោយយកចិត្តទុកដាក់គ្រប់គ្រាន់នោះឡើយ។
ជុំវិញរឿងនេះដែរ មេធាវីការពារក្ដីលោក តូច ថឹង គឺលោក សឺន ជុំជួន ប្រាប់វិទ្យុអាស៊ីសេរីថា ស្ថានភាពជំងឺធ្លាយបាតភ្នែករបស់លោក តូច ថឹង គឺមានសភាពធ្ងន់ធ្ងរ ហើយកូនក្ដីរបស់លោកនេះ ក៏មានជំងឺប្រចាំកាយផ្សេងៗផងដែរ។ លោកបញ្ជាក់ថា លោកនឹងដាក់ពាក្យស្នើសុំឱ្យលោក តូច ថឹង នៅក្រៅឃុំទៅសាលាឧទ្ធរណ៍រាជធានីភ្នំពេញនៅដើមសប្ដាហ៍ក្រោយ។
អង្គការសង្គមស៊ីវិលលើកឡើងថា អាជ្ញាធរមិនបានអនុវត្តច្បាប់ដែលអនុញ្ញាតឱ្យជនជាប់ឃុំ បានទទួលការព្យាបាលនៅពេទ្យខាងក្រៅពន្ធនាគារដោយស្មើភាពគ្នារវាងអ្នកជាប់ឃុំ ដែលជាអ្នកមានលុយមានអំណាច និងសកម្មជននយោបាយនោះឡើយ។ ជាក់ស្ដែងបើទោះបីជាគ្រូពេទ្យបានពិនិត្យឃើញថា បាតភ្នែករបស់លោក តូច ថឹង បានធ្លាយ និងឈឺចុកចាប់ ដែលតម្រូវឱ្យវះកាត់ជាបន្ទាន់តាំងថ្ងៃទី១៤ ខែសីហា ក្ដី ក៏ប៉ុន្តែអាជ្ញាធរមិនបានអនុញ្ញាតឱ្យលោក តូច ថឹង ទទួលបានការវះកាត់ភ្លាមៗនោះឡើយ ដោយរង់ចាំរហូតដល់ថ្ងៃទី២៨ ខែសីហា ទើបលោកទទួលបានការវះកាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។