កូន​ភ្លោះ​២​នាក់ជា​​សកម្មជន​​បរិស្ថាននិង​សិទ្ធិ​មនុស្ស នឹង​​ប្ដឹង​ទៅ​ក្រសួង​មហា​ផ្ទៃអន្តរាគមន៍​​ករណីគំរាមកំហែងសកម្មភាព​​នយោបាយ

0:00 / 0:00

កូន​ភ្លោះ ២នាក់ ជា​សកម្មជន​បរិស្ថាននិង​សិទ្ធិ​មនុស្ស នឹង​ដាក់​ពាក្យ​ប្ដឹង​ទៅ​ក្រសួង​មហា​ផ្ទៃនៅ​ថ្ងៃ​ទី៨ ខែកញ្ញានេះ ឲ្យ​ជួយ​អន្តរាគមន៍​ករណី​គំរាមកំហែង​មក​លើ​ពួកគេ បន្ទាប់​​ពី​ពួកគេ​ចូលរួម​ក្នុង​សកម្មភាព​គណបក្ស​នយោបាយ។ យុវជន​កូន​ភ្លោះ​ទាំង២​រូប ​គឺលោក ជុំ ហួត និង​លោក ​ជុំ ហួរ អះអាង​ថា មាន​មនុស្ស​មួយ​ក្រុម​ជិត ១០​នាក់ ស្លៀកពាក់​ស៊ីវិល និង​ម្នាក់​មាន​ឯកសណ្ឋាន​នគរបាល បាន​ចុះ​ទៅ​គំរាមកំហែង​ចាប់​ខ្លួន​ពួកគេ​បញ្ជូន​ទៅ​អគ្គស្នងការដ្ឋាន​នគរបាល​ជាតិ ដល់​បន្ទប់​ជួល ស្ថិត​នៅ​ក្នុង​ខណ្ឌ​មានជ័យ រាជធានី​ភ្នំពេញ។

មន្ត្រី​គណបក្ស​ខ្មែរ​ស្រលាញ់​ជាតិ និង​ជា​សកម្មជន​ការពារ​បរិស្ថាននិង​សិទ្ធិ​មនុស្សលោក ជុំ ហួត និង ជុំ ហួរ បាន​ចាត់​ទុក​ទង្វើ​ដែល​អាជ្ញាធរ​ចុះ​ទៅ​គំរាម​ចាប់​ខ្លួន​ពួក​គេ ថា​ជា​ការ​គំរាមកំហែង និង​បំបិទ​សិទ្ធិ​សេរីភាព​យ៉ាង​ធ្ងន់ធ្ងរ ក្នុង​ការ​ចូលរួម​សកម្មភាព​នយោបាយ​ស្រប​ច្បាប់​របស់​ពួកគេ។

សមាជិក​គណៈកម្មការ​នាយក និង​ជា​ប្រធាន​ក្រុម​ការងារ​រាជធានី​ភ្នំពេញ​នៃ​គណបក្ស​ខ្មែរ​ស្រលាញ់​ជាតិលោក ជុំ ហួត ថ្លែង​ថា បណ្ដឹង​ដែល​លោក​និង​ប្អូន​ប្រុស​ដាក់​​ទៅ​​ក្រសួង​មហា​ផ្ទៃ​នេះ ដើម្បី​សុំ​ឲ្យ​មាន​កិច្ច​អន្តរាគមន៍​បន្ទាន់​មួយ បញ្ឈប់​ការ​គំរាមកំហែង​រាល់​សកម្មភាព​របស់​ពួកគាត់​ដែល​បាន​ទទួល​ស្គាល់​ដោយ​ក្រសួង​មហា​ផ្ទៃ​រួច​ហើយ។ លោក​ថា ក្រៅ​ពី​សំណុំ​រឿង​នេះ លោក​ក៏​ស្នើ​ឲ្យ​ក្រសួង​ពិនិត្យ​មើល​ទៅ​លើអាជ្ញាធរ​មូលដ្ឋាន​ដែរ ព្រោះ​តែងតែ​រារាំង និង​រំខាន​សកម្មភាព​របស់​គណបក្ស​ជា​ញឹកញាប់ ដូច​ជា​ ការទារ​រក​ច្បាប់​ទម្លាប់ឲ្យ​បញ្ជាក់​ពី​គោលបំណង​ធ្វើ​សកម្មភាព និង​ហាម​មិន​ឲ្យ​ជួបជុំ ឬ​លើក​ស្លាក​គណបក្ស​ជាដើម៖ « ក្នុង​នាម​ជា​ថ្នាក់​ដឹកនាំ​ជាន់​ខ្ពស់​របស់​គណបក្ស​ខ្មែរ​ស្រលាញ់​ជាតិ ហើយ​បាន​ទទួល​ស្គាល់​ពី​ក្រសួង​មហាផ្ទៃ​ទៀត​ ហេតុ​អីបាន​នាំ​គ្នា​មក​សម្រុក​ចូល​ដោយ​គ្មាន​ដីកា និង​លិខិត​បញ្ជាក់​អី​ទាំង​អស់ មក​ដក​ហូត​ទូរស័ព្ទ​មក​គំរាមកំហែង​ដក​ហូត​ ស្នងការ​នេះ​ហើយ​ជា​ការ​គំរាមកំហែង​ធ្ងន់​បំផុត។ ទី​២ រាល់​នៃ​ការ​ប្រជុំ​ជាមួយ​មន្ត្រី​ជាន់ខ្ពស់​របស់​គណបក្ស​ខ្មែរ​ស្រលាញ់​ជាតិ​ សូម​កុំ​ឲ្យ​អាជ្ញាធរ​មក​ហាម​ឃាត់ ព្រោះ​នៅ​ទីស្នាក់ការ​កណ្ដាល​គណបក្ស​នៅ​ព្រែកលៀប ប្រជុំ​ជាមួយ​ថ្នាក់​ដឹកនាំ​ជាន់​ខ្ពស់​ត្រូវ​បាន​អាជ្ញាធរ​គំរាមកំហែង ជា​ពិសេសលោក ជីវ កត្តា ជា​ប្រធាន​គណបក្ស​ត្រូវ​បាន​អាជ្ញាធរ​ចុះ​ទៅ​ផ្ទះ​គាត់​ផ្ទាល់​សុំ​អត្តសញ្ញាណប័ណ្ណ​សុំ​គោលការណ៍​នៃ​ការ​ជួបជុំ​ក្នុង​នោះ​មាន​ពួក​ប្អូនៗ​ដែរ»។

សំណើ​នេះ ធ្វើ​ឡើង​បន្ទាប់​ពីយុវជន​កូន​ភ្លោះ​ទាំង ២ គឺ​លោក ជុំ ហួត ជា​ប្រធាន និង​លោក ​ជុំ ហួរ ជា​​មន្ត្រី​កម្មវិធី​សមាគម​អ្នក​ស្រលាញ់​បរិស្ថាន និង​សង្គម អះអាង​ថា មាន​មនុស្ស​មួយ​ក្រុម​ជិត ១០​នាក់ ស្លៀកពាក់​ស៊ីវិល ក្នុង​ចំណោម​នោះ​ម្នាក់​មាន​ឯកសណ្ឋាន​នគរបាល​បាន​ចុះ​ទៅ​គំរាម​នឹង​ចាប់​ខ្លួន​ពួកគេ ទៅ​អគ្គស្នងការ​ដ្ឋាន​​នគរបាល​​ជាតិ ​ព្រម​ទាំង​ដក​ហូត​ទូរស័ព្ទ​ដៃ ដល់​បន្ទប់​ជួល​ដែល​ពួកគេ​រស់នៅ ស្ថិត​នៅ​ក្នុង​ភូមិ​វត្ត​សន្សំ​កុសល្យ សង្កាត់​បឹងទំពន់ ខណ្ឌ​មានជ័យ កាល​ពី​ថ្ងៃ​ទី៧ ខែកញ្ញា។

ពាក់ព័ន្ធ​រឿង​នេះ វិទ្យុ​អាស៊ី​សេរី​មិន​អាច​ទាក់ទង ប្រធាន​គណបក្ស​ខ្មែរ​ស្រលាញ់​ជាតិលោក ជីវ កត្តា ដើម្បី​បញ្ជាក់​បន្ថែម​បាន​ទេ​នៅ​ថ្ងៃ​ទី៧ ខែកញ្ញា។ គណបក្ស​នេះ បាន​ចុះ​បញ្ជី​នៅ​ក្រសួង​មហា​ផ្ទៃកាល​ពី​ថ្ងៃទី១០ ខែមេសា ឆ្នាំ២០២០ មាន​សមាជិក​ជិត ៧ ម៉ឺន​នាក់ ដែល​មាន​លោក ជីវ កត្តា ជា​អតីត​តំណាងរាស្ត្រ​នៃ​គណបក្ស​​សង្គ្រោះ​ជាតិ​​មណ្ឌល​កំពង់ចាម ជា​ប្រធាន។

លោក ជុំ ហួត បន្ត​ថា ការ​គំរាមកំហែង​នេះ លោក​គិត​ថា មាន​តែ​ជាប់​ពាក់ព័ន្ធ​នឹង​សកម្មភាព​ដែល​គាត់​ចូលរួម​ជាមួយ​គណបក្ស​ខ្មែរ​ស្រលាញ់​ជាតិ​ប៉ុណ្ណោះ។ លោក​ថា កាល​ពី​ប៉ុន្មាន​ថ្ងៃ​មុន​នេះ ក៏​មាន​ជន​ស៊ីវិល​ចុះ​ទៅ​ថតរូប​ដល់​ផ្ទះ​ជួល​របស់​ពួកគាត់​ដែរ។

លោក ជុំ ហួត បន្ថែម​ថា កាល​ពី​ដើម​ឆ្នាំ​២០២១ មាន​រដ្ឋលេខាធិការ​នៃ​ក្រសួង​អភិវឌ្ឍន៍​ជនបទ​ម្នាក់​កូតា​គណបក្ស​ប្រជាជន​កម្ពុជា​ដែល​លោក​សុំ​មិន​បញ្ចេញ​ឈ្មោះ មក​ប្រាប់​គាត់​ថា កុំ​ឲ្យ​ចូលរួម​ជាមួយ​គណបក្ស​នេះ ​ព្រោះ​នឹង​មាន​បញ្ហា​នៅ​ថ្ងៃ​ក្រោយ។ លោក ជុំ ហួត បន្ត​ទៀត​ថា ករណី​គំរាមកំហែង​នេះ គឺ​ជា​បុគ្គល​ដដែលៗ ដែល​ធ្លាប់​ចាប់​លោក​រុញ​បញ្ចូល​រថយន្ត​នៅ​ពេល​លោក​ចូលរួម​ទាមទារ​យុត្តិធម៌​សង្គម​កាល​ពី​ពេល​កន្លង​ទៅ។ បញ្ហា​នេះ លោក​បាន​ដាក់​ពាក្យ​ប្ដឹង​ទៅ អង្គការ​​សហប្រជាជាតិ​ទទួល​បន្ទុក​សិទ្ធិ​មនុស្ស​ប្រចាំ​កម្ពុជា និង​អង្គការ​សិទ្ធិ​មនុស្ស​ក្នុង​ស្រុក​ហើយ​នៅ​ថ្ងៃ​ទី៧ ខែកញ្ញា។

វិទ្យុ​អាស៊ី​សេរី​មិន​អាច​ទាក់ទង​អ្នក​នាំ​ពាក្យ​អគ្គស្នងការ​នគរបាល​ជាតិលោក ឆាយ គឹមខឿន ជុំវិញ​បញ្ហា​នេះ​បាន​ទេ​នៅ​ថ្ងៃ​ទី៧ ខែកញ្ញា។ ប៉ុន្តែ​លោក​ប្រាប់​អ្នក​សារព័ត៌មាន​ក្នុង​ស្រុក (VOD) ថា លោក​មិន​បាន​ដឹង​ព័ត៌មាន​នេះ​ទេ។

អ្នក​ឃ្លាំមើល​កិច្ចការ​បោះឆ្នោត​យល់​ថា រឿង​នេះ គឺ​ជា​រឿង​ពាក់ព័ន្ធ​នឹង​ការ​ប្រើប្រាស់​សិទ្ធិ​នយោបាយ។

អ្នក​សម្របសម្រួល​ផ្នែក​អង្កេត​របស់​អង្គការ​ឃ្លាំមើល​ការ​បោះ​ឆ្នោតខុមហ្វែ្រល(COMFREL)​លោក កន សាវាង្ស ​ថ្លែង​​ថា​ បើ​​មាន​​ទង្វើ​បែប​​នេះ មន្ត្រី​រាជការ​និង​អាជ្ញាធរ​​នោះ បាន​ធ្វើ​ខុស​ពី​កាតព្វកិច្ច តួនាទី និង​ភាព​អព្យាក្រឹត្យ​របស់​ខ្លួន៖ « យើង​អាច​ធ្វើ​តាម​នីតិវិធី អាច​ផ្ដល់​ព័ត៌មាន​ជជែក​ផ្ទាល់​ជាមួយ​ក្រសួង​មហា​ផ្ទៃ ផ្ដល់​ជា​លិខិត​ផ្ដល់​ជា​ការ​ប្ដឹងផ្ដល់​ណា​មួយ​ក៏​បាន​ដែរ ដើម្បី​ឲ្យ​លោក​ពិនិត្យ​មើល​រឿង​នេះ​ឡើង​វិញ​ថា​តើ​សិទ្ធិ​នយោបាយ ឬ​ក៏​តួនាទី​របស់​កងកម្លាំង​ប្រដាប់​អាវុធ​ឬ​ក៏​មន្ត្រី​រាជការ​ហ្នឹង​បាន​បំពេញ​ហើយ​ឬ​នៅ ? តើ​អាច​ផ្ដល់​ឲ្យ​សិទ្ធិ​នយោបាយ​អនុវត្ត​បាន​ពេញលេញ​ឬ​ក៏​អត់ ?»។

លោក ជុំ ហួត បាន​ឲ្យ​ដឹង​ថា ក្រៅ​ពី​ការ​រារាំង​មន្ត្រី​ក្នុង​ពេល​បំពេញ​សកម្មភាព​ការងារ ឬ​ក្រោម​រូបភាព​គំរាមកំហែង​ផ្សេងៗ​នោះ សាខា​ទីស្នាក់ការ​គណបក្ស​នៅ​តាម​ខណ្ឌ ក្នុង​រាជធានី​ភ្នំពេញ ក៏​ត្រូវ​បាន​ម្ចាស់​ផ្ទះ​ជួល​ដក​កិច្ចសន្យា​លែង​ជួល​ឲ្យ។ រីឯ ស្លាក​គណបក្ស​នៅ​តាម​បណ្ដា​ខេត្ត​មួយ​ចំនួន ដូចជា នៅ​ខេត្ត​កណ្ដាល កំពង់ស្ពឺ តាកែវ ព្រៃវែង បន្ទាយមានជ័យ និង​ខេត្ត​សៀមរាប ក៏​ត្រូវ​បាន​ជន​មិន​ស្គាល់​មុខ​កាប់​បំផ្លាញ​ចោល​អស់ ហើយ​ខាង​គណបក្ស​ដាក់​ពាក្យ​ប្ដឹង​ទៅ​ក្រសួង​មហា​ផ្ទៃ​នៅ​រយៈពេល ២​ខែ​ចុងក្រោយ​នេះ ប៉ុន្តែ​នៅ​ពុំ​ទាន់​ឃើញ​មាន​ចំណាត់​ការ​នៅ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។