ការថ្លែងរបស់អ្នកនាំពាក្យស្ថានទូតវៀតណាម ប្រចាំកម្ពុជា លោក ត្រាំង វ៉ាន់ថុង ដែលថាទឹកដីកម្ពុជាក្រោម គឺជារបស់វៀតណាម យូរយារមកហើយ ហើយបារាំង មិនបានកាត់ទឹកដីនេះឲ្យវៀតណាម នោះ បានធ្វើឲ្យពលរដ្ឋខ្មែរ និងយុវជនស្នេហាជាតិមួយចំនួនមានការខឹងសម្បា និងចង់ឲ្យរដ្ឋាភិបាល ឬតំណាងស្ថានទូតប្រទេសវៀតណាម ទទួលស្គាល់នូវប្រវត្តិសាស្ត្រ និងធ្វើការសុំទោសប្រជាពលរដ្ឋខ្មែរជាសាធារណៈ។
តើជនជាតិវៀតណាម ដែលកំពុងរស់នៅលើទឹកដីប្រទេសកម្ពុជា យល់ឃើញយ៉ាងណាចំពោះការដឹកនាំធ្វើបាតុកម្មទាមទារឲ្យមានការសុំទោសជាសាធារណៈនេះ?
អស់រយៈពេលជាច្រើនសប្ដាហ៍មកហើយ ដែលសហព័ន្ធនិស្សិតបញ្ញវន្តកម្ពុជា និងប្រជាពលរដ្ឋខ្មែរ ប្រតិកម្មទៅនឹងការថ្លែងរបស់អ្នកនាំពាក្យស្ថានទូតវៀតណាម ប៉ុន្តែជនជាតិវៀតណាម រស់នៅខេត្តកំពង់ឆ្នាំង ដែលគេមើលឃើញថា ជាខេត្តមួយមានអន្តោប្រវេសន៍វៀតណាម ទាំងស្រប និងមិនស្របច្បាប់ រស់នៅច្រើនជាងគេនៅកម្ពុជា នោះ ហាក់មិនសូវចាប់អារម្មណ៍នឹងការប្រតិកម្មនេះឡើយ។
ជនជាតិវៀតណាម ជាង ២០នាក់ នៅសង្កាត់ផ្សារឆ្នាំង និងឃុំឆ្នុកទ្រូ ដែលវិទ្យុអាស៊ីសេរី ជួបសម្ភាសដោយផ្ទាល់ និងតាមរយៈទូរស័ព្ទ បានថ្លែងស្រដៀងគ្នាថា ពួកគាត់មិនដឹងច្បាស់លាស់អំពីប្រវត្តិសាស្ត្រទឹកដីកម្ពុជាក្រោម នោះទេ ប៉ុន្តែការសុំទោសជាសាធារណៈចំពោះកំហុសឆ្គងប្រវត្តិសាស្ត្រអ្វីមួយ គឺត្រូវតែធ្វើ និងជាការទទួលខុសត្រូវរបស់អ្នកនិយាយ ឬអ្នកដែលបានធ្វើខុស។
ជនជាតិវៀតណាម ម្នាក់រស់នៅឃុំឆ្នុកទ្រូ លោក វិន យ៉ាំងមិន ចង់ឲ្យមានការសុំទោសជាសាធារណៈ ប្រសិនបើដឹងថា ការថ្លែងរបស់ស្ថានទូតវៀតណាម មានការខុសឆ្គងមែន ដើម្បីកុំឲ្យមានបញ្ហាវែងឆ្ងាយតទៅទៀត។ លោកយល់ថា គ្មាននរណាម្នាក់អាចបំភ្លៃប្រវត្តិសាស្ត្របាននោះទេ បើទោះបីជាលោកមិនសូវដឹងច្បាស់អំពីប្រវត្តិសាស្ត្រទឹកដីកម្ពុជាក្រោម៖ «អាប្រវត្តិសាស្ត្របងអត់ដឹងវាយ៉ាងម៉េច ព្រោះឥឡូវយើងនិយាយវាអត់ត្រូវ ខ្លាចវាខុសណា។ បើតាមខ្ញុំយល់ទៅ យើងជាប្រជាពលរដ្ឋ បើយើងទាមទារទៅក៏វាមិនត្រូវដែរ ប្រទេសមានអ្នកគ្រប់គ្រង គេដឹងប្រវត្តិសាស្ត្រតាំងពីមុន ដល់ឥឡូវខាងណាខាងណីដែលគេដឹងអស់ហើយ បើយើងទាមទារម៉េចកើត»។
ចំណែកជនជាតិវៀតណាម ម្នាក់ទៀតរស់នៅសង្កាត់ផ្សារឆ្នាំង លោក ថៃ ស្រ៊ុន យល់ថា ការតវ៉ាទាមទារឲ្យមានការសុំទោសនាពេលនេះ មិនសូវសំខាន់នោះទេ គឺស៊ីសងលើផែនទីប្រវត្តិសាស្ត្ររបស់ប្រទេសទាំងពីរ គឺកម្ពុជា និងវៀតណាម ដែលមានស្រាប់។ លោកបានលើកយកឧទាហរណ៍សំណង់អគារ និងផ្ទះសម្បែងធំៗនៅរាជធានីភ្នំពេញ មកធ្វើការប្រៀបធៀបនឹងទឹកដីកម្ពុជាក្រោម បច្ចុប្បន្នថា នៅក្រោយរបបខ្មែរក្រហមដួលរលំ គឺមានម្ចាស់ផ្ទះតិចតួចណាស់ដែលបានចូលទៅរស់នៅ និងមានប័ណ្ណកម្មសិទ្ធិលើទ្រព្យសម្បត្តិទាំងនោះវិញ ហើយបច្ចុប្បន្នគេមិនអាចទៅទាមទារមកធ្វើជាកម្មសិទ្ធិរបស់ខ្លួនវិញបានឡើយ៖ «តវ៉ាអារឿងហ្នឹងថ្នាក់លើៗគេដោះស្រាយទៅ ស៊ីសងអាដែងលើផែនទីពីដើមគេចែកយ៉ាងម៉េចអីម៉េច អ៊ីចឹងលើគេណោះទៅគេដោះស្រាយ។ ប្រទេសទាំងពីរគេសុទ្ធតែមានផែនទីព្រំប្រទល់ ហើយដីខាងណានៅខាងណាមានតែថ្នាក់លើទេដោះស្រាយ»។
ចំពោះជនជាតិវៀតណាម មួយចំនួនទៀតថ្លែងថា ពួកគាត់នឹងមិនខ្វល់ខ្វាយរឿងអ្វីទាំងអស់ ក្រៅពីការរកស៊ីចិញ្ចឹមជីវិត រីឯរឿងរ៉ាវប្រទេសជាតិ និងរឿងនយោបាយ ទុកឲ្យថ្នាក់ដឹកនាំកំពូលៗនៃប្រទេសទាំងពីរជាអ្នកដោះស្រាយ ប៉ុន្តែស្នើឲ្យការដោះស្រាយទាំងនោះត្រូវតែមានសន្តិភាព និងមិនបង្កឲ្យមានផលប៉ះពាល់ដល់ការរស់នៅ និងសេចក្ដីថ្លៃថ្នូររបស់ពលរដ្ឋទូទៅ។
ទាក់ទងបញ្ហានេះ ប្រធានសហព័ន្ធនិស្សិតបញ្ញវន្តកម្ពុជា លោក ម៉ៅ ពិសេស មានប្រសាសន៍ថា លោកនៅតែប្រកាន់ជំហរទាមទារឲ្យមានការសុំទោសជាសាធារណៈដោយអហិង្សា ពីសំណាក់ប្រទេសវៀតណាម ចំពោះការថ្លែងបំភ្លៃប្រវត្តិសាស្ត្រ ទាក់ទងនឹងទឹកដីកម្ពុជាក្រោម។ លោកថា ក្នុងករណីដែលពុំមានការសុំទោសជាសាធារណៈ គឺមានន័យថា ប្រទេសវៀតណាម មានចេតនាពិតប្រាកដក្នុងការមើលងាយប្រជាជនខ្មែរ៖ «អ៊ីចឹង បើសិនជាគាត់សុំទោសបងមានន័យថា គាត់មិនមានចេតនាចង់មើលងាយប្រជាពលរដ្ឋខ្មែរទេ គឺគាត់ពិតជាច្រឡំអំពីប្រវត្តិសាស្ត្រមែន»។
អ្នកស្រាវជ្រាវផ្នែកការអភិវឌ្ឍសង្គម លោក កែម ឡី ដែលបានឃ្លាំមើលសកម្មភាពតវ៉ា និងដាក់ញត្តិនៅតាមស្ថានទូតនានារបស់ក្រុមអ្នកតវ៉ានៅថ្ងៃទី២១ ខែកក្កដា នេះយល់ថា ប្រសិនបើរដ្ឋាភិបាលបណ្ដែតបណ្ដោយឲ្យបញ្ហានេះទុំជោរ អាចនឹងបង្កឲ្យមានបញ្ហាច្រើន ប៉ុន្តែបើរដ្ឋាភិបាលសម្របសម្រួលបានល្អ គឺអាចធ្វើឲ្យមានការស្រុះស្រួលគ្នាឡើងវិញ ហើយគេត្រូវតែចាប់ផ្ដើមជជែកគ្នាពីរឿងនយោបាយ ឬកំណែទម្រង់រដ្ឋ ទើបជាការប្រសើរ៖ «ជាមធ្យោបាយល្អ ស្ថានទូតវៀតណាម គួរតែចេញមកទទួលញត្តិ ហើយក្រោយទៅធ្វើការឆ្លើយតបឲ្យសមស្របទៅនឹងស្ថានភាពនេះ ហើយបើមិនអ៊ីចឹងទេ គឺអាចនឹងឈានដល់ការបង្ហូរឈាម»។
ក្រុមយុវជន និស្សិត ប្រជាពលរដ្ឋ និងព្រះសង្ឃខ្មែរក្រោម នាំគ្នាដង្ហែញត្តិដាក់ជូនស្ថានទូតបានចំនួន៦ នៅថ្ងៃទី២១ ខែកក្កដា គឺពុំមានការប៉ះទង្គិចគ្នារវាងក្រុមអ្នកតវ៉ា និងសមត្ថកិច្ចនោះទេ។ ប៉ុន្តែកាលពីថ្ងៃទី៨ ខែកក្កដា នៅគ្រាដែលពួកគេតវ៉ានៅមុខស្ថានទូតវៀតណាម ប្រចាំកម្ពុជា ដើម្បីទាមទារឲ្យមន្ត្រីស្ថានទូតប្រទេសនេះទទួលស្គាល់ការពិតប្រវត្តិសាស្ត្រទឹកដីកម្ពុជាក្រោម និងសុំទោសប្រជាពលរដ្ឋខ្មែរជាសាធារណៈ ត្រូវកម្លាំងសមត្ថកិច្ចរដ្ឋាភិបាលកម្ពុជា បង្ក្រាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។