មតិ​ពលរដ្ឋ​ ជុំវិញ​ការ​អនុម័ត​ច្បាប់​ពិធី​សារ​ខណ្ឌសីមា និង​​​ការ​បង្គោល​ព្រំដែន​គោក​កម្ពុជា និង​វៀតណាម

0:00 / 0:00

ពលរដ្ឋ​មួយ​ចំនួន ​​​មិន​ពេញ​ចិត្ត ចំពោះ​ការ​អនុម័ត សេចក្ដី​ព្រាង​ច្បាប់​ស្ដីពី​ពិធី​សារ ខណ្ឌសីមា និង​​ការ​បង្គោល​ព្រំដែន​គោក កម្ពុជា វៀតណាម ទេ​ ដោយ​​យល់​ថា ​ជា​ឯកសារ​ធ្វើ​ឲ្យ​ខ្មែរ​បាត់បង់​ដី​តាម​ព្រំដែន និង​ខាត​ផល​ប្រយោជន៍​ជាតិ​ខ្មែរ។ ចំណែក​អ្នក​​​គាំទ្រ​គណបក្ស​កាន់​អំណាច​​វិញ​ ថា ពួក​គាត់​ពេញ​ចិត្ត​ និង​គាំទ្រ​ចំពោះ​សេចក្ដី​ព្រាង​ច្បាប់​នេះ។

ក្រុម​យុវជន និង​មន្ត្រី​គណបក្ស​នយោបាយ ថ្កោល​ទោស​ក្រុម​តំណាង​រាស្ត្រ​រដ្ឋសភា​ឯក​បក្ស ដែល​បាន​ការ​អនុម័ត លើ​សេចក្ដី​ព្រាង​ច្បាប់​ស្ដីពី​ពិធី​សារ ខណ្ឌ​សីមា​នេះ។ យុវតី​គាំទ្រ​គណបក្ស​សង្គ្រោះ​ជាតិ​ម្នាក់ កំពុង​​ភៀស​ខ្លួន​ នៅ​ប្រទេស​ម៉ាឡេស៊ី កញ្ញា សៅ ឧសភា មើល​ឃើញ​ថា ការ​អនុម័ត​សេចក្ដី​ព្រាង​ច្បាប់ ស្ដីពី​ពិធី​សារ និង​ការ​បោះ​បង្គោល​ព្រំដែន​គោក ៨៤ភាគ​រយ​នោះ​ថា ធ្វើ​ឡើង​ក្នុង​ស្ថានភាព​វាយ​បង្ក្រាប​ធ្ងន់ធ្ងរ​ទៅ​លើ​អ្នក​ឃ្លាំមើល​បញ្ហា​ព្រំដែន អ្នក​ដែល​ហ៊ាន​និយាយ រិះគន់​អំពី​រឿង​នេះ។

យុវតី​រូប​នេះ ទាមទារ​ឲ្យ​ដោះលែង​អ្នក​ឃ្លាំមើល​ព្រំដែន​ពី​ពន្ធនាគារ​ទាំង​អស់​វិញ​សិន ហើយ​​អនុញ្ញាត​ឲ្យ​អ្នក​ឃ្លាំមើល​ព្រំដែន​ទាំង​អស់ បាន​ចូលរួម​សកម្មភាព ដោយ​សេរី ទើប​មិន​ធ្វើ​ឲ្យ​ខាត​ប្រយោជន៍​ខ្មែរ៖ «( ច្បាប់​ស្ដីពី​ពិធី​សារ ) សារ​ដែល​គាត់​ ( រដ្ឋ​សភា ) ទើប​តែ​អនុម័ត​ហ្នឹង ខ្ញុំ​គិត​ថា គឺ​ជា​រឿង​មួយ ដែល​ធ្វើ​ឲ្យ​ខាត​ប្រយោជន៍​ពលរដ្ឋ​ខ្មែរ​ទៀត​ហើយ ពី​ព្រោះ​អ្វី ថ្ងៃ​នេះ គាត់​កាត់​ឲ្យ​គេ ជា​រឿង​មួយ​ដែល​ធម្មតា​។ តែ​ថ្ងៃ​ក្រោយ គាត់​ឲ្យ​គេ​ពេញ​សិទ្ធិ​ ដូច​ករណី ដែល​គាត់​ហ្នឹង ឲ្យ​ជន​អន្តោប្រវេសន៍​យួន ទាំង​អស់​ហ្នឹង ពេញ​សិទ្ធិ ដូច​សព្វ​ថ្ងៃ។ សម្រាប់​ខ្ញុំ​ ជា​យុវជន​យល់​ថា អា​ទង្វើ​ហ្នឹង ( អនុម័ត ) វា​មាន​តែ​ធ្វើ​ឲ្យ​ខាត​បង់​ដល់​ប្រយោជន៍​ពលរដ្ឋ​ខ្មែរ ហើយ​មាន​តែ​​ធ្វើ​ឲ្យ​ខ្មែរ​ហ្នឹង គាត់​លំបាក​ទៅ​ថ្ងៃ​ក្រោយ​ទៀត»

ប៉ុន្តែ អ្នក​​​គាំទ្រ​គណបក្ស​កាន់​អំណាច​វិញ​ថា ពួក​គាត់​ពេញ​ចិត្ត ចំពោះ​ការ​អនុម័ត​ឯកសារ​ព្រំដែន​ កម្ពុជា និង​វៀតណាម​នេះ ហើយ​ជឿជាក់​លើ​រដ្ឋាភិបាល និង​រដ្ឋសភា ក្នុង​ការ​អនុម័ត​ច្បាប់​ស្ដីពី​ពិធីសារ និង​​ការ​បោះ​បង្គោល​ព្រំដែន​គោក ៨៤ភាគ​រយ។

យុវជន និង​ជា​សមាជិក​ក្រុម​ប្រឹក្សា​ខណ្ឌ​ជ្រោយ​ចង្វា លោក ជួន ប៊ុនរឿន យល់​ថា ការ​​ចោទ​ប្រកាន់​នានា ​ពាក់ព័ន្ធ​នឹង​បញ្ហា​ព្រំដែន ឬ​ការ​បាត់បង់​ដី​ជា​ដើម សុទ្ធ​តែ​ជា​រឿង​នយោបាយ​ច្រើន​ជាង​ ព្រោះ ​លោក​ជឿ​ជាក់​ថា រដ្ឋាភិបាល និង​សហគមន៍​អន្តរជាតិ​ មិន​បណ្ដោយ​ឲ្យ​មាន​ការ​ឈ្លានពាន ឬ​ការ​រំលោភ​បំពាន​ព្រំដែន​គ្នា​ឡើយ។ លោក​យល់​ថា ការ​អនុម័ត​ច្បាប់ ដើម្បី​ទទួល​ស្គាល់​ឯកសារ​ព្រំដែន​ នឹង​ធ្វើ​ឲ្យ​បញ្ចប់​​​ភាព​កេង​ចំណេញ​នយោបាយ និង​មាន​ព្រំដែន​ត្រឹមត្រូវ​សម្រាប់​កូន​ខ្មែរ​ជំនាន់​ក្រោយ៖ « ខ្មែរ​ស្ទើរ​គ្រប់​ជំនាន់​ហើយ តែង​តែ​យក​​បញ្ហា​ព្រំដែន​នេះ ធ្វើ​ជា​លេស​បំផុស​បំផុល​​នាំ​ឲ្យ​មាន​ការ​បែកបាក់​គ្នា។ ខ្ញុំ​ជឿ​ថា បញ្ហា​ព្រំដែន ក៏​ដូចជា​ការ​បាត់​ ការ​​អ្វី​នេះ វា​គ្រាន់​តែ​ជា​លេស​មួយ ដូច​អ្វី​ដែល​ខ្ញុំ​និយាយ​អ៊ីចឹង​ ខ្ញុំ​ចង់​ឲ្យ​បញ្ចប់​ ដើម្បី​កុំ​ឲ្យ​មាន​លេស​ហ្នឹង​ត​ទៅ​ទៀត។ ខ្ញុំ​ជឿ​ថា ពិភព​លោក គេ​មិន​ល្ងង់​ជាង​ពួក​យើង​ប៉ុន្មាន​ទេ គេ​ធ្វើ​ការ គេ​មាន​ផែន​ទី​ត្រឹមត្រូវ»

ប្រធាន​គណៈកម្មការ​ប្រតិបត្តិ​គណបក្ស​សង្គ្រោះ​ជាតិ​ខេត្ត​ស្វាយរៀង និង​ជា​អ្នក​ឃ្លាំមើល​ព្រំដែន នៅ​​ខេត្ត​ស្វាយរៀង លោក ម៉ៅ វិបុល សង្កេត​ឃើញ​ថា ខ្លឹមសារ​ច្បាប់​ទាក់ទង​នឹង​ព្រំដែន​ទាំង​ឡាយ​ គ្មាន​ឥទ្ធិពល​ធ្វើ​ឲ្យ​វៀតណាម​បញ្ឈប់​សកម្មភាព​រំលោភ​បំពាន​ដី​ស្រែ​ របស់​ពលរដ្ឋ​ខ្មែរ នៅ​តាម​ព្រំដែន​​បាន​ឡើយ ហើយ​សេចក្ដី​ព្រាង​ច្បាប់​ថ្មី​ ដែល​រដ្ឋសភា​ទើប​អនុម័ត​នេះ ក៏​ដូច​គ្នា។

មន្ត្រី​បក្ស​ប្រឆាំង​ កំពុង​ភៀសខ្លួន​នៅ​ប្រទេស​ថៃ​ និង​​​ មាន​ដីកា​​តាម​ចាប់​ខ្លួន​ ចំនួន ៩ដីកា រូប​នេះ​ ​យល់​ថា មាន​តែ​​ការ​រួបរួម​គ្នា សាមគ្គី​របស់​ពលរដ្ឋ​ខ្មែរ និង​មាន​ការ​ជួយ​ជ្រោមជ្រែង​ពី​អន្តរជាតិ តាម​ខ្លឹមសារ​​កិច្ច​ព្រមព្រៀង​សន្តិភាព​ទីក្រុង​ប៉ារីស ២៣ តុលា ទើប​អាច​ការពារ​ព្រំដែន​ខ្មែរ​ឲ្យ​ស្ថិតស្ថេរ​បាន។ ឯ​ច្បាប់​​ព្រំដែន​ទាំង​ឡាយ​ផ្សេង​ទៀត លោក អះអាង​ថា របប​ក្រុង​ភ្នំពេញ ធ្វើ​ឡើង​ ក្រោម​ឥទ្ធិពល​របស់​វៀតណាម៖ « ខ្ញុំ​មិន​ជឿ​លើ​រដ្ឋាភិបាល ដែល​ដឹកនាំ​ដោយ​ លោក ហ៊ុន សែន ទេ ព្រោះ លោក ហ៊ុន សែន បម្រើ​បរទេស ហើយ​ទឹក​ដី​​​សព្វ​ថ្ងៃ​នេះ ដែល​ពលរដ្ឋ​រងគ្រោះ​នោះ គាត់​ថែម​ទាំង​ត្អូញត្អែរ ថែម​ទាំង​យំ​សោក បោក​ខ្លួន។ ឥឡូវ​នេះ គាត់ ( ពលរដ្ឋ ) លែង​ហ៊ាន​យំ​អ្វី​ទៀត ដោយសារ​អស់​ទឹក​ភ្នែក​ ដែល​ត្រូវ​យំ​ហើយ។ ទឹក​ដី​ត្រូវ​បាត់បង់ ត្រូវ​គេ​យក​ហើយ​ហ្នឹង ហើយ​ដូន​តា​របស់​គាត់ ដែល​នៅ​រស់ ( ជា​សាក្សី ) ។ យួន​ចង់​ទៅ​បោះ ( បង្គោល​ព្រំដែន ) នៅ​ត្រង់​ណា​ក៏​បាន​ដែរ ក្រុម​លោក ហ៊ុន សែន អត់​មាត់ អត់​ក​ទេ ហើយ​មួយ​ទៀត គឺ ហ៊ុន សែន ជា​អ្នក​បម្រើ​យួន បន្តុប​ដោយ​យួន។ អ៊ីចឹង មិន​អាច​ដោះ​ស្រាយ​ចេញ​ទេ។ មាន​តែ​អន្តរជាតិ ហើយ​និង​ពលរដ្ឋ​ខ្មែរ​ទេ ទើប​អាច​ដោះ​ស្រាយ​បញ្ហា​ទាំង​នេះ​បាន»

ចំណែក​ពលរដ្ឋ​ខ្លះ​​ កំពុង​រស់​នៅ​ក្នុង​ប្រទេស​កម្ពុជា និង​អ្នក​​រស់​នៅ​តាម​ព្រំដែន​កម្ពុជា ​វៀតណាម​​ខ្លះ មិន​ហ៊ាន​បញ្ចេញ​មតិ​រឿង​ព្រំដែន ឬ​ច្បាប់ ទាក់ទង​នឹង​រឿង​​ព្រំដែន​នេះ​ឡើយ ព្រោះ​ពួក​គេ​បារម្ភ​ការ​គំរាម​កំហែង បំភិត​បំភ័យ ការ​​បង្ក្រាប ការ​ធ្វើ​បាប ការ​ចាប់​ដាក់​ពន្ធនាគារ ដូច​អ្នក​ឃ្លាំមើល​ព្រំដែន​ផ្សេង​​ទៀត។

ពលរដ្ឋ​​​ម្នាក់ រស់​នៅ​ខេត្ត​ស្ទឹងត្រែង លោក ថាន់ វ៉ន ប្រាប់​ថា បញ្ហា​ និង​ច្បាប់​ទាក់ទង​នឹង​ព្រំដែន​ រដ្ឋាភិបាល ហាក់​មិន​សូវ​បង្ហាញ ​ជា​ចំហ​ទេ ម្ល៉ោះ​ហើយ លោក​មិន​ហ៊ាន​បញ្ចេញ​មតិ​ឡើយ៖ « រឿង​ព្រំដែន ខ្ញុំ​មិន​អាច​និយាយ​បាន​ទេ ពីព្រោះ​ខ្ញុំ​ឥឡូវ​នេះ កំពុង​ជាប់​ចោទ ( គេ​ប្ដឹង ) គេ​ខ្លាំង​ណាស់»

ប្រធាន​គណបក្ស​បំណង​ពលរដ្ឋ​ លោក អ៊ិត សារម្យ សង្កេត​ឃើញ​ថា រដ្ឋាភិបាល ហាក់​មិន​​​បាន​បង្ហាញ​ឯកសារ​ព្រំដែន​ជា​សាធារណៈ ឲ្យ​បាន​ជាក់លាក់​មែន និង​តែងតែ​ចាប់​ខ្លួន​អ្នក​ឃ្លាំមើល​ព្រំដែន​ជា​បន្ត​បន្ទាប់ បណ្ដាល​ឲ្យ​ពលរដ្ឋ​ភ័យ ពេល​បញ្ចេញ​មតិ​រឿង​ព្រំដែន។

លោក​យល់​ថា ការ​អនុម័ត​សេចក្ដី​ព្រាង​ច្បាប់​ស្ដីពី​ពិធីសារ​ និង​ការ​បោះ​បង្គោល​ព្រំដែន​​គោក​រួច​រាល់ ចំនួន ៨៤ភាគ​រយ​នេះ គឺ​ទាំង​រដ្ឋាភិបាល និង​រដ្ឋសភា មិន​បាន​ផ្សព្វផ្សាយ​ខ្លឹមសារ​ច្បាប់​នេះ ឲ្យ​បាន​ទូលាយ​ប៉ុន្មាន​ទេ។

ប្រធាន​គណបក្ស​នយោបាយ​រូប​នេះ ចង់​ឲ្យ​អាជ្ញាធរ​បង្ហាញ និង​ពន្យល់​ឯកសារ ពាក់ព័ន្ធ​នឹង​រឿង​ព្រំដែន​ទាំង​អស់ ដល់​ពលរដ្ឋ​ឲ្យ​បាន​ទូលំទូលាយ ព្រោះ​បញ្ហា​ទឹកដី ជា​រឿង​របស់​ពលរដ្ឋ​ខ្មែរ​ជា​ម្ចាស់​ប្រទេស​ទាំង​អស់​គ្នា។ លោក អ៊ិត សារម្យ ក៏​ទាមទារ​ឲ្យ​រដ្ឋាភិបាល​ដោះ​លែង​អ្នក​ឃ្លាំមើល​ព្រំដែន​វិញ ហើយ​បញ្ឈប់​ការ​ចាប់​ចង​ធ្វើ​បាប​អ្នក​ឃ្លាំមើល​ព្រំដែន​ទាំង​អស់៖ « ព្រោះ​បញ្ហា​ទឹក​ដី ជា​ការ​ទទួល​ខុស​ត្រូវ​របស់​ប្រជា​ពលរដ្ឋ​ខ្មែរ​ទាំង​អស់។ មិន​មែន​ជា​របស់​អ្នក​នយោបាយ​បក្ស​ណា​មួយ ក្រុម​ណា​មួយ​ទេ ព្រោះ​ទឹក​ដី វា​បន្ត នៅ​​មាន​ជា​​និរន្តរភាព​ ដល់​ប្រទេស​ជាតិ​របស់​យើង ដល់​ជន​រួម​ជាតិ​របស់​យើង។ និយាយ​ទៅ ​ពូជ​សាសន៍​ខ្មែរ​បន្ត​ទៀត នៅ​លើ​ទឹក​ដី​ហ្នឹង។ អ៊ីចឹង ទាមទារ​ឲ្យ​មាន​ការ​​ចូលរួម​របស់​ខ្មែរ​ទាំង​អស់។ ខ្មែរ​អ្នក​នយោបាយ ខ្មែរ​មិន​មែន​អ្នក​នយោបាយ។ ជា​ពិសេស​ស្ថាប័ន​រដ្ឋសភា ជា​ស្ថាប័ន​តំណាង​ឲ្យ​ប្រជាពលរដ្ឋ​​ ត្រូវ​តែ​បង្ហាញ​​ ឬ​ក៏​ផ្សព្វផ្សាយ​​​ព័ត៌មាន​ឲ្យ​ច្បាស់​លាស់​ ដល់​ប្រជាពលរដ្ឋ​ខ្មែរ ថា ទឹក​ដី​របស់​ខ្មែរ នៅ​ពេល​បច្ចុប្បន្ន​នេះ វា​អត់​មាន​ការ​បាត់​បង់​ ដោយ​ផ្អែក​លើ​មូលដ្ឋាន​បច្ចេកទេស ក្នុង​ការ​វាស់វែង​ ឬ​ក៏​គណៈកម្មការ​ព្រំដែន​​ហ្នឹង ឲ្យ​វា​​បាន​ត្រឹមត្រូវ ឲ្យ​បាន​ទូលំ​ទូលាយ។ កុំ​ឲ្យ​ធ្វើ​ហ្នឹង វា​មាន​ការ​សង្ស័យ»

រីឯ​ក្រុម​អ្នក​ឃ្លាំមើល​ព្រំដែន​កម្ពុជា មាន​មូលដ្ឋាន​នៅ​ខាង​ក្រៅ​ប្រទេស​វិញ បន្ត​ចោទ​ថា រដ្ឋសភា​ឯក​បក្ស បាន​អនុម័ត​សេចក្ដី​ព្រាង​ច្បាប់​ស្ដីពី​ពិធីសារ​ខណ្ឌ​សីមា និង​ឯកសារ​បោះ​បង្គោល​ព្រំដែន​គោក​៨៤ភាគ​រយ​នេះ គឺ​ធ្វើ​ឡើង​តាម​ការ​បង្គាប់​របស់​វៀតណាម ដើម្បី​ឲ្យ​ការ​ឈ្លានពាន​ដី​ខ្មែរ នៅ​តាម​ព្រំដែន​ក្លាយ​ជា​សកម្មភាព​ស្រប​ច្បាប់។ តែ​យ៉ាង​ណា ភាគី​រដ្ឋាភិបាល​បដិសេធ​ការ​ចោទ​ប្រកាន់​នេះ និង​​ហៅ​ការ​ចោទ​នេះ​ថា ជា​​សកម្មភាព​ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​តាម​ព្រំដែន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។