ភរិយាសកម្មជនគណបក្សប្រឆាំងនៅស្រុកវាលវែង ដែលកំពុងជាប់ពន្ធនាគារខេត្តពោធិ៍សាត់ ទាមទារឱ្យតុលាការទម្លាក់ការចោទប្រកាន់មកលើស្វាមីរបស់ពួកគាត់ និងដោះលែងឱ្យមានសេរីភាពឡើងវិញឱ្យបានឆាប់។ សកម្មជនបក្សប្រឆាំងស្រុកវាលវែងចំនួន ៦នាក់ ត្រូវបានសមត្ថកិច្ចចាប់ខ្លួនដោយប្រកាន់ពីបទទន្ទ្រានដីព្រៃខុសច្បាប់។ ប៉ុន្តែភរិយាជនជាប់ឃុំ អះអាងថា ពួកគាត់ពុំបានធ្វើខុសដូចការចោទប្រកាន់ឡើយ។
ប្រពន្ធជំទប់ទី២ ជាប់ឆ្នោតគណបក្សសង្គ្រោះជាតិឃុំអូរសោម ស្រុកវាលវែង អ្នកស្រី ឌឹម ញ ប្រាប់អាស៊ីសេរីនៅថ្ងៃទី២១ កក្កដាថា ស្វាមីរបស់ស្រី គឺលោក មុំ ភី មានជំងឺទឹកនោមប្រៃ និងបញ្ហាសុខភាពផ្សេងៗ ទៀត ត្រូវលេបថ្នាំជាប្រចាំ។ អ្នកស្រីបន្តថា ចាប់តាំងពីសមត្ថកិច្ចចាប់ស្វាមីដាក់ពន្ធនាគារកាលពីថ្ងៃទី១៦ មិថុនាមក អ្នកស្រីទើបតែបានទៅសួរសុខទុក្ខប្ដីម្ដងទេ ដោយសារគ្មានថវិកា ព្រោះបាត់បង់ស្វាមីជាបង្គោលក្នុងគ្រួសាររកប្រាក់ចំណូលដោះស្រាយជីវភាពប្រចាំថ្ងៃ។ ស្រីបន្ថែមថា ស្វាមីរបស់អ្នកស្រីមិនបានកាប់ទន្ទ្រានដីព្រៃដូចការចោទប្រកាន់របស់តុលាការនោះទេ៖ «វាមិនយុត្តិធម៌ដល់អីចឹង ត្រូវថាយើងអត់មានដីប្រធានភូមិក៏គេដឹងលឺ គេដឹងថាគាត់អត់មានដីមែន ហើយខាងអង្គការមកដល់ផ្ទះខ្ញុំសម្ភាសន៍ខ្ញុំ ហើយមកដល់ថាគាត់គ្មានដីអីមែន។ខ្ញុំមិនដឹងថាម៉េចដល់គេចាប់អីចឹងទៅខ្ញុំចេះតែគិតវែងឆ្ងាយ ចាស់ៗហើយ ចុងក្រោយត្រូវជាជាប់គុក ប៉ុន្តែចិត្តមួយទៀតមានកំហឹង នឹកឃើញថា គេមានដីបួនដប់ម្ភៃហិកតារលក់ ហេតុអីឯងក្នុងឃុំមិនដែលមានដីលក់ដូចគេម្ដងទៅជាអីចឹង ខ្ញុំនឹកឃើញគ្រាំគ្រាចិត្តណាស់រាល់ថ្ងៃនេះ » ។
បន្ថែមពីនេះសាច់ញាតិសកម្មជនបក្សប្រឆាំងនៅស្រុកវាលវែងទាំងនោះក៏បានទាមទារឱ្យអាជ្ញាធរពាក់ព័ន្ធជួយរកយុត្តិធម៌ដល់ស្វាមីរបស់ពួកគាត់ ឱ្យឆាប់បាននៅក្រៅឃុំ ដើម្បីបានជួបជុំក្រុមគ្រួសារឡើងវិញ។
ចំណែកអ្នកស្រី ប៉ែន សាវ៉ន ភរិយាលោក ចាន់ សុផលសកម្មជនបក្សសង្គ្រោះជាតិឃុំអូរសោមម្នាក់ទៀត ថ្លែងថា តាំងស្វាមីត្រូវបានចាប់ខ្លួន កាលថ្ងៃទី២៨ ខែឧសភាមក ធ្វើឱ្យអ្នកស្រីខ្វាយខ្វល់សម្រាន្តមិនលក់រហូតធ្លាក់ខ្លួនឈឺ ដោយពុំបានដឹងអំពីសុខទុក្ខប្ដីក្នុងពន្ធនាគារយ៉ាងណានោះទេ។ អ្នកស្រី បន្ថែមថា តុលាការចោទប្រកាន់ស្វាមីរបស់ខ្លួនពីបទទន្ទ្រានដីព្រៃ គ្រាន់តែជាការប្រឌិត ដើម្បីចាប់ខ្លួន ដោយសារលោកជាសកម្មជនគណបក្សសង្គ្រោះជាតិក្នុងឃុំអូរសោម ដែលមានសកម្មភាពនយោបាយ ហើយជាឆ្អឹងទទឹងកររបស់អាជ្ញាធរខេត្តពោធិ៍សាត់៖ «ខ្ញុំដៅទៅរឿងបក្សនឹងព្រោះវាគ្មានអីនឹងការងារត្រូវយើងបានព្រោះមិនដែលធ្វើអីខុសផង ប៉ុន្តែតាំងពីគាត់មកនៅឃុំអូរសោមមកគេរកតែចាប់គាត់ ប៉ុន្តែគាត់អត់មានកំហុសអីត្រូវចោទប្ដីខ្ញុំ។គេចេះតែលួចប្រាប់មកថាបងឯងធ្វើប្រធានបក្សប្រឆាំងអីចឹងបងឯងត្រូវប្រុងប្រយ័តខ្លួនតិចទៅ តែគាត់មិនខ្លាចគេ ហើយប្រាប់គាត់ក៏គាត់ថាម៉េចក៏ខ្លាចគេម្ល៉េះ » ។
អាស៊ីសេរីមិនអាចទាក់ទងអ្នកនាំពាក្យក្រសួងយុត្តិធម៌ លោក ឈិន ម៉ាលីន និងអ្នកនាំពាក្យសាលាដំបូងខេត្តពោធិ៍សាត់ លោក ឆាយ ហុង ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី២១ កក្កដា ដោយទូរស័ព្ទពុំមានអ្នកទទួល។
មេធាវីការពារក្ដីឱ្យសកម្មជនបក្សប្រឆាំងស្រុកវាលវែង លោកប៊ុន រិទ្ធី មានប្រសាសន៍ថា ចាប់តាំងពីសមត្ថកិច្ចចាប់ពួកគាត់ដាក់ពន្ធនាគារមក លោកបានចូលជួបកូនក្ដីរបស់លោក គឺលោក ចាន់ សុផល និង ទួន សំអាត ចំនួន ២លើក ក្នុងនោះលោក ទួន សំអាត មានជំងឺធ្ងន់ធ្ងរប្រចាំកាយ ហើយបានទៅព្យាបាលខាងក្រៅពន្ធនាគារម្ដងរួមមកហើយ។ លោក បញ្ជាក់ថា លោកនឹងខំរកភស្តុតាងដោះបន្ទុកជួយដល់កូនក្ដីរបស់លោក ដើម្បីឱ្យបានរួចផុតពីការចោទប្រកាន់នេះ៖ «ដែលខ្ញុំត្រូវធ្វើការវាទាក់ទិននឹងផ្លូវច្បាប់ និងការចោទប្រកាន់ បើសិនណាមិនមានភស្តុតាងក្នុងការចោទប្រកាន់ទេ រឿងនេះនីតិវិធី វាត្រូវតែលើកលែងគាត់ឱ្យមានសេរីភាព ប៉ុន្តែខ្ញុំមិនអាចនិយាយបានអំពីតុលាការទេ ថាតើលោកចៅ ក្រម គាត់យល់ឃើញយ៉ាងម៉េច លោក ព្រះរាជអាជ្ញាយល់ឃើញយ៉ាងម៉េចខ្ញុំមិនអាចទស្សន៍ទាយត្រូវបានទេ ប៉ុន្តែមិនទាន់មានភស្តុតាងគ្រប់គ្រាន់ក្នុងការដាក់បន្ទុកកូនក្ដីខ្ញុំទេ »។
ចំណែកមន្ត្រីស៊ើបអង្កេតអង្គការ លីកាដូ (Licadho) ខេត្តពោធិ៍សាត់ លោក កែម គីមស៊្រន់ លើកឡើងថា ក្រោយពីការចាប់ខ្លួនសកម្មជនបក្សប្រឆាំងទាំង ៦នាក់ លោកបានចុះស្រាវជ្រាវដល់ស្រុកវាលវែង តែរកមិនឃើញដីដែលសកម្មជនទាំងនោះទន្ទ្រានមកយកធ្វើជាកម្មសិទ្ធិនោះទេ។ ដូច្នេះលោកចាត់ទុកការចាប់ខ្លួននេះ គឺជារឿងនយោបាយ៖ «ដោយសារអី ពួកគាត់ជាអតីតគណបក្សសង្គ្រោះជាតិ ហើយពួកគាត់សុទ្ធតែជាមនុស្សដែលមិនព្រមចុះចូលជាមួយគណបក្សកាន់អំណាច។សព្វថ្ងៃពួកគាត់ជួបការលំបាកច្រើនណាស់ បន្ទាប់ពីការចាប់សាច់ញាតិនិងក្រុមគ្រួសាររបស់គាត់គ្មានអ្នកជួយទំនុកបម្រុងគ្រួសារទេ ហើយគ្រួសារមួយៗសុទ្ធតែជំពាក់លុយធនាគារទៀតផង អីចឹងសូមមេត្តាបញ្ឈប់ទៅហើយពួកគាត់គ្មានអ្នកណាបានសុខនៅស្រុកដែលគាត់កំពុងរស់នៅទេ » ។
មន្ត្រីសង្គមស៊ីវិលរូបនេះបន្តថា ការចាប់ខ្លួននេះ ដោយសារកាលពីពេលថ្មីៗ នេះ ប្រមុខរដ្ឋាភិបាលកម្ពុជាលោក ហ៊ុន សែន បានបង្គាប់ឱ្យសមត្ថកិច្ចតាមឃ្លាំមើលសកម្មជនបក្សប្រឆាំងនៅក្នុងស្រុកវាលវែង ដែលបានដើរធ្វើសកម្មភាពនយោបាយនៅតាមព្រំដែន។ លោកហៅការឃុំខ្លួននេះ គឺជាការបំភិតបំភ័យដល់សកម្មជនបក្សប្រឆាំង ធ្វើឱ្យភ័យខ្លាចកុំដើរធ្វើសកម្មភាពនយោបាយបន្តទៀត។ ប៉ុន្តែលោកយល់ថា ការធ្វើបែបនេះនឹងមិនផ្ដល់ផលចំណេញដល់របបដឹកនាំសព្វថ្ងៃនោះទេ ផ្ទុយទៅវិញ វាកាន់តែដាក់បន្ទុកដល់រដ្ឋាភិបាលបន្ថែមទៀត។ ចាប់តាំងពីថ្ងៃទី២៨ ឧសភាមក សមត្ថកិច្ចបានចាប់ខ្លួនសកម្មជនគណបក្សសង្គ្រោះជាតិស្រុកវាលវែងចំនួន ៦នាក់ ដាក់ពន្ធនាគារខេត្តពោធិ៍សាត់ជាបន្តបន្ទាប់ ក្រោមបទចោទប្រកាន់តែមួយ គឺទន្ទ្រានព្រៃសហគមន៍នៅស្រុកវាលវែងយកដីធ្វើជាកម្មសិទ្ធិ។ ក្នុងនោះមានអនុប្រធានគណបក្សសង្គ្រោះជាតិស្រុកវាលវែងម្នាក់លោក ទួន សំអាត ដែលជាប់ឃុំឃាំងទាំងមានជំងឺប្រចាំកាយ ខណៈដែលសកម្មជនគណបក្សប្រឆាំងស្រុកវាលវែងចំនួនជាច្រើននាក់ទៀត កំពុងរត់គេចខ្លួនទៅទីសុវត្ថិភាពមិនទាន់ត្រឡប់ទៅផ្ទះវិញនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។