ប្រពន្ធសកម្មជនគណបក្សសង្គ្រោះជាតិដែលកំពុងជាប់ឃុំនៅពន្ធនាគារព្រៃសម្នាក់ និងសកម្មជនបក្សប្រឆាំងនេះម្នាក់បានដាក់ញត្តិនៅស្ថានទូតអូស្ត្រាលី ដើម្បីឱ្យជួយតាមដាន និងការពារសុវត្ថិភាពក្រុមគ្រួសាររបស់គាត់ នៅព្រឹកថ្ងៃទី១៨ មករា។ ការដាក់ញត្តិនេះ បន្ទាប់ពីមានយុវជនមួយក្រុមបានថតរូប និងសួរនាំអាសយដ្ឋានកូនស្រីរបស់គាត់ក្នុងពេលនាងចេញសាលារៀន កាលពីថ្មីៗ នេះ។ មន្ត្រីអង្គការសង្គមស៊ីវិលយល់ថា ការដាក់ញត្តិនេះជាសិទ្ធិសេរីភាពរបស់ប្រជាពលរដ្ឋដោយសារពួកគាត់អស់ជំនឿលើអាជ្ញាធរពាក់ព័ន្ធ។
ប្រពន្ធចៅសង្កាត់ផ្សារដេប៉ូ៣ ជាប់ឆ្នោតរបស់គណបក្សសង្គ្រោះជាតិ ខណ្ឌទួលគោក រាជធានីភ្នំពេញ លោក ឃឹម ភាណា គឺលោកស្រី សុខ បូលីម៉ា ថ្លែងនៅព្រឹកថ្ងៃទី១៨ មករាថា ថ្មីៗ នេះមានយុវជនមួយក្រុមប្រមាណ ៣នាក់ ស្លៀកពាក់ស៊ីវិល បានសុំថតរូបកូនរបស់គាត់ និងសូររកសាលារៀន ក្នុងពេលដែលនាងធ្វើដំណើរតាមផ្លូវ។ លោកស្រីយល់ថា សកម្មជនភាពរបស់យុវជនទាំងនោះ អាចមានចេតនាមិនល្អមកលើកូនរបស់គាត់ នៅពេលខាងមុខ។ លោកស្រីប្រាប់ថា ភ្នាក់ងារសន្តិសុខរបស់ស្ថានទូតអូស្ត្រាលី (Australia) ប្រចាំនៅរាជធានីភ្នំពេញ ២នាក់ បានចេញមកទទួលញត្តិរបស់លោកស្រីរួចរាល់ហើយ៖ «និយាយរួមទៅខ្ញុំអត់មានភាពកក់ក្ដីក្នុងចិត្តទេ ព្រោះកន្លងមកខ្ញុំឃើញរបៀបថា គេវាយបែកក្បាល រហូតដល់ស្លាប់ក៏មាន ខ្លះបាត់បង់កាយសម្បទា ក៏មានដែរ។ ខ្ញុំបារម្ភមែនទែន ព្រោះគាត់ទៅរៀនផ្លូវឆ្ងាយ ខ្ញុំខ្លាចធ្វើឱ្យគ្រោះថ្នាក់ចរាចរណ៍ ឬមួយធ្វើអីលើកូនស្រីខ្ញុំ ខ្ញុំបារម្ភណាស់។ យប់មិញខ្ញុំគេងអត់លក់ទេ បានជាខ្ញុំត្រូវតែយកញត្តិហ្នឹងដាក់ទូតអូស្ត្រាលី » ។
ញត្តិនេះ គឺស្នើឱ្យស្ថានទូតអូស្ត្រាលី ជួយការពារសុវត្ថិភាពដល់ក្រុមគ្រួសាររបស់លោកស្រី ដែលមន្ត្រីប៉ូលិសនៃស្នងការដ្ឋានរាជធានីភ្នំពេញ បានគំរាមកំហែងកូនស្រីរបស់គាត់ គឺបានបង្ខំឱ្យនាងប្រាប់ម្ដាយឱ្យឈប់ចូលរួមតវ៉ាទាមទារឱ្យមានយុត្តិធម៌សង្គម និងឱ្យឈប់បង្ហោះសាររិះគន់រដ្ឋាភិបាលនៅលើហ្វេសប៊ុក (Face Book)បន្តទៀត ដើម្បីជាថ្នូរបានដោះលែងលោកស្រីមានសេរីភាពវិញ កាលពីថ្ងៃទី៣០ ធ្នូ។ លោកស្រី សុខ បូលីម៉ា យល់ថា ករណីនេះជាការគំរាមកំហែងកូនស្រីរបស់គាត់។ លោកស្រីព្រួយបារម្ភខ្លាចអាជ្ញាធរប៉ុនប៉ងធ្វើបាបកូនស្រីគាត់ ពីព្រោះលោកស្រីមិនបានធ្វើតាមការណែនាំរបស់កូនឡើយ។
ក្រុមស្ត្រីថ្ងៃសុក្រ ២នាក់ ដែលប្ដីជាប់ពន្ធនាគារព្រៃសបាននាំគ្នាត្រឡប់ទៅផ្ទះវិញ នៅព្រឹកថ្ងៃទី១៨ មករាដដែល បន្ទាប់ពីពួកគាត់បានដាក់ញត្តិជូនមន្ត្រីស្ថានទូតអូស្ត្រាលីរួចរាល់។ កន្លងមក លោកស្រី សុខ បូលីម៉ា បានដាក់ញត្តិរកអន្តរាគមន៍ពីស្ថានទូតអាមេរិក និងការិយាល័យឧត្ដមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំនៅទីក្រុងភ្នំពេញ។ លោកស្រីគ្រោងដាក់ញត្តិទៅប្រទេសប្រជាធិបតេយ្យមួយចំនួនទៀតប្រចាំនៅកម្ពុជា ដើម្បីឱ្យជួយតាមដានសុវត្ថិភាពគ្រួសាររបស់លោកស្រី។
ទាក់ទងនឹងបញ្ហានេះ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ប្រាប់អាស៊ីសេរីថា ការធ្វើកិច្ចសន្យាកន្លងមកមិនមែនជាការគំរាមកំហែងពលរដ្ឋនោះទេ គឺជាការអនុវត្តតាមច្បាប់របស់មន្ត្រីប៉ូលិស។ លោកបន្ថែមថា ប្រសិនបើប្រជាពលរដ្ឋព្រួយបារម្ភពីសុវត្ថិភាពពួកគាត់អាចប្ដឹងទៅអាជ្ញាធរឱ្យជួយអន្តរាគមន៍ពួកគាត់បាន៖ «ហើយគាត់ក៏មិនអាចចោទថា ខាងណាខាងណីដែរ បើគាត់ដឹងប្រភព ឱ្យគាត់រាយការណ៍ទៅសមត្ថកិច្ច គាត់ដាក់ពាក្យបណ្ដឹងមកយើងអនុវត្តតាមហ្នឹង។ សំខាន់គាត់ចេះតែចោទៗ យ៉ាងម៉េចបាន។ ឧបមាថា ឥឡូវយើងលើកយើងលើកមួយយើងចោទអ្នកនេះចោទអ្នកនោះ យើងម៉េចចេះតែចោទគេបាន។ សំខាន់ចោទប្រកាន់លើកលែងយើងមានភស្តុតាងត្រឹមត្រូវអាហ្នឹងយើងអនុវត្តបាន » ។
ទោះជាយ៉ាងណាអ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា យល់ថា ការដាក់ញត្តិរកអន្តរាគមន៍ពីស្ថានទូតជាសិទ្ធិសេរីភាពរបស់ប្រជាពលរដ្ឋ ដោយសារពួកគាត់អស់ជំនឿលើស្ថាប័នរដ្ឋ។ លោកបញ្ជាក់ថា កន្លងមកមានសកម្មជនគណបក្សប្រឆាំងជាច្រើននាក់ត្រូវបានជនល្មើសលបវាយឱ្យរបួសធ្ងន់ ហើយបើទោះបីជាស្គាល់ស្លាកលេខម៉ូតូនិងមានវីដេអូបញ្ជាក់ច្បាស់យ៉ាងណាក្ដី ក៏អាជ្ញាធរពាក់ព័ន្ធមិនទាន់ចាប់ជនដៃដល់ណាម្នាក់មកផ្ដន្ទាទោសបាននៅឡើយទេ៖ «ក៏ប៉ុន្តែសម្រាប់ខ្ញុំជាសង្គមស៊ីវិល ទោះបីថា វាមានស្ថានភាពអីចឹងក៏ដោយ ប៉ុន្តែផ្លូវច្បាប់កម្ពុជា ដើម្បីប្ដឹងជនណាម្នាក់ដែលធ្វើការគំរាមកំហែង ឬបំពារបំពានផ្លូវច្បាប់ គឺគ្មានអ្វីក្រៅអំពីនីតិវិធីតាមផ្លូវច្បាប់ ដើម្បីស្វែងរកជនប្រព្រឹត្តទាំងអស់ហ្នឹងមកផ្ដន្ទាទោសទេ ព្រោះអាហ្នឹងទោះបីថា យើងប្ដឹងមួយកម្រិតមិនរកយុត្តិធម៌ឱ្យ អាចថាប្ដឹងបន្តបន្ទាប់រហូតតាមនីតិវិធីអីចឹងទៅ » ។
កាលពីព្រលប់ថ្ងៃទី១២ ធ្នូ មានសកម្មជនគណបក្សសង្គ្រោះជាតិម្នាក់នៅភ្នំពេញ និងកូនមន្ត្រីគណបក្សនេះម្នាក់ទៀតនៅខេត្តកំពង់ឆ្នាំង ត្រូវបានជនមិនស្គាល់មុខ ស្ទាក់វាយបណ្ដាលឱ្យរងរបួសធ្ងន់ធ្ងរ ក្នុងពេលពួកគាត់កំពុងរត់ម៉ូតូកង់បី ដឹកភ្ញៀវនៅម្ដុំបែកចាន រាជធានីភ្នំពេញ ។
គិតត្រឹមថ្ងៃទី១៨ មករាមានសកម្មជនគណបក្សប្រឆាំងជិត ៣០នាក់ហើយ ត្រូវបានមិនស្គាល់មុខលួចវាយឲ្យរបួស ដែលភាគច្រើនកើតឡើងនៅភ្នំពេញ។ រហូតមកដល់ពេលនេះអាជ្ញាធរមិនទាន់ចាប់ខ្លួនជនល្មើសណាម្នាក់ដាក់ទោសបាននៅឡើយទេ។ ករណីអំពើហិង្សាលើមន្ត្រីគណបក្សប្រឆាំងនេះ ច្រើនមានលក្ខណៈប្រហាក់ប្រហែលគ្នា គឺជនដៃដល់ជិះម៉ូតូពាក់មួកសុវត្ថិភាព លួចវាយជនរងគ្រោះពីក្រោយខ្នង ហើយប្រើដំបងដែកវាយសំដៅក្បាលរបស់ជនរងគ្រោះ។
កាលពីខែតុលាកន្លងទៅ អង្គការសម្ពន្ធភាពការពារសិទ្ធិមនុស្សកម្ពុជា បានចេញសេចក្តីថ្លែងការណ៍មួយ ដោយចាត់ទុកថា អំពើហិង្សាទាំងនេះថា ជាការធ្វើទុក្ខបុកម្នេញផ្នែកនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។