សាច់ញាតិសកម្មជននយោបាយ និងសកម្មជនសង្គមមួយចំនួន ចូលសួរសុខទុក្ខជនជាប់ឃុំនៅពន្ធនាគារព្រៃស នៅរសៀលថ្ងៃទី១០ កុម្ភៈ។ ពួកគាត់ឱ្យដឹងថា មន្ទីរឃុំឃាំងខ្វះខាតទឹកប្រើប្រាស់ប្រចាំថ្ងៃ ធ្វើឱ្យប៉ះពាល់ដល់សុខភាពអ្នកជាប់ឃុំ។ មន្ត្រីសង្គមស៊ីវិលយល់ថា មន្ត្រីពន្ធនាគារគួរតែដោះស្រាយបញ្ហានេះជាបន្ទាន់។
ដំណឹងអំពីកង្វះទឹកប្រើប្រាស់ក្នុងពន្ធនាគារនេះ ត្រូវបានទម្លាយតាមរយៈប្រពន្ធសកម្មជនបក្សប្រឆាំង ដែលទៅសួរសុខទុក្ខប្ដីរបស់ពួកគាត់ នៅថ្ងៃទី១០ កុម្ភៈ។
ប្រពន្ធសកម្មជនបក្សប្រឆាំងលោក កាក់ កុម្ភារ គឺលោកស្រី ព្រុំ ចាន់ថា ប្រាប់អាស៊ីសេរីក្រោយចេញពីជួបប្ដីនៅពន្ធនាគារថា អ្នកជាប់ឃុំនៅក្នុងពន្ធនាគារព្រៃសខ្វះទឹកប្រើប្រាស់ជាច្រើនថ្ងៃមកហើយ ដោយពុំមានអាជ្ញាធរណាដោះស្រាយនៅឡើយទេ៖ «និយាយរួមទៅ អនាម័យធំបំផុតគឺ ទឹកហ្នឹង ហើយអ្នកខ្លះទៅ មានរមាស់វាឆ្លងគ្នាទៅវិញទៅមក វិលវល់នៅក្នុងហ្នឹងទាំងអស់ វាអត់បាត់ហ្មង។ ដូចថា មនុស្សគាត់ធាត់ផង ហើយការគេងរបស់គាត់ប្រែប្រួលចុះឡើង ដល់ពេលអីចឹងទៅ ដល់បន្ទប់តូចចង្អៀត បើតាមខ្ញុំគិតបែបមួយការ៉ូម្នាក់ហ្នឹង ងាប់ហើយ មើលទៅ។ ខ្ញុំមានអារម្មណ៍ថា ពិបាកខ្លាំងមែនទែន សូម្បីតែខ្ញុំប្រែប្រួលក៏ពិបាកដែរ ចុះទម្រាំតែគាត់ទៀត។ និយាយទៅចង់អួលដើមករ ប៉ុន្តែខ្ញុំអត់ទឹកភ្នែកទៀតទេ ព្រោះខ្ញុំអស់ទឹកភ្នែកក្នុងការហូរហើយ » ។
ស្រដៀងគ្នានេះដែរ ប្រពន្ធរបស់សកម្មជនបក្សប្រឆាំងម្នាក់ទៀត លោកស្រី កុល សាត ថ្លែងថា ប្ដីរបស់លោកស្រី គឺលោក គង់ ម៉ាស់ មានសភាពស្លេកស្លាំងខុសប្រក្រតី ដោយសារមួយរយៈនេះ លោកសម្រាន្តមិនសូវលក់ បណ្ដាលមកពីបន្ទប់ឃុំឃាំងចង្អៀតណែន និងគ្មានទឹកងូតគ្រប់គ្រាន់៖ «ខ្ញុំបារម្ភពីគាត់ដោយសារតែគាត់ហ្នឹងលើសឈាមផង ហើយបើសិនជាគាត់គិតច្រើនអ៊ីចឹង ប្រហែលជាវាអាចប៉ះពាល់ ព្រោះអីពេលដែលគាត់ចេញលើកមុន គឺគាត់មកនិយាយភ្លេចភ្លាំងទេ » ។
ជនជាប់ឃុំនយោបាយទាំងនោះអំពាវនាវឱ្យអាជ្ញាធរពាក់ព័ន្ធដោះស្រាយការខ្វះទឹកនៅក្នុងពន្ធនាគារព្រៃសឱ្យបានឆាប់ ដើម្បីសម្រួលដល់ការរស់នៅពួកគាត់។
ក្រុមស្ត្រីទាំងនេះឱ្យដឹងទៀតថា ប្ដីរបស់គាត់ និងជនជាប់ឃុំមួយចំនួនទៀត និយាយភ្លេចមុខភ្លេចក្រោយ ដោយសារអាជ្ញាធរបានដាក់វិទ្យុសកម្ម ដែលជាឧបករណ៍ផ្ដាច់ប្រព័ន្ធទូរស័ព្ទនៅក្នុងពន្ធនាគារ ដែលធ្វើឱ្យប៉ះពាល់ដល់សុខភាព។
ទាក់ទងនឹងបញ្ហានេះ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សាវនា ប្រាប់អាស៊ីសេរីថា លោកមិនទាន់ទទួលបានព័ត៌មានពីការខ្វះទឹកនេះនៅឡើយទេ។ ចំណែកករណីការដាក់ប្រព័ន្ធផ្ដាច់សេវាទូរស័ព្ទវិញ លោកថា មន្ត្រីជំនាញធ្លាប់ត្រួតពិនិត្យរួចមកហើយ គឺមិនមានអ្វីប៉ះពាល់ដល់សុខភាពរបស់ជនជាប់ឃុំឡើយ៖ «បើខាងបច្ចេកទេសគេបញ្ជាក់មកអីចឹងឱ្យខ្ញុំទៅ បញ្ជាក់លើសពីហ្នឹងម៉េច។ បើថាយ៉ាងណាៗ ទេ អាហ្នឹងសូមឱ្យជនជាប់ឃុំហ្នឹងគាត់ធ្វើលិខិតមកក្រសួងមក ហើយក្រសួងគាត់មានវិធានការស្រាវជ្រាវ ព្រោះកម្រិតខាងខ្ញុំនេះ អត់មានជំនាញផ្នែកបច្ចេកទេសទៅវាស់ស្ទង់កម្រិតឧបករណ៍ហ្នឹងទេ » ។
ទោះជាយ៉ាងណាក្ដី នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (Licadho) លោក អំ សំអាត កត់សំគាល់ថា អង្គការលោកក៏ទទួលដំណឹងពីការខ្វះទឹកប្រើប្រាស់នៅក្នុងពន្ធនាគារព្រៃសដែរ។ លោកបញ្ជាក់ថា អាជ្ញាធរពាក់ព័ន្ធគួរតែដោះស្រាយបញ្ហានេះជូនអ្នកជាប់ឃុំឱ្យបានឆាប់ ដើម្បីកុំឱ្យប៉ះពាល់ធ្ងន់ធ្ងរដល់សុខភាពរបស់ពួកគាត់។ មន្ត្រីសង្គមស៊ីវិលរូបនេះនិយាយថា អ្នកជំនាញធ្លាប់ប្រាប់លោកថា ប្រព័ន្ធកាត់ផ្ដាច់សេវាទូរស័ព្ទនេះ ប៉ះពាល់ដល់សុខភាពរបស់មនុស្ស៖ «គេលើកឡើងថា ក៏វាជាផលប៉ះពាល់មួយដែរ សម្រាប់អ្នកជាប់ឃុំដែលនៅក្រោមនៃការចាប់នៃប្រព័ន្ធទប់ទូរស័ព្ទ ពីព្រោះអាហ្នឹងក៏វាជាមានរលកនៃវិទ្យុសកម្មមួយផងដែរ » ។
ចាប់តាំងពីដើមឆ្នាំ២០២០ មកដល់ថ្ងៃទី១០ កុម្ភៈ អាជ្ញាធរបានចាប់ខ្លួនសកម្មជននយោបាយ សកម្មជនសង្គម ព្រះសង្ឃខ្មែរថាវរៈ សកម្មជនបរិស្ថាន និងក្រុមយុវជន ជាង ៧០នាក់ ដាក់ពន្ធនាគារ។ តុលាការបានចោទប្រកាន់ពួកគេពីបទរួមគំនិតក្បត់ ញុះញង់ និងប្រមាថថ្នាក់ដឹកនាំរដ្ឋាភិបាលជាដើម។
ក្រុមគ្រួសារសកម្មជនទាំងនោះចាត់ទុកការចាប់ខ្លួននេះថា ជាការធ្វើបាបប្រជាពលរដ្ឋស្លូតត្រង់ដោយអយុត្តិធម៌។ ពួកគាត់នៅតែប្រកាន់ជំហរធ្វើសកម្មភាពតស៊ូមតិ ទាមទារឱ្យមានយុត្តិធម៌សង្គមបន្តទៅមុខទៀត រហូតមានការដោះលែងអ្នកទោសមនសិការទាំងនោះឱ្យមានសេរីភាពវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។