ប្រពន្ធ​របស់​មន្ត្រី​បក្ស​ប្រឆាំង​​ដែល​កំពុង​ជាប់​ពន្ធនាគារ​ជាង ១​ពាន់​ថ្ងៃ ស្នើ​តុលាការ​ដោះ​លែង​ប្ដី

0:00 / 0:00

ប្រពន្ធ​របស់​អតីត​​មន្ត្រី​​គណបក្ស​សង្គ្រោះ​ជាតិ ដែល​កំពុង​ជាប់​ពន្ធនាគារ​ជាង ១​ពាន់​ថ្ងៃ​ស្នើ​តុលាការ​ដោះ​លែង​​ប្ដី​ឱ្យ​មាន​សេរីភាព​ជួប​ជុំ​គ្រួសារ​វិញ ខណៈ​ដែល​គ្រួសារ​របស់​ពួកគាត់​​​ជាប់​បំណុល​ និង​​បាត់​បង់​ប្ដី​ដែល​ជា​បង្គោល​គ្រួសារ។ មន្ត្រី​សង្គម​​​​ស៊ីវិល​ថា​មន្ត្រី​បក្ស​ប្រឆាំង​​​ទាំង​នេះ​បាន​កាត់​ទោស​ក្រោម​រូបភាព​នយោបាយ ដូច្នេះ​តុលាការ​គួរ​ពិចារណា​ដោះ​លែង​ពួកគាត់​ឱ្យ​មាន​សេរីភាព​​ឡើង​វិញ។

ប្រពន្ធ​​​មន្ត្រី​​បក្ស​​ប្រឆាំង​កំពុង​ជាប់ឃុំ​​លោក កាក់ កុម្ភារ គឺ លោកស្រី ព្រំ ចន្ថា ប្រាប់​វិទ្យុអាស៊ីសេរី​នៅ​ថ្ងៃ​​១៥ ខែ​តុលា ថា ចាប់​តាំង​ពី​​ប្ដី​លោកស្រី​បាន​ជាប់​ពន្ធនាគារ​​ជិត​ ១ពាន់ ៧រយ (១.៦៩៨) ថ្ងៃ​ ឬ​ជិត​៥ឆ្នាំ​មក​នេះ បាន​ធ្វើ​ឱ្យ​លោកស្រី​​​រ៉ាប់រង​​គ្រួសារ​តែ​ម្នាក់​ឯង និង​ត្រូវ​​ទៅ​សួរសុខទុក្ខ​ប្ដី​ជា​រៀងរាល់​ខែ​ទៀត។ លោកស្រី​ថា ភាព​លំបាក​វេទនា​​ដែល​​ប្ដី​ កូនៗ និង​លោកស្រី​កំពុង​ជួប​​ប្រទះ​​នេះ គឺ​ដោយសារ​តែ​តុលាការ​​​កាត់​ទោស​​ប្ដី​លោកស្រី​ទាំង​អយុត្តិធម៌ និង​​លំអៀង​ទៅ​កាន់​គណបក្ស​កាន់​អំណាច។

លោកស្រី​​ស្នើ​ដល់​តុលាការ​ងាក​មក​​មើល​សំណុំ​រឿង​មន្ត្រី​បក្ស​ប្រឆាំង​ឡើង​វិញ ដោយសារ​​​​ពួកគាត់​មិន​បាន​ប្រព្រឹត្ត​កំហុស​​ដូច​ដែល​ការ​ចោទ​ប្រកាន់​នោះ​ទេ។

លោកស្រី ព្រំ ចន្ថា៖ «ខ្ញុំ​មាន​តែ​សំណើ​ទៅ​កាន់​រដ្ឋាភិបាល​​ក៏​ដូច​ជា​ប្រព័ន្ធ​តុលាការ​​​សូម​ធ្វើ​យ៉ាងណា​ឱ្យ​វា​ឯករាជ្យ សុក្រឹត ហើយ​កាត់​ទោស​អី​ក៏​ដោយ​​ បើ​គ្រួសារ​ខ្ញុំ​អត់​មាន​​អី​ខុស​ផង​​ យក​គ្រួសារ​ខ្ញុំ​ទៅ​ដាក់​​ពន្ធនាគារ​ ក្រមសីលធម៌​របស់​ពួកគាត់​ដើម្បី​បម្រើ​ប្រជាពលរដ្ឋ​​​ មិន​មែន​យក​ប្រជាពលរដ្ឋ​អត់​កំហុស​ទៅ​កាន់​ទោស​ទេ»។

ចំណែក​ប្រពន្ធ​​របស់​មន្ត្រី​ប្រឆាំង​ជាប់​ឃុំ​មួយ​រូប​ទៀត​ លោក ខាន់ ប៊ុន ផេង​ គឺ​លោកស្រី ម៉ែន គន្ធាវី លើក​ឡើង​ថា លោកស្រី​​មាន​ជំងឺ​មហារីក​ថ្លើម​ធ្ងន់ធ្ងរ​​ជាង​មួយ​ឆ្នាំ​​មក​នេះ​​​ ហើយ​​លោក​ស្រី​បាន​សម្រេច​ខ្ចី​បំណុល​​គេ​រាប់​ពាន់​​ដុល្លារ ដើម្បី​ទៅ​ព្យាបាល​​នៅ​ប្រទេស​ថៃ។ លោកស្រី​ថា បាន​ទៅ​សួរ​សុខទុក្ខ​​​ប្ដី​បាន​តែ​ម្ដង​គត់ ក្នុង​រយៈ​ពេល​​​ជិត​មួយ​ឆ្នាំ​​​មក​នេះ ខណៈ​ដែល​លោកស្រី​បារម្ភ​ថា ជំងឺ​របស់​លោកស្រី​កាន់​តែ​ធ្ងន់ធ្ងរ​ និង​គ្មាន​ឱកាស​ទៅ​មើល​ប្ដី​បន្ត​ទៀត។

លោកស្រី ម៉ែន គន្ធាវី ថា តុលាការ​​បាន​រំលាយ​គណបក្ស​សង្គ្រោះ​ជាតិ​​​​រួច​ទៅ​ហើយ​ ដូច្នេះ​រដ្ឋាភិបាល​មិន​គួរ​ចង​គំនុំ​គុំកួន​ទៅ​លើ​មន្ត្រី​បក្ស​ប្រឆាំង​​​ទៀត​នោះ​ទេ ផ្ទុយ​ទៅ​វិញ​ពួកគាត់​ធ្វើ​នយោបាយ​ដើម្បី​បម្រើ​ពលរដ្ឋ​ប៉ុណ្ណោះ។

លោកស្រី ម៉ែន គន្ធាវី៖ «ខ្ញុំ​ចង់​សុំ​រដ្ឋាភិបាល​ឱ្យ​មាន​ដំណោះ​ស្រាយ​ លោក ហ៊ុន ម៉ាណែត ដែល​បាន​ឡើង​ថ្មី​ឱ្យ​រក​យុត្តិធម៌​ឱ្យ​គ្រួសារ​យើង​ខ្ញុំ​​​ទាំង​អស់​គ្នា​ដែល​ជាប់​ឃុំ​ដោយ​សារ​រឿង​នយោបាយ​ អ្នកទោស​មនសិការ​ឱ្យ​ដោះលែង​​ក្នុង​ពេល​ឆាប់​ៗ​នេះ​មក ព្រោះ​អី​​​មួយ​ឆ្នាំ​ទៀត​ បើ​ខ្ញុំ​ឈឺ​ខ្លាំង​ប៉ុណ្ណឹង​ហើយ​​មិន​អាច​ដល់​ប៉ុណ្ណឹង​ទៀត​ក៏​មិន​ដឹង​ដែរ​​ ព្រោះ​ជំងឺ​នេះ​មិន​អាច​ស្មាន​បាន»។

អតីត​ចៅសង្កាត់​ព្រែកព្រះស្ដេច​ក្រុង​បាត់ដំបង លោក ខាន់ ប៊ុនផេង និង​​អតីត​សមាជិក​ក្រុមប្រឹក្សា​ជាប់ឆ្នោត​រាជធានី​ភ្នំពេញ​លោក កាក់ កុម្ភារ ត្រូវ​​បាន​សមត្ថកិច្ច​​ចាប់​ខ្លួន កាល​​ពី​​​ឆ្នាំ​២០២០ ហើយ​​​ត្រូវ​បាន​ឃុំ​ខ្លួន​នៅ​​​ពន្ធនាគារ​ព្រៃស ក្រោម​បទ​​ចោទប្រកាន់​ពី​បទ​រួមគំនិត​ក្បត់ ញុះញង់​កុំ​ឱ្យ​យោធិន​ស្ដាប់​បង្គាប់ និង​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​​ជាអាទិ៍ ដោយសារ​តែ​​​ពួកគាត់​​គាំទ្រ​ស្មោះស្ម័គ្រ​ជាមួយ​ថ្នាក់​ដឹកនាំ​គណបក្ស​សង្គ្រោះជាតិ ហើយ​មិន​ព្រម​ចុះ​ចូល​ជា​មួយ​គណបក្ស​កាន់​អំណាច។

ចំណែក​អ្នក​ទោស​នយោបាយ​បក្ស​ប្រឆាំង​​​​ដែល​កំពុង​ជាប់​ពន្ធនាគារ​​​​យូរ​ជាង​គេ គឺ​សមាជិក​គណបក្ស​សង្គ្រោះ​ជាតិ លោក អ៊ីស្មាឯល ពិនអូស្មាន កំពុង​ជាប់​ពន្ធនាគារ​ជាង ២ពាន់ ៨​រយ (២.៨០៧)ថ្ងៃ ឬ​ជិត​៨ឆ្នាំ​មក​ហើយ។ ចំណែក​​មន្ត្រី​​ និង​សកម្មជន​បក្ស​​ប្រឆាំង​ផ្សេង​ទៀត​រួមមាន​ លោក ហេង ចាន់សុទ្ធី លោក ធួក ធើយ លោក វឿង សំណាង និង​លោក ម៉ិច ហ៊ាង កំពុង​ជាប់​ពន្ធនាគារ​ជាង​១ពាន់​ថ្ងៃ​មក​ហើយ​ដែរ។

វិទ្យុ​អាស៊ីសេរី​មិន​អាច​សុំ​ការ​ឆ្លើយ​តប​ពី​អ្នកនាំពាក្យ​ក្រសួង​យុត្តិធម៌​ លោក ជិន ម៉ាលីន បាន​ទេ​នៅ​ថ្ងៃ​ទី១៥ ខែ​តុលា។

​​ប្រធាន​សមាគម​ការពារ​សិទ្ធិ​មនុស្ស​អាដហុក(Adhoc) លោក នី សុខា មាន​ប្រសាសន៍​ថា សហគមន៍​ជាតិ​ និង​​អន្តរជាតិ​បាន​ដឹង​ថា ការ​ចោទ​ប្រកាន់​កាត់ទោស និង​ការ​ឃុំ​ខ្លួន​ទៅ​លើ​មន្ត្រី​បក្ស​ប្រឆាំង​ទាំង​នេះ​ធ្វើ​ឡើង​​ក្រោម​​រូបភាព​នយោបាយ​​ជា​ជាង​ការ​អនុវត្ត​ច្បាប់។ លោក​ស្នើ​តុលាការ​ទម្លាក់​ចោល​​​​ការ​ចោទ​ប្រកាន់​ទៅ​លើ​​មន្ត្រី​​បក្ស​ប្រឆាំង​ និង​ងាក​មក​ផ្សះផ្សា​​​​គ្នា​ដើម្បី​ផល​ប្រយោជន៍​ជាតិ។

លោក នី សុខា៖ «យើង​ជា​សង្គម​ស៊ីវិល​ចង់​ឃើញ​​ធ្វើ​ការ​ដោះ​ស្រាយ​បញ្ហា​នយោបាយ​នេះ​​ ដើម្បី​សម្រុះសម្រួល​គ្នា​​ ឯកភាព​ខាង​នយោបាយ​ ឯកភាព​ជាតិ​​ ដើម្បី​ឈាន​ទៅ​ដល់​ការ​ដោះ​ស្រាយ​​បញ្ហា​ទាំងអស់​ហ្នឹង​ធ្វើ​យ៉ាង​ណា​​​ទម្លាក់​ចោល​ ឬ​ដោះ​លែង​អ្នក​ជាប់​ឃុំ​​អ្នក​ទោស​មនសិការ​ឱ្យ​មាន​សេរីភាព​ឡើង​វិញ»។

រដ្ឋាភិបាល​ដាក់​គោល​ដៅ​អភិវឌ្ឍ​ប្រទេស​កម្ពុជា​ឱ្យ​ក្លាយ​​ជា​ប្រទេស​មាន​ចំណូល​មធ្យម​កម្រិត​ខ្ពស់​ក្នុង​ឆ្នាំ​២០៣០ និង​មាន​ចំណូល​ខ្ពស់​ក្នុង​ឆ្នាំ២០៥០។ ទោះ​ជា​យ៉ាង​ណា អ្នកឃ្លាំមើល​សង្គម​ថា​គោលដៅ​នេះ​នឹង​មិន​អាច​សម្រេច​បាន​នោះ​ទេ ដោយ​សារ​តែ​រដ្ឋាភិបាល​កម្ពុជា​កំពុង​ដឹកនាំ​ប្រទេស​ទៅ​កាន់​ភាព​ផ្ដាច់ការ រំលោភ​សិទ្ធិ​មនុស្ស​ធ្ងន់ធ្ងរ ជា​ពិសេស​មិន​ទទួល​យក​សំឡេង​រិះគន់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។