ក្រុម​យុវជន​បន្ត​ផ្សព្វផ្សាយ​ពី​កិច្ច​ព្រមព្រៀង​សន្តិភាព​ក្រុង​ប៉ារីស «ខណៈ​រដ្ឋាភិបាល​បំភ្លេច​កិច្ច​ព្រមព្រៀង​នេះ​ចោល»

ក្រុម​យុវជន​ដែល​សិក្សា​ពី​កិច្ច​ព្រមព្រៀង​សន្តិភាព​ក្រុង​ប៉ារីស​នាំ​គ្នា​ផ្សព្វផ្សាយ​ពី​ខ្លឹមសារ និង​សារៈសំខាន់​នៃ​កិច្ចព្រមព្រៀង​នេះ បើ​ទោះបីជា​រដ្ឋាភិបាល​ព្យាយាម​បកស្រាយ​បន្សាប​កិច្ច​ព្រមព្រៀង​មួយ​នេះ​ក្ដី។ ពួកគាត់​មើល​ឃើញ​ថា មេដឹកនាំ​បច្ចុប្បន្ន មិន​អនុវត្ត​តាម​ស្មារតី​នៃ​កិច្ចព្រមព្រៀង​នេះ​ឱ្យ​បាន​ពេញលេញ​ដើម្បី​ជា​ប្រយោជន៍​ដល់​ពលរដ្ឋ​នៅ​ឡើយ​ទេ។

នៅ​មុន​ខួប​លើក​ទី៣៣ឆ្នាំ​នៃ​កិច្ចព្រមព្រៀង​សន្តិភាព​ទីក្រុង​ប៉ារីស២៣ តុលា ១៩៩១ ក្រុម​យុវជន​នាំ​គ្នា​ផ្សព្វផ្សាយ​ពី​កិច្ច​ព្រមព្រៀង​ជា​ប្រវត្តិសាស្ត្រ​នេះ​នៅ​លើ​បណ្ដាញ​សង្គម​ហ្វេសប៊ុក​ដើម្បី​ដាស់​ស្មារតី​ពលរដ្ឋ​ខ្មែរ​ឱ្យ​ចូលរួម​ឈឺឆ្អាល​បញ្ហា​សង្គម។

យុវជន​សិក្សា​ពី​កិច្ចព្រមព្រៀង​សន្តិភាព​ទីក្រុង​ប៉ារីស លោក ឯក នូរិន ប្រាប់​វិទ្យុ​អាស៊ីសេរី​នៅ​ថ្ងៃទី២២ ខែ​តុលា ថា សមាជិក​ក្រុម​យុវជន​របស់​លោក​បាន​នាំ​គ្នា​ចែករំលែក​ពី​ខ្លឹមសារ​កិច្ច​ព្រមព្រៀង​សន្តិភាព​ទីក្រុង​ប៉ារីសរយៈពេល៣ថ្ងៃ នៅ​លើ​បណ្ដាញ​សង្គម​ហ្វេសប៊ុក និង​អ្នក​ខ្លះ​ទៀត​នាំ​គ្នា​ដាក់​ស៊ុម​រូបថត​នៅ​លើ​បណ្ដាញ​សង្គម​ដើម្បី​ចូលរួម​អបអរ​ខួប​លើក​ទី៣៣ឆ្នាំ នៃ​កិច្ច​ព្រមព្រៀង​ដែល​មានតម្លៃ​ជា​អមត​មួយ​នេះ។ លោក​បន្ត​ថា កិច្ចព្រមព្រៀង​ជា​អន្តរជាតិ​នេះ​មាន​សារៈសំខាន់​ក្នុង​ការ​ការពារ​បូរណភាព​ទឹកដី និង​ជំរុញ​ឱ្យ​រដ្ឋាភិបាល​គោរព​សិទ្ធិ​មនុស្ស​ពេញលេញ។

លោក ឯក នូរិន៖«កិច្ច​ព្រមព្រៀង​សន្តិភាព​ទីក្រុង​ប៉ារីស​នេះ​គឺ​ច្បាប់​មួយ​បង្កើត​លទ្ធិប្រជាធិបតេយ្យ​ខ្មែរ​សម្រាប់​ពូជ​ខ្មែរ​ខ្លឹមសារ​ទាំង​ស្រុង​នេះ​នៅ​មិន​ទាន់​អនុវត្ត​ឱ្យ​បាន​ពេញលេញ​នៅ​ឡើយ​ទេ។ ហើយ​ពួកគាត់​នៅតែ​សិក្សា ហើយនិង​ធ្វើ​ការ​ទំនាក់ទំនង​ការ​ទូត​បន្ត​ទៀត​ដើម្បី​ឱ្យ​សន្ធិសញ្ញា​សន្តិភាព២៣ តុលា អនុវត្ត​ឱ្យ​បាន​ពេញលេញ»។

ដោយឡែក​យុវជន​ដែល​បាន​ចូលរួម​ផ្សព្វផ្សាយ​ពី​កិច្ចព្រមព្រៀង​ទីក្រុង​ប៉ារីស​ម្នាក់ទៀត​គឺ លោក វិន វិចិត្រ ថ្លែង​ថា កិច្ចព្រមព្រៀង​សន្តិភាព​ទីក្រុង​ប៉ារីស គឺជា​អាវក្រោះ​ការពារ​កម្ពុជា​ឱ្យ​គេច​ផុត​ពី​ការរំលោភ​បំពាន​ពី​សំណាក់​បរទេស​ទាំង​នៅ​ក្នុង​ពេល​បច្ចុប្បន្ន និង​អនាគត។ លោក​ប្ដេជ្ញា​ចិត្ត​ថា នឹង​បន្ត​ចូលរួម​ផ្សព្វផ្សាយ​ពី​កិច្ច​ព្រមព្រៀង​មួយ​នេះ​ទៅដល់​ពលរដ្ឋ ពីព្រោះ​ខ្លឹមសារ​នៃ​កិច្ច​ព្រមព្រៀង​នេះ​អាច​ជួយ​ដាស់​ស្មារតី​ឱ្យ​ពលរដ្ឋ​ខ្មែរ​ចេះ​ជ្រើសរើស​មេ​ដឹកនាំ​ដែល​មាន​សមត្ថភាព​ដឹកនាំ​ប្រទេស​ពិត​ប្រាកដ។

លោក វិន វិចិត្រ៖ «ខ្ញុំ​គិត​ថា ស្មារតី​នៃ​កិច្ចព្រមព្រៀង​សន្តិភាព​ទីក្រុង​ប៉ារីស គឺ​ស្ថិត​នៅ​លើ​ពលរដ្ឋ​ដែល​ពលរដ្ឋ​គឺជា​អ្នក​សម្រេច​ជោគវាសនា​នៃ​ប្រទេស​ជាតិ​ខ្លួនឯង។ អ៊ីចឹង​ខ្ញុំ​នៅ​តែ​ជឿ​ថា ប្រសិនបើ​ចង់​ឱ្យ​កិច្ច​ព្រមព្រៀង​នេះ​អនុវត្ត​ទៅ​បាន​ពេញលេញ​គឺ​លុះត្រាតែ​ពលរដ្ឋ​ភាគច្រើន​យល់ដឹង​ពី​កិច្ច​ព្រមព្រៀង​នេះ​ទើប​អាច​ទៅ​បាន​ពេញលេញ​ល្អ»។

នៅ​ថ្ងៃ​ដដែល​នេះ គណបក្ស​កម្លាំង​ជាតិ​បាន​ចេញ​សេចក្ដីថ្លែងការណ៍​មួយ​ដើម្បី​អបអរសាទរ​ខួប​អនុស្សាវរីយ៍​លើកទី៣៣ នៃ​កិច្ច​ព្រមព្រៀង​ទីក្រុង​ប៉ារីស។ គណបក្ស​កម្លាំង​ជាតិ កត់​សម្គាល់​ឃើញ​ថា កិច្ច​ព្រមព្រៀង​ដែល​មាន​អាយុកាល ៣៣ឆ្នាំ​នេះ ភាគី​ពាក់ព័ន្ធ​នៅ​មិន​ទាន់​អនុវត្ត​ឱ្យ​បាន​ពេញលេញ​នោះ​ទេ ពីព្រោះ​កម្ពុជា​នៅ​មិន​ទាន់​មាន​ឯករាជ្យ​ជាតិ និង​ប្រជាធិបតេយ្យ​ពិត​ប្រាកដ ការ​រំលោភ​សិទ្ធិ​មនុស្ស និង​អំពើ​អយុត្តិធម៌​សង្គម​នៅ​តែ​កើត​មាន។ គណបក្ស​កម្លាំង​ជាតិ​ក៏​បាន​អំពាវនាវ​ដល់​គ្រប់​ភាគី​នយោបាយ​ទាំងអស់​ត្រូវ​មាន​វប្បធម៌​សន្ទនា បង្រួបបង្រួម​ជាតិ និង​ឯកភាព​ជាតិ​ជាពិសេស​រដ្ឋាភិបាល​ត្រូវ​ដោះលែង​សកម្មជន​គណបក្ស​នយោបាយ សកម្មជន​សិទ្ធិ​មនុស្ស​ដែល​ជាប់​ឃុំ​ដើម្បី​ការពារ​ផលប្រយោជន៍​ជាតិ។

ទាក់ទង​នឹង​ខួប​៣៣​ឆ្នាំ នៃ​កិច្ចព្រមព្រៀង​សន្តិភាព​ទីក្រុង​ប៉ារីស​នេះ​ដែរ ក្រុម​យុវជន គណបក្ស​នយោបាយ និង​ក្រុម​អង្គការ​សង្គម​ស៊ីវិល​នៅ​ក្នុង​ស្រុក កាល​ពី​ថ្ងៃ​ទី២០ ខែ​តុលា បាន​នាំ​គ្នា​ប្រារព្ធ​ខួប​កិច្ចព្រមព្រៀង​សន្តិភាព​ទីក្រុង​ប៉ារីស​នៅ​ទីលាន​ប្រជាធិបតេយ្យ​ដែល​មាន​អ្នក​ចូល​ប្រមាណ ១ពាន់​នាក់។ ពួកគាត់​នឹង​យក​លិខិត​ដាក់​ទៅ​ស្ថាប័ន​ព្រឹទ្ធសភា និង​រដ្ឋសភា​បន្ត​ទៀត​ដើម្បី​សុំ​ជួប​ជាមួយ​ប្រធាន​ព្រឹទ្ធសភា លោក ហ៊ុន សែន និង​ប្រធាន​រដ្ឋសភា អ្នកស្រី ឃួន សុដារី ដើម្បី​ជជែក​អំពី​ការ​មិន​គោរព​ខ្លឹមសារ​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស និង​ស្នើ​ឱ្យ​តុលាការ​ដោះលែង​អ្នក​ទោស​មនសិការ​ទាំងអស់​ឱ្យ​មាន​សេរីភាព​ឡើង​វិញ។

ដោយ​ឡែក​នៅថ្ងៃទី២៣ តុលា ពលករ​ខ្មែរ​ចំនួន ៦០នាក់ រួម​ទាំង​ព្រះ​សង្ឃ​ផង​គ្រោង​នឹង​ដាក់​ញត្តិ​ទៅ​កាន់​ស្ថានទូត​នៃ​ប្រទេស​ដែល​ជា​ហត្ថលេខី​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស​ប្រចាំ​នៅ​ប្រទេស​ថៃ ដើម្បី​ជំរុញ​ឱ្យ​ប្រទេស​នេះ​ពិនិត្យ​ឡើង​ពី​ការ​រំលោភ​សិទ្ធិ​មនុស្ស​នៅ​កម្ពុជា។

វិទ្យុ​អាស៊ីសេរី​មិន​អាច​ទាក់ទង ប្រធាន​អង្គភាព​អ្នកនាំ​ពាក្យ​រដ្ឋាភិបាល លោក ប៉ែន បូណា ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃ​ទី២២ ខែ​តុលា។ ប៉ុន្តែ​កាល​ពីថ្ងៃទី២១ ខែ​តុលា លោក ប៉ែន បូណា បាន​ចេញ​ទៅ​បកស្រាយ​នៅ​លើ​គណនី​ហ្វេសប៊ុក​របស់​អង្គភាព​អ្នកនាំពាក្យ​រដ្ឋាភិបាល ដោយ​ចាត់​ទុក​ពលរដ្ឋ​ដែល​ចង់​ឃើញ​រដ្ឋាភិបាល​គោរព​សិទ្ធិ​មនុស្ស និង​បើក​លំហ​សិទ្ធិ​សេរីភាព​ដូច​មាន​ចែង​នៅ​ក្នុង​កិច្ច​ព្រមព្រៀង​នោះ​ជា​ថា មនុស្ស​បំភ្លៃ​ប្រវត្តិសាស្ត្រ និង​មាន​របៀបវារៈ​នយោបាយ​ទៅ​វិញ។ លើស​ពី​នេះ លោក ប៉ែន បូណា បាន​ជំរុញ​ឱ្យ​ពលរដ្ឋ​ខ្មែរ​ត្រូវ​ដឹង​គុណ​លោក ហ៊ុន សែន និង​ត្រូវ​លើក​តម្កើង​អ្វី​មួយ​ដែល​គ្រួសារ​ត្រកូល​ហ៊ុន​ហៅ​ថា «នយោបាយ​ឈ្នះ​ឈ្នះ»។

លោក ប៉ែន បូណា៖«អ្នក​ដែល​តាំង​ខ្លួន​ជា​ជើង​ឯក​ខាង​កិច្ចព្រមព្រៀង​សន្តិភាព​ទីក្រុង​ប៉ារីស​តើ​គឺ​ធ្វើ​អី?ញុះញង់​បង្ក​ភាព​វឹកវរ​ដល់​សង្គម បង្ក​ចលាចល​ដល់​សង្គម​ឃើញ​ផ្ទុយ​ទេ»។

ជុំវិញ​រឿង​នេះ ប្រធាន​អង្គការ​សម្ព័ន្ធ​ភាព​ការពារ​សិទ្ធិ​មនុស្ស​ហៅ​កាត់​ថា ច្រាក់ (CHRAC) លោក រស់ សុដ្ឋា មាន​ប្រសាសន៍​ថា កិច្ចព្រមព្រៀង​សន្តិភាព​ទីក្រុង​ប៉ារីស​នៅតែ​មាន​តម្លៃ​សម្រាប់​ប្រជាជាតិ​ខ្មែរ ហើយ​កាលណា​រដ្ឋាភិបាល​បំភ្លេច​កិច្ចព្រមព្រៀង​ជា​ប្រវត្តិសាស្ត្រ​មួយ​នេះ​នឹង​បង្ក​ឱ្យ​មាន​អស្ថិរភាព​នយោបាយ។

លោក រស់ សុដ្ឋា៖ «ជំរុញ​លើក​ចិត្ត​ឱ្យ​រដ្ឋាភិបាល​ចាប់​ផ្ដើម​គិត​នៅ​ការ​ចរចា​គ្នា​ដើម្បី​បង្រួបបង្រួម​ជាតិ​ឡើងវិញ ពីព្រោះ​រដ្ឋាភិបាល​ធ្លាប់​តឹង​ហើយ​ក៏​ធ្លាប់​បន្ធូរ​ដែរ​ដូច្នេះ​ខ្ញុំ​គិត​ថា ពេលវេលា​នេះ​គួរតែ​បន្ធូរ​ដៃ​ឱ្យ​គ្នា​ខ្លះ​អ្វី​ទៅ ដែល​រដ្ឋាភិបាល​គណបក្ស​កាន់​អំណាច​ដែល​អាច​បន្ធូរ​អ្វី​ទៅ​ដែល​អាច​គណបក្ស ឬ​អ្នក​នយោបាយ​ផ្សេង​ទៀត​អាច​បន្ធូរ​ដើម្បី​ផល​ប្រយោជន៍​រួម​ទាំង​អស់​គ្នា»។

ក្រុម​យុវជន​ជំរុញ​ឱ្យ​ប្រជាពលរដ្ឋ​សិក្សា​ស្វែង​យល់​ស៊ីជម្រៅ​បន្ថែម​ទៀត​អំពី​កិច្ចព្រមព្រៀង​សន្តិភាព​ក្រុង​ប៉ារីស ពីព្រោះ​នេះ​ជា​មូលដ្ឋាន​ច្បាប់​អន្តរជាតិ​ដ៏​រឹងមាំ​ដែល​អាច​ជួយ​ការពារ​ប្រជាជាតិ​ខ្មែរ​គ្រប់​ជំនាន់ ជាពិសេស​បណ្ដុះ​ស្មារតី​មេ​ដឹកនាំ​ជំនាន់​ក្រោយ​ឱ្យ​គិតគូរ​ពី​បញ្ហា​ជាតិ​ជាធំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។