យុវជនប្រមាណ១០នាក់ មកពីសកលវិទ្យានានាក្នុងក្រុងភ្នំពេញ ចាប់ផ្ដើមស្វែងយល់ពីគណបក្សនយោបាយ ដែលចូលរួមបោះឆ្នោត។ ដំបូងបង្អស់ពួកគេបានធ្វើទស្សនកិច្ចស្វែងយល់ អំពីគណបក្សប្រជាធិបតេយ្យមូលដ្ឋាននៅថ្ងៃទី២៧ ខែ ឧសភា។ ក្រុមយុវជនទាំងនេះ ក៏នឹងបន្តស្វែងយល់អំពីគណបក្សនយោបាយផ្សេងៗក្នុងពេលបន្តបន្ទាប់ទៀតដែរ។
គណបក្សប្រជាធិបតេយ្យមូលដ្ឋានគឺជាគណបក្សទី១ដែលយុវនិស្សិតមកពីសកលវិទ្យានានា បានជួបសន្ទនាស្វែងយល់ដំបូងគេ អំពីបុព្វហេតុនៃការបង្កើតគណបក្ស គោលនយោបាយ ទស្សនវិស័យ ផែនការយុទ្ធសាស្ត្រ ការអនុវត្ត និងសកម្មភាពរបស់យុវជនចូលរួមក្នុងគណបក្សនយោបាយ។
យុវជនម្នាក់ឈ្មោះ ម៉ន វុទ្ធា លើកឡើងថា ទស្សនកិច្ចស្វែងយល់អំពីគណបក្សនយោបាយនេះ គឺដើម្បីលើកកម្ពស់ការយល់ដឹងរបស់យុវជនអំពីគណបក្សនយោបាយកាន់តែស៊ីជម្រៅ និងជំរុញឲ្យយុវជនចូលរួមក្នុងសកម្មភាពនយោបាយ។
យុវជនរូបនេះ ឲ្យដឹងដែរថា ក្រោយជួបសន្ទនាជាមួយតំណាងគណបក្សប្រជាធិបតេយ្យមូលដ្ឋានរួចហើយនោះ គឺពួកលោកជាយុវជនបានដឹងច្រើនអំពីគណបក្សនេះ ដូចជាការធ្វើប្រជាធិបតេយ្យនៅ មូលដ្ឋាន ដោយសារបេក្ខជនដែលឈរបោះឆ្នោត មិនមែនកើតឡើងដោយការចាត់តាំងពីមេគណបក្សឡើយ គឺកើតចេញពីការបោះឆ្នោតជ្រើសរើសដោយសមាជិកបក្សនៅមូលដ្ឋានតែម្ដង៖ « ប្រសិនបើយើងមានឱកាសក្នុងការសិក្សាស្វែងយល់ពីគណបក្សនយោបាយនីមួយៗ យើងនឹងមានមូលដ្ឋានត្រិះរិះពិចារណាកាន់តែច្រើនក្នុងការចូលរួមវិស័យនយោបាយ » ។
រីឯយុវជនម្នាក់ទៀត មកពីសកលវិទ្យាល័យមេគង្គកម្ពុជា លើកឡើងថា ការស្វែងយល់អំពីគណបក្ស នយោបាយនេះ គឺជួយឲ្យពួកគេងាយស្រួលក្នុងការធ្វើសេចក្ដីសម្រេចចិត្តច្បាស់លាស់ក្នុងការបោះឆ្នោតជ្រើសរើសមេឃុំ ឬចៅសង្កាត់ដែលល្អ ដើម្បីដឹកនាំអភិវឌ្ឍមូលដ្ឋានឲ្យរីកចម្រើន។ ជាពិសេស យុវជនទាំងនេះ ក៏នឹងបន្តចែករំលែកនូវអ្វីដែលពួកគេបានសិក្សាស្វែងពីគណបក្សនយោបាយនានា ដល់ប្រជាពលរដ្ឋបន្តទៀត។ យុវជនរូបនេះ បន្តថា ក្រោយជួបសន្ទនា សួរដេញដោលជាង២ម៉ោង នេះគឺលោកសង្កេតឃើញថា គណបក្សប្រជាធិបតេយ្យមូលដ្ឋាន មានគោលនយោបាយល្អ និងច្បាស់លាស់៖ « គាត់មានគោលនយោបាយច្បាស់លាស់ក្នុងការអភិវឌ្ឍភូមិ - ឃុំ ធ្វើយ៉ាងម៉េចឲ្យភូមិ - ឃុំដែលគាត់ទទួលបានហ្នឹង គឺមានការអភិវឌ្ឍឲ្យប្រជាពលរដ្ឋទទួលបាននូវសេវាសាធារណៈ និងដំណើរការផ្សេងៗទៀតដែលប្រជាពលរដ្ឋគាត់ចង់បាន » ។
ក្រោយជួបជាមួយគណបក្សប្រជាធិបតេយ្យមូលដ្ឋានហើយនោះ យុវជនទាំងនេះ ក៏នឹងទៅជួបជាមួយ នឹងគណបក្សនយោបាយផ្សេងៗទៀតដែរ ដើម្បីសិក្សាស្វែងយល់ដូចគ្នា ប៉ុន្តែពេលនេះ ពួកគេ នៅមិនទាន់កំណត់ច្បាស់ថា តើគណបក្សណាជាបក្សដែលត្រូវជួបបន្ទាប់នោះទេ។
អគ្គលេខាធិការគណបក្សប្រជាធិបតេយ្យមូលដ្ឋាន លោក សាម អ៊ីន បានថ្លែងសរសើរយុវជនទាំងនេះ ដែលបានឆ្លៀតពេលវេលាស្វែងយល់អំពីរឿងនយោបាយ និងបញ្ហាសង្គម។ លោក សាម អ៊ីន បានប្រាប់យុវជនទាំងនោះច្រើនអំពីការកកើតគណបក្សប្រជាធិបតេយ្យមូលដ្ឋាន ដែលផ្ដួចផ្ដើមដោយប្រធានអង្គការសង្គមស៊ីវិល និងក្រុមបញ្ញវន្តមួយចំនួន រួមមានលោកបណ្ឌិត កែម ឡី ជាដើម។
ទន្ទឹមគ្នានេះ លោកក៏បានចែករំលែកនូវចំណុចសំខាន់ៗជាច្រើន ដូចជាការអនុវត្តប្រជាធិបតេយ្យ ផ្ទៃក្នុងគណបក្សដែលអនុញ្ញាតឲ្យសមាជិក នូវមូលដ្ឋានបោះឆ្នោតជ្រើសរើសមេដឹកនាំមូលដ្ឋានរបស់ពួកគាត់ ហើយបេក្ខជនមេឃុំ ឬចៅសង្កាត់ដែលជ្រើសរើសនោះ គឺជាមនុស្សល្អ មានសមត្ថភាព និងមានបទពិសោធន៍ មានស្នាដៃក្នុងការដឹកនាំការងារអភិវឌ្ឍមូលដ្ឋាន៖ « គ . ប . ម ដឹកនាំឃុំ - សង្កាត់ណាមួយនោះ មេឃុំរបស់យើងត្រូវដឹងថា គាត់ត្រូវធ្វើកិច្ចការអ្វីខ្លះដើម្បីបម្រើប្រជាពលរដ្ឋ ជាពិសេសយើងគោលនយោបាយ ៥ល្អ គឺធ្វើម៉េចធានាឲ្យមានមេភូមិ - មេឃុំល្អ គ្រូបង្រៀនល្អ គ្រូពេទ្យល្អ គ្រូបង្រៀនកសិកម្មល្អ ដែលជួយកសិកររឿងបញ្ហាទឹក បញ្ហាទុន បញ្ហាទីផ្សារ ហើយធ្វើម៉េចធានាឲ្យមាននគរបាលល្អ » ។
ក្រុមយុវជនរំពឹងថា ក្រោយការធ្វើទស្សនកិច្ចស្វែងយល់អំពីគណបក្សនយោបាយនោះ គឺយុវជននឹង យល់ដឹងអំពីដំណើរការ នៃការវិវត្តន៍របស់គណបក្សនយោបាយ គោលនយោបាយ ផែនការ យុទ្ធសាស្ត្រ និងការអនុវត្តរបស់គណបក្ស។ លើសពីនេះ យុវជននឹងមានភាពក្លាហានក្នុងការ បញ្ចេញមតិ និងចូលរួមយ៉ាងសកម្មក្នុងនយោបាយ ហើយយុវជននឹងចែករំលែកនូវចំណេះដឹង អំពីគណបក្សនយោបាយទៅកាន់ប្រជាពលរដ្ឋផងដែរ ដើម្បីឲ្យពួកគាត់ធ្វើសេចក្ដីសម្រេចចិត្តបោះឆ្នោតគាំទ្រដ៏ត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។