មនុស្ស ៣៥នាក់បានរងរបួសក្នុងហេតុការណ៍ក្រឡាប់រថយន្តដឹកកម្មករនៅខេត្តកំពង់ស្ពឺ ។ មន្ត្រីសហជីព និងអ្នកជំនាញចរាចរណ៍ ស្នើដល់រដ្ឋាភិបាលឱ្យរឹតបន្តឹងការត្រួតពិនិត្យភាពស្របច្បាប់របស់អ្នកបើកបររថយន្ត។
ហេតុការណ៍គ្រោះថ្នាក់ចរាចរណ៍ ក្រឡាប់រថយន្តដឹកកម្មកររោងចក្រមួយបានកើតឡើងនៅឃុំអូរ ស្រុកភ្នំស្រួច ខេត្តកំពង់ស្ពឺ បណ្ដាលឲ្យកម្មកររាប់សិបនាក់រងរបួស កាលពីព្រឹកថ្ងៃទី៩ ខែតុលា។
ស្នងការដ្ឋាននគរបាលខេត្តកំពង់ស្ពឺ ឲ្យដឹងថា មូលហេតុនៃការក្រឡាប់រថយន្តដឹកកម្មករនេះ ដោយសារតែរថយន្ត បើកគេចគោយន្តកន្ត្រៃ រួចរេចង្កូតក្រឡាប់ចូលផ្ទះរបស់ពលរដ្ឋលក់ដូរតាមដងផ្លូវតែម្ដង។
ចំណែកពលរដ្ឋនៅកន្លែងកើតហេតុប្រាប់អ្នកសារព័ត៌មានក្នុងស្រុកថា រថយន្តដឹកកម្មករ ប្រភេទ២៥ កៅអី ផ្ទុកកម្មករចំនួន ៣៥នាក់ បានបើកបរក្នុងល្បឿនលឿន គេចគោយន្តកន្ត្រៃ ហើយរេចង្កូតក្រឡាប់បុកចូលផ្ទះពលរដ្ឋតាមដងផ្លូវ។ ភ្លាមៗ បន្ទាប់ពីហេតុការណ៍នេះ រថយន្តសង្គ្រោះបន្ទាន់ បានដឹកជនរងគ្រោះបញ្ជូនទៅមន្ទីរពេទ្យបង្អែកត្រពាំងក្រឡឹង ដើម្បីព្យាបាលរបួស។
វិទ្យុអាស៊ីសេរី នៅមិនទាន់អាចទាក់ទងអធិការ នៃអធិការដ្ឋាននគរបាលស្រុកភ្នំស្រួច លោក ជុន ចន្ទដេត និងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក កត្តា អ៊ន ដើម្បីសុំការអត្ថាធិប្បាយជុំវិញបញ្ហានេះ បាននៅឡើយទេ នៅថ្ងៃទី៩ ខែតុលា។
ទាក់ទងនឹងសុវត្ថិភាពចរាចរណ៍របស់កម្មកររោងចក្រ រដ្ឋមន្ត្រីក្រសួងការងារ លោក ហេង សួរ កាលពីឆ្នាំ២០២៣ បានថ្លែងនៅចំពោះមុខកម្មករជិត ២ម៉ឺននាក់ នៅខេត្តកំពង់ស្ពឺថា ក្រសួងបានសហការជាមួយភាគីពាក់ព័ន្ធ ដើម្បីគាំទ្រ និងលើកទឹកចិត្តឲ្យមានការផ្លាស់ប្ដូរជាបណ្ដើរៗ នូវមធ្យោបាយដឹកជញ្ជូនកម្មករនិយោជិត ដែលស្របតាមបទដ្ឋានបច្ចេកទេស និងមានផាសុកភាពជាងមុនត្រឹមឆ្នាំ២០២៧។ លោកអះអាងទៀតថា ការធ្វើបែបនេះ ដើម្បី ការពារសុវត្ថិភាពដល់កម្មករអំឡុងពេលធ្វើដំណើរ។
អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) លោក អាត់ ធន់ ប្រាប់វិទ្យុអាស៊ីសេរី នៅថ្ងៃទី៩ ខែតុលាថា លោកសោកស្ដាយ ចំពោះគ្រោះថ្នាក់ចរាចរណ៍នៅខេត្តកំពង់ស្ពឺ ដែលបណ្ដាលឲ្យកម្មកររាប់សិបនាក់រងរបួស។ លោកសង្កេតឃើញថា ជារឿយៗ រថយន្តដឹកកម្មករលើសចំនួនកំណត់ តែងជួបគ្រោះថ្នាក់ចរាចរណ៍ ហើយដើម្បីដោះស្រាយបញ្ហានេះ កម្មករក៏ធ្លាប់ស្នើដល់ភាគីរដ្ឋាភិបាល និងរោងចក្រ ឲ្យចេញសោហ៊ុយធ្វើដំណើរ ដើម្បីឲ្យពួកគេមានលទ្ធភាពស្វែងរករថយន្ត ដែលមានបច្ចេកទេសត្រឹមត្រូវ។
លោក អាត់ ធន៖«ខ្ញុំគិតថា វិធានការអត់មានអ្វីក្រៅពី ទី១ គឺត្រូវរៀបចំផ្លូវ ដែលមានក្នុងពេលបច្ចុប្បន្នឲ្យមានគំនូសសញ្ញា ស្លាកសញ្ញា ឬការឈូសឆាយ ឬជួសជុល ហើយដាក់ស្លាកសញ្ញាឲ្យបានច្បាស់លាស់។ ទី២ គឺឡានដឹកកម្មករ ត្រូវដឹកតាមបច្ចេកទេស ហើយប្រភេទឡាន ដែលមិនតម្រូវតាមបច្ចេកទេស គឺយើងត្រូវតែពិនិត្យមើល ព្រោះជួនកាល មិនមានបច្ចេកទេស ឬកែច្នៃឲ្យបានត្រឹមត្រូវហ្នឹង ហើយអត់មានភ្លើងសញ្ញា ក៏វាប៉ះពាល់ដែរ។ ចុងក្រោយពាក់ព័ន្ធនឹងអ្នកបើកបរទាំងអស់ គួរតែរៀនសូត្រ ឲ្យចេះច្បាប់ទម្លាប់ត្រឹមត្រូវ មាន ក្រម សីលធម៌ និងមានការយោគយល់គ្នា ទើបអាចកាត់បន្ថយបាន»។
អ្នកជំនាញចរាចរណ៍ និងជាគ្រូបង្រៀនបើកបរ លោក អៀង សីហា ប្រាប់អាស៊ីសេរីតាមបណ្ដាញសង្គម តេឡេក្រាម (Telegram) នៅថ្ងៃទី៩ ខែតុលាថា ករណីរថយន្ត ២៥កៅអី ហើយផ្ទុកមនុស្សដល់ទៅ ៣៥នាក់ គឺជាអំពើល្មើសច្បាប់ចរាចរណ៍។ លោកពន្យល់ថា ការដឹកលើសចំណុះបែបនេះ ពេលជួបឧបសគ្គនៅខាងមុខ គឺពិបាកជាន់ហ្វ្រាំង ឬជាន់ហ្វ្រាំងមិនស៊ីជាដើម។ លោកថា ដើម្បីដោះស្រាយបញ្ហានេះ អាជ្ញាធរគួរតែពង្រឹងការអនុវត្តច្បាប់ចរាចរណ៍ ដោយពិនិត្យលើកម្រិតចំនួន មិនឲ្យលើសចំនួនកំណត់ និងពិនិត្យលើប័ណ្ណបើកបរតៃកុងរថយន្តដឹកកម្មករជាដើម។
កន្លងទៅគ្រោះថ្នាក់ចរាចរណ៍រថយន្តដឹកកម្មករ បានឆក់យកជីវិត និងបង្ករបួសស្នាមដល់កម្មករជាច្រើននាក់ ខណៈវិធានការដោះស្រាយហាក់នៅពុំទាន់ឆ្លើយតបនៅឡើយទេ ដែលបណ្ដាលឲ្យគ្រោះថ្នាក់ទាំងនេះ នៅតែកើតឡើងជារឿយៗ។
ជាក់ស្ដែង កាលពីចុងខែសីហា មានហេតុការណ៍គ្រោះថ្នាក់ចរាចរណ៍មួយ រវាងរថយន្តកុងតឺន័រ និងរថយន្តសាំយ៉ុង (SsangYong) ដឹកកម្មករ បណ្ដាលឲ្យកម្មករចំនួន ២នាក់ បានស្លាប់ និងកម្មករ ប្រមាណ ២៥នាក់ទៀត រងរបួសធ្ងន់ និងស្រាល។ ករណីមួយផ្សេងទៀត គឺកាលពីរសៀលថ្ងៃទី២៧ ឧសភា មានគ្រោះថ្នាក់ចរាចរណ៍រវាងរថយន្តដឹកជញ្ជូនកម្មករ ២គ្រឿងបានបុកគ្នា នៅក្នុងស្រុកសាមគ្គីមានជ័យ ខេត្តកំពង់ឆ្នាំង ដែលបណ្ដាលឲ្យមនុស្សចំនួន ៦៦នាក់រងរបួសធ្ងន់ និងស្រាល ក្នុងនោះ មានស្ត្រីមានផ្ទៃពោះម្នាក់ រងរបួសធ្ងន់ ហើយត្រូវបញ្ជូនទៅវះកាត់នៅមន្ទីរពេទ្យកាល់ម៉ែត្រ ក្នុងរាជធានីភ្នំពេញ ដើម្បីសង្គ្រោះម្ដាយ និងទារក។
បើតាមក្រសួងការងារ គិតត្រឹមត្រីមាសទី១ ក្នុងឆ្នាំ២០២៤ នេះ មានកម្មករ-និយោជិតជួបគ្រោះថ្នាក់ចរាចរណ៍ចំនួនជាង ៩រយករណី (៩១៣) ដែលមានជនរងគ្រោះសរុបជាង ១ពាន់នាក់ (១.០៦៥) ក្នុងនោះស្លាប់ ៣៩នាក់ របួសធ្ងន់ស្រាលជាង ១ពាន់នាក់ (១.០២៦)។ បើធៀបទៅនឹងត្រីមាសទី១ ឆ្នាំ២០២៣ មានការកើនឡើង ៣៨ភាគរយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។