សកម្មជនបក្សប្រឆាំងម្នាក់នៅខេត្តកណ្ដាល ត្រូវជនមិនស្គាល់មុខជិះម៉ូតូបុកបណ្ដាលឱ្យដួលសន្លប់នៅនឹងកន្លែង។ ហេតុការណ៍នេះកើតឡើង បន្ទាប់ពីសកម្មជនរូបនោះ បន្តចូលរួមសកម្មភាពជាមួយក្រុមស្ត្រីតវ៉ាថ្ងៃសុក្រ និងចូលរួមឃ្លាំមើសវនាការសំណុំរឿងមន្ត្រីគណបក្សសង្គ្រោះជាតិ។
មន្ត្រីសង្គមស៊ីវិលយល់ថា អាជ្ញាធរគួរស៊ើបអង្កេតករណីនេះ ដើម្បីជៀសវាងការចោទប្រកាន់ពីសហគមន៍ជាតិ និងអន្តរជាតិ។
សកម្មជនគណបក្សសង្គ្រោះជាតិដែលរងគ្រោះនោះ គឺលោក ចាន់ តុន ជាឪពុករបស់មន្ត្រីបក្សប្រឆាំងលោក តុន និមល ដែលកំពុងជាប់ឃុំនៅពន្ធនាគារព្រៃស ក្នុងបទចោទញុះញង់។
លោក ចាន់ តុន ប្រាប់អាស៊ីសេរីថា លោកត្រូវបានជនមិនស្គាល់អត្តសញ្ញាណពីរនាក់ជិះម៉ូតូមកបុកពេញទំហឹង បណ្តាលឱ្យលោកដួលសន្លប់លើថ្នល់ នៅម៉ោង១១ព្រឹក ថ្ងៃទី១១ កុម្ភៈ នៅម្តុំផ្សារតាខ្មៅថ្មី សង្កាត់ដើមមៀន ក្រុងតាខ្មៅ ខេត្តកណ្តាល។ បន្ទាប់មក លោកត្រូវកូនដឹកទៅសម្រាកព្យាបាលនៅមន្ទីរពេទ្យ។
ជនរងគ្រោះរូបនេះបន្តថា មុនពេលមានហេតុការណ៍គ្រោះថ្នាក់នេះ លោកតែងតែនាំកូន និងចៅៗ ទៅចូលរួមឃ្លាំមើលសវនាការសំណុំរឿងមន្ត្រីគណបក្សសង្គ្រោះជាតិនៅសាលាដំបូងរាជធានីភ្នំពេញ។ លោកអះអាងថា អាជ្ញាធរមូលដ្ឋានបានតាមឃ្លាំមើលសកម្មភាពរបស់លោកស្ទើរគ្រប់ពេល។ លោកយល់ថា គ្រោះថ្នាក់ចរាចរណ៍នេះ ទំនងជាមានរៀបចំ ដើម្បីបំបាក់ស្មារតី និងគំរាមកំហែងលោកឱ្យបញ្ឈប់សកម្មភាពទាមទារយុត្តិធម៌សង្គម។ ទោះជាយ៉ាងនេះក្តី លោកបញ្ជាក់ថា លោកមិនបាក់ស្មារតីនោះទេ ហើយលោកក៏មិនដាក់ពាក្យបណ្ដឹងទៅអាជ្ញាធរដែរ ព្រោះលោកគ្មានជំនឿថានឹងទទួលបានយុត្តិធម៌៖ «សូមឱ្យខាងសមត្ថកិច្ចជាតិ និងអន្តរជាតិជួយតាមដានវែកមុខរកជនមិនស្គាល់មុខហ្នឹងមកផ្ដន្ទាទោស»។
កូនប្រុសលោក ចាន់ តុន គឺលោក តុន និមល ត្រូវបានអាជ្ញាធររបបក្រុងភ្នំពេញចាប់ខ្លួន និងចោទប្រកាន់ពីបទញុះញង់ ដោយសារតែការចូលរួមតវ៉ាមុខស្ថានទូតចិនក្នុងរាជធានីភ្នំពេញ កាលពីខែតុលា ឆ្នាំ២០២០។ ចាប់តាំងរបបក្រុងភ្នំពេញចាប់កូនប្រុសមក លោកចាប់ផ្តើមចេញតវ៉ាជាមួយសកម្មជនបក្សប្រឆាំងដទៃទៀត ដើម្បីរកយុត្តិធម៌ជូនកូនប្រុស។ បុរសវ័យ៦៩ឆ្នាំរូបនេះ ប្ដេជ្ញាចិត្តធ្វើសកម្មភាពទាមទារតវ៉ាឱ្យតុលាការដោះលែងកូនលោកឱ្យមានសេរីភាពឡើងវិញ ដោយមិនខ្លាចការគំរាមកំហែង និងការធ្វើទុក្ខបុកម្នេញនានាឡើយ។
អាស៊ីសេរីមិនអាចទាក់ទង អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន និងស្នងការខេត្តកណ្តាល ឈឿន សុចិត្ត ដើម្បីសាកសួរអំពីករណីគ្រោះថ្នាក់ចរាចរណ៍លើសកម្មជនបក្សប្រឆាំង នេះបានទេ។ ក៏ប៉ុន្តែ លោក ឆាយ គឹមខឿន ធ្លាប់លើកឡើងថា លោកសុំឱ្យសាធារណជន កុំប្រញាប់ធ្វើការសន្និដ្ឋាន ឬទាញភ្ជាប់សំណុំរឿងទាំងនេះ ទៅនឹងរឿងនយោបាយ មុនការរកឃើញរបស់សមត្ថកិច្ច។ ប៉ុន្តែទន្ទឹមនឹងការបកស្រាយបែបនេះ អាជ្ញាធរក៏មិនបានជួយរកយុត្តិធម៌ដល់សកម្មជនបក្សប្រឆាំងជាច្រើននាក់ទៀតដែលរងការវាយដំពីសំណាក់ជនមិនស្គាល់មុខនោះដែរ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា ការធ្វើទុក្ខបុកម្នេញកើតឡើងលើសកម្មជនបក្សប្រឆាំងកន្លងមក សមត្ថកិច្ចមិនដែលចាប់ជនល្មើសណាម្នាក់មកកាត់ទោសតាមច្បាប់បានទេ។ លោកយល់ថា ករណីគ្រោះថ្នាក់ចរាចរណ៍លើសកម្មជនបក្សប្រឆាំងនេះ អាជ្ញាធរគួរស៊ើបអង្កេតឱ្យបានច្បាស់លាស់ ដើម្បីជៀសវាងការចោទប្រកាន់ថា អាជ្ញាធររើសអើងនិន្នាការនយោបាយ ឬហេតុការណ៍ទាំងនេះធ្វើឡើងក្នុងទិសដៅគំរាមកំហែងលើសកម្មជនបក្សប្រឆាំង៖«ត្រូវតែមានការបើកការស៊ើបអង្កេតដើម្បីស្វែងរកយុត្តិធម៌សម្រាប់ជនរងគ្រោះ មិនមែនតម្រូវថាទល់តែជនរងគ្រោះដាក់ពាក្យបណ្ដឹងបានអាជ្ញាធរចាត់វិធានការណ៍ទេ»។
គិតត្រឹមថ្ងៃទី១៣ កុម្ភៈ សកម្មជនគណបក្សសង្គ្រោះជាតិ និងសាច់ញាតិរបស់ពួកគេ ព្រមទាំងអ្នកតស៊ូមតិជាង ៣០នាក់ហើយ ត្រូវបានជនអនាមិកលួចវាយដំបណ្ដាលឱ្យរបួសធ្ងន់ធ្ងរ រងគ្រោះថ្នាក់ចរាចរណ៍ ឬរងអំពើហិង្សាពីសំណាក់ក្រុមអាជ្ញាធរ។ ជនរងគ្រោះមួយចំនួន ត្រូវបានជនល្មើស លួចវាយប្រហារពីក្រោយខ្នងផ្ទួនៗ ដោយប្រើឧបករណ៍រឹង ដូចជា ដំថ្ម និងដំបងដែក។ ជនរងគ្រោះ កត់សម្គាល់ថា ជនល្មើសទាំងនោះ មិនមែនជាពលរដ្ឋធម្មតានោះទេ ព្រោះពួកគេ មានជំនាញច្បាស់លាស់ក្នុងការវាយប្រហារ៕