ក្រុមហ៊ុន ឯកជនចិនមួយដែលមានឈ្មោះថា កូស្តល ស៊ីធី ឌីវីឡុបមិន(Coastal City Development)កាលពីថ្ងៃទី៩ តុលា បង្ហាញគម្រោងថ្មីមួយនៅ តំបន់តារាសាគរ ដោយអះអាងថា នឹងប្រែក្លាយតំបន់ នេះទៅជាបុរីទេសចរណ៍ នឹងវប្បធម៌ ហើយនឹងដាក់ឈ្មោះថា បឹងតារាច័ន្ទ។
អ្នកវិភាគនយោបាយដែលកំពុងរស់នៅនិទ្ទេសខ្លួននៅប្រទេស ហ្វាំង ឡង់(Finland) លោក គឹម សុខ មានប្រសាសន៍ថា ការវិនិយោគរបស់ក្រុមហ៊ុនចិន នៅតំបន់តារាសាគរ ខេត្តកោះកុង នឹងបង្កើនភាពតានតឹងបន្ថែមទៀតរវាងចិន និងក្រុមប្រទេសលោកសេរី។
លោកថា ការពង្រីកការអភិវឌ្ឍន៍របស់ចិន នៅតំបន់សមុទ្រទឹកជ្រៅ ក្នុងខេត្តកោះកុង បើទោះបីការវិនិយោគនោះធ្វើឡើងដោយក្រុមហ៊ុនឯកជន ក៏ដោយ ក៏ធ្វើឲ្យសហគមអន្តរជាតិ និងប្រទេសកាន់លទ្ធិប្រជាធិបតេយ្យ មិនអាចជឿទុកចិត្ត បានឡើយ នៅពេលដែលចិនពង្រីកឥទ្ធិពលនៅកម្ពុជា។
«ចិនតែងតែភ្ជាប់នូវការអភិវឌ្ឍន៍របស់ខ្លួន ជាមួយនឹងការបង្ហូរចូលនូវ ជនជាតិចិន ច្រើនរាប់ម៉ឺននាក់ ចូលមកក្នុងប្រទេសកម្ពុជា។ដូចជាខាងវិនិយោគវិស័យ អចលនទ្រព្យ និងវិស័យទេសចរណ៍ ជាដើម ដែលរូបភាពបែបនេះ ជាទូទៅ ជាយុទ្ធសាស្ត្រ ឈ្លានពាននៃអាណានិគម ក្នុងឈ្មោះសេដ្ឋកិច្ច មិនមែនបទដ្ឋាន ទំនាក់ទំនងពាណិជ្ជកម្ម ត្រឹមត្រូវទេ"។
ការប្រកាសគំរោងអភិវឌ្ឍន៍ថ្មីរបស់ ក្រុមហ៊ុនចិននេះ ធ្វើក្រោយបន្ទាប់ពីអាមេរិកទើបបានដាក់ទណ្ឌកម្មលើក្រុមហ៊ុនចិនមួយ ដែលជាប់ពាក់ព័ន្ធនឹងរដ្ឋាភិបាលចិន។
កាលពីថ្ងៃទី១៤ ខែកញ្ញា ក្រសួងរតនាគារអាមរិក បានដាក់ទណ្ឌកម្មលើក្រុមហ៊ុនចិន UDG ដែលស្ថាប័ននេះអះអាងថាគ្រប់គ្រងដោយរដ្ឋអំណាចចិន ដែលកំពុងអនុវត្តគម្រោងអភិវឌ្ឍន៍នៅតំបន់តារាសាគរ ខេត្តកោះកុង។
ក្រសួងរតនាគារអាមេរិកថា សាធារណរដ្ឋប្រជាមានិតចិន បានប្រើប្រាស់គម្រោងរបស់ក្រុមហ៊ុន នេះនៅកម្ពុជា ដើម្បីពង្រីកមហិច្ឆតារបស់ខ្លួនក្នុងការពង្រីកអំណាចរបស់ចិននៅលើសាកលលោក។ បើតាមសហរដ្ឋអាមេរិកក្រុមហ៊ុននេះបានចុះបញ្ជីក្លែងបន្លំបោកប្រាស់ថាជាក្រុមហ៊ុនមានសញ្ជាតិកម្ពុជា ដើម្បីទទួលបានដីសម្បទានដល់ទៅជាង៣ម៉ឺនហិកតារ (៣៦.០០០) ក្នុងនោះបានបណ្តាលឲ្យពលរដ្ឋកម្ពុជាជាច្រើននាក់ត្រូវរងគ្រោះដោយសារការបណ្តេញចេញពីដីធ្លីរបស់ពួកគេដោយបង្ខំ ការបំផ្លាញបរិស្ថាន និងផលប៉ះពាល់ដល់ជីវភាពរស់នៅរបស់សហគមន៍មូលដ្ឋាន។ ក្រសួងរតនាគារអាមេរិកថែមទាំងព្រមានពីលទ្ធភាពនៃវត្តមានយោធាចិនជាអចិន្ត្រៃយ៍នៅលើទឹកដីកម្ពុជាតាមរយៈគម្រោងអភិវឌ្ឍន៍នោះថែមទៀត៕