អាជ្ញាធរមិនទាន់បញ្ជូនអ្នកជាប់ឃុំដែលដាក់ផ្ញើនៅពន្ធនាគារផ្សេងៗ ក្នុងពេលមានទឹកជំនន់ ត្រឡប់នាំទៅពន្ធនាគារខេត្តបន្ទាយមានជ័យវិញទេ ដោយសារនៅបន្តលាងសំអាត និងបាញ់ថ្នាំសម្លាប់មេរោគ។ អាជ្ញាធរអះអាងថា សុខភាពរបស់អ្នកជាប់ឃុំមួយចំនួន ដែលរងផលប៉ះពាល់ពីទឹកជំនន់ បានធូរស្រាលពីរោគរមាស់ខ្លួនខ្លះហើយ។ ទោះបីជាយ៉ាងនេះក្ដី សាច់ញាតិរបស់អ្នកជាប់ឃុំ ចង់ឲ្យអាជ្ញាធរអនុញ្ញាតឲ្យអ្នកកើតរមាស់ធ្ងន់ធ្ងរ បានចេញទៅសម្រាកព្យាបាលនៅមន្ទីរពេទ្យក្រៅពន្ធនាគារ ។
អ្នកនាំពាក្យអគ្គនាយកដ្ឋានពន្ធនាគារ លោក នុត សាវនា ប្រាប់អាស៊ីសេរីថា ឆ្មាំពន្ធនាគារ និងអ្នកទោសខ្លះ កំពុងបន្តសំអាតបង្ហើយ ក្នុងបរិវេណពន្ធនាគារខេត្តបន្ទាយមានជ័យ ហើយគ្រោងនឹងបញ្ជូនអ្នកជាប់ឃុំពីពន្ធនាគារផ្សេងៗ មកដាក់ក្នុងពន្ធនាគារខេត្តបន្ទាយមានជ័យវិញ នៅសប្ដាហ៍នេះ។ លោក នុត សាវនា បន្តថា អ្នកជាប់ឃុំភាគច្រើន បានធូរស្រាលពីរោគរមាស់ខ្លួនបណ្ដើរៗ ខ្លះហើយ ក្រោយពេលអាជ្ញាធរបានចែកសាប៊ូឲ្យប្រើប្រាស់ ដើម្បីលាងសំអាតខ្លួន និងបរិវេណបន្ទប់ឃុំ ដោយផ្ដល់ទឹកប្រើប្រាស់បានច្រើនជាងមុន៖ «បញ្ហាគមរមាស់វានៅមាន ប៉ុន្តែមានការធូរស្បើយដោយសារយើងបានផ្គត់ផ្គង់ថ្នាំជូនពួកគាត់ បង្កើនអនាម័យជាងមុន។ មានសាប៊ូឲ្យគាត់ប្រើប្រាស់ ងូតទឹកឲ្យបានច្រើនជាងមុន ដុសលាងខ្លួនសម្អាតអ៊ីចឹង ឲ្យបានល្អជាងមុន ហើយមានថ្នាំលាប»។
អគ្គនាយកដ្ឋានពន្ធនាគារ បានជម្លៀសអ្នកជាប់ឃុំសរុបទាំងអស់ ជាង ១.៦០០នាក់ ចេញពីពន្ធនាគារខេត្តបន្ទាយមានជ័យ ដោយបែងចែកអ្នកខ្លះ យកទៅដាក់នៅពន្ធនាគារខេត្តកំពង់ធំ ពន្ធនាគារខេត្តសៀមរាប ពន្ធនាគារខេត្តឧត្តរមានជ័យ និងខ្លះទៀត យកទៅដាក់នៅមណ្ឌលអប់រំកែប្រែទី៣ ឬពន្ធនាគារត្រពាំងផ្លុង នៅខេត្តត្បូងឃ្មុំ ក្នុងអំឡុងទឹកជន់លិចពន្ធនាគារ កាលពីខែតុលាកន្លងមក។
ក្នុងពេលជាមួយគ្នានោះ អ្នកជាប់ឃុំនៅក្នុងមណ្ឌលអប់រំកែប្រែទី២ "ម២" ឬហៅថា ពន្ធនាគារព្រៃសផ្នែកស្ត្រី ប្រមាណជាង ២.០០០នាក់ ក៏ត្រូវបានជម្លៀសចេញទាំងស្រុងដែរ ដោយអ្នកខ្លះត្រូវជម្លៀសទៅផ្នែកបុរស គឺ "ម១" និងខ្លះទៀតទៅពន្ធនាគាររាជធានីភ្នំពេញ ហៅកាត់ថា ប៉េហ្ស៊ី (PJ)។
ការជម្លៀសអ្នកជាប់ឃុំចេញពី "ម២" និងពន្ធនាគារខេត្តបន្ទាយមានជ័យ ភ្លាមៗ នោះ គឺបណ្ដាលឲ្យអ្នកជាប់ឃុំខ្លះ កើតជំងឺកន្ទួលរមាស់លើខ្លួន ដោយសារដើរលុយទឹកមានមេរោគ និងការស្នាក់នៅប្រជ្រៀតគ្នា គ្មានអនាម័យ។
ប្រពន្ធរបស់សមាជិកក្រុមប្រឹក្សាជាប់ឆ្នោតរាជធានីភ្នំពេញ លោក កាក់ កុម្ភារ គឺលោកស្រី ព្រុំ ចាន់ថា ឲ្យដឹងថា ស្ថានភាពសុខភាពរបស់លោក កាក់ កុម្ភារ ដែលកើតកន្ទួលរមាស់ខ្មៅដុំៗ លើស្បែក បានធូរស្រាលខ្លះហើយ ដោយសារលោកស្រីបានទិញថ្នាំផ្ញើឲ្យប្ដីលាប នៅពេលទៅជួបសួរសុខទុក្ខម្ដងៗ។
ទោះជាយ៉ាងណា លោកស្រី ព្រុំ ចាន់ថា ចង់ឲ្យមន្ត្រីពន្ធនាគារសំអាតមន្ទីរឃុំឃាំង "ម១" ឲ្យបានស្អាត ដោយត្រូវបាញ់សម្លាប់មេរោគជាប្រចាំ និងត្រូវកែលម្អស្ថានភាពរស់នៅចង្អៀតណែន ក្នុងបន្ទប់ឃុំឃាំង ដើម្បីឲ្យអ្នកជាប់ឃុំ មានសុខភាពល្អប្រសើរឡើងវិញ៖ «ទៅម្សិលមិញហ្នឹង គាត់ថាបានធូរច្រើនជាងមុនហើយ ដោយសារតែស្ថានភាពទឹកវាគោកផងទៅ។ ថ្ងៃក្ដៅអ៊ីចឹងទៅ វាងាប់មេរោគជាងមុនអ៊ីចឹង ហើយក៏ឲ្យពួកគាត់លាបដែរ បើលាបតែយើង ក៏នៅតែឆ្លងដែរ។ ថ្នាំខ្ញុំទិញ ផ្ញើទៅរហូតហ្នឹង ហើយខាងអង្គការលីកាដូចុះទៅចឹងទៅ ប្រហែលជាគាត់ឲ្យថ្នាំរមាស់ដែរ មិនអត់ទេ។ ខ្ញុំទិញឲ្យដែរ៥ទីប៦ទីប តាមតែគេឲ្យយកចូល។ យកទៅច្រើនពេកក៏អត់ឲ្យយកចូលដែរ ។ វាមានកំណត់របស់គេអ៊ីចឹងណា៎»។
ចំណែកស្ថានភាពសុខភាពរបស់អ្នកទោសមនសិការមួយចំនួនទៀត ក្នុងពន្ធនាគារ "ម២" នៅផ្នែកស្ត្រីវិញ ក៏មានភាពប្រសើរជាងមុនច្រើនដែរ។ លោកស្រី សាន សារ៉ន ដែលត្រូវជាម្ដាយរបស់សកម្មជនមាតាធម្មជាតិ កញ្ញា ឡុង គន្ធា ឲ្យដឹងថា ក្រោយកូនលោកស្រីប្ដូរពីពន្ធនាគាររាជធានីភ្នំពេញ ប៉េហ្ស៊ី (PJ) មកដាក់នៅ "ម២" វិញ អាជ្ញាធរបានជួយសម្រួលឲ្យក្រុមអ្នកទោសមនសិការខ្លះអាចរស់នៅក្នុងបន្ទប់ឃុំឃាំងជាមួយគ្នា អាចសម្រាលទុក្ខលំបាកដល់ពួកគេបានច្រើន។
លោកស្រី សាន សារ៉ន បន្តទៀតថា អ្នកទោសមនសិការ ៣នាក់ គឺកញ្ញា ឡុង គន្ធា កញ្ញា ភួន កែវរស្មី និងកញ្ញា ឈឿន ដារ៉ាវី រស់នៅក្នុងបន្ទប់ឃុំឃាំងតែមួយ ហើយមិនសូវមានអាការៈរមាស់ខ្លួនខ្លាំងនោះទេ៖ «ចា៎ សុគន្ធ គេដូរ ទៅប៉េហ្ស៊ី ។ ខ្ញុំទៅមើលនៅប៉េហ្ស៊ីហ្នឹងម្ដង ប៉ុន្តែទៅហ្នឹងពិបាកណាស់ គេជក់បារី គេអីចឹងណា៎ ប្រាប់ខ្ញុំ ថា ពិបាក។ ដល់ពេលនេះទៅ គេដូរមក "ម២" ដូរទាំងពីរថ្ងៃសុក្រ»។
ក្រៅពីការលាងសំអាតបរិវេណពន្ធនាគារ និងការបន្ថែមវិធានការចែកសាប៊ូ និងថ្នាំបំបាត់រមាស់ដល់អ្នកជាប់ឃុំហើយនោះ អាជ្ញាធរក៏កំពុងពិចារណាសិក្សាគម្រោងផ្លាស់ប្ដូរទីតាំងពន្ធនាគារដែរ។
លោក នុត សាវនា ធ្លាប់បានបញ្ជាក់ថា នៅក្រោយពេលរៀបចំ អ្នកជាប់ឃុំតាមកន្លែងដើមវិញរួចរាល់ហើយ ខាងពន្ធនាគារនឹងសិក្សាពីលទ្ធភាពប្ដូរទីតាំងពន្ធនាគារមួយចំនួន ដែលលិចទឹក ព្រោះពន្ធនាគារទាំងអស់នោះ គឺស្ថិតនៅតំបន់ទំនាប ដែលងាយរងគ្រោះពីទឹកជន់លិច។
អង្គការ សង្គមស៊ីវិល គាំទ្រឲ្យអាជ្ញាធរសិក្សារកទីតាំងថ្មី ដើម្បីប្ដូរពន្ធនាគារ ចេញពីតំបន់ទំនាប ដែលងាយលិចទឹក និងជំរុញឲ្យមានការពង្រីកអគារឃុំឃាំងឲ្យបានធំទូលាយ ដើម្បីកាត់បន្ថយភាពចង្អៀតណែន ដែលជាសិទ្ធិរបស់អ្នកជាប់ឃុំ។
គិតត្រឹមខែឧសភា អ្នកជាប់ឃុំក្នុងពន្ធនាគារនៅទូទាំងប្រទេស មានចំនួន ៣៨.៩១១នាក់។ ក្នុងនោះ អ្នកមិនទាន់កាត់ទោស មានចំនួនជាង ១៣.៧២៩នាក់។ អ្នកជាប់ឃុំភាគច្រើន ដែលមានប្រមាណមួយភាគបី (១/៣) នៃអ្នកជាប់ឃុំទាំងអស់ គឺពាក់ព័ន្ធនឹងបទល្មើសគ្រឿងញៀន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។