សមត្ថកិច្ចសាលាខណ្ឌឫស្សីកែវ នាំខ្លួនក្រុមយុវជនដែលបម្រុងចាក់បញ្ចាំងវីដេអូរបស់ទូរទស្សន៍អាល់ហ្សាហ្សេរ៉ា (Al Jazeera) ស្ដីអំពីឃាតកម្មបណ្ឌិត កែម ឡី ទៅសួរនាំនៅប៉ុស្តិ៍ប៉ូលិសទួលសង្កែ នៅរសៀលថ្ងៃអាទិត្យ ទី១២ មីនា។ សមត្ថកិច្ចអះអាងថា ក្រុមយុវជននេះមិនបានសុំច្បាប់ចាក់បញ្ចាំងវីដេអូជាមុន ហើយថាសំណុំរឿងបណ្ឌិត កែម ឡី កំពុងស្ថិតនៅក្នុងដៃតុលាការនៅឡើយ។
ក្រុមយុវជនដែលត្រូវសមត្ថកិច្ចនាំខ្លួនទៅសួរនាំរួមមាន ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី និងយុវជន ៣នាក់ផ្សេងទៀត។
វីដេអូដែលក្រុមយុវជនដែលគេស្គាល់ថាជាយុវជន កែម ឡី និយម នឹងចាក់បញ្ចាំងនោះ រួមមានវីដេអូរបស់ទូរទស្សន៍អាល់ហ្សាហ្សេរ៉ា ប្រវែងជិតកន្លះម៉ោង ដោយមានការបកប្រែជាភាសាខ្មែរផង និងវីដេអូឯកសារពាក់ព័ន្ធនឹងឃាតកម្មបណ្ឌិត កែម ឡី នៅស្តារម៉ាត ( Star Mart ) កាល់តិច (Caltex) បូកគោ ដែលត្រូវបានគេបង្ហាញនៅតុលាការ។
កម្មវិធីចាក់បញ្ចាំងវីដេអូនេះ គឺធ្វើនៅទីស្នាក់ការសមាគមសម្ព័ន្ធនិស្សិតបញ្ញវន្តខ្មែរ និងអង្គការពលរដ្ឋដើម្បីអប់រំ ដែលមានអាសយដ្ឋានផ្ទះលេខ A13 ផ្លូវលេខ ១០៧ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
សូមស្ដាប់ព័ត៌មានពិស្ដារ៖
ក្រុមយុវជនដែលគេថាជាសិស្ស និងអ្នក កែម ឡី និយម អះអាងថា អាជ្ញាធរប្រើអំណាចដាក់សម្ពាធពួកគេមិនឲ្យចាក់បញ្ចាំងវីដេអូស្ដីពីឃាតកម្មបណ្ឌិត កែម ឡី និងដកហូតវីដេអូនេះជាថ្នូរនឹងការដោះលែងពួកគេ។
សូមស្ដាប់លោក សេក បណ្ឌិត រាយការណ៍អំពីព័ត៌មាននេះបន្ថែម៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។