អាជ្ញាធរខេត្តសៀមរាបសម្រេចផ្ដល់ប្រាក់ប័ណ្ណសមធម៌ជូនពលរដ្ឋជាង ២ពាន់គ្រួសារនៅតំបន់រុនតាឯកវិញ ក្រោយពីពលរដ្ឋ បានចេញតវ៉ាជាបន្តបន្ទាប់។ មន្ត្រីសង្គមស៊ីវិលថា ការដោះស្រាយ របស់អាជ្ញាធរនេះ គឺជារឿងត្រឹមត្រូវ ដើម្បីជួយសម្រួលដល់ជីវភាពពលរដ្ឋ។
ប្រជាពលរដ្ឋ និងអាជ្ញាធរមូលដ្ឋាន ស្រុកបន្ទាយស្រី ឱ្យដឹងថា អភិបាលរងខេត្ត លោក លី សំរិទ្ធ និងមន្ត្រីសង្គមកិច្ច អតីតយុទ្ធជន និងយុវនីតិសម្បទាកាលពីថ្ងៃទី១ ខែកុម្ភៈ បានចុះមកដោះស្រាយជាមួយពលរដ្ឋដោយផ្ទាល់ ហើយសន្យាថា នឹងផ្ដល់ប្រាក់ប័ណ្ណសមធម៌ជូនពលរដ្ឋជាង២.០០០គ្រួសារនៅតំបន់រុនតាឯកវិញ ចាប់ពីថ្ងៃទី៥ ខែកុម្ភៈ ខាងមុខនេះ។
ពលរដ្ឋរស់នៅតំបន់រុនតាឯក លោកឡង ឡែន ប្រាប់វិទ្យុអាស៊ីសេរីនៅថ្ងៃទី០៣ ខែកុម្ភៈថា ពួកគាត់សប្បាយចិត្ត ដែលអាជ្ញាធរសម្រេចផ្ដល់ប្រាក់សមធម៌ទាំងអស់មកវិញ។ លោកថា ទោះថវិកានេះ ពុំបានច្រើន តែក៏អាចជួយដោះស្រាយជីវភាពពួកគាត់បានខ្លះ។
យ៉ាងណា លោក ឡង ឡែន នៅតែមិនទាន់ជឿទុកចិត្តចំពោះការសន្យារបស់អាជ្ញាធរទាំងស្រុងនៅឡើយទេ។ ចំណែក ប្រជាពលរដ្ឋក៏បានត្រៀមខ្លួនរួចជាស្រេចថា នឹងតវ៉ាសាជាថ្មី ប្រសិនបើអាជ្ញាធរពុំគោរពតាមការសន្យា។ លោកថា កាលថ្ងៃទី២៦ មករា អាជ្ញាធរធ្លាប់សន្យាម្ដងរួចហើយ តែបែរពុំផ្ដល់នោះទេ។
លោក ឡង ឡែន៖ «យើងដឹងហើយថា នៅកន្លែងអភិវឌ្ឍន៍មួយៗ នៅពេលយើងចាប់ផ្ដើមអភិវឌ្ឍន៍មុនដំបូង វាជួបការលំបាកខ្លាំងមែនទែន សម្រាប់ប្រជាពលរដ្ឋដែលគាត់អត់មានប្រភពចំណូល។ អ៊ីចឹងមុននឹងធ្វើអ្វីដែលប៉ះពាល់ពួកគាត់ គួរតែគិតពិចារណាឱ្យបានវែងឆ្ងាយបន្តិច ដើម្បីបញ្ចៀសការមានបញ្ហារបស់ពលរដ្ឋ»។
ពលរដ្ឋបានអះអាងថា ចាប់តាំងពីពួកគាត់ មករស់នៅតំបន់រុនតាឯក មានពលរដ្ឋស្ទើរ ៩៩ភាគរយហើយ ប្រឈមបញ្ហាជីវភាព និងជំពាក់បំណុលវ័ណ្ឌក ដោយសារត្រូវខ្ចីបំណុលបន្ថែមទៀត ដើម្បីសាងសង់ផ្ទះ និងចំណាយ លើការហូបចុកប្រចាំថ្ងៃ។
ជុំវិញរឿងនេះវិទ្យុអាស៊ីសេរីពុំអាចទាក់ទងអភិបាលខេត្តសៀមរាប លោក ប្រាក់ សោភ័ណ និងមេឃុំរុនតាឯក អ្នកស្រី ឈួន អ៊ឹម បានទេនៅថ្ងៃទី៣ ខែកុម្ភៈ ដោយហៅទូរស័ព្ទចូលតែគ្មានអ្នកទទួល។យ៉ាងណា ជំទប់ទី១ ឃុំរុនតាឯក លោក ទាវ សម ប្រាប់វិទ្យុអាស៊ីសេរីថា កាលពីថ្ងៃទី១ ខែកុម្ភៈ អភិបាលរងខេត្តសៀមរាប លោក លី សំរិទ្ធ និងតំណាងមន្ត្រីសង្គមកិច្ច បានចុះមកសម្របសម្រួលជូនពលរដ្ឋរួចហើយថា នឹងផ្ដល់ប្រាក់ប័ណ្ណសមធម៌ទាំងអស់ដល់ពលរដ្ឋវិញ ដោយពុំមានការកាត់ពាក់កណ្ដាលនោះទេ។
លោក ទាវ សម៖ «ការបកស្រាយរបស់គាត់[លោក លី សំរិទ្ធ]គឺគាត់បានទំនាក់ទំនងជាមួយបងប្អូនប្រជាពលរដ្ឋ និងបានបកស្រាយជូនប្រជាពលរដ្ឋនៅពេលថ្ងៃនោះហើយ អ៊ីចឹងឯកឧត្តមប្រធានគាត់បានសន្យាផ្ដល់ជូនប្រជាពលរដ្ឋវិញ»។
នៅថ្ងៃទី២ ខែកុម្ភៈ ក្រសួងសង្គមកិច្ចអតីតយុទ្ធជន និងយុវនីតិសម្បទា បានចេញសេចក្ដីបំភ្លឺទៅគណបក្សកម្លាំងជាតិ ថា បញ្ហាការតវ៉ារបស់ពលរដ្ឋនៅតំបន់រុនតាឯក ពាក់ព័ន្ធប័ណ្ណសមធម៌នេះ រដ្ឋាភិបាលកំពុងតែដោះស្រាយទៅតាមគោលការណ៍នីតិវិធី ហើយពុំឱ្យពលរដ្ឋបាត់បង់ផលប្រយោជន៍នោះទេ។ សេចក្ដីប្រកាសដដែលនេះ ក៏បានស្នើឱ្យពលរដ្ឋរក្សាភាពស្ងប់ស្ងាត់។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្ស កម្ពុជា លោក វណ្ណ សុផាត លើកឡើងថា ការសម្រេចផ្ដល់ជូនប្រាក់ប័ណ្ណសមធម៌ដល់ពលរដ្ឋវិញ ពីសំណាកអាជ្ញាធរគឺជាសញ្ញាល្អ។ ប៉ុន្តែអាជ្ញាធរគួរតែពិនិត្យឡើងវិញដល់ជីវភាពពលរដ្ឋ ហើយបញ្ឈប់ការបណ្ដាញពលរដ្ឋចេញទាំងបង្ខំតទៅទៀត។
លោក វណ្ណ សុផាត៖ «អាហ្នឹងជាការរំលោភសិទ្ធិធ្ងន់ធ្ងរ ជាពិសេសអនុសាសន៍របស់អង្គការលើកលែងទោសអន្តរជាតិ(Amnesty International)ឬអង្គការយូណេស្កូ(UNESCO)ថ្មីៗ នេះ សូមឱ្យបញ្ឈប់ការបណ្ដេញជាបន្ទាន់ ហើយពិនិត្យមើលជីវភាពប្រជាពលរដ្ឋដែលបានត្រូវបណ្ដេញចេញទៅរុនតាឯកហ្នឹង»។
ចាប់តាំងពីចុងខែមករា រហូតដល់ដើមខែកុម្ភៈ ប្រជាពលរដ្ឋជាង ២ពាន់នាក់បាននាំគ្នាប្រមូលម្ដុំ តវ៉ានៅមុខសាលាឃុំរុនតាឯក និងនៅផ្សារថ្មីក្នុងភូមិរុនតាឯក អស់រយៈពេលបីលើកមកហើយ ក្រោយពីរដ្ឋាភិបាល បានកាត់ប្រាក់ប័ណ្ណសមធម៌ពីពលរដ្ឋ ចំនួនពី ២០ ទៅ ៣០ ម៉ឺនរៀលក្នុងមួយគ្រួសារ ឬកាត់យ៉ាងតិចពាក់កណ្ដាល ក្រោមហេតុផលថា យកប្រាក់នោះទៅជួយអ្នករៀនជំនាញផ្សេងៗ។ ពលរដ្ឋថា ការកាត់ប្រាក់ស្ទើរពាក់កណ្ដាលនេះគឺជាការដើរផ្ទុយនឹងការសន្យា របស់រដ្ឋាភិបាល ដែលសន្យា ថានឹងផ្ដល់ជូនពួកគាត់រយៈពេល ១០ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។