សមត្ថកិច្ច កាលពីថ្ងៃទី១១ មីនា បានឃាត់ខ្លួនជនជាតិចិនចំនួន៦ នាក់ ក្នុងនោះមានស្ត្រីម្នាក់ ក្រោយពីបានឆ្លងតាមព្រំដែនពីប្រទេសវៀតណាម( Vietnam) ចូលមកប្រទេសកម្ពុជា តាមច្រកជ័យជោគ ជាប់នឹងខេត្តតាកែវ។
អ្នកនាំពាក្យអគ្គស្នងការនគរបាលជាតិលោក ឆាយ គឹមឃឿន បញ្ជាក់ថា សមត្ថកិច្ចមិនទាន់ដឹងពីមូលហេតុពិតប្រាកដដែលជនជាតិចិនទាំង ៦ នាក់នេះ បានលបឆ្លងដែនចូលមកប្រទេសកម្ពុជានោះទេ ដោយសារតែសមត្ថកិច្ចបានដាក់ពួកគេឱ្យធ្វើចត្តាឡីស័ក រយៈពេល១៤ ថ្ងៃសិនទើបសមត្ថកិច្ចចាប់ផ្ដើមសាកសួរមុននឹងបំពេញនីតិវិធីតាមផ្លូវច្បាប់៖«យើងកំពុងសួរនាំតែពេលសួរនាំហើយ យើងនឹងរុញទៅចត្តាឡីស័កសិន»។
លោក ឆាយ គឹមឃឿន មានប្រសាសន៍ថា ចាប់តាំងពីព្រឹត្តិការណ៍ថ្ងៃទី ២០ កុម្ភៈ មកសមត្ថកិច្ចនៅតាមតំបន់ព្រំដែនកំពុងរឹតបណ្ដឹងរាល់ការចេញចូល និងចរាចរណ៍ពលរដ្ឋពីតំបន់មួយទៅតំបន់មួយដើម្បីទប់ស្កាត់ការរាលដាលជំងឺកូវីដ១៩ ចូលទៅក្នុងសហគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។