ក្រុមអ្នកធ្វើការងារកីឡាប្រដាល់គុនខ្មែរ (Kun Khmer) ជំរុញឱ្យមានការផ្សព្វផ្សាយគុនខ្មែរឱ្យបានទូលំទូលាយ និងថែរក្សារក្សាការពារកីឡានេះឱ្យរីកចម្រើនដូចប្រទេសជិតខាង។ ការលើកឡើងដូច្នេះ ក្រោយពេលកម្ពុជាដែលជាម្ចាស់ផ្ទះនៃការប្រកួតគុនខ្មែរកីឡាស៊ីហ្គេម(SEA Games) ជោគជ័យក្នុងការប្រើពាក្យគុនខ្មែរ ក្នុងវិញ្ញាសាប្រកួតកីឡាស៊ីហ្គេម នាពេលខាងមុខ។
ក្រុមអ្នកធ្វើការងារកីឡាប្រដាល់គុនខ្មែរ លើកឡើងថា ទោះពេលនេះកម្ពុជាមានសិទ្ធិគ្រប់គ្រាន់ ក្នុងការប្រើពាក្យគុនខ្មែរជំនួសពាក្យមួយថៃ (Muay Thai) ក្នុងវិញ្ញាសាប្រកួតកីឡា ស៊ីហ្គេម ប៉ុន្តែ អ្វីដែលកម្ពុជាត្រូវធ្វើប្រឹងប្រែងកាន់តែខ្លាំងថែមទៀត គឺរៀបចំកីឡានេះឱ្យរីកចម្រើនថែមទៀត។
នាយកមជ្ឈមណ្ឌលកីឡាកងទ័ពខេមរភូមិន្ទ លោក តែម ម៉ឺន លើកឡើងថា គុនខ្មែរជាកីឡាប្រពៃណីរបស់កម្ពុជា និងមានឯកសារអំណះអំណាងតាមជញ្ជាំងប្រាសាទអង្គរវត្ត និងប្រាសាទមួយចំនួនទៀតដែលមានអាយុកាលជាងពាន់(១.០០០)ឆ្នាំមកហើយ។ អ្នកជំនាញផ្នែកកីឡារូបនេះ ចង់ឃើញយុវជនខ្មែរ និងអ្នកពាក់ព័ន្ធរួមគ្នាអភិរក្សនិងអភិវឌ្ឍគុនខ្មែរឱ្យស្ថិតស្ថិរយូរអង្វែង។
លោក តែម ម៉ឺន៖«គេយ៉ាងម៉េចៗយើងមិនស៊ីជម្រៅទេ យើងគិតតែយើងអភិវឌ្ឍន៍របស់យើងបើកបេះដូងដើម្បីទទួលថែរក្សាការអភិវឌ្ឍរៀងៗទៅ របស់ពីណាមានអ្នកហ្នឹងថែរក្សាទៅ»។
ស្រដៀងគ្នានេះដែរ គ្រូប្រដាល់ជើងចាស់ លើកឡើងថា កម្ពុជាមិនមែនមានតែគុនខ្មែរមួយទេ គឺមានកីឡាបុរាណជាច្រើនទៀត ប៉ុន្តែ បរទេសហាក់មិនសូវស្គាល់ទេ។ លោកយល់ថា បញ្ហានេះអាចមកពីការផ្សព្វផ្សាយមិនទាន់បានទូលំទូលាយ។
លោក មាស សុខគ្រី៖«សំខាន់បំផុតមកពីយើងអត់បានសូវផ្សព្វផ្សាយនូវគុនខ្មែរយើង ដើម្បីឱ្យគេទទួលស្គាល់ដឹងលឺ»។
កម្ពុជាបានស្នើបញ្ចូល គុនខ្មែរក្នុងវិញ្ញាសាប្រកួតកីឡាស៊ីហ្គេម ក្នុងខែឧសភាខាងមុខ ក្នុងនាមកម្ពុជាជាម្ចាស់ផ្ទះនៃការប្រកួតនេះ ដោយសំអាងថា គុនខ្មែរជាកីឡាជាតិរបស់ខ្លួន។
ដំបូងឡើយភាគីថៃមិនយល់ព្រមឱ្យកម្ពុជា ប្រើពាក្យគុនខ្មែរ និងហាមមិនឱ្យកីឡាកររបស់ខ្លួនមកចូលរួមក្នុងការប្រកួតស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះនោះទេ។ ភាគីថៃ លើកឡើងថា គុនខ្មែរ គឺដូចគ្នានឹងកីឡា មួយថៃរបស់ខ្លួន។ ទោះយ៉ាងណា ភាគីថៃបានយល់ព្រមឱ្យកម្ពុជា ប្រើពាក្យគុនខ្មែរក្នុងវិញ្ញាសាប្រកួតកីឡានៃការប្រកួតស៊ីហ្គេម។ ការសម្រេចរបស់ថៃបែបនេះ ក្រោយពេលមានកិច្ចប្រជុំដែលមានការចូលរួមពីតំណាងសហព័ន្ធកីឡាក្បាច់គុនមកពីក្រុមប្រទេសក្នុងតំបន់អាស៊ានចំនួន៧ រួមមានភាគីថៃផងដែរកាលពីថ្ងៃទី២៦ ខែមករាដើម្បីជជែកទាក់ទងពាក្យគុនខ្មែរ។ ថៃបានប្រើពាក្យមួយថៃនេះ ក្នុងកម្មវិធីប្រកួតស៊ីហ្គេម កាលពីឆ្នាំ២០០៧ ដែលកាលនោះថៃធ្វើជាម្ចាស់ផ្ទះនៃការប្រកួតស៊ីហ្គេម។
ពេលនេះភាគីកម្ពុជាបានបញ្ជូនលិខិតទៅគណៈកម្មការអូឡាំពិកថៃ ដើម្បីឱ្យថៃជួយសម្រួលបញ្ជូនឈ្មោះកីឡាកររបស់ខ្លួនមកចូលរួម ក្នុងព្រឹត្តិការណ៍ស៊ីហ្គេមនាពេលខាងមុខ។
អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (CAMSOC) និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) លោក វ៉ាត់ ចំរើន ឱ្យដឹងថា ការប្រកួតកីឡាប្រដាល់គុនខ្មែរ គឺកម្ពុជាធ្វើឡើងតាមទម្រង់របស់ខ្លួន និងមិនបានធ្វើឱ្យប៉ះពាល់ដល់កីឡាប្រដាល់ប្រទេសផ្សេងនោះទេ។ លោកបន្តទៀតថា ការប្រើពាក្យគុនខ្មែរទទួលបានការគាំទ្រពីប្រទេសក្នុងតំបន់អាស៊ានចំនួន៨។ លោករំពឹងថា ការប្រកួតស៊ីហ្គេមនាពេលខាងមុខ នឹងធ្វើឱ្យគុនខ្មែរ ត្រូវបានសហគមន៍អន្តរជាតិបានស្គាល់ថែមទៀត។
លោក វ៉ាត់ ចំរើន៖«គឺយើងធ្វើអ្វីតែដែលជារតនសម្បត្តិ និងជាគោលការណ៍របស់យើងតែប៉ុណ្ណោះ យើងធ្វើការរៀបចំតែអត្តសញ្ញាណជាតិរបស់យើងទេ អ៊ីចឹងយើងប្រកាសថ្ងៃនេះថា អ្វីដែលធ្វើគឺយើងធ្វើជាម្ចាស់ផ្ទះដែលមានបុព្វសិទ្ធិក្នុងការបន្ថែមប្រភេទកីឡាអត្តសញ្ញាណជាតិរបស់យើងក្នុងការរៀបចំកម្មវិធីប្រកួត»។
កម្ពុជានឹងរៀបចំការប្រកួតកីឡាស៊ីហ្គេម លើកទី៣២ ដែលធ្វើនៅរាជធានីភ្នំពេញ ចាប់ពីថ្ងៃទី៥ ដល់ថ្ងៃទី១៧ ខែឧសភា ខាងមុខ។ កម្ពុជា ត្រៀមកងកម្លាំងជាង ២ម៉ឺននាក់ដើម្បីការពារសន្តិសុខក្នុងព្រឹត្តិការណ៍នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។