Opens in new windowធនាគារអភិវឌ្ឍន៍អាស៊ី ហៅកាត់ថា អេ.ឌី.ប៊ី (ADB) ព្យាករថា កំណើនសេដ្ឋកិច្ចកម្ពុជា នឹងនៅតែរឹងមាំរហូតដល់ឆ្នាំ២០១៦ ក៏ប៉ុន្តែការកើនឡើងនោះ ស្ថិតក្នុងល្បឿនយឺតជាងការព្យាករកាលពីដើមឆ្នាំ។ ការព្យាករនេះ ត្រូវបានបង្ហាញនៅក្នុងរបាយការណ៍ប្រចាំឆ្នាំរបស់ធនាគារនេះ ដែលចេញផ្សាយនៅថ្ងៃទី២២ ខែកញ្ញា។
របាយការណ៍នេះលើកឡើងថា សេដ្ឋកិច្ចកម្ពុជា នៅឆ្នាំ២០១៥ កើនឡើងក្នុងអត្រា ៧% ហើយនៅឆ្នាំ២០១៦ នឹងកើនក្នុងអត្រា ៧,២% ដែលកំណើននេះស្ថិតក្នុងល្បឿនយឺតជាងការព្យាករកាលពីដើមឆ្នាំ២០១៥ បន្តិច។ កាលពីដើមឆ្នាំ ធនាគារនេះព្យាករថា កំណើនក្នុងឆ្នាំ២០១៥ មាន ៧,៣% ហើយនៅឆ្នាំ២០១៦ មាន ៧,៥%។
ពាក់ព័ន្ធនឹងមូលហេតុនៃការធ្លាក់ចុះនេះ ធនាគារអភិវឌ្ឍន៍អាស៊ី ថាដោយសារវិស័យចម្បងៗដែលរុញច្រានកំណើនសេដ្ឋកិច្ចកម្ពុជា មានការធ្លាក់ចុះបន្តិច។
សេដ្ឋកិច្ចវិទូជាន់ខ្ពស់ប្រចាំកម្ពុជា នៃធនាគារអភិវឌ្ឍន៍អាស៊ី លោក ជែន ហានសេន (Jan Hansen) លើកឡើងក្នុងសេចក្ដីប្រកាសព័ត៌មានរបស់ធនាគារនេះថា ការរីកលូតលាស់នៃឧស្សាហកម្មកាត់ដេរ សំណង់ សេវាកម្មវិស័យទេសចរណ៍ ហិរញ្ញវត្ថុ និងអចលនទ្រព្យ នៅតែបន្តជំរុញកំណើនសេដ្ឋកិច្ចបន្ថែមទៀត ក៏ប៉ុន្តែលោកថា ការនាំចេញ និងវិស័យទេសចរណ៍មានការថយចុះបន្តិច ក្នុងឆមាសទី១ នៃឆ្នាំ២០១៥ នេះ ខណៈវិស័យកសិកម្មក៏ទទួលរងផលប៉ះពាល់ដោយសារភ្លៀងធ្លាក់មានកម្រិតទាប និងអូសបន្លាយយូរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។