កម្ពុជាជាប់ឈ្មោះជាប្រទេស «បង្កាត់ពូជល្បែងឆបោកតាមអនឡាញ» របស់បណ្ដាញក្រុមឧក្រិដ្ឋជនក្នុងចំណោមបណ្ដាប្រទេសមួយចំនួនទៀតក្នុងតំបន់អាស៊ីអាគ្នេយ៍ ដែលប្រតិបត្តិការល្បែងឆបោកតាមអនឡាញក្នុងទំហំទឹកប្រាក់ ១១ពាន់លានដុល្លារ។ សារព័ត៌មាន ដឹ ហែកឃឺ ញូស៍ (The Hacker News) បានរាយការណ៍ថា ក្រុមឧក្រិដ្ឋជនឆបោកតាមអនឡាញឈរជើងនៅកម្ពុជាបានដោយសារតែ មានទំនាក់ទំនងយ៉ាងជិតស្និទ្ធជាមួយក្រុមគ្រួសារត្រកូល «ហ៊ុន»។
សារព័ត៌មាន ដឹ ហែកឃឺ ញូស៍ ដែលមានមូលដ្ឋាននៅសហរដ្ឋអាមេរិកកាលពីថ្ងៃទី១០ ខែកក្កដា រាយការណ៍ថា ក្រុមឧក្រិដ្ឋជនបានបង្កើតកម្មវិធីសម្រាប់ទីផ្សារអនឡាញដែលមានឈ្មោះថា ហួយវ័ន(Huione)ប្រើប្រាស់យ៉ាងទូលំទូលាយក្នុងតំបន់អាស៊ីអាគ្នេយ៍រួមមាន កម្ពុជា មីយ៉ាន់ម៉ា (Myanmar) ឡាវ (Laos) ម៉ាឡេស៊ី (Malaysia ) និងហ្វីលីពីន (Philippines) ដើម្បីប្រតិបត្តិការលើវិស័យឆបោកតាមអនឡាញ។
សារព័ត៌មានដដែលឱ្យដឹងថា ប្រតិបត្តិករ និងក្រុមឆបោកតាមអនឡាញប្រើប្រាស់សេវាកម្មលាងលុយកខ្វក់ តាមរយៈកម្មវិធីទីផ្សារអនឡាញនេះមានយ៉ាងហោចណាស់ ១១ពាន់លានដុល្លារ។ ប្រភពដដែលបញ្ជាក់ថា ក្នុងគម្រោងកម្មវិធីសម្រាប់ទីផ្សារអនឡាញនេះប្រជាជនមកពីតំបន់អាស៊ី និងអាហ្វ្រិកមួយចំនួន ពុំបានដឹងខ្លួនឡើយ ដែលក្រុមឧក្រិដ្ឋជនមានប្រភពមកពីប្រទេសចិន បានបោកបញ្ឆោតបញ្ជូនមកធ្វើការឆ្លងដែន និងត្រូវបានបង្ខិតបង្ខំឱ្យឆបោកតាមអនឡាញ។
សារព័ត៌មាន ដឹ ហែកឃឺ ញូស៍ បានដកស្រង់សម្ដីអ្នកជំនាញនៃក្រុមហ៊ុនវិភាគការបោកប្រាស់តាមអនឡាញ (Blockchain) របស់អង់គ្លេសថា កម្មវិធីសម្រាប់ទីផ្សារអនឡាញចិនឈ្មោះថា ហួយវ័ន ក៏មានបណ្ដាញក្រុមហ៊ុនហួយវ័ន ដែលគ្រប់គ្រងដោយអ្នកជំនួញចិនកំពុងឈរជើងនៅកម្ពុជាដែលមានទំនាក់ទំនងយ៉ាងជិតស្និទ្ធជាមួយគ្រួសារត្រកូលហ៊ុន។ ក្រុមហ៊ុនកំពុងមានវត្តមាននៅកម្ពុជានេះ ក៏កំពុងប្រតិបត្តិការផ្ទេរទូទាត់សាច់ប្រាក់យ៉ាងសកម្មក្នុងវិស័យឆបោកតាមអនឡាញជាសកល។
ឆ្លើយតបចំពោះការផ្សព្វផ្សាយរបស់សារព័ត៌មានបរទេសនេះ អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សអ្នកស្រី ជូ ប៊ុនអេង នៅថ្ងៃទី១១ ខែកក្កដា ច្រានចោលចំពោះរបាយការណ៍នៃស្ថាប័នសារព័ត៌មាននេះ ដោយចាត់ទុកថា គ្មានមូលដ្ឋាន និងមានចេតនាទម្លាក់កំហុសបង្ខូចឈ្មោះកម្ពុជា។
អ្នកស្រី ជូ ប៊ុនអេង៖«កម្ពុជាគឺជាប្រទេសដែលរងគ្រោះ បើគ្រាន់តែនាំគ្នាមកបំផ្លាញបង្កើតរឿងយើងខូចឈ្មោះប៉ុណ្ណា ហើយឱ្យមានរឿងយើងដោះស្រាយរឿងក្បាលប៉ុណ្ណា។ យើងមិនមែនចង់ទុកបទល្មើសក្នុងប្រទេសខ្លួនឯង ដើម្បីបំផ្លាញការអភិវឌ្ឍខ្លួនឯងទេ ប៉ុន្តែយើងតែងតែអំពាវនាវ តើមានប្រទេសណាខ្លះ មានសមត្ថភាពបង្ក្រាប ឬបង្ការបទល្មើសទាំងអស់ហ្នឹង ហើយឱ្យជួយផ្ដល់បទពិសោធន៍ ឬមកជួយឱ្យយើងបានសហការជាមួយផង»។
ទោះជាយ៉ាងណា ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា លើកឡើងថា ការណ៍ដែលរដ្ឋាភិបាលមិនទទួលស្គាល់របាយការណ៍របស់ស្ថាប័នអន្តរជាតិនានាដែលលើកឡើងបញ្ហាជួញដូរមនុស្ស គឺហេតុធ្វើឱ្យប្រតិបត្តិការបង្ក្រាបអំពើជួញដូរមនុស្ស និងបញ្ហាបោកតាមអនឡាញរបស់អាជ្ញាធរនៅចន្លោះប្រហោង និងគ្មានប្រសិទ្ធភាព។
លោក នី សុខា៖«អាជ្ញាធរកម្ពុជាគួរណាកុំធ្វើការបដិសេធប្រញាប់ពេក យើងត្រូវយករបាយការណ៍ទាំងអស់ហ្នឹងមកធ្វើការឆ្លុះបញ្ចាំង មកធ្វើការសិក្សាបន្ថែមទៀត ព្រោះថា របាយការណ៍វាអាចជួយយើងជាពន្លឺសម្រាប់ឱ្យយើងអាចធ្វើការឆ្លុះបញ្ចាំង ដើម្បីរកមើលថា រឿងហ្នឹងមានពិតយ៉ាងម៉េច មិនពិតយ៉ាងម៉េច បានវាអត់មានអីខាតសម្រាប់ប្រទេសកម្ពុជា។ ផ្ទុយទៅវិញ ប្រសិនជាយើងបដិសេធ ហើយយើងមិនបានដោះស្រាយបញ្ហាឱ្យស៊ីជម្រៅឱ្យដល់ឫសគល់ទេ បញ្ហានឹងនៅតែកើតមានជាបន្តបន្ទាប់វាជាធ្វើឱ្យជះឥទ្ធិពលមកល្អដល់ប្រទេសកម្ពុជាទៅវិញទេ»។
របាយការណ៍ស្ដីពីការជួញដូរមនុស្សនៅលើពិភពលោកប្រចាំឆ្នាំ២០២៤ របស់ក្រសួងការបរទេសអាមេរិក ផ្សាយកាលពីថ្ងៃទី២៤ ខែមិថុនា រកឃើញថា អំពើពុករលួយ និងការសមគំនិតពីសំណាក់ក្រុមមន្ត្រីរដ្ឋាភិបាលក្នុងឧក្រិដ្ឋកម្មជួញដូរមនុស្ស នៅតែរីករាលដាលខ្លាំង។ នេះក៏រាប់បញ្ចូលទាំងការកេងប្រវ័ញ្ចលើជនរងគ្រោះរាប់ម៉ឺននាក់ក្នុងឧក្រិដ្ឋកម្មបង្ខាំងមនុស្សឱ្យប្រព្រឹត្តអំពើឆបោកតាមអនឡាញនៅក្នុងប្រទេសកម្ពុជាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។