មន្ត្រីសង្គមស៊ីវិលនិយាយថា សំណុំរឿងរបស់លោក ដួង ឆាយ មិនត្រូវបញ្ចប់ត្រឹមដកហូតគោរមងារជាឧកញ៉ាទេ គឺលោកត្រូវផ្ដន្ទាទោសពាក់ព័ន្ធពីបទប្រើប្រាស់អំពើហិង្សា ប្រសិនបើលោកបានប្រព្រឹត្តបទល្មើសដូចការចោទប្រកាន់មែន។
នាយិកាមជ្ឈមណ្ឌលសិទ្ធិមនុស្សកម្ពុជាអ្នកស្រី ចក់ សុភាព មានប្រសាសន៍ថា ការដកហូតគោរមងារជាជំហានមួយ តែមិនគួរបញ្ចប់ត្រឹមនេះទេ ពីព្រោះអំពើហិង្សាទៅលើស្ត្រីនេះត្រូវតែបន្តនីតិវិធីតាមផ្លូវច្បាប់ថែមទៀតដើម្បីជាគំរូដល់អ្នកក្រោយៗទៀតកុំឱ្យប្រើប្រាស់អំពើហិង្សានៅក្នុងក្រុមគ្រួសារតទៅទៀត។
អ្នកស្រីបន្តថា ក្នុងករណីអំពើហិង្សាដែលមានលក្ខណៈបទល្មើសព្រហ្មទណ្ឌរបៀបនេះមិនចាំបាច់ជនរងគ្រោះចេញមុខប្ដឹងផ្ដល់ទេ។ អាជ្ញាធរមានសមត្ថកិច្ច រួមទាំងក្រសួងកិច្ចការនារីដែលធ្វើការងារទាក់ទងទៅលើស្ត្រីគួរតែចាត់វិធានការទៅតាមនីតិវិធីផ្លូវច្បាប់៖«នៅក្នុងករណីនៃការប្រើប្រាស់អំពើហិង្សាទៅលើស្ត្រីជនរងគ្រោះអាចប្រឈមនូវកត្តាជាច្រើនជាឧបសគ្គដល់ស្ត្រីក្នុងការចេញមុខ ឬក៏ធ្វើការរាយការណ៍និងដាក់ពាក្យបណ្ដឹង។ ហេតុដូច្នេះនៅក្នុងករណីដែលអាជ្ញាធរបានដឹងឮរឿងរ៉ាវទាំងអស់នេះ។ អាជ្ញាធរត្រូវតែមានសមត្ថកិច្ចក្នុងការបន្តនីតិវិធីទៅមុខទៀតដើម្បីធានាថា រាល់ករណីនៃការប្រើប្រាស់អំពើហិង្សាទៅលើស្រ្តីនេះ នឹងមិនត្រូវបានលើកលែង ហើយនឹងមិនមានវប្បធម៌និទ្ទណ្ឌភាព នៅក្នុងសង្គមកម្ពុជាយើង»។
ប្រមុខរដ្ឋស្ដីទីលោក សាយ ឈុំ បានសម្រេចបញ្ចប់គោរមងារឧកញ៉ារបស់លោក ឌួង ឆាយ តាមសំណើរបស់លោកនាយករដ្ឋមន្រ្តី ហ៊ុន សែន ក្រោយពេលអតីតភរិយាលោក បង្ហោះវីដេអូនៅតាមបណ្ដាញសង្គមបង្ហាញថា លោកបង្កអំពើហិង្សាក្នុងគ្រួសារ។
ពាក់ព័ន្ធនឹងការផ្ដល់គោរមងារជាឧកញ៉ានេះ អនុប្រធានផ្នែកអង្គការលីកាដូទទួលបន្ទុកសិទ្ធិមនុស្សលោក អំ សំអាត បញ្ជាក់ថា គោរមងារជាឧកញ៉ានីមួយៗ គួរតែផ្តល់ឱ្យមនុស្សណា ដែលមានស្នាដៃជួយជាតិ និងដែលគួរឱ្យគោរពដល់មនុស្សទូទៅនៅក្នុងសង្គម៖ «អ៊ីចឹងការបញ្ចប់នេះទាក់ទិននឹងរូបភាពដែលបែកធ្លាយហ្នឹង គឺវាជាចំណាត់ការមួយល្អហើយ។ មួយទៀតទាក់ទងនឹងបញ្ហាអំពើហិង្សាវាជាទង្វើខុសច្បាប់។ ហេតុដូច្នេះហើយស្ថាប័នដែលពាក់ព័ន្ធគួរតែពិនិត្យ ហើយពិចារណាអនុវត្តទៅតាមច្បាប់ ដើម្បីជាគំរូ ដើម្បីកុំឱ្យអ្នកប្រើប្រាស់អំពើហិង្សានៅក្នុងគ្រួសារ ឬក៏អំពើហិង្សាដ៏ទៃទៀតហ្នឹងអាច គេចផុតពីផ្លូវច្បាប់។ នេះគឺអាស្រ័យទៅលើស្ថាប័នទាំងអស់ដែលពាក់ព័ន្ធលោក ពិចារណាទៅ»។
គោរម្យងារ «ឧកញ៉ា» បានមកដោយព្រះរាជក្រឹត្យឡាយព្រះហស្តលេខាដោយព្រះមហាក្សត្រ។ លក្ខខណ្ឌដែលអាចទទួលបាននូវគោរម្យងារ «ឧកញ៉ា» គឺសប្បុរសជនទាំងឡាយណា ដែលបានបរិច្ចាគទ្រព្យធនផ្ទាល់ខ្លួនជួយសង្គមជាតិ។ ដំបូងចាប់ពីមួយសែនដុល្លារឡើងទៅ និងត្រូវបាននាយករដ្ឋមន្ត្រីស្នើសុំទៅព្រះមហាក្សត្រ ដើម្បីព្រះរាជទាននូវគោរម្យងារនេះ ។
គិតចាប់តាំងពីឆ្នាំ២០១៧ សប្បុរសជនទាំងឡាយណា ដែលបានបរិច្ចាគទ្រព្យធនផ្ទាល់ខ្លួន ជួយស្ថាបនាជាតិ ចាប់ពី ៥០ម៉ឺនដុល្លារ ឡើងទៅ ទើបនាយករដ្ឋមន្ត្រីសម្រេច ស្នើសុំទៅព្រះមហាក្សត្រព្រះរាជទាននូវគោរម្យងារឧកញ៉ា ដែលអាចបញ្ជាក់បានថា តម្លៃឧកញ៉ា នេះបានកើនឡើងមួយគុណ និងប្រាំដង។ប៉ុន្តែកន្លងមក មនុស្សមួយចំនួនបានប្រើប្រាស់គោរមងារឧកញ៉ា ដើម្បីកាប់ឈើ និងរំលោភយកដីពលរដ្ឋដោយខុសច្បាប់។
លោក ដួង ឆាយ ធ្លាប់ត្រូវតុលាការកាត់អោយជាប់ពន្ធនាគារ៣ ឆ្នាំកន្លះកាលពីឆ្នាំ២០១៣ ពីបទហិង្សាដោយចេតនាមានស្ថានទម្ងន់ទោសប្រើអាវុធខុសច្បាប់ ប៉ុន្តែលោកទទួលទោសបានត្រឹមតែ ៦ខែប៉ុណ្ណោះ។ កាលពីឆ្នាំ២០១៥ ឧកញ៉ារូបនេះក៏ត្រូវតុលាការកាត់អោយជាប់ទោស ១ឆ្នាំទៀត ពីបទបង្កហិង្សាដោយចេតនាទៅលើកូន ឧកញ៉ា លោក ទ្រី ភាព មេឈ្មួញរកស៊ីឈើខុសច្បាប់ដែលស្និទ្ធនឹងលោកហ៊ុន សែន ប៉ុន្តែលោកជាប់ពន្ធនាគារតែ ៤ខែ ក៏ត្រូវតុលាការសម្រេចដោះលែងឱ្យមានសេរីភាពវិញ។
អាស៊ីសេរី មិនទាន់អាចទាក់ទងលោក ដួង ឆាយ ដើម្បីឆ្លើយតបនឹងការចោទប្រកាន់ករណីបង្កអំពើហិង្សាក្នុងគ្រួសារបាននៅឡើយទេ កាលពីថ្ងៃទី១៨ មីនា។
ទាក់ទិនសំណុំរឿងប្រើប្រាស់អំពើហិង្សាចុងក្រោយទៅលើអតីតភរិយារបស់ខ្លួននេះ មន្ត្រីសង្គមស៊ីវិលរង់ចាំមើលថា តើសមត្ថកិច្ចពាក់ព័ន្ធនឹងមានវិធានការយ៉ាងណាទៅលើលោក ឧកញ៉ា ដួង ឆាយ ដែលតែងយកអំពើហិង្សាដោះស្រាយទំនាស់កន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។