ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ព្រមទាំងសាច់ញាតិ និងអ្នកគាំទ្រប្រមាណ ៧០នាក់នៅព្រឹកថ្ងៃទី១៩មករា ជួបជុំគ្នានៅផ្ទះលោក ឌិន ពិទ្ធី ហើយនិមន្តព្រះសង្ឃប្រាំអង្គសូត្រមន្តធ្វើបុណ្យសុំសេចក្ដីសុខ និង ស្នើឲ្យតុលាការខេត្តបន្ទាយមានជ័យ ទម្លាក់ការចោទប្រកាន់ទាំងអស់មកលើលោក ឌិន ពុទ្ធី។
នេះជាសកម្មភាពលើកដំបូងហើយដែលលោក ឌិន ពុទ្ធី និងអ្នកគាំទ្រ ធ្វើពិធីផ្នែកសាសនា សម្ដែងមតិទទូចសុំឲ្យតុលាការទម្លាក់ការចោទមកលើលោក ឌិន ពុទ្ធី បន្ទាប់ពីលោកចេញពីពន្ធនាគារកាលពីថ្ងៃទី១៤ ខែមករា កន្លងទៅ។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី មានប្រសាសន៍នៅថ្ងៃទី១៩ ខែមករា ថា បើទោះជាលោកបាននៅក្រៅឃុំបណ្ដោះអាសន្នក្ដី ក៏ប៉ុន្តែតុលាការពុំទាន់លើកលែងទោសឲ្យលោកមានសេរីភាពទាំងស្រុងនៅឡើយ៖ «ព្រោះរឿងនេះវាអយុត្តិធម៌មែនទែនសម្រាប់ខ្ញុំដែលគេចាប់ឃុំខ្ញុំរយៈពេល ២២ថ្ងៃ បូកនឹងការឃាត់ខ្លួន ២ថ្ងៃទៀតនៅស្នងការនគរបាលបាលខេត្ត ទាំងអស់ចំនួន ២៤ថ្ងៃ។ ដូច្នេះខ្ញុំសូមអំពាវនាវដល់លោកនាយករដ្ឋមន្ត្រី ហ៊ុន សែន ដែលជានាយករដ្ឋមន្ត្រីសម្រាប់ប្រជាពលរដ្ឋទូទាំងប្រទេស ជួយរកយុត្តិធម៌ដល់ខ្ញុំផង»។
អាស៊ីសេរី ពុំអាចទាក់ទងអ្នកនាំពាក្យសាលាដំបូងខេត្តបន្ទាយមានជ័យ ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១៩ ខែមករា។
លោក ឌិន ពុទ្ធី ត្រូវបានតុលាការដោះលែងពីពន្ធនាគារកាលពីថ្ងៃទី១៤ មករា កន្លងទៅ។ ប៉ុន្តែដាក់ឲ្យស្ថិតនៅក្រោមការតាមដានរបស់តុលាការ គឺហាមមិនឲ្យលោកផ្លាស់ទីលំនៅថ្មី ឬធ្វើដំណើរចេញទៅក្រៅប្រទេស និងត្រូវបង្ហាញខ្លួននៅប៉ុស្តិ៍នគរបាលក្រុងប៉ោយប៉ែត រៀងរាល់ថ្ងៃទី១។
ទោះជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា សាក្សីបានបំភ្លឺយ៉ាងច្បាស់លាស់ហើយថា លោក ឌិន ពុទ្ធី ពុំបានបើកឡានបុកលោក ឈាន ពិសិដ្ឋ នោះទេ។
លោកបន្ថែមថា តុលាការគួរតែទម្លាក់ការចោទប្រកាន់ទាំងអស់នេះដើម្បីឲ្យលោក ឌិន ពុទ្ធី មានសេរីភាពជាធម្មតាឡើងវិញ៖ «ហើយអ្វីដែលយើងមើលឃើញបន្តទៅទៀត គឺការធ្វើពិធីនេះចង់បង្ហាញថា គាត់គឺគ្រោះថ្នាក់ មានន័យថា គ្រោះថ្នាក់ដោយសារការចោទប្រកាន់ គ្រោះថ្នាក់ដោយសារជួយដល់ពលរដ្ឋ ជួយដល់អ្នករងគ្រោះ ដូចជាក្រុមអាជីវករ អ្នករត់តាក់ស៊ី និងអ្នករត់ម៉ូតូឌុបជាដើម។ អ៊ីចឹងគ្រោះថ្នាក់របស់គាត់មិនមែនធ្វើដើម្បីប្រយោជន៍ផ្ទាល់ខ្លួនទេ គឺដើម្បីផលប្រយោជន៍របស់មនុស្សក្នុងសង្គមជាតិ»។
សាលាដំបូងខេត្តបន្ទាយមានជ័យ បានបញ្ជូនលោក ឌិន ពុទ្ធី ទៅឃុំខ្លួននៅពន្ធនាគារកាលពីរសៀលថ្ងៃទី២៤ ខែធ្នូ ក្រោមបទចោទបង្កហិង្សាដោយចេតនាមានស្ថានទម្ងន់ទោស ក្នុងសំណុំរឿងដែលអាជ្ញាធរអះអាងថា លោក ឌិន ពុទ្ធី បានបើកឡានបុកនាយរងប៉ូលិសអន្តោប្រវេសន្តច្រកព្រំដែនអន្តរជាតិប៉ោយប៉ែត គឺលោក ឈាន ពិសិដ្ឋ។ កាលពីថ្ងៃទី២៩ ខែធ្នូ សាច់ញាតិ និងអ្នកគាំទ្រមន្ត្រីអង្គការសង្គមស៊ីវិលរូបនេះ ប្រមាណ ៥០នាក់ បានតវ៉ាបិទផ្លូវជាតិលេខ៥ នៅច្រកទ្វារព្រំដែនអន្តរជាតិប៉ោយប៉ែត ទាមទារឲ្យតុលាការផ្ដល់យុត្តិធម៌ដល់លោក ឌិន ពុទ្ធី។ លោក ឌិន ពុទ្ធី ត្រូវបានសាលាឧទ្ធរណ៍ចេញសេចក្ដីសម្រេចដោះលែងឲ្យនៅក្រៅឃុំជាបណ្ដោះអាសន្នកាលពីថ្ងៃទី១៣ ខែមករា។ លោក ឌិន ពុទ្ធី អះអាងថា ក្រៅអំពីតុលាការដាក់ឲ្យស្ថិតនៅក្រោមការតាមដានហើយ គឺរថយន្តរបស់លោកក៏តុលាការមិនទាន់ប្រគល់មកឲ្យលោកយកមកប្រើប្រាស់នៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។