កម្មករ-កម្មការិនីរោងចក្រកាត់ដេរសំលៀកបំពាក់ ឈ្មោះ ឃែនធើរេន អឹភែរឹល ខេមបូឌា (Canteran Apparel Cambodia Co.,LTD) ជាង៣រយ នាក់ (៣០០) នៅរាជធានីភ្នំពេញ បានដេកយាមសម្ភារៈនៅខាងមុខរោងចក្រជិតមួយខែមកហើយ ដោយសារតែថៅកែរោងចក្រមួយនេះព្យាយាមគេចវេះដោះស្រាយប្រាក់ឈ្នួលជូនកម្មករ។
ក្រុមកម្មករឱ្យដឹងថា ក្រោយពីថៅកែ និងភាគីនិយោជកជាច្រើននាក់ផ្សេងទៀត នៃក្រុមហ៊ុន ឃែនធើរេន អឹភែរឹល ខេមបូឌា បានដាក់ពាក្យលាឈប់ពីការងារ កម្មករថា ក្រុមថៅកែទាំងនេះបានចូលម្រើការងារក្នុងក្រុមហ៊ុនសាខាថ្មីមួយទៀតដែលមានឈ្មោះ ខ្វលីធីត្សេកស្ទីល (Quality Textiles Co.,LTD) ដែលស្ថិតនៅសង្កាត់ទួលពង្រ រាជធានីភ្នំពេញ។
កូដករម្នាក់ លោកស្រី ណុប បូផាន ប្រាប់វិទ្យុអាស៊ីសេរីនៅថ្ងៃទី២២ ខែឧសភាថា ក្រុមកម្មករជាង៣០០នាក់ បានដាក់លិខិតស្នើជួយអន្តរាគមន៍ពីក្រសួងការងារកាលពីថ្ងៃទី១៩ ឧសភា ប៉ុន្តែមកដល់ពេលនេះគ្មានការឆ្លើយតបជាវិជ្ជមានណាមួយនៅឡើយទេ។ លោកស្រីរិះគន់ថា បើអាជ្ញាធរបន្តអូសបន្លាយ ក្នុងការដោះស្រាយវិវាទការងារនេះតទៀត ក្រុមកម្មករនឹងកាន់តែប្រឈមបញ្ហាជីវភាព និងប៉ះពាល់ដល់ការស្វែងរកការងារនៅកន្លែងថ្មី៖ « ប៉ះពាល់ [ ជីវភាព ] ចឹងបានខ្ញុំដាក់តាមផ្លូវច្បាប់ ស្រួលច្បាប់ដោះស្រាយ ចេញ ម៉េចម៉ា ស្រួលឱ្យកម្មកររកកន្លែង ការងារផ្សេងដើម្បី បង់លុយរដ្ឋ បង់លុយអង្គការ។ មួយៗ [ កម្មករ ] សុទ្ធតែវេទនាណាស់។ អ៊ីចឹងបានខ្ញុំដាក់ [ លិខិតអន្តរាគមន៍ ] ទៅក្រសួងការងារដើម្បីឱ្យដោះស្រាយតាមផ្លូវច្បាប់ ដោយសារខាងថៅកែ ខាងនាយក ខាងរដ្ឋបាល ជំនួយការរដ្ឋបាល មេធាវីឈប់ថ្ងៃទី៣០ [ មេសា ] ទាំងអស់ »។
ក្រុមកម្មករឱ្យដឹងថាកន្លងទៅ កម្មករ នៅរោងចក្រ ឃែនធើរេន អឹភែរឹល ខេមបូឌា មានកម្មកររាប់ពាន់នាក់ ប៉ុន្តែដោយសារថៅកែដែលជាជនជាតិ ម៉ាឡេស៊ី និងដៃគូរសហការជនជាតិចិន បានរំលោភសិទ្ធិកម្មករ ដោយបង្ខំឱ្យពួកគេធ្វើការច្រើនម៉ោង ទាំងគ្មានបើកប្រាក់ឈ្មួល ទើបកម្មករមួយចំនួនធំអស់ជំនឿ ក៏សម្រេចដើរចេញពីកន្លែងការងារដោយខ្លួនឯង។ សហជីព និងក្រុមកម្មករដែលនៅសល់ចំនួនជាង ៣០០ នាក់ បន្តស្នើដល់ក្រសួងការងារ ឱ្យពន្លឿនធ្វើការតាមនីតិវិធី ដោយជំរុញឱ្យភាគីថៅដោះស្រាយបញ្ហាប្រាក់ឈ្មួលកម្មករឱ្យបានឆាប់ ដើម្បីអាចឱ្យកម្មករទៅរកការងារនៅកន្លែងថ្មីទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។