ព្រះមហាក្សត្របានបញ្ចប់មុខតំណែងលោក កឹម ជាតិ ពីអនុរដ្ឋលេខាធិការក្រសួងមហាផ្ទៃ ក្រោយពីក្រុមហ៊ុនឧកញ៉ា ដួង តិច បានប្ដឹងទៅក្រសួងមហាផ្ទៃ ដោយចោទថា លោកទារប្រាក់ពីក្រុមហ៊ុនលក់ស្រាប្រមាណ ១០ម៉ឺនដុល្លារ។
ក្នុងព្រះរាជក្រឹត្យចុះនៅថ្ងៃទី១៤ ធ្នូ ឆ្នាំ២០២៣ ដែលឡាយព្រះហស្តលេខាដោយ ព្រះករុណាព្រះបាទសម្តេច ព្រះបរមនាថ នរោត្តម សីហមុនី បានត្រាស់បង្គាប់បញ្ចប់មុខតំណែង លោក កឹម ជាតិ ពីអនុរដ្ឋលេខាធិការក្រសួងមហាផ្ទៃ។ ការបញ្ចប់តំណែងនេះ តាមសំណើរបស់លោកនាយករដ្ឋមន្ត្រី ហ៊ុន ម៉ាណែត។
លោក ហ៊ុន ម៉ាណែត ទូលថ្វាយទៅព្រះមហាក្សត្រឱ្យបញ្ចប់មុខតំណែង លោក កឹម ជាតិ នេះ បន្ទាប់ពីលោក អ៊ូច សុភត្រា មេធាវីការពារក្ដីឱ្យក្រុមហ៊ុន ឈីវ ទីម៉ិច គ្រុប (Chhivtimex Group) បានដាក់ពាក្យបណ្ដឹងមកអគ្គាធិការដ្ឋាននៃក្រសួងមហាផ្ទៃ។
ពាក្យបណ្ដឹងចុះថ្ងៃទី៦ ខែតុលា លោក អ៊ូច សុភត្រា ជាមេធាវី ការពារក្ដីឱ្យក្រុមហ៊ុន ឈីវ ទីម៉ិច ឱ្យដឹងថា កាលពីថ្ងៃទី៥ ខែវិច្ឆិកា ឆ្នាំ២០២១ លោក កឹម ជាតិ អនុរដ្ឋលេខាធិការក្រសួងមហាផ្ទៃ និងជាអនុប្រធានគណ:កម្មាធិការបានចុះទៅពិនិត្យឃ្លាំងស្រារបស់កូនក្ដីរបស់ខ្លួន និងបានចោទក្រុមហ៊ុន នេះថា មិនស្របច្បាប់។
ប្រភពដដែលថា ក្រៅពីចោទនោះ លោក កឹម ជាតិ បានទាមទារប្រាក់ចំនួន ១០ម៉ឺនដុល្លារ ជាថ្នូរនឹងការអនុញ្ញាតឱ្យបើកដំណើរការអាជីវកម្មធម្មតាវិញ។
លោក អ៊ូច សុភត្រា ដែលជាមេធាវីបានស្នើឱ្យអគ្គាធិការដ្ឋាន នៃក្រសួងមហាផ្ទៃចាត់វិធានការលើលោក កឹម ជាតិ ដោយចោទថា លោកបានធ្វើឱ្យប៉ះពាល់ផលប្រយោជន៍កូនក្ដីរបស់ខ្លួន និងឱ្យលោក កឹម ជាតិ ប្រគល់ស្រាចំនួន ៤៨ដប ដែលបានដកហូត រួមទាំងប្រគល់ប្រាក់ចំនួន ១០ម៉ឺនដុល្លារឱ្យមកក្រុមហ៊ុនវិញផងដែរ។
អ្នកនាំពាក្យរងនៃក្រសួងមហាផ្ទៃលោក ទូច សុឃៈ ប្រាប់វិទ្យុអាស៊ីសេរី នៅល្ងាចថ្ងៃទី១៦ ធ្នូ ដោយសុំមិនធ្វើអត្ថាធិប្បាយលម្អិតចំពោះរឿងនេះ ដោយថា នគរបាលយុត្តិធម៌ កំពុងធ្វើការស្រាវជ្រាវនិងស៊ើបអង្កេត។
ក្រុមហ៊ុន ឈីវ ទីម៉ិច គ្រុប របស់ឧកញ៉ា ដួង តិច ដែលត្រូវជាកូនរបស់លោក ដួង ឈីវ ស្ថាបនិកក្រុមហ៊ុន ឈីវទិម៉ិច គ្រុប ដែលក្រុមហ៊ុនវិនិយោគលើវិស័យជាច្រើន ដូចជា ការនាំចេញ-នាំចូល ការអភិវឌ្ឍន៍វិនិយោគអចលនទ្រព្យ កសិកម្ម សំណង់ ទេសចរណ៍ ធានារ៉ាប់រង និងដឹកជញ្ជូនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។