ខ្មែររស់នៅប្រទេសកាណាដាជិត ១០០នាក់ បានជួបប្រជុំគ្នានៅថ្ងៃទី២៥ ខែសីហា នៅខេត្ត អនធារីយ៉ូ (Ontario) ដើម្បីសម្ដែងមតិ ឬធ្វើបាតុកម្មទាមទារឱ្យរដ្ឋាភិបាល លោក ហ៊ុន ម៉ាណែត ស្ដាប់សំណើរបស់ពលរដ្ឋ ដែលបារម្ភពីការបាត់បង់ទឹកដីទៅឱ្យវៀតណាមក្នុងគម្រោងតំបន់ត្រីកោណអភិវឌ្ឍន៍ CLV ។
ក្រុមអ្នកចូលរួមបានលើកបដាដែលមានសរសេរអក្សរជាភាសាអង់គ្លេសថា No CLV ដែលមានន័យថាមិនត្រូវមានទេ CLV ព្រមទាំងមានបដាជាភាសាខ្មែរថាបញ្ហាខ្មែរជាបញ្ហារួមរបស់យើងទាំងអស់គ្នា មិនទទួលស្គាល់គម្រោង CLV និងរដ្ឋាភិបាលត្រូវដកខ្លួនពីគម្រោងអភិវឌ្ឍន៍ CLV ជាបន្ទាន់ជាដើម។
អ្នករៀបចំកម្មវិធី លោក ប៊ុន យុគ ជាខ្មែររស់នៅប្រទេសកាណាដាម្នាក់មានប្រសាសន៍ថា ខ្មែររស់នៅប្រទេសកាណាដាប្រឆាំងនឹងការចូលរួមរបស់រដ្ឋាភិបាលក្នុងគម្រោង CLV ដោយបារម្ភខ្លាចបាត់បង់ទឹកដីទៅថ្ងៃអនាគត។
លោក ប៊ុន យុគ៖«ការជួបជុំថ្ងៃនេះ ដើម្បីបញ្ចេញមតិ ដែលយើងមិនទទួលស្គាល់ការរួមខេត្តទាំង៤ ជាមួយ វៀតណាម ឡាវ និងកម្ពុជា។ យើងសុំឱ្យរដ្ឋាភិបាលកម្ពុជាដកខ្លួនពីគម្រោង CLV»។
ការជួបជុំសម្ដែងមតិនេះចាប់ផ្ដើមពីម៉ោង១រសៀល នៅថ្ងៃទី២៥ ខែសីហា និងបិទបញ្ចប់ទៅវិញនៅម៉ោង៤។ អ្នកចូលរួមបាតុកម្មមួយរូប លោក ឈឹម សំរេច បញ្ជាក់ថា លោកចូលរួមការតវ៉ានេះក្នុងនាមជាពលរដ្ឋខ្មែរដែលស្រឡាញ់ទឹកដីកំណើត។
លោក ឈឹម សំរេច៖«ចូលរួមបាតុកម្មគឺចម្រុះភាគច្រើនជាពលរដ្ឋមិនមែននិន្នាការនយោបាយទេ យើងជាម្ចាស់ទឹក ម្ចាស់ដី។ យើងភ័យព្រួយក្នុងនាមជាម្ចាស់ទឹកម្ចាស់ដី ក្នុងនាមជាអ្នកប្រជាធិបតេយ្យ។ យើងចង់ឱ្យប្រទេសយើងក្លាយជាប្រទេសប្រជាធិបតេយ្យដូចក្នុងរដ្ឋធម្មនុញ្ញ ហើយក្នុងកិច្ចព្រមព្រៀងសន្តិភាពទីក្រុងប៉ារីស»។
ការជួបជុំសម្ដែងមតិដូចគ្នានេះរបស់ខ្មែររស់នៅប្រទេសកាណាដា បានធ្វើម្ដងរួចហើយកាលពីថ្ងៃទី ២៤ ខែសីហា នៅខេត្ត កាល់ហ្គារី (Calgary) ដោយមានមនុស្សចូលរួមប្រមាណ ១០០នាក់។
ប្រធានអង្គការចលនាខ្មែរ ដើម្បីប្រជាធិបតេយ្យ អ្នកស្រី មូរ សុខហួរ ដែលចូលរួមការជួបប្រជុំនៅទីតាំងទាំង២នេះមានប្រសាសន៍ថា ដល់ពេលហើយ ដែលរដ្ឋាភិបាលលោក ហ៊ុន ម៉ាណែត ត្រូវស្ដាប់សំឡេងពលរដ្ឋ និងមិនត្រូវយកពលរដ្ឋខ្លួនឯងជាសត្រូវទេ។ ជាមួយគ្នានេះរដ្ឋាភិបាលក៏ត្រូវងាកមកដើរតាមគន្លងប្រជាធិបតេយ្យ បើកឱ្យមានតំណាងពលរដ្ឋពីគ្រប់ស្រទាប់ ដែលឈានទៅបើកលម្ហនយោបាយ និងការបោះឆ្នោត ដោយសេរីត្រឹមត្រូវ យុត្តិធម៌ និងមានការចូលរួមពីគណបក្សប្រឆាំង។
អ្នកស្រី មូរ សុខហួរ៖«ទុកយើងជាដៃគូទៅ។ យើងនឹងត្រឡប់ទៅប្រទេសជាតិយើងវិញ ដែលជាជាតិមួយ ដែលអាចថាអភិវឌ្ឍទាំងអស់គ្នាបានផលចំណេញទាំងអស់គ្នា។ យើងអត់មានបំណងអ្វីនៅក្រៅប្រទេស ហើយផ្ដួលរំលំរដ្ឋាភិបាលទេ។ យើងចង់មាននីតិរដ្ឋ យើងចង់មានការបោះឆ្នោត ដោយសេរី ត្រឹមត្រូវ និងយុត្តិធម៌។ យើងចង់ថាកុំយកអ្នកដឹកនាំ ដែលពលរដ្ឋមិនចង់បានដាក់ឱ្យយើងជ្រើសរើស ហ្នឹងមិនមែនជាជម្រើសទេ។ ត្រូវឱ្យមានការបោះឆ្នោតត្រឹមត្រូវយុត្តិធម៌ ដែលមានបេក្ខភាព ដែលពលរដ្ឋជាម្ចាស់ឆ្នោតអាចទៅជ្រើសរើសដោយសេរី ទើបឈានទៅមានការអភិវឌ្ឍ ដែលមានចីរភាពពិតប្រាកដ ដែលយកប្រទេសជាតិជាធំ»។
ពលរដ្ឋខ្មែរនៅក្រៅប្រទេសបានធ្វើបាតុកម្មជាបន្តបន្ទាប់ចាប់តាំងពីថ្ងៃទី ១១ ខែសីហា មក ដោយចាប់ផ្ដើមពីក្រុមខ្មែររស់នៅប្រទេសកូរ៉េខាងត្បូង និងជប៉ុន ដើម្បីប្រឆាំងនឹងគម្រោងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម ឬ CLV-DTA ។ បន្ទាប់មកការវ៉ានេះបានបន្តទៅសហគមន៍ខ្មែរនៅប្រទេសអូស្ត្រាលី បារាំង សហរដ្ឋអាមេរិក និងកាណាដា។ គម្រោងការតវ៉ានេះនឹងបន្តទៅទៀត មិនទាន់បញ្ឈប់នៅឡើយ ដោយក្នុងនោះអ្នកនៅសហរដ្ឋអាមេរិកគ្រោងនឹងបន្តបាតុកម្មនៅថ្ងៃទី៣១ ខែសីហា និងនៅកូរ៉េខាងត្បូងនឹងបន្តធ្វើនៅថ្ងៃទី ១ ខែកញ្ញា ជាដើម។
ស្របគ្នានេះអាជ្ញាធររដ្ឋាភិបាលនៅក្នុងស្រុកក៏បង្កើនការចាប់ខ្លួនយុវជន និងអ្នកមានទស្សនៈមិនស្របនឹងគម្រោងនេះ ក្នុងនោះក៏មានការចាប់ខ្លួនយុវជនដែលសកម្មធ្វើការងារសង្គមជាច្រើននាក់ផ្សេងទៀត ដាក់ពន្ធនាគារជាបន្តបន្ទាប់ ដោយចោទថាមានគម្រោងផ្ដួលរំលំរដ្ឋាភិបាល។ ការផ្ទុះការតវ៉ារបស់ពលរដ្ឋខ្មែរនេះ កើតមានក្រោយពេលរដ្ឋាភិបាលរបស់លោក ហ៊ុន ម៉ាណែត ចាប់អ្នកសកម្មជនកិច្ចព្រមព្រៀងសន្តិភាពទីក្រុងប៉ារីសចំនួន៣នាក់ និងសកម្មជនសង្គមម្នាក់ ដែលបាននិយាយរិះគន់គម្រោងCLV៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។