អ្នកនាំពាក្យសមាគមសិទ្ធិមនុស្សអាដហុកលោក សឹង សែនករុណា មានប្រសាសន៍ថា នៅក្នុងសង្គមប្រជាធិបតេយ្យមិនមែន មានពលរដ្ឋគ្រប់រូបពេញចិត្តចំពោះការដឹកនាំរបស់មន្ត្រីរដ្ឋាភិបាលនោះទេ។ ហេតុដូច្នេះហើយបានជាពួកគាត់ចេះតែរកមធ្យោបាយ ដើម្បីធ្វើការបញ្ចេញមតិ និងរិះគន់ទៅលើមន្ត្រីរដ្ឋាភិបាលតាមបណ្ដាញសង្គម។
លោកបន្តថា អ្វីដែលពលរដ្ឋបានរិះគន់នេះ គឺពួកគេចង់ឲ្យមានការកែលម្អ ធ្វើយ៉ាងណាដើម្បី ឱ្យពលរដ្ឋមានការពេញចិត្តចំពោះការដឹកនាំ ។លោក ថា ការបញ្ចេញមតិនេះគឺជាការសំខាន់ មិនត្រូវមានការចាប់ខ្លួនទេ៖«បរិបទនៅក្នុងសង្គមប្រជាធិបតេយ្យ ដែលប្រទេសយើងមិនទាន់មានប្រជាធិបតេយ្យបែបហ្នឹងគឺ ច្បាប់ទាំងអស់ហ្នឹងគឺជាឧបករណ៍ ធ្វើការរឹតត្បិតទៅលើ សេរីភាពរបស់មនុស្សហើយ។អញ្ចឹងហើយយើងមិនចង់ឃើញ ចំណាត់ការបែបហ្នឹងទៅលើប្រជាពលរដ្ឋ ឬក៏អ្នកដែលលេងបណ្ដាញសង្គម បញ្ចេញមតិក្នុងការរិះគន់ ទៅលើការដឹកនាំរបស់រដ្ឋាភិបាលអ្វីនោះទេ។»
ការលើកឡើងរបស់មន្ត្រីសិទ្ធិ មនុស្សរូបនេះ បានកើតមានឡើងក្រោយពីសមត្ថកិច្ច កាលពីថ្ងៃទី១៥ ធ្នូបានចាប់ខ្លួនអ្នកលេងហ្វេសប៊ុកម្នាក់ទៀត ឈ្មោះ ងិន ស៊ុយទ្រី អាយុ ២៥ ឆ្នាំ រស់នៅ ក្រុងកែប ខេត្តកែប ក្រោយពីបានរិះគន់មន្ត្រីប៉ូលិស និងមន្ត្រីអាជ្ញាធររដ្ឋាភិបាលនៅតាមបណ្ដាខេត្តមួយចំនួនផ្សេងទៀត។
អ្នកនាំពាក្យអគ្គស្នងការនគរបាលជាតិលោក ឆាយ គឹមឃឿន មានប្រសាសន៍ថា មូលហេតុដែលនាំទៅរកការចាប់ខ្លួននេះ ដោយសារតែជនសង្ស័យ មានចេតនាទុច្ចរិត បានបង្កើតគណនី ហ្វេសប៊ុក ក្លែងក្លាយជេរប្រមាថ បរិហារកេរ្តិ៍ បំប៉ោងព័ត៌មានបំពុលសង្គម និងបង្កើតព័ត៌មានក្លែងក្លាយ ជាដើម។ តែទោះជាយ៉ាងណាសមត្ថកិច្ចមិនទាន់ចោទប្រកាន់ពីបទអ្វីនោះទេ ដោយរង់ចាំ ការសាកសួរក្នុងរយៈពេល៤៨ ម៉ោងសិន។
លោកបានថ្លែងការពារចំណាត់ការរបស់សមត្ថកិច្ចថា ធ្វើឡើងត្រឹមត្រូវតាមច្បាប់ មិនដូចមានការរិះគន់ពីមន្ត្រីសង្គមស៊ីវិលថា រំលោភសេរីភាពបញ្ចេញមតិនោះទេ៖«អាហ្នឹងសេរីភាពបញ្ចេញមតិ ដើមចោទគេ បំផើមមនុស្ស រំលោភស្ត្រី អាហ្នឹងសេរីភាពបញ្ចេញមតិ ឬមួយក៏វាប្រមាថ មើលងាយប៉ះពាល់ដល់កិត្តិយសគេ។ អញ្ចឹងអ្នកទទួលការចោទប្រកាន់ហ្នឹង អត់មានសេរីភាពទេ។ សួរ សង្គមស៊ីវិលមួយណាដែលវានិយាយអញ្ចឹង ? ដល់ពេលវាចោទស្នងការត្រឹមត្រូវទៅចោទគេថា រំលោភស្ត្រី ទៅ បំផើមគេ អាចោទគេអត់មានភស្តុតាង ប៉ះពាល់សេរីភាពអត់ ហើយបុគ្គលដែលគេ បំផ្លើសហ្នឹងមានសេរីភាពសម្រាប់តវ៉ាជាមួយវាអត់។»
ទាក់ទិននឹងការចាប់ខ្លួនអ្នករិះគន់តាមបណ្ដាញសង្គមហ្វេសប៊ុកនេះ អនុប្រធានគណបក្សសង្គ្រោះជាតិលោក អេង ឆៃអ៊ាង ថា របបក្រុងភ្នំពេញបច្ចុប្បន្នកំពុងភ័យខ្លាចស្រមោលខ្លួនឯង ចំពោះទង្វើកាន់តែអាក្រក់របស់ខ្លួនកន្លងមក។ ហេតុដូច្នេះ ហើយដើម្បី ទប់ស្កាត់កុំឱ្យគេនិយាយពីទង្វើអាក្រក់របស់ខ្លួន គឺមានតែយកការចាប់ចងធ្វើជាមូលដ្ឋានសម្រាប់ការបិទបាំង នៃទង្វើអាក្រក់របស់ខ្លួន ដែលនេះជាការរំលោភទៅលើសេរីភាពរបស់ប្រជាពលរដ្ឋ៖«វាអត់មានទេ ប្រទេសខ្មែរ យើងដឹងហើយថា គឺកាន់របបផ្ដាច់ការ ច្បាប់ស្ថិតនៅលើបបូរមាត់អ្នកដឹកនាំ។អ្នកដឹកនាំចង់បានអ្វីគឺធ្វើច្បាប់បែបហ្នឹង ដើម្បីយកច្បាប់ហ្នឹងទៅបង្ក្រាបប្រជាពលរដ្ឋខ្លួនឯង និងធ្វើជាឧបករណ៍ដើម្បីបម្រើមហិច្ឆតារបស់ខ្លួនតែប៉ុណ្ណឹង។ មិនមែនច្បា់ដើម្បីបម្រើផលប្រយោជន៍ ប្រជាពលរដ្ឋជាសាធារណៈទេ។ នៅបណ្ដាប្រទេសដែលគេគោរព នូវគោលការណ៍លទ្ធិប្រជាធិបតេយ្យ គោរពសិទ្ធិមនុស្ស សេរីភាពបញ្ចេញមតិ គេមិនដែលទៅចាប់ចងមនុស្ស គ្រាន់តែនិយាយ សរសេររិះគន់ តាម អ្វីដែលគេមើលឃើញនោះទេ។»
តុលាការក្រុងភ្នំពេញកាលពីថ្ងៃទី ១២ ធ្នូ ក៏បានចេញដីកាសម្រេចឃុំខ្លួនអ្នកលេងហ្វេសប៊ុក ម្នាក់ផ្សេងទៀត ឈ្មោះ នី ណាក់ នៅពន្ធនាគារព្រៃស ដោយចោទប្រកាន់ពីបទ «ជេរប្រមាថជាសាធារណៈ និងញុះញង់ឲ្យមានការរើសអើង »។
ដើមហេតុដែលនាំទៅរកការឃុំខ្លួនលោក នី ណាក់ ដោយសារតែបង្ហោះខ្លឹមសារក្នុងបណ្ដាញសង្គម (Facebook) ឌឺដងរដ្ឋាភិបាល ដែលកំពុងចាត់វិធានការប្រឆាំងជំងឺកូវីត១៩ កាលពីថ្ងៃទី៧ ខែធ្នូ ដោយបានប្រើប្រាស់ « ពាក្យទិញម៉ាស់ពាក់ឲ្យកូនមាន់ » ។ សមត្ថកិច្ចក្រសួងមហាផ្ទៃឃាត់ខ្លួន លោក នី ណាក់ កាលពីរសៀលថ្ងៃទី១១ ខែធ្នូ។
គិតចាប់ពីខែមករា មកដល់ដើមខែធ្នូនេះ មានសកម្មជននយោបាយ សកម្មជនសិទ្ធិមនុស្ស អ្នកសារព័ត៌មាន ព្រះសង្ឃ យុវជន និងអ្នករិះគន់តាមបណ្ដាញសង្គម ប្រមាណជិត ៥០នាក់ហើយ ត្រូវបានអាជ្ញាធររបបក្រុងភ្នំពេញ ចាប់ខ្លួនដាក់ពន្ធនាគារដោយសារការអនុវត្តសិទ្ធិសេរីភាពរបស់ពួកគេទាំងនៅក្នុងសង្គម និងនៅលើប្រព័ន្ធអ៊ីនធឺណិត។ អង្គការជាតិ និងអន្តរជាតិ ស្នើសុំឲ្យរដ្ឋាភិបាលកម្ពុជា បញ្ឈប់ការយាយី និងការចោទប្រកាន់អ្នករិះគន់ទាំងបំពានច្បាប់ ហើយដោះលែងឲ្យពួកគេមានសេរីភាព និងត្រូវធានាលើកស្ទួយសិទ្ធិសេរីភាពជាមូលដ្ឋានរបស់ពលរដ្ឋឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។