ជំនួបចរចាដោះស្រាយវិវាទការងាររវាងតំណាងកម្មករសហជីពណាហ្គាវើលដ៏ (Naga world) តំណាងក្រុមហ៊ុន និងក្រសួងការងារ នៅរសៀលថ្ងៃទី៤ ខែឧសភា មិនទទួលបានដំណោះស្រាយនោះទេ។ ក្រសួងការងារកំណត់ពេលជួបគ្នាសារជាថ្មីទៀត នៅថ្ងៃទី១១ ខែឧសភា សប្ដាហ៍ក្រោយ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរកញ្ញា ឈឹម ស៊ីថរ ថ្លែងថាមូលហេតុដែលការចរចាគ្មានដំណោះស្រាយនោះមកពីឆន្ទៈរបស់អ្នកសម្របសម្រួល គឺក្រសួងការងារនោះតែម្ដងដែលមានភាពលម្អៀងទៅភាគីក្រុមហ៊ុន។
កញ្ញាថាភាគីក្រុមហ៊ុននៅតែប្រកាន់ជំហរមិនទទួលយកបុគ្គលិកកម្មករនិយោជិក ជិត២០០នាក់ ដែលស្នើសុំត្រឡប់ចូលធ្វើការវិញជាដាច់ខាត៖ « ភាគីក្រុមហ៊ុនហ្នឹង គឺ នៅតែ ប្រកាន់ជំហរដដែលក្នុងការមិនព្រមទទួលយកកម្មករនិយោជិកដែលស្នើសុំត្រឡប់ចូលធ្វើការវិញហ្នឹង ទោះបីជាយើងមានអ្នកដោះដូរជំនួសពួកគាត់ យើងយល់ព្រមកាត់បន្ថយម៉ោងការងារក្នុងរយៈពេល៣ខែដំបូងបើសិនជាយើងត្រឡប់ចូលធ្វើការវិញ ក៏ដោយក៏ជំរើសទាំងអស់នេះ មិនត្រូវបានពិចារណាដោយក្រុមហ៊ុនទេ ព្រោះដោយសារគេគ្មានចេតនាក្នុងការដោះស្រាយបញ្ហាហ្នឹងទេ ហើយអ្នកសម្របសម្រួលទៀតសោតមិនមែនសម្របសម្រួលទៅរកដំណោះស្រាយដែរ តែជាការសម្របសម្រួលឲ្យតែក្រុមហ៊ុនណាហ្គាវើលដ៏ចង់បាន ជោគជ័យទៅអនុវត្ត ផែនការដែល ណាហ្គា ចង់អនុវត្តគឺធ្វើម៉េចកាត់សមាជិក ថ្នាក់ដឹកនាំសហជីពចេញឲ្យបានក្នុងពេលហ្នឹង»។
ជំនួបចរចាវិវាទការងារលើកទី៧ដែលនៅមិនទាន់មានដំណោះស្រាយនេះ បានជជែកដេញដោលគ្នារយៈពេល២ម៉ោង ដោយមានតំណាងបុគ្គលិកណាហ្គាវើលដ៏ចំនួន៤នាក់ តំណាងក្រុមហ៊ុននិងតំណាងពីក្រសួងការងារ។ក្រសួងការងារកំណត់ពេលជួបគ្នាសារជាថ្មីទៀត នៅថ្ងៃទី១១ ខែឧសភា សប្ដាហ៍ក្រោយ។
នៅថ្ងៃដដែលនេះកូដករណាហ្គាវើលដ៏ជាង១រយនាក់ (១១៨) ត្រូវបានអាជ្ញាធរនិងជនស្លៀកពាក់ស៊ីវិលជាច្រើននាក់ បន្តឡោមព័ទ្ធ និងរុញច្រានបង្ខំកូដករឲ្យឡើងរថយន្តក្រុង មិនឲ្យពួកគេទៅជួបជុំតវ៉ាទាមទារដោះស្រាយការងារ ក្បែរអាគារក្រុមហ៊ុន។
កូដករណាហ្គាវើលដ៏ម្នាក់ កញ្ញា ស្រីពេជ្រ ថ្លែងថា ក្រោយអាជ្ញាធរនិងជនស៊ីវិលបង្ខំរុញច្រានកូដករឲ្យឡើងរថយន្តដឹកចេញតាំងពីម៉ោងប្រមាណ២រសៀល រហូតដល់ម៉ោង៥ ល្ងាច ទៅតំបន់ជាយៗក្រុងហើយដឹកកូដករទៅទម្លាក់ចោលនៅក្បែរទីលានប្រជាធិបតេយ្យ រួចពួកគេរកមធ្យោបាយធ្វើដំណើរមកផ្ទះវិញដោយខ្លួនឯង។ កញ្ញាថា ថ្ងៃនេះនាងបានដើរទៅដល់ខាងមុខក្រុមហ៊ុនតែម្នាក់ឯង។
ក្រុមកម្មករកាស៊ីណូណាហ្គាវើលដ៍ បានចាប់ធ្វើកូដកម្មដោយសន្តិវិធីតាំងពីថ្ងៃទី១៣ ខែធ្នូ ឆ្នាំ២០២១ មក ពោលគឺជិត៥ខែហើយ។ ពួកគេបន្តទាមទារឱ្យក្រុមហ៊ុនទទួលយកបុគ្គលិក ដែលត្រូវបញ្ឈប់ដែលនៅសល់រួមនិងមេដឹកនាំសហជីពឱ្យចូលធ្វើការវិញ ដោយទម្លាក់ចោលរាល់បទចោលប្រកាន់ និងធានាសេរីភាពសហជីពនៅកន្លែងការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។