អ្នកឃ្លាំមើលស្នើឱ្យតុលាការស៊ើបអង្កេតលើអ្នកវិនិយោគ និងជាអតីតប្រធានអង្គការក្រៅរដ្ឋាភិបាលគឺលោក ព្រាប កុល ដែលរងការចោទប្រកាន់ថា កិបកេងលុយគម្រោងវិនិយោគជាង ៨០លានដុល្លារ ហើយរត់ទៅចុះចូលជាមួយរដ្ឋាភិបាល ដើម្បីបានរួចខ្លួន។ ពួកគាត់ថា ការស៊ើបអង្កេតនេះ គួរធ្វើឡើងឱ្យមានតម្លាភាព ដើម្បីបញ្ជាក់ដល់មហាជនថា ការចុះចូលរបស់បុគ្គលណាម្នាក់ ក្នុងជួររដ្ឋាភិបាល គឺមិនមែនជាការរកខ្នងបង្អែក ដើម្បីបិទបាំងទោសនោះឡើយ។
ចៅក្រមស៊ើបសួរនៃសាលាដំបូងរាជធានីភ្នំពេញ សម្រេចឃុំខ្លួន លោក យ៉ង់ ប៉ាក់ ដែលជាម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) បណ្ដោះអាសន្ន នៅមណ្ឌលអប់រំកែប្រែទី១(ម១)ហើយ ដើម្បីបន្តចំណាត់ការស៊ើបសួរបន្ថែម តាមនីតិវិធីច្បាប់ ក្រោយពីសាកសួរ និងពិនិត្យភស្តុតាង។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ប្រាប់វិទ្យុអាស៊ីសេរី តាមបណ្ដាញតេឡេក្រាម នៅថ្ងៃទី២៤ មករា ថា តុលាការបានចោទលោក យ៉ង ប៉ាក់ ពីបទញុះញង់ឱ្យមានការរើសអើង និងបទបរិហារកេរ្តិ៍ជាសាធារណៈ តាមមាត្រា៣០៥ មាត្រា៤៩៤ និងមាត្រា៤៩៦ នៃក្រមព្រហ្មទណ្ឌ។
ព្រះរាជអាជ្ញារង នៃអយ្យការអមសាលាដំបូង រាជធានីភ្នំពេញ លោក សេង ហៀង នៅថ្ងៃទី១៩ ខែមករា បានចេញដីកា បង្គាប់ឱ្យកម្លាំងសមត្ថកិច្ច នាំខ្លួនលោក យ៉ង ប៉ាក់ ដែលតុលាការអះអាងថា គឺជាម្ចាស់គណនីហ្វេសប៊ុក ឈ្មោះ ប៉ែន ជីវ័ន្ត (Chivann Pen) មកការិយាល័យប្រឆាំងបទល្មើសបច្ចេកវិទ្យា តាមពាក្យបណ្ដឹងរបស់រដ្ឋមន្ត្រីប្រតិភូអមនាយករដ្ឋមន្ត្រី លោក ព្រាប កុល ក្រោយពីម្ចាស់គណនីរូបនេះ បង្ហោះសារកាលពីថ្ងៃទី១៥ មករា ថា លោក ព្រាប កុល បានកិបកេងលុយក្រុមហ៊ុនគ្រប់គ្រងមូលធនវិនិយោគមួយ ហៅកាត់ថា ស៊ី.អាយ.ស៊ី(CIC) ប្រមាណ ៨០លានដុល្លារ។
រដ្ឋមន្ត្រីប្រតិភូអមនាយករដ្ឋមន្ត្រី លោក ព្រាប កុល ថ្លែងបដិសេធថា លោកមិនជាប់ពាក់ព័ន្ធនឹងការកិបកេងលុយក្រុមហ៊ុនគ្រប់គ្រងមូលធនវិនិយោគ ប្រមាណជាង ៨០លានដុល្លារអាមេរិកឡើយ។ លោក ព្រាប កុល ថា កន្លងមក លោកមិនធ្លាប់មានទំនាក់ទំនងការរកស៊ីជាមួយនឹងលោក យ៉ង ប៉ាក់ ដែលតុលាការបង្ហាញថា ជាម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) នេះទេ។
លោក ព្រាប កុល៖ «មកចោទគេថា កេងប្រវ័ញ្ចយកលុយរាប់សិបលានហ្នឹង គេយកតាមណា?ចេញតាមគណនីធនាគារណា?ហើយយកលុយសុទ្ធហ្នឹង យកទៅទុកនៅឯណា?»។
ទោះជាបែបនេះក្ដី ម្ចាស់គណនីឈ្មោះ ប៉ែន ជីវ័ន្ត ធ្លាប់បានអះអាងមុនការចាប់ខ្លួនថា លោកមានភស្តុតាង ដែលបញ្ជាក់ថា លោក ព្រាប កុល ពិតជាជាប់ពាក់ព័ន្ធក្នុងការកិបកេងលុយជាង ៨០លានដុល្លារ ហើយម្ចាស់គណនីរូបនេះ បានបញ្ជាក់ថា ខ្លួនក៏ជាជនរងគ្រោះម្នាក់ នៅក្នុងការវិនិយោគជាមួយក្រុមហ៊ុនស៊ី.អាយ.ស៊ី (CIC) នេះដែរ។
លោក ព្រាប កុល បានបញ្ចប់អាណត្តិជានាយកប្រតិបត្តិអង្គការតម្លាភាពកម្ពុជា កាលពីខែមេសា ឆ្នាំ២០២០ បន្ទាប់ពីលោកបានដឹកនាំស្ថាប័នមួយនេះ អស់រយៈពេល ៨ឆ្នាំ។ ក្រោយចាកចេញពីអង្គការប្រឆាំងនឹងអំពើពុករលួយ ដែលជាស្ថាប័នធ្លាប់វាយតម្លៃ និងឱ្យពិន្ទុទាប ដល់រដ្ឋាភិបាលកម្ពុជា លើការស្ដារប្រជាធិបតេយ្យ និងគោរពសិទ្ធិមនុស្សហើយ លោក ព្រាប កុល បានងាកមកផ្ដោតលើជំនួញក្នុងវិស័យអចលនទ្រព្យវិញ ដោយលោកបានគ្រប់គ្រងក្រុមហ៊ុនអចលនទ្រព្យជាច្រើន។ ក្នុងនោះ លោកក៏ជាប្រធានក្រុមប្រឹក្សាភិបាល និងជាគ្រូបង្គោលនៃក្រុមហ៊ុនអចលនទ្រព្យ ទិញ លក់ ជួល ឯកទេសលើវិស័យដីធ្លី នៅទូទាំង២៤ខេត្ត និងរាជធានី (Century 21 Zillion Holding) ផងដែរ។
ក្រោយជោគជ័យលើវិស័យអចលនទ្រព្យហើយ លោក ព្រាប កុល បានប្រកាសចុះចូលជាមួយគណបក្សប្រជាជនកម្ពុជា ហើយត្រូវបានអតីតនាយករដ្ឋមន្ត្រី លោក ហ៊ុន សែន តែងតាំងជារដ្ឋមន្ត្រីប្រតិភូអមនាយករដ្ឋមន្ត្រី កាលពីខែឧសភា ឆ្នាំ២០២៣ ដោយលោកបន្តកាន់តំណែងនេះ តាំងពីអាណត្តិរដ្ឋាភិបាលអាណត្តិទី៦ រហូតដល់រដ្ឋាភិបាលអាណត្តិទី៧ ក្រោមការដឹកនាំរបស់ លោក ហ៊ុន ម៉ាណែត។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា តុលាការគួរបើកការស៊ើបអង្កេត ស្វែងរកភស្តុតាងឱ្យបានច្បាស់លាស់នៅក្នុងករណីនេះ ដើម្បីធានាពីការភាពស្មើគ្នាចំពោះមុខច្បាប់ និងការកាត់ក្ដីដោយយុត្តិធម៌។
លោក អំ សំអាត៖ «អ្នកប្ដឹងមានសិទ្ធិប្ដឹងទៅកាន់តុលាការ ឬក៏អាជ្ញាធរ។ ក៏ប៉ុន្តែ ដើម្បីភាពយុត្តិធម៌ ដើម្បីភាពស្មើភាពគ្នាចំពោះមុខច្បាប់ ធានាយុត្តិធម៌នៅក្នុងសង្គម ត្រូវបានធានាដែរថា ការស៊ើបអង្កេត ការស្រាវជ្រាវ និងការសិក្សាទៅលើបញ្ហាទាំងអស់ហ្នឹង គឺត្រូវធ្វើឡើងដោយតម្លាភាព សំអាងលើភស្តុតាង គោលការណ៍នៃច្បាប់ ដើម្បីកំណត់ថា ជាបទល្មើស ឬក៏មិនមែនជាបទល្មើស»។
ទោះជាយ៉ាងណា កន្លងមក ម្ចាស់គណនី ប៉ែន ជីវ័ន្ត ជាញឹកញាប់ តែងតែបង្ហោះសាររិះគន់នៅលើបណ្ដាញសង្គម ទាក់ទងនឹងភាពអយុត្តិធម៌សង្គម និងអំពើពុករលួយជាដើម។ ក្នុងនោះ កាលពីថ្ងៃទី ១៨ ខែមករា ម្ចាស់គណនីរូបនេះក្រៅពីបានបង្ហោះសារ ថាលោក ព្រាប កុល បានកិបកេងលុយជាង ៨០លានដុល្លារហើយនោះ លោកក៏បានបង្ហោះសារ ដោយបង្ហើបពីការទម្លាយរឿងរបស់ រដ្ឋលេខាធិការក្រសួងកសិកម្ម លោក យ៉ង់ សាំងកុមារ ដែលបានទៅចុះចូលជាមួយបក្សកាន់អំណាចដែរនោះ បានជាប់ពាក់ព័ន្ធនឹងលុយប្រមាណជាង ៣០លានដុល្លារ ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។