អ្នកជំនាញផ្នែកសុខភាព និងអ្នកឃ្លាំមើលស្នើឱ្យរដ្ឋាភិបាលស៊ើបអង្កេត និងបិទទីតាំងគ្លីនិកឯកជនមួយចំនួនដែលអាជ្ញាប័ណ្ណត្រឹមត្រូវ ដើម្បីបង្ការកុំឱ្យមានករណីពលរដ្ឋស្លាប់បន្តទៀត។ ការលើកឡើងនេះធ្វើឡើងបន្ទាប់ពីតុលាការខេត្តតាកែវបានឃុំខ្លួនជនសង្ស័យពីរនាក់ប្ដីប្រពន្ធដែលជាម្ចាស់គ្លីនិកឯកជនមួយកន្លែងព្យាបាលអ្នកជំងឺខុសបច្ចេកទេសបណ្ដាលឱ្យមានមនុស្សស្លាប់។
អ្នកជំនាញ និងអ្នកឃ្លាំមើលសោកស្ដាយដែលរដ្ឋាភិបាលបណ្ដែតបណ្ដោយឱ្យគ្លីនិកមួយចំនួនអាចបើកដំណើរព្យាបាលអ្នកជំងឺខុសវិជ្ជាជីវៈរហូតឈានដល់ករណីមានមនុស្សស្លាប់ និងយកទៅសាកសពទៅផ្លុងចោល។
ប្រធានសមាគមគ្រូពេទ្យគុណធម៌កម្ពុជាលោកវេជ្ជបណ្ឌិត អ៊ូច វុឌ្ឍី ប្រាប់វិទ្យុអាស៊ីសេរីនៅថ្ងៃទី២៣ ខែវិច្ឆិកា ថា បញ្ហាគ្រូពេទ្យមួយចំនួនគ្មានវិជ្ជាជីវៈព្យាបាលអ្នកជំងឺដោយមិនស្គាល់ពីរបៀបប្រើប្រាស់ថ្នាំនៅបន្តកើតមានដែលបណ្ដាលឱ្យប៉ះពាល់សុខភាពពលរដ្ឋ ដូច្នេះរដ្ឋាភិបាលគួរតែលុបបំបាត់ចោលនូវគ្លីនិកដែលគ្មានអាជ្ញាប័ណ្ណ។ លោកវេជ្ជបណ្ឌិតបញ្ជាក់ថា ក្រៅពីបញ្ហានេះហើយនៅមានគ្រូពេទ្យមួយចំនួនទទួលព្យាបាលអ្នកជំងឺខុសពីជំនាញរបស់ខ្លួនករណីដូចជា គ្រូពេទ្យព្យាបាលជំងឺធម្មតា ប៉ុន្តែបែរជាទៅវះកាត់ក៏ត្រូវប្រឈមនឹងជាប់ទោសពី៦ខែទៅដល់២ឆ្នាំដែរ។
លោកវេជ្ជបណ្ឌិត អ៊ូច វុឌ្ឍី៖«ប្រសិនបើយើងជាគ្រូពេទ្យធម្មតាហើយយើងទៅវះកាត់ទេវាអាចខុសយើងមិនមែនជាឆ្មប ហើយយើងទៅធ្វើជាឆ្មបអាចខុសកន្លែងហ្នឹងហើយដែលគេមានពិន័យ។ ប្រសិនបើគេរកឃើញ យើងធ្វើការហួសដែនកំណត់នៃវិជ្ជាជីវៈរបស់ប្រសិនបើយើងបើរកឃើញយើងនឹងអាចមានទោសព្រហ្មទណ្ឌពី៦ខែ ទៅដល់២ឆ្នាំទោសនិងមានពិន័យជាទឹកប្រាក់ពី ៥លានរៀល ទៅដល់ ១០លានរៀលអាហ្នឹងគ្រាន់តែយើងព្យាបាលហួសដែនកំណត់»។
ការលើកឡើងរបស់អ្នកជំនាញនេះគឺក្រោយពេលដែលតុលាការខេត្តតាកែវ កាលពីថ្ងៃទី២២ ខែវិច្ឆិកា បានឃាត់ខ្លួន និងចោទប្រកាន់ជនសង្ស័យពីរនាក់ប្ដីប្រពន្ធដែលជាម្ចាស់មន្ទីរសម្រាកព្យាបាល និងសម្ភព សុងហាក់ម៉ារីណា នៅស្រុកបាទី ករណីព្យាបាលខុសបច្ចេកទេសលើស្ត្រីជាអ្នកជំងឺម្នាក់ស្លាប់ និងយកសាកសពទៅផ្លុងចោលក្នុងព្រៃជាមួយនិងកូនជនរងគ្រោះអាយុ៣ឆ្នាំ។
ចៅក្រមស៊ើបសួរបានចោទប្រកាន់ជនសង្ស័យជាប្រពន្ធឈ្មោះ ស៊ុន ម៉ារីណា ចំនួន ៤បទចោទរួមមាន មនុស្សឃាតដោយអចេតនា ប្រកបវិជ្ជាជីវៈសុខាភិបាលដោយគ្មានអាជ្ញាប័ណ្ណប្រកបវិជ្ជាជីវៈសុខាភិបាល និងលាក់បំបាំងសាកសព និងទារុណកម្ម និងអំពើឃោរឃៅមានស្ថានទម្ងន់ទោស។ ចំណែកជនសង្ស័យជាប្ដីឈ្មោះ ហៀង សុងហាក់ ជាប់ចោទពីបទ ប្រកបវិជ្ជាជីវៈសុខាភិបាលដោយគ្មានអាជ្ញាប័ណ្ណប្រកបវិជ្ជាជីវៈសុខាភិបាល សមគំនិតក្នុងអំពើលាក់កំបាំងសាកសព និងសមគំនិតក្នុងអំពើទារុណកម្ម និងអំពើឃោរឃៅមានស្ថានទម្ងន់ទោស។
វិទ្យុអាស៊ីសេរីមិនអាចទាក់ទងអភិបាលខេត្តតាកែវ លោក វ៉ី សំណាង និងរដ្ឋលេខាធិការក្រសួងសុខាភិបាលអ្នកស្រី ឱ វណ្ណឌីន ដើម្បីសុំការបញ្ជាក់បន្ថែមជុំវិញរឿងនេះបានទេនៅថ្ងៃទី២៣ ខែវិច្ឆិកា។
ប៉ុន្តែរដ្ឋលេខាធិការប្រចាំការក្រសួងសុខាភិបាល លោក ម៉ី សំបូរ កាលពីថ្ងៃទី២០ ខែវិច្ឆិកា បានចេញលិខិតជូនដំណឹងដល់អភិបាលនៃគណៈអភិបាលរាជធានី ខេត្ត ត្រូវធ្វើការត្រួតពិនិត្យជាបន្ទន់លើមន្ទីរពេទ្យព្យាបាលឯកជនទាំងអស់ដែលកំពុងផ្ដល់សេវាក្នុងដែនសមត្ថកិច្ចរបស់ខ្លួនដោយពិនិត្យមើលលិខិតអនុញ្ញាត ឬសញ្ញាប័ត្រវិជ្ជាជីវៈ ហើយបញ្ឈប់មិនដំណើររាល់ទីតាំងផ្ដល់សេវាសុខាភិបាល ឬឱសថស្ថានណាដែលគ្មានច្បាប់អនុញ្ញាត។
ប្រធានអង្គការប្រជាធិបតេយ្យខ្មែរប្រចាំប្រទេសអូស្ត្រាលី (KDO) លោក ស៊ឹង សែនករុណា មានប្រសាសន៍ថា រដ្ឋាភិបាលគួរតែបើកការស៊ើបអង្កេត និងចាត់វិធានការឱ្យបានម៉ឺងម៉ាត់ទៅលើម្ចាស់គ្លីនិក ឬឱសថស្ថានមួយចំនួនដែលបើកព្យាបាលអ្នកជំងឺខុសច្បាប់។ លោកបន្តថា ដើម្បីពង្រឹងវិស័យសុខាភិបាលឱ្យមានប្រសិទ្ធភាពទៅបានគឺទាល់តែរដ្ឋាភិបាលលុបបំបាត់អំពើពុករលួយ និងបោសសំអាតមន្ត្រីពីថ្នាក់លើរហូតដល់ថ្នាក់ក្រោមជាមុនសិន។
លោក ស៊ឹង សែនករុណា៖ «អំពើពុករលួយហ្នឹងដែលទៅដល់ក្រសួងសុខាភិបាល មន្ទីរសុខាភិបាល ខាងក្រសួងសុខាភិបាលដែលទទួលបាននូវផលប្រយោជន៍ទាំងអស់ហ្នឹង។ ទោះបីជាសញ្ញាប័ត្រវិជ្ជាជីវៈអត់ត្រឹមត្រូវយ៉ាងម៉េចក៏ដោយក៏ធ្មេចភ្នែកផ្ដល់ឱ្យសិទ្ធិទៅបង្កើតអ៊ីចឹងទៅហើយគ្លីនិកហ្នឹងក៏ទៅដំណើរព្យាបាលគ្មានគុណភាព គ្មានការយកចិត្តទុកដាក់គ្មានការទទួលខុសត្រូវទៅលើសុខុមាលភាពប្រជាពលរដ្ឋ»។
នេះមិនមែនជាលើកទី១ទេ ដែលគ្រូពេទ្យឯកជនព្យាបាលអ្នកជំងឺបណ្ដាលឱ្យស្លាប់។ មានករណីគ្រូពេទ្យរដ្ឋ និងម្ចាស់គ្លីនិកមួយចំនួនទៀតដែលធ្វើការធ្វេសប្រហែស ទុកអ្នកជំងឺចោលរហូតដល់ស្លាប់ និងរារាំងមិនឱ្យសាច់ញាតិយកអ្នកជំងឺទៅព្យាបាលនៅក្រៅប្រទេសជាដើម។ ករណីដូចជាបុរសម្នាក់បានស្លាប់ដោយគ្រួសាររបស់អ្នកជំងឺបានចោទថា មន្ទីរពេទ្យមិត្តភាពខ្មែរ-សូវៀត ឬហៅថាពេទ្យរុស្ស៊ី បានទុកអ្នកជំងឺចោល ជាច្រើនម៉ោងដោយគ្មានការសង្គ្រោះបឋម គ្មានពេទ្យប្រចាំការគ្រប់គ្រាន់ និងតម្រូវបង់លុយជាមុន។
អ្នកជំនាញ និងអ្នកឃ្លាំមើលផ្ដល់យោបល់ថា ដើម្បីពង្រឹងគុណភាពក្នុងវិស័យសុខាភិបាល និងសេវាព្យាបាលនៅតាមថ្នាក់មូលដ្ឋានឱ្យមានប្រសិទ្ធភាព រដ្ឋាភិបាលគួរតែលុបបំបាត់អំពើពុករលួយ ពង្រឹងសីលធម៌ និងពង្រឹងសមត្ថភាពវិជ្ជាជីវៈគ្រូពេទ្យបន្ថែមទៀតដើម្បីធ្វើឱ្យពលរដ្ឋមានជំនឿលើពេទ្យនៅក្នុងស្រុកឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។