មហាជនជាច្រើន បានរិះគន់តាមបណ្តេញសង្គម លើករណីអ្នកបើកបរឡានពេទ្យ ខេត្តរតនគិរី ដឹកសាកសពស្ត្រីមានផ្ទៃពោះទម្លាក់ចោលនៅពាក់កណ្តាលផ្លូវ។
សារព័ត៌មានក្នុងស្រុកមួយចំនួនដែលផ្សាយតាមបណ្តេញសង្គមកាលពីពេលថ្មីៗ នេះ ចុះផ្សាយអំពីសាច់ញាតិរបស់សពស្ត្រីពោះធំម្នាក់ បានមកទទួលសពដោយអូសតាមម៉ូតូ យកទៅធ្វើបុណ្យនៅផ្ទះរបស់ខ្លួន បន្ទាប់ពីរថយន្តសង្គ្រោះរបស់មន្ទីរពេទ្យបង្អែកខេត្តរតនគិរី ដឹកយកទៅទម្លាក់ចោលតាមផ្លូវ ក្រោយពីសពស្ត្រីពោះធំនោះ ឆ្លងទន្លេមិនរួច បណ្តាលឱ្យឈឺរហូតដល់ស្លាប់នៅមន្ទីរពេទ្យបង្អែកខេត្ត កាលពីថ្ងៃទី២៣ កុម្ភៈ។
ប្រភពដដែលឱ្យដឹងថា សាកសពស្ត្រីពោះធំ មានឈ្មោះ កាវែម ពូន អាយុ ៣១ឆ្នាំ ជាជនជាតិភាគតិចក្រឹង។
ព័ត៌មាននេះត្រូវបាន អ្នកប្រើប្រាស់តាមបណ្តេញសង្គមចែករម្លែកតគ្នា ឬហៅថា (Share) ថែមទាំង Comments រិះគន់ធ្ងន់ៗ និងថ្កោលទោសមន្ត្រីពេទ្យដែលបានប្រព្រឹត្តិយ៉ាងដូច្នេះ។
បើកឆាកដំបូងដោយចាប់ផ្តើម Comments លើរឿងនេះ គឺម្ចាស់គណនីយហ្វេសប៊ុក ឈ្មោះ Sophead Thachបានសរសេរ អក្សរពណ៌ក្រហមច្រាល នៅលើផ្ទះខ្មៅ ដោយខ្លីថា សង្គម មួយនេះ អយុត្តិធម៌ណាស់!
ម្ចាស់គណនីហ្វេសប៊ុកមួយទៀត ឈ្មោះ ណំ សម្បត្តិ បានបន្ទរថា៖ «មិនអាចលើកលែងទោសតៃកុងឡានហ្នឹង ហើយលោកគ្រូអ្នកគ្រូពេទ្យត្រូវតែមានក្រមសីលធម៌ ហើយកុំឱ្យមានការរើសអើងអ្នកមានអ្នកក្រ។ ជីវិតមនុស្សត្រូវការរស់ដូចតែគ្នាទេ»។
ចំណែក ម្ចាស់គណនីហ្វេសប៊ុកមួយទៀត ឈ្មោះ Nheanny Hy ថា៖ នៅពេលដែលមនុស្សគ្មានគុណធម៌ សីលធម៌ និងមនសិការក្នុងខ្លួន ទង្វើថោកទាបបែបណាក៏អាចធ្វើបានដែរ។
ដោយឡែក ម្ចាស់គណនីហ្វេសប៊ុកមួយទៀត ឈ្មោះ Maly Pech សរសេរថា៖ អ្នកដែលប្រព្រឹត្តិផ្ទុយពីក្រមសីលធម៌ត្រូវតែពិន័យទោសទៅតាមទង្វើរបស់គាត់ គឺមិនអាចលើកលែងបានទេ បើមិនដូច្នោះទេ នឹងក្លាយទៅជាទម្លាប់របស់អ្នកដទៃទៀតមិនខាន។
ម្ចាស់គណនីហ្វេសប៊ុក ឈ្មោះ Maly Pech ដដែលក៏Comments ម្តងទៀតក៏ប៉ុន្តែហាក់គាំទ្រទៅខាងថ្នាក់ដឹកនាំមន្ត្រីពេទ្យទៅវិញ។
គាត់សរសេរថា៖ តើអ្នកអង្គុយតែច្រណែន ចាំតែទម្លាក់កំហុសមកលើគេនោះ? តើបានប្រយោជន៍អីទៅ? បើរឿងអយុត្តិធម៌យើងត្រូវតែនិយាយឱ្យតែរឿងនោះវាជាការពិត មិនប្រឌិតដើម្បីកូរសង្គមជាតិ វាជារឿងត្រឹមត្រូវ ព្រោះយើងរិះគន់ក្នុងន័យស្ថាបនា! ព្រោះថា មានរឿងខ្លះថ្នាក់ដឹកនាំគាត់មិនបានដឹង គឺបុគ្គលថ្នាក់ក្រោមជាអ្នកប្រព្រឹត្ត ប៉ុន្តែមានមនុស្សខ្លះមិនយករឿងបុគ្គលដែលខុស មកលាតត្រដាងដើម្បីឱ្យថ្នាក់លើលោកបានដឹងទេ បែរជាយករឿងច្រណែន ឈ្នានីស យកមកបំពុលសង្គម ដើម្បីតែផលប្រយោជន៍របស់បក្សពួកខ្លួនតែប៉ុណ្ណោះ។
ម្ចាស់គណនីហ្វេសប៊ុក ឈ្មោះ បង សុគុណ សរសេរថា៖ នេះហើយជាសង្គមតិរច្ឆាន ខ្ញុំសង្ឃឹមថា បងប្អូននឹងយល់ពីបញ្ហានេះ ហើយចូលរួមដោះស្រាយ លះបង់ថ្ងៃនេះ ដើម្បីអនាគតក្មេងជំនាន់ក្រោយ។
ម្ចាស់គណនីហ្វេសប៊ុក ឈ្មោះ Ek Samart ថា៖ មានច្បាប់ តែគ្មានយុត្តិធម៌ ដូចមុខរបួសដែលគ្មានការព្យាបាល។ ម្ចាស់គណនីហ្វេសប៊ុក ឈ្មោះ Rous Dara ក៏ Comments លើរឿងនេះដែរថា៖ សែនអាណិត រើសអើងគ្នាដល់ម្ល៉ឹង ថាគ្រូពេទ្យទៅមានវិជ្ជាជីវៈក្នុងខ្លួនតែដល់ឃើញគ្នាលំបាកបែរជារើសអើងធ្វើឱ្យគ្នាបាត់បង់ជីវិតដោយសារគ្នាគ្មានលុយកាក់ ឱលោកអើយបើអ្នកគិតលុយជាធំយ៉ាងនេះលោកគ្រូពេទ្យ អ្នកគ្រូពេទ្យ ដើរប្លន់គេទៅវាល្អជាង កុំយកជីវិតគ្នាមកលេងសើចធ្វើឱ្យក្មេងកំព្រាគ្មានម្តាយវាធ្វើឱ្យសង្គមខ្មែរយើងកាន់តែអាម៉ាស់។
គណនីហ្វេសប៊ុក ឈ្មោះ Cheng Kosal ថា៖ ត្រូវសួរនាំទៅលើប្រធានមន្ទីរពេទ្យខេត្ត ព្រោះគាត់ជាអ្នកទទួលខុសត្រូវផ្ទាល់។
ម្ចាស់គណនីហ្វេសប៊ុក ឈ្មោះ Srèyy Chhåñg អះអាងថា គាត់ជាជនជាតិដើមភាគតិច ក៏ចូល Comments លើរឿងនេះដែរថា៖ ក្នុងនាមខ្ញុំជាកូនជនជាតិដើមភាគតិចមួយរូប ខ្ញុំពិតជាសោកស្តាយ និងឈឺចាប់ ចំពោះទង្វើដែលក្រុមគ្រូពេទ្យប្រកាន់ការរើសអើងចំពោះជនជាតិដើម និងជាទង្វើដែលគ្មានក្រមសីលធម៌គ្មានទំនួលខុសត្រូវ អាងតែគ្នាជាជនស្លូតត្រង់ពុំសូវមានការយល់ដឹងជ្រៅជ្រះ ធ្វើបែបណាក៏បាន។
ចំណែក ម្ចាស់គណនីហ្វេសប៊ុក ឈ្មោះ នេត ក្មេងតូច បានComments តប ថា៖ ហ្នឹងហើយខ្ញុំក៏ជាជនជាតិភាគតិចដែរ ខ្ញុំឆ្ងល់ណាស់ខ្មែរមួយចំនួនម្ដេចក៏រើសអើងស្អប់ ជនជាតិភាគតិចខ្លាំងម្ល៉េះ យើងជាមនុស្សដូចគ្នាទេ យើងមានសាច់មានឈាមមានបេះដូងដូចគ្នាទេ ទៅស្អប់គ្នាធ្វើអី? ជនជាតិដើមភាគតិចគ្មានកំហុសទេ អ្នកដែលមានកំហុសគឺអ្នកដែលរើសអើងគេ។
ម្ចាស់គណនីហ្វេសប៊ុក ឈ្មោះ Dara Sb សរសេរដែរថា៖ ធ្វើដល់ពេទ្យហេតុអីដាច់ចិត្តម្ល៉េះ? បើធ្លាក់លើក្រុមគ្រួសារពេទ្យវិញ តើពេទ្យមានអារម្មណ៍ឈឺចាប់ដែរទេ?
ដោយឡែក ម្ចាស់គណនីហ្វេសប៊ុកមួយទៀត ឈ្មោះ Uong Leap សរសេរអំពាវនាវ សូមមេត្តាគ្រប់គ្រូពេទ្យរដ្ឋ និងឯកជនចេះអាណិតអាសូរដល់ជីវិតជនក្រីផង បើខ្លួនព្យាបាលបាន ឬមិនបានជួយបញ្ជូនទៅកន្លែងផ្សេងឱ្យរហ័សកុំពន្យារពេល ខ្ញុំឃើញប្រទេសគេជិតយើង គេយកចិត្តទុកដាក់លើជីវិតមនុស្សណាស់ បើជនជាតិគេជាជនក្រីក្រអស់តែ ៣០បាតទេ ទោះជំងឺអ្វីក៏ដោយ ដេកនៅមន្ទីរពេទ្យព្យាបាលរហូតដល់ជា។
ទោះយ៉ាងណា ប្រធានមន្ទីរសុខាភិបាលខេត្តរតនគីរី ទទួលស្គាល់កំហុសរបស់មន្ត្រីខ្លួន ដែលដឹកសាកសពស្ត្រីមានផ្ទៃពោះ ទម្លាក់ចោលពាក់កណ្តាលផ្លូវ។
ប្រធានមន្ទីរសុខាភិបាលខេត្តរតនគីរី លោក អ៊ុង រតនា ថ្លែងប្រាប់អាស៊ីសេរីយ៉ាងខ្លីថា ករណីអ្នកបើកឡានសាមុយដឹកសាកសពស្ត្រីពោះធំម្នាក់ មិនដល់គោលដៅ ដោយទម្លាក់ចោលពាក់កណ្តាលផ្លូវនោះ គឺជាកំហុសរបស់អ្នកបើកឡានរូបនោះ។ លោកបន្តថា ករណីនេះ មន្ត្រីសុខាភិបាលបានរាយការណ៍ទៅមន្ត្រីថ្នាក់ខេត្ត ដើម្បីរង់ចាំការពិន័យទៅលើអ្នកបើកឡានដឹកសាកសពនោះ។ ទោះជាយ៉ាងណា លោកពុំបានបញ្ជាក់លំអិតអំពីការដាក់ពិន័យ ឬវិធានការណ៍រដ្ឋបាលណាមួយឱ្យបានច្បាស់លាស់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។