កម្ពុជា និង​ហ្វីលីពីន​ពង្រឹង​កិច្ច​សហប្រតិបត្តិការ​ទប់ស្កាត់​ការ​ជួញ​ដូរ​មនុស្ស

រដ្ឋាភិបាល​កម្ពុជា និង​ហ្វីលីពីន (Philippines) ពង្រឹង​កិច្ច​សហប្រតិបត្តិការ​ទប់​ស្កាត់​ការ​ជួញ​ដូរ​មនុស្ស។ ការ​ជួប​ពិភាក្សា​គ្នា​របស់​ថ្នាក់​ដឹកនាំ​ទាំងពីរ​នេះ​ ក្រោយ​ពី​គេ​រក​ឃើញ​ទីភ្នាក់ងារ​ហ្វីលីពីន​មួយ​បាន​នាំ​ស្ត្រី​ជនជាតិ​ហ្វីលីពីន​មក​កម្ពុជា​ ចំនួន ២០នាក់​ ដើម្បី​ពពោះ​ជំនួស​ក្នុង​ទិសដៅ​ជួញដូរ​ទារក។

អនុប្រធាន​គណៈកម្មាធិការ​ជាតិ​ប្រយុទ្ធ​ប្រឆំាង​ការ​ជួញដូរ​មនុស្ស នៃ​ក្រសួង​មហាផ្ទៃ​អ្នកស្រី ជូ ប៊ុនអេងនិង​ឯកអគ្គរដ្ឋទូត​ហ្វីលីពីន​ អ្នកស្រី ហ្លីរីដា អាន់កាម៊ីល (Flerida Ann Camille P. Mayo) បាន​ជួប​ប្រជុំ​ពិភាក្សា​គ្នា​អំពី​កិច្ច​សហប្រតិបត្តិការ​ ទប់ស្កាត់​អំពើ​ជួញ​ដូរ​មនុស្ស​នៅ​ក្រសួង​មហាផ្ទៃ​ កាល​ពី​ថ្ងៃ​ទី៣ តុលា។

វិទ្យុ​អាស៊ីសេរី​មិន​អាច​ទាក់​ទង​អ្នកស្រី ជូ ប៊ុនអេង ដើម្បី​សុំ​សួរ​អំពី​បញ្ហា​នេះ​បន្ថែម​បាន​ទេ​កាល​ពី​ថ្ងៃទី៨ តុលា។ ប៉ុន្តែ​អ្នកស្រី​បាន​ប្រាប់​ក្នុងស្រុក​ថា​ ភាគី​ទាំងពីរ​ គឺ​កម្ពុជា​និង​ហ្វីលីពីន​បាន​ពិភាក្សា​គ្នា​និង​ប្ដេជ្ញា​ចិត្ត​ទប់ស្កាត់ អំពើ​ជួញ​ដូរ​មនុស្ស​ ​ស៊ើប​អង្កេត និង​ស្វែងរក​ដំណោះ​ស្រាយ​ចំពោះ​ករណី​ស្ត្រី​ហ្វីលីពីន ២០នាក់​ ដែល​ត្រូវ​បាន​គេ​នាំ​យក​មក​កម្ពុជា​ ដើម្បី​ពពោះ​ជំនួស​នេះ។

​ក្នុង​ចំណោម​ស្ត្រី​ជនជាតិ​ហ្វីលីពីន​ទាំង ២០នាក់​ ត្រូវ​បាន​អាជ្ញាធរ​កម្ពុជា​កំណត់​ថា ជា​ជនល្មើស​អន្តោប្រវេសន៍​ ហើយ​អាជ្ញាធរ​បាន​បណ្ដេញ​ចេញ​ពី​កម្ពុជា​ ដោយសារតែ​ពួកគេ​មិន​ទាន់​មាន​គភ៌​ ឬ​ពពោះ​ជំនួស​នៅឡើយ។ រីឯ​ស្ត្រី​១៣​នាក់​ទៀត​ តុលាការ​បាន​ចោទ​ប្រកាន់​ពី​បទ​ជួញ​ដូរ​មនុស្ស​តាម​មាត្រា​១៣ នៃច្បាប់​ជួញ​ដូរ​មនុស្ស។

កម្ពុជា​មិន​ទាន់​មាន​ច្បាប់​ស្ដីពី​ពរ​ពោះ​ជំនួស​នៅ​ឡើយ​ទេ។ កាល​ពី​ដើម​ឆ្នាំ​២០១៩ ក្រសួង​យុត្តិធម៌​បាន​ធ្វើ​សេចក្ដី​ព្រាងច្បាប់​បើក​ឱ្យ​ស្ត្រី​ពរ​ពោះ​ជំនួស​បានប៉ុន្តែ​ត្រូវ​ធានា​ការ​អនុវត្ត​ឲ្យ​បាន​ត្រឹមត្រូវ​ ​ដើម្បី​ការពារ​សិទ្ធិ​ជន​ដែល​ពាក់ព័ន្ធ​ទៅ​នឹង​ការ​ពរ​ពោះ​ជំនួស​នេះ ជាពិសេស​ស្ត្រី ​និង​កុមារ​ ​ដោយធ្វើ​យ៉ាងណា​ឲ្យ​ស្រប​តាម​បញ្ញត្តិច្បាប់ និង​ការពារ និង​ទប់​ស្កាត់​មិន​ឲ្យ​មាន​អាជីវកម្ម​ពរ​ពោះ​ជំនួស​នេះ​។ ​មក​ទល់​ពេល​នេះ​ ច្បាប់​នេះ​មិន​ទាន់​ចេញ​ជា​ផ្លូវការ​នៅ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។