សាលាដំបូងរាជធានីភ្នំពេញ សម្រេចឃុំខ្លួនជនជាតិកូរ៉េពីរនាក់ប្ដីប្រពន្ធ ពីបទសង្ស័យជួញដូរគ្រឿងញៀន ជាង ២គីឡូក្រាម នៅអាកាសយានដ្ឋានអន្តរជាតិភ្នំពេញ។
ថ្នាំញៀនទាំងនោះជាប្រភេទកេតាមីន (KETAMINE) និងមេតំហ្វេតាមីន (METHANPHETAMINE)។
អ្នកនាំពាក្យសាលាដំបូងរាជធានីភ្នំពេញ កាលពីថ្ងៃទី៨ ខែមីនា ឲ្យដឹងថា ២នាក់ប្តីប្រពន្ធនោះ មានឈ្មោះ គិន យ៉ាងអឿន (KIN JANGEUN) និងឈ្មោះ លី ហៃយឺរ៉ាន (LEE HYERAN)។ ចំណែកជនសង្ស័យចំនួន ៣នាក់ផ្សេងទៀត ដែលកំពុងរត់គេចខ្លួន ត្រូវបានតុលាការចោទប្រកាន់ពីបទ ផ្តើមគំនិត និងដឹកជញ្ជូនដោយខុសច្បាប់គ្រឿងញៀន នៅអាកាសយានដ្ឋានអន្តរជាតិភ្នំពេញ និងនៅរាជធានីភ្នំពេញ កាលពីអំឡុងថ្ងៃទី២០ ខែមករា ដល់ថ្ងៃទី៤ ខែមីនា។
បន្ទាប់ពីបានសួរចម្លើយជនសង្ស័យ ២នាក់ប្ដីប្រពន្ធ និងបានពិនិត្យភស្តុតាងមក ចៅក្រមស៊ើបសួរនៃសាលាដំបូងរាជធានីភ្នំពេញ សម្រេចឃុំខ្លួនបណ្ដោះអាសន្ន ដើម្បីបន្តនីតិវិធីតាមច្បាប់។
អាជ្ញាធរជាតិប្រយុទ្ធប្រឆាំងគ្រឿងញៀនឱ្យដឹងថា ក្នុងរយៈពេល ៦៣ថ្ងៃ ដើមឆ្នាំ២០២៤ សមត្ថកិច្ចបង្ក្រាបបានការជួញដូរគ្រឿងញៀនជិត ៧រយ ករណី (៦៥៩) និងឃាត់ខ្លួនមនុស្សជិត ៤ពាន់ (៣.៨៩៩)នាក់។ ក្នុងចំណោមជនបរទេស ដែលបានឃាត់ខ្លួន រួមមាន ជនជាតិវៀតណាម ថៃ ឡាវ គឺជនជាតិចិនចំនួនច្រើនជាងគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។