សាលាដំបូងរាជធានីភ្នំពេញពន្យារពេលសាកសួរសកម្មជនសហជីពនៃកម្មករណាហ្គាវើលដ៍២នាក់ ទៅពេលក្រោយដោយមិនកំណត់ ពាក់ព័ន្ធនឹងសកម្មភាពធ្វើកូដកម្មទាមទារឲ្យក្រុមហ៊ុនទទួលយកបុគ្គលិកជាង៣រយនាក់ចូលធ្វើការវិញ ដែលត្រូវបានតុលាការនិងអាជ្ញាធរចោទថាជាបាតុកម្មខុសច្បាប់។ អង្គការសង្គមស៊ីវិលដែលតាមដានរឿងនេះ ស្នើតុលាការទម្លាក់ចោលបទចោទ និងដោះលែងតំណាងសហជីព ៨នាក់ដោយគ្មានលក្ខខណ្ឌ ដើម្បីបន្តការចរចាបញ្ចប់វិវាទការងារជាមួយក្រុមហ៊ុន។
ចៅក្រមស៊ើបសួរនៃសាលាដំបូងរាជធានីភ្នំពេញ លោក អ៊ឹម វណ្ណៈ នៅថ្ងៃទី២១ មករា សម្រេចលើកពេលសាកសួរសមាជិកសហជីពណាហ្គាវើលដ៍ (NagaWorld) ២ នាក់គឺ លោកស្រី ឃ្លាំង សុបិន្ត និងលោកស្រី ហៃ សុភាព ដោយសារចៅក្រមរូបនេះជាប់រវល់ភារកិច្ចផ្ទាល់ខ្លួន។ ជនជាប់ចោទទាំងពីរនាក់នេះ មិនត្រូវបានគេនាំខ្លួនពីពន្ធនាគារព្រៃស មកតុលាការនោះទេ។
រីឯសមាជិកសហជីព២នាក់ទៀត គឺកញ្ញា ទូច សេរីមាស និងលោកស្រី ស៊ុន ស្រីពេជ្រ ដែលតុលាការគ្រោងនឹងសាកសួរនៅថ្ងៃទី២៤ មករា ខាងមុខ ក៏ត្រូវតុលាការពន្យារពេលសាកសួរដោយមិនកំណត់ពេលដូចគ្នាដែរ។
មេធាវីការពារក្ដី លោក សំ ចំរើន ប្រាប់វិទ្យុអាស៊ីសេរីថា ការសាកសួរកូនក្ដីរបស់លោកម្នាក់ៗដល់ទៅ២ដងនេះ ទំនងជាចៅក្រមចង់ពិនិត្យមើលរឿងក្ដីនេះ ឲ្យបានល្អិតល្អន់ ឬអាចស្វែងរកភស្តុតាងដាក់បន្ទុកកូនក្ដីលោក។
មេធាវីរូបនេះ រំពឹងថា តុលាការនឹងស៊ើបអង្កេតដោយឯករាជ្យ ហើយពិនិត្យមើលសំណុំរឿងនេះដោយយកចិត្តទុកដាក់ខ្ពស់ ដើម្បីផ្ដល់យុត្តិធម៌ដល់អ្នកជាប់ឃុំទាំង៨នាក់ ដែលមិនបានប្រព្រឹត្តកំហុសដូចការចោទប្រកាន់៖ «ខ្ញុំសំណូមពរឲ្យយកចិត្តទុកដាក់ក្នុងនីតិវិធីនេះ ឲ្យបានឆាប់រហ័ស នេះជារឿងក្ដីមួយដែលឃើញជាទូទៅហើយថា អ្នកទាងនោះគឺមិនអ្វីដូចបទចោទប្រកាន់ទេ។ ប្រសិនបើវាមានការភ័ន្តច្រឡំតាំងពីដំបូងទីអី យកចិត្តទុកដាក់ក្នុងចំណាត់ហ្នឹងឲ្យបានយុត្តិធម៌ និងឆាប់រហ័សសម្រាប់ពួកគាត់ » ។
ទោះបីជាតុលាការបានលើកពេលសាកសួរយ៉ាងណាក្ដី ក៏នៅខាងក្រៅតុលាការឯណោះវិញ ក្រុមកម្មករណាហ្គាវើលដ៍ជាច្រើននាក់បានប្រមូលផ្ដុំគ្នា ដើម្បីលើកទឹកចិត្តដល់តំណាងរបស់ពួកគាត់។
កម្លាំងសមត្ថកិច្ចស្លៀកពាក់ស៊ីវិល និងឯកសណ្ឋាន អមដោយកងសន្តិសុខខណ្ឌ ៧ មករាជាច្រើននាក់ បានដេញក្រុមកម្មករណាហ្គាវើលដ៍ជាស្ត្រីប្រមាណ ១០នាក់ មិនឲ្យឈរនៅទីធ្លាម្ខាងផ្លូវទល់មុខតុលាការនោះទេ។
កម្មករម្នាក់ក្នុងចំណោមនោះ គឺកញ្ញា ម៉ែន សុធីវឌ្ឍនៈ ឲ្យដឹងថា អាជ្ញាធរបានដេញពួកគាត់ទៅឆ្ងាយផុតពីមុខតុលាការ រហូតដល់អាងស្តុកទឹកអូឡាំពិក ហើយប្រើពាក្យសម្ដីមិនសមរម្យ ថែមទៀត។
កញ្ញាចាត់ទុកទង្វើរបស់អាជ្ញាធរនេះថា ជារឿងហួសហេតុ និងមិនអាចទទួលយកបានឡើយ ព្រោះទីតាំងដែលកម្មករឈរនោះ គឺជាកន្លែងសាធារណៈ៖ «ខ្ញុំគិតថាជាការរឹតត្បិតសិទ្ធិសេរីភាពរបស់ពួកខ្ញុំមែនទែន។ ហេតុអ្វីក៏ពួកខ្ញុំគ្រាន់តែឈរនៅហ្នឹង អត់មានភាពរញ៉េរញ៉ៃអីសោះ គ្រាន់តែចាំមើលបងប្អូនយើងដែលគាត់ជាប់ឃុំ ឡើងមកកាត់ក្ដីសោះ ហេតុអ្វីក៏ត្រូវគាត់ដេញអ៊ីចឹង ហើយក្នុងនោះ មានគេអ្នកដទៃដែរ ម៉េចក៏គាត់អត់ដេញ ហេតុអ្វីក៏ដេញតែបុគ្គលិកណាហ្គាវើលដ៍អ៊ីចឹង ! ។ ហេតុអីក៏អាជ្ញាធរតាមពួកខ្ញុំ តាមរឹតត្បិតសេរីភាពពួកខ្ញុំ។ ទៅកន្លែងណាក៏ដោយ តែងតែមានអាជ្ញាធរមករារាំងជានិច្ច។ ពួកខ្ញុំមានវិវាទជាមួយក្រុមហ៊ុនសោះ ហេតុអ្វីក៏រឹតត្បិតសេរីភាពសូម្បីតែការបញ្ចេញមតិ ឬអ្វីផ្សេងៗចឹង» ។
វិទ្យុអាស៊ីសេរីមិនអាចសុំឆ្លើយតបរឿងនេះ ពីអ្នកនាំពាក្យតុលាការក្រុងភ្នំពេញ លោក អ៊ី រិន្ទ បានទេ នៅថ្ងៃទី២១ មករា ដោយសារហៅទូរស័ព្ទចូលតែពុំមានអ្នកទទួល។
ទាក់ទងនឹងរឿងនេះ អង្គការសង្គមស៊ីវិលផ្នែកសិទ្ធិមនុស្សនិងសិទ្ធិការងារ ស្នើឲ្យបញ្ឈប់ការប្រើប្រាស់ប្រព័ន្ធតុលាការ ដើម្បីបំបិទសំឡេងរបស់សហជីពឯករាជ្យ នៅក្នុងក្រុមហ៊ុនណាហ្គាវើលដ៍តទៅទៀត។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា ដំណោះស្រាយដ៏ល្អបំផុតក្នុងរឿងនេះ ទាល់តែមានការដោះលែងតំណាងសហជីព ៨នាក់នោះ ហើយឲ្យពួកគាត់ចូលតុចរចាដោះស្រាយជាមួយក្រុមហ៊ុន និងក្រសួងការងារ ដើម្បីបិទបញ្ចប់វិវាទការងាររ៉ាំរ៉ៃមួយនេះ៖ «យើងជាអង្គការសង្គមស៊ីវិលធ្វើការផ្នែកសិទ្ធិមនុស្សនិងសិទ្ធិការងារ នៅតែទាមទារឲ្យទម្លាក់ចោលបទចោទ អ្នកទាំង ៨នាក់ដោយឥតលក្ខខណ្ឌឲ្យបានឆាប់ ដើម្បីឲ្យពួកគាត់ស្ថិតក្នុងការចូលរួមជាប្រតិភូតំណាងរបស់បុគ្គលិកនៅក្នុងការចរចាបញ្ចប់វិវាទការងារនៅក្រុមហ៊ុនណាហ្គាវើលដ៍ហ្នឹង» ។
គិតត្រឹមថ្ងៃទី២១ មករា ថ្នាក់ដឹកនាំនិងសមាជិកសហជីពនៃកម្មករណាហ្គាវើលដ៍ ៨នាក់ កំពុងជាប់ឃុំក្នុងពន្ធនាគារព្រៃសអស់រយៈពេល ២២ថ្ងៃហើយ។ ចំណែកក្រុមកម្មករណាហ្គាវើដល៍បន្តធ្វើកូដកម្មដដែល រហូតមានការដោះលែងតំណាងពួកគេត្រឡប់មកវិញ ហើយក្រុមហ៊ុនត្រូវទទួលយកបុគ្គលិកជាង ៣រយកាន់ចូលធ្វើការវិញ ទើបពួកគេរំសាយការតវ៉ា។
បើទោះបីជាមានការអំពាវនាវពីក្រសួងការងារឲ្យក្រុមកម្មករណាហ្គាវើលដ៍ទៅផ្ទៀងផ្ទាត់ទទួលយកប្រាក់សំណងត្រឹមត្រូវតាមច្បាប់ក៏ដោយ ក៏ក្រុមកម្មករបដិសេធមិនទទួលយកសំណងនោះទេ ប្រសិនបើគ្មានវត្តមានតំណាងសហជីព ៨នាក់ចូលតុចរចាដោះស្រាយវិវាទជំនួសពួកគេ។
អង្គការជាតិនិងអន្តរជាតិផ្នែកសិទ្ធិមនុស្ស និងសិទ្ធិការងារ ទាមទារឲ្យរដ្ឋាភិបាលត្រូវតែដោះលែងតំណាងសហជីព៨នាក់នោះ ជាបន្ទាន់និងគ្មានលក្ខខណ្ឌ ហើយក្រសួងការងារបន្តដោះស្រាយវិវាទនេះដោយឈរលើគោលការណ៍ច្បាប់ និងភាពស្មោះត្រង់ ដើម្បីបញ្ចប់វិវាទការងាររវាងកម្មករនិយោជិត និងថៅកែក្រុមហ៊ុនណាហ្គាវើលដ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។