បុរសម្នាក់នៅខណ្ឌទួលគោក ក្រុងភ្នំពេញ ឈ្មោះ ដារ៉ា រ័ត្នសុគន្ធ អាយុ ២៧ឆ្នាំ ត្រូវសារព័ត៌មានហ្រ្វេសញូចុះផ្សាយកាលពីថ្ងៃទី១៨ ខែមេសាថា តុលាការបានកាត់ទោសគាត់ភ្លាមៗ ឲ្យជាប់ពន្ធនាគារមួយឆ្នាំពីបទប្រឆាំងនឹងការអនុវត្តការងារសាធារណៈ ក្រោយពីបុរសរូបនេះរងការចោទប្រកាន់ថា បានយកកូនកាំបិទកាត់ខ្សែរបាំង ដែលអាជ្ញាធរឃាំងការធ្វើដំណើររបស់ពលរដ្ឋក្នុងមូលដ្ឋានរបស់គាត់។
អាស៊ីសេរីមិនទាន់អាចសុំការបំភ្លឺពីអគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន ឬតុលាការជុំវិញរឿងនេះបាននៅឡើយទេ មកដល់ត្រឹមម៉ោងផ្សាយនេះ។
នៅថ្ងៃម្សិលមិញនេះដែរ អាជ្ញាធរក្រុងភ្នំពេញ បានចាប់ផ្តើមពិន័យធ្ងន់កដល់អ្នកដែលល្មើសបម្រាមពេលបិទខ្ទប់ទីក្រុង។ នៅក្នុងសេចក្តីសម្រេចដែលមានកម្រាស់បីទំព័រ និងមាន ៧ ប្រការ ចេញកាលពីថ្ងៃទី១៨ ខែមេសា និងចូលជាធរមានភ្លាម អាជ្ញាធរក្រុងនឹងពិន័យបុគ្គលទាំងឡាយណា ដែលមិនគោរពវិធានការរដ្ឋាភិបាល និងវិធានការរដ្ឋបាលក្រុងភ្នំពេញ ដែលបានដាក់ចេញកន្លងមក ជុំវិញការបិទខ្ទប់ទីក្រុងភ្នំពេញ និងក្រុងតាខ្មៅនោះ។
អ្នកដែលបំពានវិធានការទាំងនេះគឺ នឹងត្រូវពិន័យជាប្រាក់ចាប់ពី ២លាន៥សែនរៀល (ឬ ៦២៥ដុល្លារ) ដល់ ៥លានរៀល (ឬ ១.២៥០ដុល្លារ)។ បម្រាមទាំងនោះរួមមាន ដូចជា រឹតត្បិតការធ្វើដំណើរចេញពីផ្ទះ ហាមការជួបជុំ ឬប្រមូលផ្តុំ ហាមឃាត់សកម្មភាពការងារ មុខរបរ ឬអាជីវកម្ម ហាមឃាត់ការធ្វើដំណើរចេញចូលតំបន់ផ្ទុះជំងឺកូវីដ-១៩ និងបម្រាមគោចរ ដែលមិនអនុញ្ញាតឲ្យធ្វើដំណើរពីម៉ោង ៨យប់ ដល់ម៉ោង ៥ភ្លឺជាដើម។ សាលាក្រុងទុកពេលឲ្យ ៣០ថ្ងៃ សម្រាប់បង់ប្រាក់ពិន័យនេះ។ បើហួសរយៈពេលនេះ ជនប្រព្រឹត្តមិនបានបង់ប្រាក់តាមកាលកំណត់ នគរបាលយុត្តិធម៌ ត្រូវកសាងសំណុំរឿងបញ្ជូនទៅតុលាការ។
សេចក្តីសម្រេចបន្ថែមថា ក្នុងករណីដែលអំពើល្មើសនេះ ធ្វើឲ្យឆ្លងជំងឺកូវីដ-១៩ ដល់អ្នកដទៃ ឬបង្កឲ្យមានបញ្ហាសុខភាពសាធារណៈ បុគ្គលល្មើសត្រូវផ្តន្ទាទោសដាក់ពន្ធនាគារថែមទៀតផង។
ទោះជាយ៉ាងនេះក្ដី អាជ្ញាធរមានសមត្ថកិច្ច ហាក់ដូចជាកំពុងបន្ថែមពិន័យលើប្រជាពលរដ្ឋ ដែលកំពុងទាល់ច្រក និងស្វះស្វែងរកចំណីអាហារ និងបំពេញកិច្ចការបន្ទាន់ផ្សេងទៀត ក្នុងស្ថានភាពដែលរដ្ឋាភិបាលប្រកាសបិទទីក្រុងទាំងស្រុង យ៉ាងតក់ក្រហល់បែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។