ពលរដ្ឋតំបន់រុនតាឯកជាង ២០០០នាក់គ្រោងនាំគ្នាតវ៉ាជាថ្មី បើរដ្ឋាភិបាល មិនផ្ដល់ប្រាក់ដែលកាត់ពីប័ណ្ណសមធម៌ដល់ពួកគេវិញ។ មន្ត្រីរដ្ឋបាលរុនតាឯក និងសង្គមស៊ីវិលយល់ស្របនឹងការទាមទាររបស់ប្រជាពលរដ្ឋ។
ប្រជាពលរដ្ឋរស់នៅតំបន់រុនតាឯកគ្រោងនឹងនាំគ្នាតវ៉ាជាថ្មីនៅសប្ដាហ៍ក្រោយ បើរដ្ឋាភិបាលលោក ហ៊ុន ម៉ាណែត នៅតែមិនផ្ដល់ប្រាក់ដែលកាត់ពីប័ណ្ណសមធម៌ ឱ្យពួកគាត់ជាង ៦ពាន់គ្រួសារវិញទេ។
ប្រជាពលរដ្ឋតាំងចិត្តបន្តការតវ៉ាបន្ទាប់ពីអាជ្ញាធរតំបន់រុនតាឯក និងប្រជាពលរដ្ឋ រងគ្រោះបានជួបជជែកគ្នា ប៉ុន្តែអាជ្ញាធរនៅតែមិនបានដោះស្រាយជូនពលរដ្ឋដូចការសន្យារបស់អតីតនាយករដ្ឋមន្ត្រីកន្លងមក។
នៅថ្ងៃទី២៧ មករា ប្រជាពលរដ្ឋរស់នៅតំបន់រុនតាឯក ជាង ២០០០នាក់ បានជួបជាមួយរដ្ឋបាលខេត្តសៀមរាបដូចជា មន្ត្រីសង្គមកិច្ច ព្រមទាំងអភិបាលស្រុក បន្ទាយស្រីលោក រិន ឡូត រយៈពេលកន្លះម៉ោងនៅផ្សាររុនតាឯកថ្មី ដើម្បីស្វែងរកដំណោះស្រាយរឿងរដ្ឋាភិបាលកាត់ប្រាក់ប័ណ្ណសមធម៌ពីពួកគាត់ចំនួនពី ២០ ទៅ ៣០ ម៉ឺនរៀលក្នុងមួយគ្រួសារ ឬកាត់យ៉ាងតិចពាក់កណ្ដាល ក្រោមហេតុផលថា យកប្រាក់នោះទៅជួយអ្នករៀនជំនាញផ្សេងៗ ប៉ុន្តែជំនួបដ៏ខ្លី នេះ ពុំមានលទ្ធផលល្អទេ។
ពលរដ្ឋរស់នៅរុនតាឯកលោកស្រី ណែម នារី ប្រាប់វិទ្យុអាស៊ីសេរីនៅថ្ងៃទី២៧ មករា ថា លោកស្រីមិនសុខចិត្តដាច់ខាត ពីព្រោះឧបត្ថម្ភមិនទាន់បាន ២ឆ្នាំផង មានការប្រែប្រួលបែបនេះធ្វើឱ្យប្រជាពលរដ្ឋនៅរុនតាឯករងគ្រោះធ្ងន់ធ្ងរ។
លោកស្រី ណែម នារី៖ «បើបងប្អូនដឹងថា ការចុះឈ្មោះរៀនជំនាញ ហើយមានការកាត់លុយប័ណ្ណសមធម៌ក៏គាត់អត់រៀនដែរដោយសារអី កាត់លុយគាត់ដែរ។ ចុះឥឡូវលុយគាត់បាន ៦០ម៉ឺនរៀល គាត់នៅសល់១២ ម៉ឺនរៀលដល់ពេលជំនាញ ដែលគាត់ទៅបាន ២៨ ម៉ឺនរៀល សរុបទៅលុយហ្នឹងតែ៤០ ម៉ឺនរៀល ចុះ២០ម៉ឺនរៀលទៀតនៅទីណា»។
ពលរដ្ឋម្នាក់ទៀតសុំមិនបញ្ចេញឈ្មោះនិយាយថា ការកាត់ប្រាក់ឧបត្ថម្ភនេះមិនស័ក្ដិសមទេ។
លោកស្រីថា ប្រជាពលរដ្ឋនៅរុនតាឯកចំនួន ៩៩ភាគរយ ហើយដែលប្រឈមទាំងបញ្ហាជីវភាពប្រចាំថ្ងៃ និងជំពាក់បំណុលហើយបំណុលនេះកាន់តែកើនវ័ណ្ឌក ដោយសារការផ្លាស់ទៅរស់នៅតំបន់រុនតាឯកពួកគាត់ត្រូវខ្ចីបំណុលបន្ថែមទៀត ដើម្បីសាងសង់ផ្ទះ។
ពលរដ្ឋម្នាក់ទៀតសុំមិនបញ្ចេញឈ្មោះ៖ «ព្រោះយើងមកនេះអត់មានចំណូលអី ហើយយើងខ្ចីលុយគេយកមកសាងសង់ផ្ទះ។ អ៊ីចឹងបំណុលកើន បំណុលកើនពីកន្លែងចាស់ អ៊ីចឹងគាត់បានលុយហ្នឹងឯង ដើម្បីមកដោះស្រាយបញ្ហាជីវភាព និងដោះបំណុលឱ្យគេ ព្រោះយកស្ម័គ្រចិត្តខាងរដ្ឋាភិបាល គឺគាត់ឱ្យតែដី ហើយហ្នឹងប័ណ្ណក្រីក្រទេ គាត់អត់បានឱ្យលំនៅឋានដល់ប្រជាពលរដ្ឋផង។ អ៊ីចឹងប្រជាពលរដ្ឋ គឺគាត់ប្រើវិធីសាស្ត្រ យកប័ណ្ណក្រីក្រទៅដាក់បញ្ចាំង ដើម្បីទទួលបានលុយមកសាងសង់ផ្ទះ អ៊ីចឹងបើ ពួកគាត់កាត់អស់អ៊ីចឹងគ្នាបានលុយណាឡើងឱ្យអត្រាការប្រាក់ប្រចាំខែរបស់គេនោះ»។
ពលរដ្ឋរស់នៅរុនតាឯកលោក មុត ខុន ប្រាប់វិទ្យុអាស៊ីសេរី នៅថ្ងៃទី២៧ មករា ថា ពួកគាត់គ្រោងនឹងនាំគ្នាប្រមូលផ្ដុំជាថ្មីទៀត ដែលអាចនឹងឡើងទៅតវ៉ាដល់ខេត្ត ពីព្រោះសព្វថ្ងៃ ពួកគាត់រស់នៅតំបន់រុនតាឯករកចំណូលមិនបាន ដូច្នេះបើរដ្ឋាភិបាលកាត់ប្រាក់ពីប័ណ្ណសមធម៌ដូចផ្ដាច់ជីវិតពួកគាត់ទាំងអស់គ្នាដែរ។
លោក មុត ខុន៖ «ឥឡូវនេះគឺការខ្វះខាតច្រើនហើយណាមួយវាអត់មានការងារធ្វើ ប្រជាពលរដ្ឋមកដល់ខ្លះខ្វះខាតរកផ្ទះនៅមិនបានផង ខ្លះក៏បានផ្ទះ ដំណាំដាំដុះក៏អត់មាន ហើយណាកន្លែងនេះ ក៏អត់មានអីរកអត់មានអីធ្វើអ៊ីចឹង អត់មានលុយចូលប្រចាំថ្ងៃអត់មាន ពឹងលើប័ណ្ណសមធម៌ហ្នឹងហើយ ដល់គាត់ផ្ដាច់អ៊ីចឹងទៀត បងប្អូនប្រជាពលរដ្ឋខ្លះអត់ៗតែមែនទែន មិនមែនអត់ធម្មតាទេគឺអត់តែមែនទែន»។
វិទ្យុអាស៊ីសេរីមិនអាចសុំការអត្ថាធិប្បាយបញ្ហានេះ ពីអភិបាលខេត្តសៀមរាប លោក ប្រាក់ សោភ័ណ និងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា បានទេ នៅថ្ងៃទី២៧ មករា ដោយទូរស័ព្ទចូលគ្មានអ្នកទទួល។
យ៉ាងណាមន្ត្រីឃុំរុនតាឯកម្នាក់ ដែលសុំមិនបញ្ចេញឈ្មោះ និងសំឡេងប្រាប់វិទ្យុអាស៊ីសេរីនៅថ្ងៃទី ២៧ មករា ថា លោកក៏យល់ស្របនឹងការតវ៉ារបស់ប្រជាពលរដ្ឋដែរ ពីព្រោះចំណាត់ការចុងក្រោយនេះរបស់អាជ្ញាធរផ្ទុយពីការប្រកាសសន្យារបស់អតីតនាយករដ្ឋមន្ត្រីលោក ហ៊ុន សែន។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត យល់ថា ការប្រមូលផ្ដុំរបស់ប្រជាពលរដ្ឋ ដើម្បីទាមទារដំណោះស្រាយ គឺជាភាពត្រឹមត្រូវ និងស្របច្បាប់ហើយរដ្ឋាភិបាលមានតួនាទី គិតគួរដោះស្រាយដោយមានតម្លាភាព។ លោកថា បើមានការសម្រេចថ្មីណាមួយ រដ្ឋាភិបាលគួរណាស់ប្រាប់ប្រជាពលរដ្ឋឱ្យដឹងជាមុនថា តើពលរដ្ឋយល់ ព្រម ឬអត់។
លោក វណ្ណ សុផាត៖ «ស្រាប់តែនៅស្ងាត់ៗ ថា ត្រូវកាត់យកទៅឱ្យគ្រូ ដើម្បីបង្រៀនវិជ្ជាជីវៈបង្រៀន ខាងផ្នែកបច្ចេកទេស ស្អីណាទេ អាហ្នឹងវាអត់សមហេតុសមផលសោះ ហើយប័ណ្ណសមធម៌អត់ត្រូវមានលក្ខខណ្ឌអីថា ត្រូវដកពីហ្នឹងទៅចំណាយ ក្នុងកម្មវិធីអីផ្សេងទៀតទេ បើតាមខ្ញុំដឹងប័ណ្ណសមធម៌គឺប័ណ្ណសមធម៌ហើយត្រូវផ្ដល់ជូនប្រជាពលរដ្ឋរយៈពេលប៉ុន្មានឆ្នាំអនុវត្តឱ្យគ្រប់លក្ខខណ្ឌរបស់គាត់»។
ពលរដ្ឋអះអាងថា អាជ្ញាធរសុំពេលមួយសប្ដាហ៍ដើម្បីឆ្លើយតបទៅនឹងការទាមទាររបស់ប្រជាពលរដ្ឋ ប៉ុន្តែពលរដ្ឋមិនព្រមហើយឱ្យអាជ្ញាធរឆ្លើយតបយ៉ាងយូរបំផុត ត្រឹមថ្ងៃទី២៩ មករា បើមិនដូច្នេះទេ ពួកគាត់នឹងឡើងទៅតវ៉ាដល់អាជ្ញាធរខេត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។