មន្ត្រីសង្គមស៊ីវិល និងសាធារណជន ស្វាគមន៍សកម្មភាពរៀបចំហេដ្ឋារចនាសម្ព័ន្ធនានារបស់រដ្ឋបាលខេត្តព្រះសីហនុ ត្រៀមសម្រាប់បុណ្យសមុទ្រជុំទី២ ដែលខេត្តនេះទទួលធ្វើជាម្ចាស់ផ្ទះ។ អភិបាលខេត្តព្រះសីហនុ ប្រកាសឲ្យប្រជាពលរដ្ឋនៅទូទាំងប្រទេស ឲ្យចូលមកទស្សនាពិធីបុណ្យដែលនឹងចាប់ផ្ដើមចាប់ពីថ្ងៃទី២៣ ដល់ថ្ងៃទី២៥ ខែធ្នូ ឲ្យបានច្រើនកុះករ។
មន្ត្រីសង្គមស៊ីវិល និងសាធារណជន បង្ហាញអារម្មណ៍សប្បាយរីករាយនៅគ្រាពួកគេសង្កេតឃើញថា បច្ចុប្បន្ននាមូលដ្ឋានខេត្តព្រះសីហនុ បានកសាងរីកចម្រើនស្ទើរគ្រប់ហេដ្ឋារចនាសម្ព័ន្ធនានា មានដូចជា ផ្លូវថ្នល់ ប្រព័ន្ធលូបង្ហូរទឹក សួនច្បារ និងបំពាក់ភ្លើងបំភ្លឺស្ទើរគ្រប់ច្រកល្ហក ជាពិសេសនៅពេលរាត្រី បានបង្ហាញសោភណភាព ព្រមទាំងមានភ្លើងបំភ្លឺស្រស់បំព្រង។
អ្នកសម្របសម្រួលអង្គការលីកាដូ (LICADHO)ខេត្តព្រះសីហនុ លោក ប៊ួន ណារិទ្ធិ ទទួលស្គាល់ថា មូលដ្ឋាននេះពិតជាមានការអភិវឌ្ឍស្ទើរគ្រប់ហេដ្ឋារចនាសម្ព័ន្ធពិតមែន ជាពិសេសការរៀបចំស្វាគមន៍ពិធីបុណ្យសមុទ្រជុំទី២ របស់រដ្ឋបាលខេត្តព្រះសីហនុ ដែលនឹងចូលមកដល់នៅថ្ងៃទី២៣ ខែធ្នូ។
អ្នកឃ្លាំមើលសង្គមរូបនេះបន្ថែមថា បច្ចុប្បន្ន នៅពេលរាត្រីនាខេត្តព្រះសីហនុ គឺខុសប្លែកពីពេលមុន ដោយពេលនេះរដ្ឋបាលខេត្តបានស្ថាបនាសួនច្បារ និងបំពាក់ភ្លើងបំភ្លឺស្ទើរពាសពេញផ្លូវ ហើយមានប្រជាពលរដ្ឋចេញពីផ្ទះមកកម្សាន្តនៅពេលរាត្រីមានចំនួនច្រើនកុះករ៖ « ផ្លូវបានពង្រីកទៅឆ្នេរឯករាជ្យ ពង្រីកផ្លូវធំនៅតាមផ្លូវឯករាជ្យ តាំងអំពូលភ្លើងបំភ្លឺនៅតាមដងគោមនានា នៅតាមផ្លូវមានស្ថាបនារូបសំណាកនានា មានរូបសំណាកត្រីដាវ និងមានសង់ខ្លោងទ្វារនៅតាមឆ្នេរសមុទ្រ ក្នុងនោះរដ្ឋបាលខេត្តក៏មានកម្មវិធីធ្វើសម្អាតអនាម័យនៅតាមឆ្នេរសមុទ្រ មានដាក់ពង្រាយធុងសំរាម និងមានចាត់តាំងឲ្យក្រុមការងារដាំកូនឈើ ធ្វើសួនច្បារ ដើម្បីលំអនៅតាមផ្លូវសាធារណៈ ជាដើម »។
អភិបាលខេត្តព្រះសីហនុ លោក យន្ត មីន ផ្តល់សម្ភាសថា ពិធីបុណ្យសមុទ្រឆ្នាំនេះ រដ្ឋបាលខេត្តបានត្រៀមលក្ខណៈជាស្រេចទាំងបញ្ហាការពារសន្តិសុខ និងបានស្ថាបនាគ្រប់ហេដ្ឋារចនាសម្ព័ន្ធនានា មានបំពាក់ភ្លើងបំភ្លឺ ស្ថាបនាសួនច្បារ និងស្ថាបនាពង្រីកផ្លូវធ្វើដំណើរឲ្យបានទូលំទូលាយ ជាដើម។
លោក យន្ត មីន អំពាវនាវដល់ភ្ញៀវទេសចរជាតិ និងអន្តរជាតិ ពិសេសប្រជាពលរដ្ឋខ្មែរមកពីគ្រប់ទិសទីឲ្យចូលរួមបុណ្យសមុទ្រដែលខេត្តព្រះសីហនុ រៀបចំជាម្ចាស់ផ្ទះឲ្យបានច្រើនកុះករ។ ជាងនេះ លោកបានស្នើដល់ប្រជាពលរដ្ឋរស់នៅខេត្តព្រះសីហនុ និងប្រតិបត្តិករទេសចរទាំងអស់ ឲ្យចូលរួមសហការគាំទ្រពិធីបុណ្យសមុទ្រជាមួយអាជ្ញាធរខេត្ត និងត្រូវកំណត់តម្លៃសេវាបម្រើជូនភ្ញៀវឲ្យបានសមរម្យ៖ « អំពាវនាវដល់បងប្អូនទាំងអស់ដែលមានឱកាស ឬពេលវេលាសម្រាកពេលចុងឆ្នាំនេះ ព្រោះនៅថ្ងៃទី២៣ ដល់ថ្ងៃទី២៥ ខែធ្នូ បើនៅអឺរ៉ុប គេចាត់ទុកជាថ្ងៃបុណ្យណូអែលរបស់ប្រទេសគេ ប៉ុន្តែដោយឡែកនៅប្រទេសកម្ពុជា យើងក៏មានពលរដ្ឋខ្លះ ក៏គេអាចមានពេលសម្រាកចុងឆ្នាំដែរ។ ដូច្នេះសូមអំពាវនាវឲ្យបងប្អូនប្រជាពលរដ្ឋយើង ត្រូវយកឱកាសនេះមកលេងកម្សាន្តខេត្តព្រះសីហនុ ពេលបុណ្យសមុទ្រ គឺមិនខុសបំណងនោះទេ។ បន្ទាប់ពីពិធីបុណ្យសមុទ្ររួចរាល់នៅថ្ងៃទី២៣ ដល់ថ្ងៃទី២៥ ខែធ្នូ រួចហើយ រហូតដល់ថ្ងៃចុងឆ្នាំនៅខេត្តព្រះសីហនុ គឺមានកម្មវិធីបុណ្យសប្បាយរីករាយជាប់គ្នារដឹកមិនដាច់ទេ។ អ៊ីចឹងសូមអំពាវនាវដល់បងប្អូនដែលមានពេលវេលាចុងឆ្នាំ សូមជ្រើសយកគោលដៅខេត្តព្រះសីហនុ ដើម្បីធ្វើដំណើរកម្សាន្ត គឺមិនខុសបំណងទេ សូមអញ្ជើញបងប្អូនចូលរួមឲ្យបានច្រើនកុះករ »។
អភិបាលខេត្តព្រះសីហនុ លោក យន្ត មីន ឲ្យដឹងថា រាល់ថ្ងៃនេះមិនថាយប់ថ្ងៃនោះទេ គឺរដ្ឋបាលខេត្តនេះកំពុងមមាញឹកការងារស្ថាបនា និងអភិវឌ្ឍមូលដ្ឋាន ពិសេសតំបន់ឆ្នេរសមុទ្រឲ្យមានសោភណភាព ដើម្បីត្រៀមរៀបចំស្វាគមន៍ពិធីបុណ្យសមុទ្រជុំទី២ ដែលខេត្តនេះនឹងទទួលធ្វើជាម្ចាស់ផ្ទះនៅឆ្នាំ២០១៦ នេះ។
អ្នកឃ្លាំមើលសង្គម និងវិស័យឯកជន គាំទ្រសកម្មភាពអភិវឌ្ឍន៍មូលដ្ឋាន និងតំបន់ឆ្នេរសមុទ្ររបស់រដ្ឋបាលខេត្តព្រះសីហនុ ដែលបានត្រៀមលក្ខណៈទទួលអបអរពិធីបុណ្យសមុទ្រឆ្នាំនេះឲ្យទទួលបានភាពសប្បាយរីករាយ។
អភិបាលខេត្តព្រះសីហនុ លោក យន្ត មីន ប្រកាសស្វាគមន៍ភ្ញៀវទេសចរជាតិ និងអន្តរជាតិ ជាពិសេសប្រជាពលរដ្ឋខ្មែរមកពីគ្រប់ទិសទីទូទាំងប្រទេសកម្ពុជា អញ្ជើញមកចូលរួមពិធីបុណ្យសមុទ្រឆ្នាំនេះឲ្យបានច្រើនកុះករ ដោយសមត្ថកិច្ចជំនាញមកពីគ្រប់ស្ថាប័នពាក់ព័ន្ធ បានត្រៀមកម្លាំងការពារសុវត្ថិភាពជូនភ្ញៀវទេសចរដោយការទទួលខុសត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។