អាជ្ញាធរខេត្តនៅជាប់ព្រំដែនវៀតណាម បានបង្កើនការរឹតបន្តឹងតាមច្រកចេញចូលទាំងអស់ ដើម្បីបង្ការជំងឺកូវីដ-១៩ (Covid-19) ក្នុងឱកាសពិធីបុណ្យចូលឆ្នាំចិន វៀតណាមខាងមុខនេះ តាមការណែនាំរបស់ប្រមុខរដ្ឋាភិបាល លោក ហ៊ុន សែន។ ទោះជាយ៉ាងណា ពលរដ្ឋខ្លះ ឲ្យដឹងថា ជនជាតិខ្មែរមិនអាចឆ្លងដែនទៅវៀតណាមបានទេ តែជនជាតិវៀតណាម នៅតែអាចឆ្លងចូលកម្ពុជាបាន។
អាជ្ញាធរខេត្តមួយចំនួននៅជាប់ព្រំដែនប្រទេសវៀតណាម បានបន្ថែមគោលដៅប្រចាំការ និងយាមកាមតឹងរ៉ឹង ដើម្បីទប់ស្កាត់ការលួចឆ្លងដែនខុសច្បាប់រវាងពលរដ្ឋប្រទេសទាំងពីរ។ វិធានការថ្មីនេះ គឺជាការអនុវត្តតាមបញ្ជារបស់លោកនាយករដ្ឋមន្ត្រី ហ៊ុន សែន ដើម្បីបង្ការការរីករាលដាលជំងឺកូវីដ-១៩ បន្ទាប់ពីប្រទេសវៀតណាមផ្ទុះរាលដាលជំងឺកូវីដ-១៩ ជាថ្មីម្តងទៀត។
អភិបាលខេត្តកណ្ដាល លោក គង់ សោភ័ណ្ឌ ប្រាប់ អាស៊ីសេរី ថា លោកបានដឹកនាំមន្ត្រី និងកងកម្លាំង ចុះត្រួតពិនិត្យមើលច្រកទ្វារអន្តរជាតិក្អមសំណ និងជ្រៃធំ កាលពីថ្ងៃទី០៥ កុម្ភៈ ដើម្បីរឹតបន្តឹង និងបង្ការការលួចឆ្លងដែនខុសច្បាប់ ក្នុងឱកាសពិធីបុណ្យចូលឆ្នាំចិន-វៀតណាម ខាងមុខនេះ។
លោក ឲ្យដឹងថា ខេត្តកណ្ដាល មានព្រំប្រទល់ជាប់ប្រទេសវៀតណាម ជិតសាមសិប (២៩,៥) គីឡូម៉ែត្រ មានច្រកទ្វារអន្តរជាតិ២ និងច្រកទ្វារតំបន់២ សុទ្ធតែបានរៀបចំទីតាំងសម្រាប់ធ្វើចត្តាឡីស័ក និងអាចដាក់មនុស្ស បានច្រើនរយនាក់។ អភិបាលខេត្តកណ្តាលរូបនេះ បន្តថា ស្ថានភាពបច្ចុប្បន្ន អាជ្ញាធរទប់ស្កាត់ ពលរដ្ឋទាំងពីរប្រទេសមិនឲ្យលួចឆ្លងដែន បានល្អប្រសើរ៖ « ច្រកតំបន់២ ឯច្រកអន្តរជាតិ២ទៀត វាបួន។ ឯក្រៅពីនេះ មិនមានដាច់ខាត ក្នុងការឆ្លងចេញចូល ដាច់ខាត គឺកម្លាំងយើងមាននៅតាមប៉ុស្តិ៍គោលដៅនីមួយៗ ក្នុងការត្រួតពិនិត្យ ដោយហ្មត់ចត់បំផុត គឺអត់មានឲ្យឆ្លងចេញចូលទេ ទាំងទំនិញ ក៏ដោយ ក៏អត់អាចឆ្លងដែរ គឺត្រូវចូលមកច្រកអន្តរជាតិ ឬក៏ច្រកតំបន់របស់យើង»។
ចំណែកអភិបាលរង និងជាអ្នកនាំពាក្យសាលាខេត្តត្បូងឃ្មុំ លោក កេង ប៊ុនណា វិញ លោកប្រាប់ អាស៊ីសេរី ថា អាជ្ញាធរ បានពង្រាយកងកម្លាំងតាមព្រំដែន ចំនួន២ ទៅ៣នាក់ ក្នុងមួយគីឡូម៉ែត្រ បណ្ដាក់តាមបណ្ដោយព្រំដែន ជាងមួយរយ (១៤៣) គីឡូម៉ែត្រ នៃខេត្តត្បូងឃ្មុំ ដើម្បីទប់ស្កាត់ការលួចឆ្លងដែនខុសច្បាប់។ លោកអះអាងថា ស្ថានភាពការឆ្លងដែននៅខេត្តត្បូងឃ្មុំ បច្ចុប្បន្ន មានភាពប្រក្រតី និងតម្រូវឲ្យពលរដ្ឋខ្មែរ និង វៀតណាម ធ្វើចត្តាឡីស័កទាំងអស់ នៅពេលឆ្លងដែន៖ « ប្រចាំការ ខ្លាចតាមលួចចូល យើងបារម្ភត្រង់ហ្នឹង។ ទើបអ៊ីចឹងហើយ បានយើងចាត់តាំងកម្លាំងទាំងសឹករង ក៏ដូចជា ប៉េអិម ដែលជាសមត្ថកិច្ច។ និយាយរួមទៅ មួយគីឡូដី គឺពីរ ទៅបី ប៉ុស្តិ៍។ យើងដាក់ហ្នឹង មិនមែនថាម្ដេចទេ គឺខ្លាចចេញចូលដោយខុសច្បាប់ ដូចបានរៀបរាប់ខាងលើអ៊ីចឹង »។
ទោះជាយ៉ាងណា ពលរដ្ឋនៅតាមតំបន់ព្រំដែន អះអាងថា ជនជាតិវៀតណាមខ្លះ នៅតែអាចឆ្លងដែនចូលមកប្រទេសកម្ពុជា ទិញលក់ផលិតផល និងរកស៊ីបាន ជាធម្មតា បើទោះជាកម្ពុជា និងវៀតណាម បានបិទព្រំដែន និងពង្រាយកងកម្លាំងការពារព្រំដែន យ៉ាងតឹងរ៉ឹងក៏ដោយ។
អ្នកស្រុកពញាក្រែក ខេត្តត្បូងឃ្មុំ ម្នាក់ លោក ជា វីរៈ ឲ្យដឹងថា ពលរដ្ឋកម្ពុជា មិនអាចឆ្លងទៅខាងវៀតណាមបានទេ តែពលរដ្ឋវៀតណាមខ្លះ នៅតែអាចឆ្លងចូលមករកស៊ី នៅខេត្តនេះបាន។ លោក ឲ្យដឹងថា មន្ត្រីខិលខូចខ្លះ បានលួចបើកដៃឲ្យជនជាតិវៀតណាម ចូលមករកស៊ីទិញអេតចាយ និង ចូលមកបើកឡានដឹកកសិផល ដល់ខេត្តត្បូងឃ្មុំ។ ចំណែកជនជាតិវៀតណាមខ្លះទៀត បានលួចឆ្លងដែន ចូលតាមច្រករបៀងមកកម្ពុជា។ អ្នកជាយដែនរូបនេះ បារម្ភពីការរីករាលដាលជំងឺកូវីដ-១៩ ដោយសារការទប់ស្កាត់មិនមានប្រសិទ្ធភាព៖« ឈ្មួញវៀតណាម ដែលមានមុខរបរ រកស៊ីនៅក្នុងស្រុកខ្មែរ អ៊ីចឹងទៅ មានអ្នកនាំផ្លូវ មានអ្នកសម្រួលឲ្យគេចូលមកតែម្ដង។ ទី២ ចូលលាក់លួច តាមច្រករបៀងផ្សេងៗ ហើយខ្ញុំជឿថា ការណ៍ដែលវៀតណាម ចូលមកខ្មែរយើងនេះ សុទ្ធតែមានបណ្ដាញ គេឲ្យចូលហើយ។ ខ្ញុំជឿថា ពួកមន្ត្រីព្រំដែនអ្វីគ្រប់គ្នា គឺសុទ្ធតែដឹង។ ពេលខ្លះ គាត់ជាអ្នកនាំចូល យួនឲ្យលុយបន្តិចបន្តួចទៅ បង្ហាញផ្លូវឲ្យគេទៀត ខ្ញុំបានឃើញជាក់ស្ដែង »។
ស្រដៀងគ្នានេះ សមាជិកក្រុមការងារ១០០រាត្រី លោក ឃីម សុខុម សង្កេតឃើញថា ក្នុងស្ថានភាពបិទព្រំដែនជិតមួយឆ្នាំមកនេះ ពលរដ្ឋវៀតណាម មានឱកាសឆ្លងដែនចូលកម្ពុជាបានច្រើន ជាងពលរដ្ឋខ្មែរ ដែលលួចឆ្លងដែនចូលប្រទេសវៀតណាម។ អ្នកឃ្លាំមើលព្រំដែនរូបនេះ ស្វាគមន៍ការរឹតបន្តឹង និងយាមល្បាត តាមព្រំដែន ក្នុងឱកាសបុណ្យចូលឆ្នាំចិន-វៀតណាម ខាងមុខនេះ តែលោក ស្នើសុំ ឲ្យអាជ្ញាធររឹតបន្តឹងឲ្យមានប្រសិទ្ធភាព ទើបអាចទប់ស្កាត់ការលួចឆ្លងដែនខុសច្បាប់បាន៖ « ជាធម្មតា ពួកគាត់ធ្លាប់តែទទួលបានអត្ថប្រយោជន៍ពីបណ្ដាជនអ្នកដែលចូលមករកស៊ីនៅហ្នឹងអ៊ីចឹងណា។ ជាក់ស្ដែង ខ្ញុំធ្លាប់ទទួលបានព័ត៌មានពីអ្នកភូមិ ពីក្មេងនៅក្បែរៗហ្នឹង គាត់ថា ជនជាតិវៀតណាម រៀបចូលមកអ៊ីចឹង គេមានស្រោមសំបុត្រ អ្នកលក់ដូរអ្វីអ៊ីចឹង គេហុចលុយ ហុចកាក់អ្វី ឲ្យពួកគាត់ អ្នកនៅយាមនៅហ្នឹងអ៊ីចឹងទៅ ចេញចូលវារាងធូរ រាងងាយស្រួល »។
កម្ពុជា និងវៀតណាម មានព្រំប្រទល់គោកជាប់គ្នា ជាងមួយពាន់ (១.២៧០) គីឡូម៉ែត្រ ចាប់ពីខេត្តរតនៈគិរី រហូតដល់ខេត្តកំពត។ រដ្ឋាភិបាលវៀតណាម បានបិទព្រំដែន ជាមួយកម្ពុជា ដោយមិនប្រាប់មុន កាលពីពាក់កណ្ដាលខែមីនា ឆ្នាំ២០២០ ដើម្បីទប់ស្កាត់ការរីករាលដាលជំងឺកូវីដ-១៩។ មួយថ្ងៃក្រោយមក គឺនៅថ្ងៃទី១៩ មីនា ឆ្នាំ២០២០ រដ្ឋាភិបាលកម្ពុជា ប្រកាសបិទព្រំដែនកម្ពុជា ជាមួយវៀតណាម និងរឹតបន្តឹងការចេញចូល តែរដ្ឋាភិបាលទាំងពីរ បានព្រមព្រៀងគ្នា ឲ្យមានការដឹកទំនិញចេញចូលទៅវិញទៅមករហូតដល់បច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។