មន្ត្រីជាន់ខ្ពស់នគរបាលជាតិអះអាងថា បានកសាងសំណុំរឿងបញ្ជូនជនសង្ស័យជនជាតិចិនចំនួន ១០នាក់រួមនឹងវត្ថុតាងមួយចំនួនទៅសាលាដំបូងរាជធានីភ្នំពេញនៅថ្ងៃទី២៧ ខែតុលា ពាក់ព័ន្ធការផលិតខ្សែវីដេអូអាសអាភាស។
អ្នកនាំពាក្យនៃអគ្គស្នងការដ្ឋាននគរបាលជាតិលោក ឆាយ គឹមខឿន ប្រាប់វិទ្យុអាស៊ីសេរីតាមបណ្ដាញសង្គមតេឡេក្រាម (Telegram) នៅល្ងាចថ្ងៃទី២៧ ខែតុលា ថា ក្នុងចំណោមជនសង្ស័យជិត ៥០នាក់ ក្រោយបញ្ចប់ការសាកសួរសមត្ថកិច្ចរកឃើញជនជាតិចិន ១០នាក់ ជាប់ពាក់ព័ន្ធនឹងការផលិតវីដេអូអាសអាភាស និងបានបញ្ជូនពួកគេទៅតុលាការ។ ទោះជាយ៉ាងណាក្ដី លោកមិនបានបញ្ជាក់ចំពោះការសម្រេចរបស់តុលាការលើជនត្រូវចោទទាំងនោះ និងនីតិវិធីឃុំខ្លួនពួកគេបែបណានោះទេ។
ទន្ទឹមនឹងការអះអាងនេះ មន្ត្រីប្រចាំការនៅនាយកដ្ឋានព្រហ្មទណ្ឌនៃក្រសួងមហាផ្ទៃថ្លែងសុំមិនបញ្ចេញឈ្មោះ និងតួនាទី ប្រាប់វិទ្យុអាស៊ីសេរី នៅរសៀលថ្ងៃទី២៧ ខែតុលា ថា បច្ចុប្បន្នក្រុមជនសង្ស័យទាំងនោះត្រូវបានឃុំខ្លួនបណ្ដោះអាសន្ននៅនាយកដ្ឋានព្រហ្មទណ្ឌនៃក្រសួងមហាផ្ទៃ ក្រោមការឃ្លាំមើលតឹងរ៉ឹងពីព្រះរាជអាជ្ញា និងមន្ត្រីប្រចាំការ។
សម្ដីប្រភពអនាមិក៖ «យើងកំពុងធ្វើនីតិវិធី ដើម្បីបញ្ជូនទៅអយ្យការ។ ខ្ញុំប្រចាំបញ្ជាខាងមន្ត្រីជំនាញគាត់កំពុងធ្វើកិច្ចការហ្នឹង ទុកឱ្យជំនាញគាត់សួរ[ជនសង្ស័យ]។ ខ្ញុំទទួលខាងព័ត៌មានទេ ទាល់សួរខាងជំនាញ។ ប្អូនអាចមកខាងនាយកដ្ឋានយើងខ្ញុំ ដើម្បីសាកសួរមន្ត្រីជំនាញ ប្អូនដឹងហើយ»។
កម្លាំងអគ្គស្នងការដ្ឋាននគរបាលជាតិ កាលពីយប់ថ្ងៃទី២៤ ខែតុលា បានឆ្មក់បង្ក្រាបទីតាំងផលិតវីដេអូអាសអាភាសមួយកន្លែងនៅអគារក្រុមហ៊ុនដឹកជញ្ជូនម្ហូបអាហារ វ៉ាយ៍ ណាវ (Wow Now) ក្នុងខណ្ឌបឹងកេងកង និងបានឃាត់ខ្លួនមនុស្ស ៤៥នាក់ ដែលរួមមានជនជាតិចិន វៀតណាម និងខ្មែរផងដែរ។ ប្រតិបត្តិការបង្ក្រាបនេះធ្វើឡើងក្រោមបទបញ្ជាពីរដ្ឋមន្ត្រីក្រសួងមហាផ្ទៃ លោក ស សុខា។ លោក ឆាយ គឹមខឿន ឱ្យដឹងថា ក្រោយបញ្ចប់ការសាកសួរកាលពីរសៀលថ្ងៃទី២៥ ខែតុលា សមត្ថកិច្ចបានដោះលែង មនុស្ស ៣៥នាក់ឱ្យវិលត្រឡប់ទៅផ្ទះវិញ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ករណីជនបរទេសផលិតខ្សែវីដេអូអាសអាភាសនេះ ជារឿងអាស្រូវ និងបានទាញវប្បធម៌ជាតិអាប់ឱនធ្ងន់ធ្ងរ។ លោកនៅតែទទូចដល់សមត្ថកិច្ច និងស្ថាប័នតុលាការ បន្តការស្រាវជ្រាវរកមុខសញ្ញាដែលពាក់ព័ន្ធផ្សេងទៀត និងផ្ដន្ទាទោសជនល្មើសឱ្យបានធ្ងន់ធ្ងរតាមច្បាប់ ដើម្បីព្រមានដល់ជនបរទេសទាំងឡាយណាដែលប៉ុនប៉ងប្រើប្រាស់ទឹកដីខ្មែរធ្វើអាជីវកម្មខុសច្បាប់ និងធ្វើឱ្យប៉ះពាល់ដល់កិត្តិយសនៃវប្បធម៌ជាតិ។
លោក យង់ គិមអេង៖ «ប៉ុន្តែ ប្រសិនជាយើងមិនបានចាត់វិធានការតឹងតែងសមរម្យ សមស្រប គឺបញ្ហាហ្នឹងនៅតែកើតឡើងទៀតវាប៉ះពាល់ ហើយវាបង្កភាពភ័យខ្លាចទៅដល់អ្នកទេសចរ ប្រជាពលរដ្ឋយើងដទៃទៀត វាជារឿងដែលត្រូវគិតពិចារណាចាត់វិធានការខាងផ្លូវច្បាប់ឱ្យខាងតែបាន»។
ច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ មាត្រា ១៥ ចែងថា ជនណាជួញដូរអ្នកដទៃជាអនីតិជនក្នុងគោលដៅស្វែងរកប្រយោជន៍ បំពានផ្លូវភេទ និងផលិតរូបភាពអាសអាភាស ជាដើម អាចប្រឈមត្រូវផ្ដន្ទាទោសរយៈពេល ២០ឆ្នាំ។
មន្ត្រីសង្គមស៊ីវិលព្រមានអំពីការកើនឡើងនូវវីដេអូអាសអាភាសក្នុងប្រព័ន្ធផ្សព្វផ្សាយថា វាជាផ្នែកមួយជំរុញឱ្យកើតមានបទល្មើសបែបឧក្រិដ្ឋក្នុងសង្គម និងធ្វើឱ្យប៉ះពាល់ដល់វប្បធម៌ជាតិធ្ងន់ធ្ងរ ប្រសិនបើអាជ្ញាធរគ្មានវិធានការទប់ស្កាត់ការចែកចាយវីដេអូ និងអ្នកផលិតវីដេអូអាសអាភាសនេះឱ្យមានប្រសិទ្ធភាពទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។